Read Библия- Yakut 2021 Иоанн 18 Bible Online

Иоанн 18 - Библия- Yakut 2021 bible

Иоанн 18

¹Иисус маны этэн баран, үөрэнээччилэрин кытта, Кедрон үрүйэтин уҥуордаан, саад баар сиригэр тиийэн киирбиттэрэ.

²Кини үөрэнээччилэриниин онно үгүстүк мустубут буолан, Кинини таҥнарыахтаах Иуда эмиэ ол сири билэрэ.

³Онон Иуда Рим буойуннарын этэрээтин, архиерейдар, фарисейдар ыыппыт харабылларын илдьэ, банаарданан, уоттанан, сэптэнэн-сэбиргэллэнэн онно тиийэн кэлбиттэрэ.

⁴Иисус, Кинини туох күүтэрин билэ-билэ, утары тахсан: «Кими көрдүүгүт?» — диэн ыйыппыта.

⁵«Иисус Назорейы», — дэспиттэрэ кэлбит дьон. «Мин бу баарбын», — диэбитэ Иисус. Кинини таҥнарбыт Иуда эмиэ олору кытта турара.

⁶Иисус «Мин бу баарбын» диэбитигэр кинилэр кэннилэринэн чугурус гынан, сууллан түспүттэрэ.

⁷Иисус иккиһин: «Кими көрдүүгүт?» — диэн ыйыппыта. «Иисус Назорейы», — диэбиттэрэ.

⁸«Эһиэхэ эттим ээ: Мин бу баарбын, — диэбитэ Иисус. — Миигин көрдүүр буоллаххытына, атыттары тыытымаҥ, бардыннар». (

⁹Онон Кини «Миэхэ биэрбит дьоҥҥуттан хайаларын да сүтэрбэтим» диэн эппитэ туолбута.)

¹⁰Симон Петр илдьэ сылдьар батаһын кыыныттан таһааран, архиерей кулутун уҥа кулгааҕын быһа охсубута. Кулут аата Малх диэн этэ.

¹¹«Батаскын кыыныгар ас, — диэбитэ Иисус Петрга. — Аҕам Миэхэ биэрбит иһититтэн Мин ама иһиэм суоҕа дуо?»

¹²Рим буойуннара тойоннорун уонна иудей харабыллары кытта, бары бииргэ саба түһэн, Иисуһу кэлгийбиттэрэ.

¹³Кинини бастаан Аннаҕа, ол сыл архиерей буолбут Каиафа аҕа кынныгар, илдьибиттэрэ.

¹⁴Каиафа буоллаҕына били иудейдарга норуот туһугар биир киһи өлбүтэ ордук диэн сүбэлээбит киһи этэ.

¹⁵Симон Петр атын биир үөрэнээччини кытта Иисуһу батыһан барбыттара; ол үөрэнээччи архиерейы билэр буолан, кини Иисуһу кытта архиерей тиэргэнигэр киирсибитэ;

¹⁶Петр тиэргэҥҥэ киирэр халҕан аан таһыгар туран хаалбыта. Онтон архиерейы билэр үөрэнээччи тахсан аан харабыла дьахтарга этэн, Петры иһирдьэ киллэртэрбитэ.

¹⁷Халҕан ааны харабыллыыр кулут дьахтар Петртан: «Эн эмиэ ити Киһи үөрэнээччитэ этиҥ буолбат дуо?» — диэн ыйыппыта. «Эчи суох», — диэбитэ Петр.

¹⁸Тымныы этэ. Кулуттар харабыллары кытта чоҕунан кулуһун уотун күөдьүтэн иттэ тураллара. Петр эмиэ кинилэр аттыларыгар иттэ турбута.

¹⁹Архиерей Иисустан үөрэнээччилэрин уонна үөрэтэр үөрэҕин туһунан ыйыппыта.

²⁰«Мин барытын дьоҥҥо аһаҕастык этэрим, — диэн хоруйдаабыта Иисус. — Иудейдар бары мунньустар сирдэригэр — синагогаларга уонна Таҥара Дьиэтигэр үөрэтэрим. Мин тугу да кистээн үөрэппэтэҕим.

²¹Тоҕо Миигиттэн ыйытаҕын? Истибит дьонтон ыйыт; тугу эппиппин кинилэр билэллэр».

²²Инньэ диэбитигэр чугас турар харабыл: «Архиерейга итинник хоруйдуугун дуо?» — диэн баран, Иисуһу сирэйгэ охсубута.

²³Иисус киниэхэ эппитэ: «Сыыһа эппит буоллахпына, сыыһабын ый, оттон сөпкө эппит буоллахпына, Миигин тоҕо охсоҕун?»

²⁴Анна Кинини, кэлгиэтин сүөрбэккэ эрэ, Каиафа архиерейга ыыппыта.

²⁵Симон Петр тиэргэҥҥэ иттэ турбута. Ол турдаҕына: «Эн эмиэ Кини үөрэнээччитэ этиҥ буолбат дуо?» — диэн ыйыппыттара. Петр мэлдьэһэн: «Эчи суох», — диэн хоруйдаабыта.

²⁶Архиерей биир кулута, били Петр батаһынан кулгааҕын быһа охсубут киһитин уруута: «Эн Кинини кытта саад иһигэр тураргын көрбүтүм буолбат дуо?» — диэбитэ.

²⁷Петр эмиэ мэлдьэспитэ, сонно тута бөтүүк хаһыытаабыта.

²⁸Каиафаттан Иисуһу Рим анаабыт баһылыгын дыбарыаһыгар илдьэ барбыттара. Сарсыарда этэ. Паасха аһын аһыахтаах иудейдар, киртийимээри, дыбарыаска киирбэтэхтэрэ.

²⁹Пилат утары тахсан: «Бу Киһини туохха буруйдуугутуй?» — диэн ыйыппыта.

³⁰«Буруйу оҥорботоҕо эбитэ буоллар, биһиги Кинини эйиэхэ аҕалыахпыт суоҕа этэ», — диэн хоруйдаабыттара.

³¹«Кинини Бэйэҕит ылан, сокуоҥҥут ирдэбилинэн дьүүллээҥ», — диэбитэ Пилат. «Биһиги кими да өлөрөрбүт көҥүллэммэт», — иудейдар утарбыттара. (

³²Ити курдук Иисус Бэйэтэ хайдах өлүөхтээҕин өтө көрөн эппитэ туолар буолбута.)

³³Пилат дыбарыаска төттөрү киирэн Иисуһу ыҥыран ылан: «Эн, кырдьык, Иудей Ыраахтааҕытынаҕын дуо?» — диэн ыйыппыта.

³⁴«Бэйэҥ маннык ыйытаҕын дуу, атыттар эйиэхэ Мин туспунан итинник эппиттэрэ дуу?» — диэн хоруйдаабыта Иисус.

³⁵«Мин иудей үһүбүн дуо? — диэбитэ Пилат. — Эйигин миэхэ Бэйэҥ норуотуҥ, архиерейдар тутан биэрдилэр. Эн тугу оҥорбуккунуй?»

³⁶«Мин Саарыстыбам бу дойду Саарыстыбата буолбатах, — Иисус хоруйдаабыта. — Бу дойду киэнэ эбитэ буоллар, дьонум Миигин иудейдарга биэрбэт туһугар туруулаһыа этилэр. Ол гынан баран Мин Саарыстыбам билигин манна буолбатах».

³⁷«Ол аата Эн Ыраахтааҕы буоллаҕыҥ дии?» — Пилат ыйыппыта. «Ыраахтааҕыгын диэн эн этэҕин, — диэбитэ Иисус. — Мин кырдьык туһунан туоһулаары төрөөбүтүм, ол туһугар бу дойдуга кэлбитим; кырдьыгы таптыыр киһи Мин саҥабын истэр».

³⁸«Кырдьык диэн тугуй?» — диэбитэ Пилат. Инньэ диэн баран, эмиэ иудейдарга тахсан: «Кини туох да буруйдааҕын булбатым, — диэбитэ. —

³⁹Эһиги Паасха аайы миэхэ биир киһини босхолотторор үгэстээххит, онон эһиэхэ иудей Ыраахтааҕытын босхолуохпун баҕараҕыт дуо?»

⁴⁰Бары эмиэ күргүөмүнэн: «Ити Киһини буолбатах, Варавваны босхолоо!» — диэн үөгүлэспиттэрэ. Варавва ороспуой этэ.