Read Библия- Yakut 2021 Иоанн 20 Bible Online

Иоанн 20 - Библия- Yakut 2021 bible

Иоанн 20

¹Нэдиэлэ бастакы күнүгэр[56] Мария Магдалина сарсыарда эрдэ, халлаан өссө сырдыан иннинэ, хаспахха кэлэн көрбүтэ — арай ааны бүөлээбит таастара халбарытыллан хаалбыт этэ.

²Кини Симон Петрга итиэннэ Иисус таптыыр биир үөрэнээччитигэр сүүрэн тиийэн: «Тойоммутун хоруобуттан ылан барбыттар, ханна гыммыттарын билбэппит», — диэбитэ.

³Сонно тута Петр ол үөрэнээччилиин тахсан, хоруопка барбыттара.

⁴Иккиэн бииргэ сүүрбүттэрэ да, үөрэнээччи Петрдааҕар түргэнник сүүрэн, урут тиийбитэ.

⁵Кини хаспах иһин өҥөйөн, таҥас сытарын көрбүтэ, ол гынан баран иһирдьэ киирбэтэҕэ.

⁶Кэнниттэн тиийбит Симон Петр иһирдьэ киирэн таҥас сытарын,

⁷итиэннэ Иисус төбөтүн саппыт былааттара, таҥаһы кытта буолбакка, туспа сууланан сытарын көрбүтэ.

⁸Дьэ онтон хаспахха бастакынан кэлбит үөрэнээччи киирэн, бэйэтэ барытын көрөн, итэҕэйбитэ.

⁹Иисус өлөн баран тиллиэхтээҕин туһунан Суруйууларга этиллибитин кинилэр өссө да өйдүү иликтэрэ.

¹⁰Онон үөрэнээччилэр дьиэлэригэр төннүбүттэрэ.

¹¹Оттон Мария хаспах таһыгар ытыы турбута; ытыы-ытыы, төҥкөйөн иһирдьэ өҥөйөн көрбүтэ,

¹²арай Иисус сыппыт сиригэр маҥан таҥастаах икки Аанньал — биирдэрэ бас диэки, атына атах диэки өттүгэр — олороллоро.

¹³«Тоҕо ытыыгыный?» — кинилэр ыйыппыттара. «Тойоммун ылан барбыттар, ханна гыммыттарын билбэппин», — диэбитэ Мария.

¹⁴Инньэ диэн баран кэннин хайыһан, Иисус турарын көрбүтэ, ол эрээри бу Кини буоларын билбэтэҕэ.

¹⁵«Тоҕо ытыыгыный? Кими көрдүүгүнүй?» — Иисус ыйыппыта. Саад көрөөччү буоллаҕа дии санаан, Мария: «Тойонуом! — диэбитэ. — Кинини мантан Эн таһаарбыт буоллаххына, ханна гыммыккын миэхэ эт, мин баран Кинини ылыам этэ».

¹⁶«Мария!» — диэбитэ Иисус. Эргиллэ түһээт, Мария еврей тылынан: «Раввуни!» (ол аата «Үөрэтээччим!») — диэн саҥа аллайбыта.

¹⁷Иисус эппитэ: «Мин Аҕабар өссө тахса иликпин, онон Миигин таарыйыма. Бырааттарбар баран Мин этэрбин тиэрт: Мин Бэйэм Аҕабар уонна эһиги Аҕаҕытыгар, Бэйэм Таҥарабар уонна эһиги Таҥараҕытыгар тахсабын».

¹⁸Мария Магдалина баран Айыы Тойону көрбүтүн, Кини тугу эппитин үөрэнээччилэргэ кэпсээбитэ.

¹⁹Ол күн, нэдиэлэ бастакы күнүн киэһэтигэр, үөрэнээччилэр иудейдартан куттанан, түмсэр дьиэлэрин аанын хатанан олордохторуна, Иисус киирэн ортолоругар туран эппитэ: «Эһиэхэ эйэ буоллун!»

²⁰Инньэ диэн баран, үөрэнээччилэригэр илиитин-атаҕын[57], ойоҕоһун көрдөрбүтэ. Үөрэнээччилэрэ Айыы Тойону көрөн, үөрэ түспүттэрэ.

²¹«Эһиэхэ эйэ буоллун! — диэбитэ Иисус иккиһин. — Аҕам Миигин ыыппытын курдук, Мин эмиэ эһигини ыытабын».

²²Маны этэн баран, салгыны үрбүтэ уонна: «Сибэтиэй Тыыны ылыҥ! — диэбитэ. —

²³Ким аньыытын бырастыы гынаҕыт да, ол аньыыта бырастыы буолуоҕа; ким аньыытын бырастыы гыммаккыт да, ол аньыыта бырастыы буолуо суоҕа».

²⁴Уон Иккиэлэртэн биирдэстэрэ, Игирэ Аҥаара диэн ааттаах Фома, Иисус кэлэ сылдьыбыт кэмигэр суох этэ.

²⁵Үөрэнээччилэр Фомаҕа: «Биһиги Айыы Тойону көрдүбүт», — диэн кэпсээбиттэрэ. Фома эппитэ: «Илиитигэр тоһоҕо суолун көрө иликпинэ, бааһыгар тарбахпын, ойоҕоһугар илиибин уга иликпинэ, итэҕэйиэм суоҕа».

²⁶Аҕыс хонон баран үөрэнээччилэр эмиэ дьиэҕэ олорбуттара, Фома кинилэри кытта баара. Аан халҕана хатанан турдаҕына, арай Иисус киирэн ортолоругар туран баран: «Эһиэхэ эйэ буоллун!» — диэбитэ.

²⁷Онтон Фомаҕа туһаайан эппитэ: «Сөмүйэҕин аҕал, уонна бу икки илиибин көр, илиигин ойоҕоспор ук. Уонна аны итэҕэйбэт буолума, итэҕэйэр буол».

²⁸«Айыы Тойонум, Таҥарам!» — диэбитэ Фома.

²⁹Иисус эппитэ: «Эн көрөҥҥүн итэҕэйдиҥ, көрбөккө эрэ итэҕэйбиттэр алгыстаахтар».

³⁰Уонна да атын үгүс дьиктини Иисус үөрэнээччилэригэр көрдөрбүтэ да, ол туһунан бу кинигэҕэ суруллубата.

³¹Оттон бу суруллубут барыта — Иисус Мессия, Таҥара Уола буоларын итэҕэйэргит итиэннэ итэҕэйэҥҥит Кини аатынан Олоххо тиксэргит туһугар, сурулунна.