Read Библия- Yakut 2021 Иоанн 7 Bible Online

Иоанн 7 - Библия- Yakut 2021 bible

Иоанн 7

¹Бу кэнниттэн Иисус Галилея устун сылдьыбыта, иудейдар өлөрөргө соруналларын иһин, Кини Иудеяҕа сылдьыан баҕарбатаҕа.

²Иудей бырааһынньыга Отуу Туруоруута чугаһаабыт кэмэ этэ.

³Бырааттара Киниэхэ эппиттэрэ: «Эн бу дойдуну хаалларан, Иудеяҕа бар. Ити оҥорор дьиктилэргин үөрэнээччилэриҥ эмиэ көрдүннэр.

⁴Дьоҥҥо биллэ-көстө сатыыр хайа да киһи бэйэтин дьайыыларын кистээбэт. Эн, итинник дьиктилэри оҥорор кыахтаах буоллаххына, дьоҥҥо-сэргэҕэ Бэйэҕин тоҕо биллэрбэккин?»

⁵Кинини бэл бырааттара итэҕэйбэт этилэр.

⁶«Мин кэмим өссө да кэлэ илик, — диэбитэ Иисус кинилэргэ, — оттон эһиэхэ ханнык баҕарар кэм табыгастаах.

⁷Бу дойду эһигини абааһы көрүөн сатаммат, оттон Миигин, кини дьайыылара мөкүтүн туоһулуурум иһин, абааһы көрөр.

⁸Эһиги бу бырааһынньыкка барыҥ. Мин кэмим өссө кэлэ илик, онон бырааһынньыкка барбаппын[24]».

⁹Маны этэн баран, Иисус Галилеяҕа хаалбыта.

¹⁰Бырааттара бырааһынньыкка барбыттарын кэннэ, ким да билбэтинэн Бэйэтэ эмиэ онно барбыта.

¹¹Иудейдар тойотторо бырааһынньыкка: «Кини ханнаный?» — дии-дии Иисуһу көрдүүллэрэ.

¹²Мустубут дьон Кини туһунан араастаан мөккүһэллэрэ. Сорохторо «үтүө санаалаах» дииллэрэ, атыттара «норуоту албынныыр» диэн утараллара.

¹³Ол эрээри, иудейдартан куттанар буолан, ким даҕаны аһаҕастык кэпсэппэт этэ.

¹⁴Бырааһынньык хайыы-үйэ ортолоон эрдэҕинэ, Иисус Таҥара Дьиэтигэр киирэн үөрэппитэ.

¹⁵«Үөрэммэтэх буолан баран, Суруйуулары ити хайдах билэрий?» — диэн иудейдар дьиктиргээбиттэрэ.

¹⁶Иисус кинилэргэ хоруйдаан эппитэ: «Мин үөрэтэр үөрэҕим Миэнэ буолбатах, Миигин Ыытааччы үөрэҕэ.

¹⁷Кини көҥүлүн тутуһуон баҕарар киһи бу үөрэх Таҥараттан кэлбитин дуу, эбэтэр Мин Бэйэбиттэн үөрэтэрбин дуу билиэҕэ.

¹⁸Бэйэтин аатыттан үөрэтэр киһи бэйэтигэр албан ааты ситиһэ сатыыр, оттон ким Кинини Ыыппыты албан аатырдыан баҕарар, ол дьиҥ кырдьыктаах, Кини сымыйалаабат.

¹⁹Моисей эһиэхэ Сокуону биэрбэтэҕэ этэ дуо? Ол үрдүнэн хайаҕыт да Сокуону тутуспат. Эһиги тоҕо Миигин өлөрөр сылтаҕы көрдүүгүт?»

²⁰«Искэр абааһы киирбит дуу? — диэн дьон быыһыттан хаһыытаабыттара. — Ким Эйигин өлөрөөрү гынар үһүнүй?»

²¹Иисус эппитэ: «Мин субуотаҕа биир дьиктини оҥоруохпуттан эһиги күн бүгүҥҥэ диэри уоскуйа иликкит.

²²Моисей эһиэхэ быһыллыы сиэрин-туомун олохтообута (дьиҥэр ону Моисей буолбатах, өбүгэлэргит олохтообуттара), ол иһин эһиги субуота күн быһыы оҥороҕут.

²³Моисей Сокуона кэһиллибэтин туһугар, киһи субуотаҕа да быһыллар буоллаҕына, Мин киһини бүтүн бэйэтин субуота күн үтүөрдүбүппэр эһиги абараҕыт дуо?

²⁴Таһыттан көрөн дьүүллүүргүтүн аны тохтотуҥ — кырдьыктаах дьүүлү тутуһуҥ».

²⁵Маны истэн, Иерусалимтан сылдьар сорох дьон: «Өлөрөөрү көрдүүр Киһилэрэ бу буолбатаҕа буолуо дуо? — диэн кэпсэппиттэрэ. —

²⁶Көр, аһаҕастык саҥарар да, туох да диэбэттэр. Кини чахчы Христос буоларын тойоттор билбиттэрэ дуу?

²⁷Ол гынан баран биһиги Кини Кимин, хантан сылдьарын билэбит, оттон Христос кэллэҕинэ, Кини хантан кэлбитин ким да билиэ суохтаах».

²⁸Иисус Таҥара Дьиэтигэр үөрэтэ туран саҥа аллайбыта: «Миигин эһиги билэҕит, хантан кэлбиппин эмиэ билэҕит: Мин Бэйэм көҥүлбүнэн кэлбэтэҕим — Миигин Дьиҥ Кырдьыктаах ыыппыта. Кинини эһиги билбэккит,

²⁹оттон Мин, Киниттэн кэлбит, Кинини билэбин. Миигин Кини ыыппыта».

³⁰Иисуһу тутан ылар тоҕоостоох түгэни көрдүү сатаабыттара да, кэмэ уолдьаһа илик буолан, Кинини ким да туппатаҕа.

³¹Оттон мустубут дьонтон үгүстэрэ Кинини итэҕэйбиттэрэ. Итэҕэйбит дьон: «Христос, кэллэҕинэ, ама бу Киһи оҥорбутунааҕар элбэх дьикти бэлиэни оҥороро буолуо дуо?» — дэһэллэрэ.

³²Дьон Иисус туһунан тугу кэпсэтэрин истэн, фарисейдар архиерейдардыын, Кинини туттара, харабылларын[25] ыыппыттара.

³³«Эһигинниин бииргэ сылдьар кэмим кылгаата, — диэбитэ Иисус. — Мин сотору Миигин Ыыппыкка барыаҕым.

³⁴Оччоҕо Миигин көрдөөн да, булуоххут суоҕа. Мин баар сирбэр эһиги кыайан тиийбэккит».

³⁵Иудейдар бэйэлэрин икки ардыларыгар: «Ити, биһиэхэ буллартарбат гына, ханна бараары сорунарый? — дэһиспиттэрэ. — Туора омуктар тарҕанан олорор сирдэригэр баран, кинилэри үөрэтээри гынара буолуо дуо?

³⁶Миигин көрдүөххүт да, булуоххут суоҕа, Мин баар сирбэр эһиги тиийэр кыаххыт суох диэн тугу этэр быһыытай?»

³⁷Бырааһынньык бүтэһик улуу күнүгэр Иисус дьон ортотугар туран, дорҕоонноохтук эппитэ: «Ким утаппыт, Миэхэ кэлэн утаҕын ханнарыахтын.

³⁸Миигин итэҕэйэр киһи сүрэҕиттэн, Суруйууларга этиллэринии, өлбөт мэҥэ уутун өрүстэрэ сүүрүгүрдүөхтэрэ».

³⁹Манан Иисус Кинини итэҕэйэр дьоҥҥо бэриллэр Тыын туһунан эппитэ. Кини өссө да албан аатыра илик буолан, Сибэтиэй Тыын[26] кинилэргэ бэриллэ илигэ.

⁴⁰Мустан турбут дьон халыҥ халҕаһатыттан үгүстэр бу тыллары истэн: «Кини чахчы Пророк эбит!» — дэспиттэрэ.

⁴¹«Бу — Христос!» — диэбиттэрэ атыттар. «Христос Галилеяттан кэлэр үһү дуо? — сорохторо утарбыттара. —

⁴²Христос Давид удьуоруттан, Вифлеемтэн, Давид төрөөбүт-үөскээбит сириттэн кэлиэ диэн Суруйууларга этиллибэтэҕэ этэ дуо?»

⁴³Ити курдук көй дьон Иисус туһуттан мөккүһэн турбуттара.

⁴⁴Сорохтор Кинини тутан ылыахтарын баҕараллара эрээри, Киниэхэ ким да илиитин көтөхпөтөҕө.

⁴⁵Харабыллар архиерейдарга уонна фарисейдарга төннөн кэлбиттэрэ. «Хайа, тоҕо тутан аҕалбатыгыт?» — дии тоһуйбуттара анарааҥҥылар.

⁴⁶«Хаһан даҕаны ким да ити Киһи этэрин этэ илигэ!» — харабыллар хоруйдаабыттара.

⁴⁷«Эһигини эмиэ бутуйбуттар дуу? — диэбиттэрэ фарисейдар. —

⁴⁸Аҕа баһылыктартан, фарисейдартан ким эмэ Кинини итэҕэйбитин эһиги көрбүккүт дуо?

⁴⁹Арай ити Сокуону билбэт, кырыыска турар ньүдьү-балайдар итэҕэйэллэр!»

⁵⁰Кинилэртэн биирдэстэрэ, урут түүн Иисуска кэлэ сылдьыбыт Никодим, эппитэ: «Биһиги Сокуоммут киһини, этэр тылын истибэккэ, тугу гыммытын билбэккэ эрэ, дьүүллүүр дуо?»

⁵¹

⁵²Маны эппитигэр: «Эн эмиэ Галилея этиҥ буолбат дуо? — диэбиттэрэ. — Суруйуулары сирийэн көр, оччоҕо Галилеяттан Пророк кэлбэтин өйдүөҥ».

⁵³Ол кэнниттэн бары дьиэлэригэр тарҕаспыттара[27].