Read Библия- Yakut 2021 1 Коринф христианнарыгар 16 Bible Online

1 Коринф христианнарыгар 16 - Библия- Yakut 2021 bible

1 Коринф христианнарыгар 16

¹Аны сибэтиэйдэргэ анаан хомуллар көмө туһунан этэр буоллахха, мин Галатиятааҕы сиэркэптэргэ олохтообут үгэспин тутуһар буолуҥ.

²Кэлбитим кэннэ, хомуйа сатыы сылдьыбат туһугар, хас биирдиигит нэдиэлэ маҥнайгы күнүн аайы үбүттэн-хамнаһыттан төһө кыалларынан туспа уурунан иһэр буоллун.

³Кэллэхпинэ, хомуйбут үтүө көмөҕүтүн Иерусалимҥа тиэрдэрдии, бэйэҕит талбыт дьоҥҥутунан суруктаан ыытыаҕым.

⁴Оттон бэйэм барарым табыллар буоллаҕына, кинилэр миигин кытта барсыахтара.

⁵Македонияҕа сылдьан баран эһиэхэ тиийиэҕим; суолум Македониянан ааһар.

⁶Эһиэхэ, баҕар, тохтуу түһүөҕүм, баҕар, кыстыам даҕаны, оччоҕо барарбар эһиги миигин атааран биэриэ этигит.

⁷Аны эһигини кытта ааһан эрэ иһэн көрсүһүөхпүн баҕарбаппын, Айыы Тойон биэрдэҕинэ, син тохтуу түһүөм диэн эрэнэбин.

⁸Эфескэ Биэс уонус күн бырааһынньыгар диэри сылдьыам, —

⁹манна иннибэр улуукан киэҥ аан тэлэччи аһыллан турар, утарсааччы да баһаам.

¹⁰Тимофей тиийдэҕинэ, киниэхэ ханнык да куттал суоһаабатын курдук көрө-истэ сылдьаарыҥ; кини эмиэ мин курдук Айыы Тойон дьыалатын толоро сылдьар.

¹¹Онон ким да кинини сэнии көрүө суохтаах, хата кытаатан миэхэ кэлэр гына тэрийэн эйэнэн атааран биэрээриҥ. Манна бырааттарбыныын кинини күүтэбит.

¹²Оттон бырааппыт Аполлос туһунан этэр буоллахха, кинини бырааттарбытын кытары эһиэхэ ыытаарыбын бэркэ көрдөспүтүм да, билигин барыан олох баҕарбатаҕа, онон бэйэтигэр табыгастаах кэмҥэ эһиэхэ тиийиэҕэ.

¹³Эһиги сэргэх сылдьыҥ, итэҕэлгитин бигэтик тутуһуҥ, эр санааланыҥ, халбаҥнаабат бөҕө буолуҥ.

¹⁴Тугу да гыммыккыт иһин, барытын таптыыр сүрэхтэн оҥоруҥ.

¹⁵Стефан дьиэ кэргэттэрэ Ахайяҕа аан бастакынан итэҕэйбиттэрин, сибэтиэйдэргэ көмөлөһөр аналы ылыммыттарын билэҕит. Онон, бырааттарым, эһигиттэн көрдөһүөм этэ:

¹⁶итинник дьоҥҥо итиэннэ бииргэ сулууспалаһар, бары сыраларын биэрэр ханнык баҕарар үлэһиттэргэ истигэн буолуҥ.

¹⁷Стефан, Фортунат уонна Ахаик тиийэн кэлбиттэриттэн олус үөрдүм: кинилэр эһигини суохтаппатылар,

¹⁸онон барыбыт — мин да, эһиги да — сүргэбитин көтөхтүлэр. Маннык дьону ытыктааҥ.

¹⁹Асиятааҕы сиэркэптэр эһиэхэ эҕэрдэ ыыталлар; Акилалаах Прискилла уонна кинилэр дьиэтээҕи сиэркэптэрэ Айыы Тойон туһугар эһигини истиҥник эҕэрдэлииллэр.

²⁰Бырааттаргыт бука бары эһиэхэ эҕэрдэ тиэрдэллэр. Сибэтиэй уураһыынан бэйэ-бэйэҕитин эҕэрдэлэһиҥ.

²¹Аны билигин бу бэйэм суруйан эрэбин: миигиттэн, Павелтан — эҕэрдэ.

²²Ким Айыы Тойон Иисус Христоһу таптаабат — ол анафема. Маран-афа![33]

²³Айыы Тойоммут илгэлээх үтүөтэ эһигинниин эҥээрдэһиэхтин.

²⁴Эһигини, Христос Иисуһу итэҕэйээччилэри барыгытын кытта, мин тапталым бииргэ буолуохтун. Аминь[34].