Read Библия- Yakut 2021 Руфь 2 Bible Online

Руфь 2 - Библия- Yakut 2021 bible

Руфь 2

¹Ноеминь эрин аймаҕа, дьоҥҥосэргэҕэ олус ытыктанар, эмиэ Елимелех аҕатын ууһуттан төрүттээх Вооз диэн киһи баара.

²Биирдэ Моав кыыһа Руфь ийэ хотунуттан: «Мин бааһынаҕа баран, көҥүллүүр буоллахтарына, тохтубут куолаһы итигэстиэхпин сөп дуо?» — диэн ыйыппыта. «Чэ бара сырыт, тоойуом», — диэбитэ Ноеминь.

³Руфь бурдук быһааччылары батыһа сылдьан, кинилэр түһэрбит куоластарын хомуйбута. Бааһына Елимелех аҕатын ууһуттан төрүттээх Вооз киэнэ буолан биэрбитэ.

⁴Өссө ити күн Вифлеемтэн Вооз бэйэтинэн тиийэн кэлбитэ. «АЙЫЫ ТОЙОН эһигинниин бииргэ буоллун!» — диэбитэ кини бурдук быһааччыларыгар. «АЙЫЫ ТОЙОН эйигин алҕаатын!» — дэспиттэрэ анарааҥҥы дьон.

⁵Вооз бурдук быһааччылары салайар үлэһититтэн: «Ити хайаларын эдэр кыыһа сылдьарый?» — диэн ыйыппыта.

⁶«Моав сириттэн Ноемины кытта кэлсибит кыыс, — диэбитэ үлэһиттэр тойонноро. —

⁷Быһааччылар хаалларбыт куоластарын итигэстиэхпин сөп дуо диэн көрдөспүтэ. Хара сарсыардаттан баччааҥҥа диэри олох сынньаммакка сылдьар».

⁸Вооз Руфька эппитэ: «Тоойуом, иһит. Эн атын бааһынаҕа хомуйа барыма, мантан халбарыйыма. Мин чаҕар кыргыттарбын кытта бииргэ сырыт.

⁹Быһааччылар ханна үлэлииллэрин көрө сылдьан кыргыттары батыһан ис. Мин дьоммор эттим, эйигин атаҕастыахтара суоҕа. Утаттаххына, ол чаҕардарым толору уу куппут купсууннарыттан иһээр».

¹⁰Маны истээт Руфь сөһүргэстии түспүтэ уонна сиргэ диэри сүгүрүйэн баран: «Эн тоҕо мин туспар кыһаллаҕын, маннык үтүөтүк сыһыаннаһаҕын? Мин туора омукпун эбээт», — диэбитэ.

¹¹Вооз киниэхэ эппитэ: «Эриҥ өлбүтүн кэннэ ийэ хотуҥҥар хайдах амарахтык сыһыаннаспыккын миэхэ кэпсээбиттэрэ. Аҕалаах ийэҕин, төрөөбүт дойдугун хаалларан, урут төрүт билбэт дьоҥҥор кэлсибиккин.

¹²Ити үтүөҕүн эйиэхэ АЙЫЫ ТОЙОН төлүөхтүн, Израиль Таҥарата, АЙЫЫ ТОЙОН, эйиэхэ, Кини кынатын анныгар дурдахахха көрдөһөн кэлбитиҥ иһин, толору манньа биэриэхтин».

¹³«Тойонуом, эн үтүө сыһыаҥҥын сүтэрбэтэрбин! — диэбитэ Руфь. — Олус да санаабын көтөхтүҥ, кулуккун, миигин, уоскуттуҥ! Мин, дьиҥэр, эн биир да чаҕар дьахтаргар тэҥнэспэппин».

¹⁴Күнүскү омурҕан саҕаламмыта. Вооз: «Руфь, манна кэлэн аһаа, бу уксууска килиэпкин умньаа», — диэбитэ. Руфь бурдук быһааччылар аттыларыгар олорбута. Вооз киниэхэ ыһаарыламмыт туораах бурдук биэрбитэ. Руфь тотохана аһаабыта, биэрбит астарыттан өссө ордоруммута.

¹⁵Онтон эмиэ куолас хомуйа барбыта. Кини барбытын кэннэ, Вооз үлэһиттэригэр эппитэ: «Түүтэхтэр быыстарыттан да итигэстээтэҕинэ, туох да диэмээриҥ.

¹⁶Бурдук быһаргытыгар соруйан куоласкытын түһэрэ сылдьыҥ. Ыллын, эһиги кинини саҥарымаҥ».

¹⁷Руфь бааһынаҕа тохтубут куолаһы киэһээҥҥэ диэри хомуйан баран, онтун кэлиигэ сынньыбыта — эфа[4] кэриҥэ нэчимиэн буолбута.

¹⁸Руфь куоракка төннүбүтэ. Төһөнү хомуйбутун ийэ хотунугар көрдөрбүтэ уонна күнүскү омурҕаныттан ордоруммут аһын биэрбитэ.

¹⁹«Хайа бүгүн ханна итигэстээтиҥ? Ханна үлэлээтиҥ? — диэн ыйыппыта ийэ хотуна. — Эйиэхэ үтүөнү оҥорбут киһиэхэ алгыс буоллун!» Руфь хайаларын сиригэр сылдьыбытын кэпсээн баран: «Ол бааһыналаах киһим Вооз диэн», — диэбитэ.

²⁰«АЙЫЫ ТОЙОН кинини алгыахтын! — Ноеминь саҥа аллайбыта. — АЙЫЫ ТОЙОН тыыннаахха да, өлбүккэ да үтүө сыһыанын уларыппат эбит. Ол киһи биһиэхэ көмөлөһөр кыахтаах чугас уруубут ээ».

²¹Руфь эппитэ: «Өссө саамай үчүгэйэ баар, кини бурдук быһыыта бүтүөр диэри үлэһиттэрбин кытта бииргэ сырыт диир».

²²Ноеминь кийиитигэр: «Тоойуом, эн кини чаҕар кыргыттарын кытта бииргэ сылдьарыҥ ордук эбит, — диэбитэ, — Атын бааһынаҕа бардаххына атаҕастаныаҥ».

²³Руфь нэчимиэн уонна сэлиэһинэй быһыыта бүтүөр диэри Вооз чаҕар кыргыттарын кытта бииргэ сылдьан, бааһынаҕа хаалбыт бурдук куолаһын итигэстээбитэ. Ити кэмҥэ Руфь ийэ хотунунуун бииргэ олороро.