Read Библия- Yakut 2021 Руфь 3 Bible Online

Руфь 3 - Библия- Yakut 2021 bible

Руфь 3

¹Биирдэ Ноеминь кийиитигэр Руфька эппитэ: «Тоойуом, мин эйиэхэ дурдахахха буолар үчүгэй эрэбил киһини булуохпун баҕарабын.

²Бу киэһэ куумунаҕа биһиги уруубут Вооз (эн кини чаҕар кыргыттарыныын бииргэ сылдьыбытыҥ) нэчимиэнин көтүтэр.

³Суунантараанан, үчүгэй таҥаскын таҥнан куумунаҕа тиий. Ол гынан баран, аһаан бүтүөр диэри, киниэхэ көстүмэ.

⁴Утуйа барбытын кэннэ, ханна сыппытын билэн баран чугаһаар уонна бүрүнэ сытар таҥаһын сэгэтэн, аттыгар сытаар. Салгыы тугу гыныахтааххын бэйэтэ этиэҕэ».

⁵Руфь ийэ хотунугар: «Сөп, эн эппиккин барытын толоруом», — диэбитэ.

⁶Итиэннэ куумунаҕа баран, хотуна тугу эппитин толорбута.

⁷Вооз дуоһуйа аһаансиэн, бинэгирээт арыгытын иһэн баран, өрөһөлөммүт туораах бурдук кытыытыгар сытан утуйан хаалбыта. Ити кэмҥэ Руфь тыаһаууһа суох тиийэн, Вооз бүрүммүт таҥаһын сэгэтэн, аттыгар сыппыта.

⁸Түүн үөһүн саҕана киһи эмискэ уһуктан кэлэн эргиллэн көрбүтэ — арай аттыгар дьахтар сытара.

⁹«Кимҥиний?» — диэн ыйыппыта Вооз. «Кулутуҥ Руфь, — диэбитэ дьахтар. — Бука диэн, кулуккун, миигин, кынатыҥ анныгар киллэр. Эн миэхэ көмөлөһүөхтээх уруум эбиккин».

¹⁰«АЙЫЫ ТОЙОН эйигин алгыахтын, тоойуом! — диэбитэ Вооз. — Эн уруккугунааҕар өссө үчүгэйи оҥордуҥ — эдэр киһини, дьадаҥыны да, баайы да, көрдүү барбатыҥ.

¹¹Онон, тоойуом, куттаныма, эн тугу көрдөспүккүн барытын толоруом. Эн үтүө санаалааххын куорат дьоно бары билэллэр.

¹²Кырдьык, мин эһиэхэ көмөлөһүөхтээх уруугут буолабын, ол гынан баран эһиги миигиннээҕэр өссө ордук чугас атын биир уруулааххыт.

¹³Чэ бу түүн манна утуй. Онтон сарсын ол киһи быраабын туһанарга сөбүлэнэр буоллаҕына, туһаннын, оттон көмөлөһүөн баҕарбатаҕына, АЙЫЫ ТОЙОН иннигэр этэбин, эйиэхэ мин көмөлөһүөм. Утуй, сарсыарда буолуо ыраах».

¹⁴Руфь сарсыардааҥҥа диэри кинилиин атахтаһан утуйан баран, бэрт эрдэ, ким да кинилэри көрө илигинэ, тура охсубута. Вооз: «Куумунаҕа дьахтар кэлэ сылдьыбытын ким да билбэтэ ордук», — дии санаабыта.

¹⁵«Накыайкаҕын манна аҕалан тоһуй эрэ», — диэбитэ кини. Руфь накыайкатын тоһуйан биэрбитигэр Вооз алта мээрэй[5] нэчимиэни куппута. Итиэннэ ону Руфька санныгар сүктэрэн баран, бэйэтэ куоракка барбыта.

¹⁶Руфь ийэ хотунугар тиийэн кэлбитэ. Хотуна: «Хайа, тоойуом, төһө бэркэ сырыттыҥ?» — дии түспүтэ. Вооз хайдах сыһыаннаспытын кэпсээн баран, Руфь:

¹⁷«Бу кини, ийэ хотуҥҥар кураанах төннүмэ диэн, миэхэ алта мээрэй нэчимиэни биэрэн ыытта», — диэбитэ.

¹⁸Ноеминь эппитэ: «Билигин, тоойуом, кэтэс. Ити барыта хайдах түмүктэнэрэ сотору биллиэ. Ол киһи саҕалаабытын бүтэрэ илигинэ уоскуйуо суоҕа».