Read Yamano Mak 1 Bible Online

Mak 1 - Yamano bible

Mak 1

¹Jisas Krais re God Reri Yen. Reri Tuma Yenbo gwotek basrastene.

²Aisaia re God reri kiyi temenem tuma wesowbem tame, re tuma kiyi siglowke op basrasem.Kem wan tai. Gwor tame re ari tuma wesowte tame.An rene weraste, re temnas yin ari tuma wesowte, re neri yate kelow heyar nente. (Malakai 3:1)

³Tame wuri re tamekene bo emik temente, re yaye op tete.Haneyen re yate. Kem reri yate kelow heyar nen. (Aisaia 40:3)

⁴Opkap Jon re etek yam. Re tamekene bo emik yin temenem, re tatame remne tuma op wesowbem. Kem keremri yaper nen wos mesegente, an kemne okke panen waren tirmunen nenewayete. God re keremri yaper nen wos poten ek septite, re kemne tuma sene be wete.

⁵Judia nowselri tatame, Jerusalem kwomri tatame rem aboyei Jon rene lasyim. Rem remri yaper nenbem wos wesowemke, Jon re remne Jordan Peikke panen waren okke tirmunem.

⁶Jon re kamel por weske nenem tame oub wubem, re somokep borborke simenem. Re boulri awos, muskene wiyi yenkene abem.

⁷Re tuma wesowbem, re op wem. An temnas yam, tame wuri re tiptuwu yate tetane. Re tame bukre, re tame yenbowai. An tame eisow. An tame yenbo bo, nes wolbaye wurik be site. An eisow yen, an selke site.

⁸An kemne okke waren tirmunte. Yuri yate tame re God Reri Wow kemne newote. Jon re Jisas rene okke waren tirmunem.

⁹Yuri Jisas re Nasaret kwom mesegenen yim. Nasaret kwom et Galili yokwok tetane. Re Jordan Peikke yin tem, Jon re rene Jordan Peikke waren tirmunem.

¹⁰Jisas re ok mesegenen wayen niruw labem. Gwan berabem, God Reri Wow re nelke ap bourkap yan yeren Jisas rene yeren sim.

¹¹Tuma wuskiy wuri nelke op wem. Ne areri meseke mogul Yen. An nene okbop tebo. Satan re Jisas rene seilam.

¹²God Reri Wow re Jisas rene werasem, re tamekene bo emik yim.

¹³Re neir tame pesri ok, yabel tame pesri ok etek temenemke, gambo remri keryen yen, Satan, re rene seilabem. Re temenem emi hekna habona tame tabo por tob rem etek temenem. God reri kwomri tame rem yan rene heyarbem. Jisas re Galili yokwok yaku tobotem.

¹⁴Yuri Jon re ake yaperke temenem, Jisas re Galili yokwok yin God Reri Tuma Yenbo etek wesowen op wem.

¹⁵God re Keryen Yen, re kwom panen site yabel matnaye. Kem wuribai yaper mesegente, sene kem wuribai yenbo pot. Kem God Reri Tuma Yenbo meten omuteke habote. Jisas re tame eis remne wepotem, rem rene semowen yim.

¹⁶Jisas re Galili wame barke sewurbem, re lakemase per Saimonkene Andrukene repne lam. Rep omyen potbem tame, rep wuli wamek rasen omyen potbem.

¹⁷Jisas re repne op wem. Kep arenkene yite. Kep omyen potbokap sene an kepne muwkuwteken peterate, kem tatame etopkap potte.

¹⁸Op wemke, agetage rep etepri wuli mesegenen rekene yim.

¹⁹Re kera sene yibem, re agerbo lakemase per, Jemskene Jonkene, repne lam. Rep Sebedi reri yen. Rep perek sin wuli let mate nabem.

²⁰Jisas re repne yate wem. Hakene reri yaku nenbem tamekene rem perek temenem, rep remne mesegenen Jisas rekene yim. Gambo re tame wuri gureremenem, Jisas re er gambo rene wekrokem.

²¹Rem yim, rem Kaperneam kwomke yan tem, Egesi Yabel ten Jisas re God reri akek wuren tatame remne tuma wesowem.

²²Rem reri tuma metem, rem danekene sekem. Re remne Moses Reri Wule peikbem tame remri wesowbemkap be wesowem. Keryen yen remri wesowbemkap re remne etop wesowem. Opkap rem danekene sekem.

²³Et yabel gambo gureremenem tame wuri re God reri akek temenem, re yan wuram.

²⁴Re yaye op wem. Jisas, ne Nasaret kwomri tame. Ne kap nesne berke nente? Kap, ne nesne botkute yawo? An nene latene. Ne God reri tame yenbo. Re nene werasen yam.

²⁵Jisas re rene tuma op wem. Ne elen me te. Ne tame rene pelebiten yi.

²⁶Gambo re tame rene selke terem, tame reri let tewo negnegem. Gambo re taye piten tame rene mesegenen yim.

²⁷Nugwape tatame rem op lam, rem danekene sekem, rem etemwou etemwou op wemetem. Et mapkap tuma? Jisas re kitimenakene keryen yenkap webo. Gambo rem reri tuma metbo, rem tame mesegenen yibo.

²⁸Agetage Galili yokwori tatame aboyei rem Jisas reri nenem wos metkeipem. Jisas re Pita reri owyit tene heyarem.

²⁹Jisas re reri anepoi tamekene rem God reri ake mesegenen yim, Saimonkene Andrukene repri akek yin wurem. Jonkene Jemskene rep kirkir yin wurem.

³⁰Saimon reri owyit te yaper metem, te tiyke tuknamenem. Jisas re akek wuram, egegekene rem rene op wem. Gwot ta te yaper metbo.

³¹Jisas re yin tene let keren nenewayen siruwem. Op nenem, teri yaper boyem, te wayen remne awos nenem. Jisas re nugwape tatame remne heyarem.

³²Yabel warbem, tatame rem sikanuma nenbem tatame, gambo gureremenem tatame remne panen Jisas rene lasyam.

³³Nugwape kwomri tatame rem ake eruk yan teteyewom.

³⁴Jisas re hekna habona sikanuma nen tatame remne heyarbem, re gambo remne wekroken yim. Gambo rem Jisas rene sanem, eker Jisas re remne sewayem, rem tuma kap namrete. Jisas re Galili yokwori kwomke kwomke sewurbem.

³⁵Neir tepke Jisas re wayen ek yim. Re tatame be temenem emik yim, re Apiy God rekene tuma namrem.

³⁶Saimon, rekene temenem tamekene rem Jisas rene sopen yim.

³⁷Rem rene lam, rem rene op wem. Nugwape tatame rem nene late yawo.

³⁸Jisas re remne op wem. Etop mesegente. Nem agerbo agerbo kwomke yite. An remne tuma kirkir wesowte. An er yaku nente yam.

³⁹Jisas re Galili yokwok yin sewurbem, re kwomri kwomri God reri akek wuren tuma wesowbem, gambo remne wekrokbem. Jisas re numape tame wuri rene heyarem.

⁴⁰Numape tame wuri re yan gulke pan Jisas rene op wem. Ne selte, ne anne heyarte, an yenbo sene tete.

⁴¹Jisas re rene pap metem, re rene let kerelan op wem. An nente selbo. Ne heyar sene te.

⁴²Tuma egegekene rene temenem pemenem numa re sok tem, re heyar tem.

⁴³Jisas re rene werasen omuteke op wem.

⁴⁴Metye. An nene heyar nenye. Ne yike tamene etop kap wesowte. Ne sagunan yin neri wes God reri Kwoborke yaku nenbo tame rene peterate. Re nene lakeipte, ne Moses re kiyi wemkap, ne etop nente, ne God rene kwar pete. Op nentek, sage tatame rem mette, ne heyar tetane.

⁴⁵Er tame re yin nugwape tatame remne Jisas re nenemkap wesowem. Op tem, tatame nugwape rem Jisas rene late wem, Jisas re kwomke mapurke yim. Tame be temenem emik re etek yin temenem. Kwomri kwomri tatame nugwape rem rene etek lasyam.