Read Yamano Rom 11 Bible Online

Rom 11 - Yamano bible

Rom 11

¹An op wemetbo. God re Israel tatame remne mesegenen magel tayem o? Yehow. Re op be nenem. Kem habote. An Israel tame. Abraham re areri warege. An Benjamin eterri tame beig. God re anne be mesegenen be magel tayem.

²God re reri kiyisapek kenem tatame remne be mesegenen magel be tayem. Elaija reri nenemkap God reri siglowke basrastene tuma kem metem. Israel tatame rem nugwape yaper wos nenbem, Elaija re Israel remne tuma wen God rene neluwpelen op wem.

³Haneyen. Rem nene kwar pebo tiy aboyei berayewobem.Rem neri tuma wesow tame remne kirkir pen sabem.Rem anne kirkir pen sate webo.Arenwou an som tetane.

⁴God re Elaija rene sein op wem. Nerenwou bo.Rane tame, 7,000, rem areri.Rem Bal wurya rene be lom yokwobo.

⁵Gwopte etopkap tetane. Rane Israel remne God re pap meten kwobo lan remne kenem. Rem rene omuteke habobo.

⁶Re remne pap meten kwobo lam, re remne kenem. Re remri nenbem wos lan remne ek be kenem. Yehow. God re tatame remri nenbem wos lan remne kenete wem, re remne pap meten kwobo labo wule sekene be tete wem.

⁷Op tem, nem berke wete? Israel tatame nugwape rem remri sopbem wos be lam. Rem God eterri tatame yenbo be tem. God re kenem tatame rem nugwape bo, etemwou rem er wos lam. Nugwape rem wan si tatamekap tem, rem God reri wem tuma be metem.

⁸God Reri Siglow tuma op webo.God re wemke, tatame rem purere yaper tem.Rem welepe be habobem.Re remne weragerem, rem kebese be lam,rem God Reri Tuma kebese be metem.Kiyi op tem, gwopte rem etopkap som tetane. (Lo 29:4)

⁹Devit eter mere, re etopkap op wem.God, ne Israel remne gwop nente.Rem awos bukre nenen abet,wos yaper remne ek tete.Ne remne manke yerbo awoskap keikerete.Ne remne pete, rem selke warte.Ne remne yaper sein nente.

¹⁰Ne remne wete, rem lesi tatame tete,rem kebese be late.Kwokwos kwokwos ne remne lim ya wosmagelke raste, rem guromen ek yite. God re Juda bo tatame remne poten rem eterri tatame tem.

¹¹An op wemetbo. Israel rem selke warem, rem yaperwai tem? God re remne magel tayem? Yehow. Israel rem wule yaper nenen God rene omuteke be habom, eker God re Juda bo tatame remne poten rem eterri tatame tem. Israel rem etop lan pap yaper meten remne ayekutete.

¹²Israel rem God rene omuteke be habon rene magel tayem. Opkap God re nugwape nowselri tatame remne kwobo lan heyar nenbo. Israel rem God reri wule nenlaweibo, eker God re Juda bo tatame remne yenbo nenbo. Nem metbo, Israel rem aboyei God rene omuteke sene habote, God re Juda bo tatame nugwape remne heyarsubuwai nente tetane.

¹³An Juda bo tatame kemne webo. God re anne werasen yin Juda bo tatame kemne eterri tuma wesowte wem. Eker an ari yaku okbop tebo.

¹⁴An selbo, an ari tame beig remri wuribai lisokote, God re kemne yenbo nenbokap late, rem ayekutete. Opkap God re rane remne potte.

¹⁵God re Israel remne magel tayem yabel, re aboyei nowselri tatame remne kelmenan remkene nowu tem. God re Israel remne sene potte, et sam tame wow sene potbokap!

¹⁶Rem geil subo, temnas yi potte geil wuri rem God rene newote, agerbo geil mere rem God eterri. Me nen rem God rene newote, me tewo mere rem God eterri.

¹⁷Israel rem nowri oliv me yenbokap. God re remri rane me tewo tan septim. Sene re boulri oliv me tewo poten sen yan natirem. Juda bo tatame kem er boulri oliv mekap. God re Juda bo tatame kemne Israel etemkene natirtene. Boulri oliv me tewo re nowri olivri kitimena potbokap, kem Israel tatame etemri kitimenakene God re remne yenbo nenbo wulekene kirkir potbo.

¹⁸Op tetane, kem Israel remne kap op habote. Er tan septim oliv me tewokap tatame rem tame yaper. Yehow. Kem habola. Kem me tewowou, opkap kem me tobo rene kitimena be newobo. Yehow. Me somo eter kemne kitimena newobo.

¹⁹Kap, kem sein op wete? God re nemne poten natirte habom, eker re nowri oliv me tewo tapoten septin nemne etemri emik ek natirem.

²⁰Etop weye tuma et sekene. Israel rem Krais rene omuteke be habomke, God re remne tan septim. Kem Krais rene omuteke habobo, eker kem remri emi poten eker tetane. Etop tetane, kem mane kworer gabote. Kem God rene akte.

²¹God re nowri oliv me tewo tan septim. Kem mangure tete, re kemne kirkir tan septite.

²²Kem habola. God re pap metbo tame, re tuma nenen yaper sein nenbo tame mere. Tame rem yaper wos nente, God re remne yaper sein nente. Kem rene omuteke som habobet, re kemne heyar som nenbet. Kem etop be nente, re kemne tan septite.

²³Kiyi tan septim Israel tatame, rem God rene omuteke sene habote, God re remne potte. Etem kiyi temenem emik rem sene ek tete. Re remne kebese sene natirte.

²⁴Kem Juda bo tatame, kem boulri oliv me tewokap. God re kemne tan sen yan nowri oliv me yenbok natirem. Juda tatame rem er nowri oliv mekap. God re nowri oliv me tewo sene poten er nowri olive me somok kebese sene natirte. Et yaku bukre bo. God re aboyei tatame remne pap metbo.

²⁵Gesmase. Kem kap op habote, kem purere bukrewai tetane. Eker an kemne berastene tuma wesowte. Er berastene tuma re gwor. Israel tatame nugwape rem omuteke habote muwebo. Rem etopkap sou be tete. Yehow. God re reri kiyi kenem Juda bo tatame rem aboyei omuteke habotek, Israel rem God rene magel sene be taite.

²⁶God re Israel remne sene potte wule gwopkap. God Reri Siglow tuma op webo.Tatame Sene Potbo Tame re Jerusalem mesegenen yate.Re Jekop reri gurnan sokonan remri mangure tebo wule teitkwunte. (Aisaia 59:20-21)

²⁷An remkene tuma op natebote.An remri yaper nen wos aboyei poten septite. (Jeremaia 31:33-34)

²⁸Israel tatame rem Jisas eterri Tuma Yenbo muwebo. Rem God reri peiktame tetane. Etop tem, et Juda bo tatame kemne kwobo lam. God re Israel tatame remne kiyi kenem, re etemri warege remkene tuma natobom. Eker re Israel remne pap som yewobo.

²⁹God re wuribai pes be tetane. Reri kenen tatame, re remne yenbo nente wem, re remne etop nente.

³⁰Kem Juda bo tatame, kiyi kem God rene mangure tebem. Gwopte God re kemne pap metbo. Israel etem rem mangure tebo, eker God re kemne pap metbo.

³¹Etopwou sene tete. God re kemne pap metbo, eker Israel rem mangure tebo. Opkap God re Israel remne pap kirkir mette tetane.

³²God re wemke, aboyei tatame rem tuma biragiyebo wuleri kulke tem. Opkap, re remne aboyei pap mette. Nem God rene pir webo.

³³God reri pap metbo wule et yenbosubuwai. Reri wuribai purere et bukrewai. Tame wuri re God reri wuribai mapurke sanetene! Tame wuri re God reri nenbokap kebese be mettene!

³⁴God Reri Siglow tuma op webo.Yike rem Haneyen reri wuribai latene?Yike rene purere lei kebese newote? (Aisaia 40:13)

³⁵Yike rene wos newom,opkap re wos sein sene newote?Bupo sekenewai. (Job 41:11)

³⁶God re aboyei wos nenbo. Eterke aboyei wos tetane. Re aboyei wosri mutame. Nem God rene tuma yenbowai som webet. Et sekenewai. Krais rene omuteke habobo tatame etem nenbo wule, Pol re wesowem. (Sapta 12:1—15:13)