Read Yamano Rom 15 Bible Online

Rom 15 - Yamano bible

Rom 15

¹Nem Jisas rene habobo tatame sespe, nem omuteke habobo samsam tatame remne kwobo late. Mapkap yaper wos remne tete, nem remne kwobo late. Nem neremwou kworer kap habote.

²Nem aboyei nemri gesmase remne heyar habon kwobo late, rem yenbo ten Jisas rene habobo tatame rem sespe tete.

³Krais re eter kworer kwobo late be habobem. God Reri Siglow tuma op webo.Tatame rem nene tame kwuyebo.Remri kwuyebo tuma rem anne kirkir kwuyebo. (Buk Song 69:9)

⁴God Reri kiyri Siglowke basrasem tuma et nemne purere peikte tuma rem habon basrasem. Er basrasem tumake nemri pap re kitimena potbo. Eker nem omuteke som habon heyar kowte.

⁵Taskurbo wulekene pap kitimena newobo wulekene repri tobo et God eterri. An rene wemetbo, re kemne kwobo late, kem Krais Jisas eter nenbemkap kirkir nente, kem wuribai wuriwou tete.

⁶Etop tete, kem aboyei, kem tuma wuskiy wuriwou God rene pir wete. Re neremri Haneyen Jisas Krais eterri God, eterri Ha mere. Krais re Juda tatamekene Juda bo tatamekene remne kwobo labem.

⁷Krais re kemne wepoten pap yewobokap, kem agerbo Jisas rene habobo tatame remne kirkir etop pap yewote. Kem op nente, God eterri sig bukre tete.

⁸An kemne op webo. Kiyi God re Juda remri warege remkene tuma natobom. Er natobom tuma Krais re etop nenem. Re yaku bukre nenen Juda remne peteram, God reri kiyi natobom tuma sekene tem.

⁹Re Juda bo tatame remne God reri pap metbo wule kirkir peteram, opkap rem God reri sig yenbo kebese webet. God Reri Siglowke basrastene tuma op webo.An Juda bo tatame remkene temente,an neri sig yenbo wete.An sekwo lomun neri sig yenbo wete. (Buk Song 18:49)

¹⁰God Reri Siglow tuma sene op webo.Kem Juda bo tatame, kem God eter kenemtatame etemkene okbop ten metekwaste. (Lo 32:43)

¹¹Sene God Reri Tuma op webo.Juda bo tatame,kem Keryen Yen reri sig yenbo we.Kwomri kwomri nugwape tatame,aboyei tame beig kem reri sig yenbo we. (Buk Song 117:1)

¹²Aisaia re kirkir op wem.Warege Jesi reri nan re tete.God re rene nenewayen re aboyei nowselri Judabo tatame remri keryen yen tete.Rem rene omuteke op habobet.Re nemne heyarwai nente tetane. (Aisaia 11:10)

¹³Nemne yenbo nente tuma teiktem God eterne an rene op wemetbo. Kem rene omuteke habobokap re kemne pap pulten kem nugwape metekwaste. Opkap, Reri Wow re kemne kitimena newon kem heyar kowen omuteke som op habobet. Re remne newote wem wos yenbo, nem potte tetane. Pol re reri yaku Rom remne wesowen remne pir wem. (Sapta 15:14—16:27) Pol re God reri yaku nenbo, re metekwasebo.

¹⁴Ari gesmase, aren an habobo, kerem kem wule yenbowai nenbo tatame. Kem nugwape purere tetane. Opkap, kem awosein awosein purere yenbo kebese weiwebet.

¹⁵Gwor siglow an kemne basrasbo, an mol pan teten rane tuma an kemne wuribaike lisokon ek basrasbo. God re anne yenbo nenem, re anne lebam, eker an kemne gwor tuma basrasbo.

¹⁶Re anne Jisas Krais reri yaku nen tame wemke, re anne werasen an Juda bo tatame remne kwobo labo. An God Reri Kwobor yaku nen tamekap, an God Reri Tuma Yenbo remne wesowbo. Opkap Juda bo tatame rem God Reri Tuma omuteke meten God Reri Wowke rem God eterri tatame sekene tebo. Rem God rene kwar pebo kitikap, God re remne metekwasen ek potte.

¹⁷Krais Jisas re arenkene tetane, eker God re anne newom yaku an gabobo.

¹⁸An mol pan teten Krais re arenke nenbem yaku etopwou an kemne wesowte. Arenke, Juda bo tatame rem God Reri Tuma meten nenbo. Krais re anne kitimena newobem, an tuma wesowbem, an remne heyar nenbem. Re anne kitimena som newobem, an kitimenakene bukre wos nenbem, an danekene sekebo wos nenbem. God Reri Wow eterri kitimenak er wos tem. Opkap, Krais rene webo Tuma Yenbo an Jerusalemke tasen kwomke kwomke yin heyar wesowen yim yim, Ilirikum yokwok kirkir yin wesowbem.

²⁰Kiyikene gwoptekene an op nente selbo. Tatame rem Krais reri sig be mettene emi, an reri Tuma Yenbo etopkap emiwouke yin wesowbet. Agerbo tame kiyi yin God reri yaku nenem kwom, an yaku ek be yin nente.

²¹God eter wem siglowke basrasemkap, an etop nenbo. Reri siglow tuma op webo.Remne be wem tatame rem late tetane.Tuma be mettene tatame rem heyar mette tetane. (Aisaia 52:15) Pol re Romri tatame remne lasyin sene re Spen nowselke yite selem.

²²An yaku bukre nenbemke, opkap tewok tewok an kemne kebese be lasyam.

²³Nabe nugwape an kemne late tekatekabem. Gwopte ari gwok nenbo yaku legem.

²⁴Eker an kemne lasyate selbo. An yate, an rane liyp kemkene okbop ten si gerate. Sene an kemne mesegenen an Spen nowselke yite. Kem anne kelowke ate awoskene kelkene kirkir kwobo late. An etop selbo.

²⁵Kiyi an Jerusalemke yin etek tetane God reri tatame remne kwobo late.

²⁶Masedoniakene Akaiakene yokwori Jisas rene omuteke habobo tatame, rem metekwasen tuma op natobom. Rem God reri Jerusalemke tetane kel heiksebo tatame remne kwobo lan kel rasen newopitibo.

²⁷Rem remri wuribaike kel newom. Opkap rem Jerusalemke tetane God reri tatame remne kwobo sein labo. Kiyi Juda tatame rem God reri wule yenbo Juda bo tatame remne wesowbem. Opkap Juda bo tatame rem etemri kelkene woskene Juda remne kwobo sein newote, et yenbo.

²⁸Eker rem newom kel an kiyi Jerusalemke sen yin remne ab newote. Er yaku an nenkeipte selbo. Sene an kemne kiyi yan lan sewuren an sene Spen nowselke ek yite.

²⁹An sanetene, an kemne lasyate, an Krais reri yenbo nenbo wulekene kirkir yate, kemne ab newote tetane.

³⁰Ari gesmase, an kemne op neluwpelebo. Haneyen Jisas Kraiskene God Reri Wowkene rep nemne pap yewobo wulek kem anne kwobo lan God rene omutekewai wemette, re anne kwobo late.

³¹Kem rene op wemette. An Jerusalemke yite, Judia yokwori God rene magel taibo tame rem kap anne pen sate. Kem rene sene op wemette. God reri Jerusalemke tetane tatame an etemkene nente yaku rem metekwaste.

³²Op tete, God re kirkir wete, an metekwaste, kemne lasyan ege kemkene sin okbop tete.

³³Nemri pap pultebo God rene an op wemetbo. Re keremkene temente. Et sekenewai.