Read Yamano 1 Korin 10 Bible Online

1 Korin 10 - Yamano bible

1 Korin 10

¹Ari gesmase. Yei warege remne tem wos, kem habo. Rem Moses rene tobom, God re remne aboyei gwan kitkerem, rem heyar temenem. Aboyei rem sewuren Retsi, kersepkap ok kelarek heyar wum. (Kisim Bek 13:21-22; 14:22-29)

²Gwankene Retsikene remne tirmunem, rem Moses rene semowbem tatame tem.

³God Reri Wow re remne newobem awos, rem aboyei kirkir abem.

⁴God Reri Wow reri remne newobem ok, rem aboyei kirkir abem. Wow reri pa re remne panen yibem, rem ok etek tin abem. Er pa et Krais eter.

⁵Op tem, God re nemri warege nugwape remri nenbem wule be metekwasem. Eker re remne pen sabem, remri kupa tamekene bo emik sarbem.

⁶Et nemne ei me pebo tuma. Rem yaper wos pap tetebemkap, nem kap nente.

⁷Rane rem sukwiye wurabemkap, nem kap wurate. God Reri Siglow tuma op webo.Rem sin awos bukre abem, sene rem ok yaper an sisi pen yage taibem. (Kisim Bek 32:6)

⁸Nugwape rem muye bisi yibem. Op tem,yabelwuriwouke nugwape tatame rem sam,sam tame ok (23,000) rem etop sam.Nemri warege rem muye bisi yibemkap,nem etop kap nente.

⁹Nem Krais rene kap seilate. Rane warege rem op nenem, sopo biyir rem remne tan sam.

¹⁰Kem God rene kap ker we tobo wete. Kiyi warege rane rem op nenem, God reri kwomri tame pen sabo tame re yan remne pen saiwom.

¹¹Warege remne tem wos, et tatame remne ei me pebo tuma. Gwopte nem er tuma basrastene siglow labo, nem purere potbo. Gwopte nemri tetane yabel nowsel legete nenbo.

¹²Yike op habobo. An Jisas reri wule heyar sen murese tetetene. Op webo tatame kemne an ei me pebo. Kem heyar la. Kem wule yaper kap nente.

¹³Be wos kemne seilate, et sange tame remne kirkir seilabo. God reri kiyi wemkap re nente tetane. Re kemne lakeren kwobo labo. Eker seila wos wuri re kemri tetane kitimena be teitkwunte. Seila wos wulare wulare kemne tete, God re kemne kitimena newote, kem kebese taskurte. Nem Godkene suwkwiyekene repne peske kap lom yokwote.

¹⁴Opkap, ari gesmase yenbo, kem sukwiye wurabo wule mesegenen magel tai.

¹⁵Kem wuribai purere tetane. Eker an kemne webo. Kem ari webo tuma sin namrela.

¹⁶Nem wuriwouke duwen Krais reri samkap habobo, nem ware poten God rene wese an ok ek abo. Nem ok kirkir an Jisas reri nep kirkir habobo. Nem geil kirkir belokteyewon abo, nem Krais reri wesom kirkir habobo.

¹⁷Nem aboyei geil wuriketwou poten belokteyewon kirkir abo. Opkap nem nugwape, nem wesom wuriwou tetane.

¹⁸Kem Israel remri nenbokap habo. God rene kwar pebo kiti abo tatame, rem kirkir duwen kwar pebo tiyri yaku kirkir nenbo.

¹⁹An op be webo. Sukwiye tarekene wuryakene rem sekene. Sikele arkwu remne kwar pebo kiti et sekene. Yehow!

²⁰God rene omuteke be habobo tatame rem sukwiye kwar pebo, rem omugambo remne kwar kirkir pebo. Rem God rene kwar be pebo. Eker an webo. Kem sukwiyekene omugambokene etemkene duwbo, opkap an muwai webo.

²¹Kem Haneyen reri warek yewotene okkene omugambo remri warek yewotene okkene kirkir mane ate. Kem Haneyen reri awos abo tiykene omugambo remri awos abo tiykene kirkir mane sin ate.

²²Kap, nem selbo, Haneyen re nemne pap yokte? Kap, nem habobo, nem reri kitimena kebese teitkwunte? Kwokwos kwokwos nem God reri sig yenbo bukre webet.

²³Rane rem op webo. God re nemne wos wuri be sewaitene. An op wete. Rane wos et yenbo bo. Rane rem op webo. God re nemne wos wuri be sewaitene. An op wete. Rane wos et nemne kwobo be labo.

²⁴Kem keremwou kworer kap habote. Kem agerbo tatame remne kirkir habon kwobo labet.

²⁵Kem get yin be kiti kem tupan ate habote, kem tupate. Kem wuribai pes kap tete. Kem kap op habo op habon wemet kamette. Et sukwiye kiti o? An ate o an be ate? Yehow. Kem bupo me tupan ate, et yenbo.

²⁶God Reri Siglow tuma op webo.Gwor nowselkene nowselke tetane woskene,et Haneyen eterriwou. (Buk Song 24:1)

²⁷Jisas rene omuteke be habobo tatame, rem kemne wepoten awos newon ate wete, kem kirkir ten kemkene ate. Kem wuribai yaper kap ten kap op habo op habon op wemette. Gwor kiti et sukwiye kiti o? Yehow. Kem bupo me ate, kap wemette.

²⁸Kap, etek tetane tame wuri re kemne op wete. Gwor kiti et sukwiye kwar peye kite. Op mette, kem er tame rene habote, kem er kiti mane ate. Reri wuribai yaper kap tete.

²⁹An kemri wuribai yaper kap tete be webo. Agerbo tame eterri wuribai yaper kap tete. An op eker webo. Sene rane tame rem op webo. Berke agerbo tame re ari nenbo wos se pete?

³⁰An awos poten God rene wese an ek ate, berke agerbo tame rem anne yaper webo?

³¹Opkap, kem awos o ok ate, o be wos kem nente, kem God rene habon rene sig bukre kirkir wete.

³²Juda tatame, Juda bo tatamekene, God reri tatamekene remne kem habon yaper be wuri nente.

³³An kirkir etop nenbo. Tatame nugwape rem ari nenbokap metekwaste, an etop selbo. An kworer be habobo. Agerbo tatame rem heyar temente, eker an remne kwobo labo. An selbo. God re remne potte.