Read Yamano 1 Tesalonaika 5 Bible Online

1 Tesalonaika 5 - Yamano bible

1 Tesalonaika 5

¹Gesmase, Haneyen reri yate yabelkene yuri tete woskene kem kiyi heyar metem. Er tuma nem kemne sene be basraste.

²Bisi a tame rem neirke elen me yabokap, Haneyen re etopkap sene yate tetane. Kem etop mettene.

³Jisas rene be habobo tame rem op wete tetane. Gwopte yabel et yabel yenbo. Nem heyar tetane. Etop wete, agetage rem yaper tete tetane. Ta rem yen wurbo mus agetage metbokap, rem agetage etop yaper tete tetane. Rem sekiyen amelaweite tetane.

⁴Gesmase, kem kerneirke be tetane. Bisi a tame yabo, tame re danekene sekete, er yabel tete, ne danekene be sekete.

⁵Kem aboyei, kem yabel geiri yen, kem kerneirri yen bo, nem yabelri yen.

⁶Opkap, agerbo tame rem tuknatenekap, nem kap tuknate. Nem le nowsin heyar lakerete.

⁷Tuknabo tame rem neirke tuknabo. Ok yaper abo tame rem neirke an sisi pen belebo.

⁸Nem etopkap bo. Nem yabel geiri tatame, nem heyar habote. Jisas rene omuteke habobo wulekene pap metbo wulekene nem etop nenen heyar temente, et ei nai tame rem tame oub kapak nenen wubokap. Ei nai tame rem tare gurerebokap kapak nenen gumbokap, God re nemne sene potbo wule nem etop omuteke habon heyar temente.

⁹God re nemne kenem, re gwule ten yaper sein nente be wem. Neremri Haneyen Jisas Krais eterke God re nemne potte wem.

¹⁰Krais re nemne kwobo lan sam. Nem samente o nem le kelpe temente, nem eterkene heyar somsom temente tetane.

¹¹Opkap, kem awosein awosein tuma yenbo wete. Op nente, kem kemri wuribai kitimena newote. Kemri nenbokap kem etop som nenbet. God re eterne omuteke habobo tatame remne kwobo labo, rem wule yenbowai potte.

¹²Gesmase, nem kemne omuteke op webo. Kemne kwobo labo tatame remri kulke kem temente. Haneyen re remne lebam, rem kemne lakeren tuma peikte, kemri nenbo wule heyar tete.

¹³Rem yaku yenbo kemne nenbo, kem remne pap meten heyar nenbet. Kem wuribai wuriketwou tete.

¹⁴Gesmase, nem kemne omuteke op webo. Yaku pwoibo tatame remne kem tuma heyar weiwete. Akbo tatame remne kem purere lei newote. Kem kitimenakene bo tatame remne kwobo late. Kem nugwape tatame remne tuma elen me wete.

¹⁵Tatame rem kemne wule yaper nente, kem yaper sein mane nente. Kwokwos kwokwos kem God rene omuteke habobo tatamekene agerbo tatamekene remne kem heyar nenbet.

¹⁶Kem okbop ten boteyatebet.

¹⁷Tewok tewok kem God rekene tuma namrebet.

¹⁸Be wos be wos kemne tete, kem God rene wese abet. God re selbo, kem Krais Jisas rekene bogtene tatame kem etopkap wule nente.

¹⁹God Reri Wow re kemne wos wuri nente wete, kem rene kap weragerte.

²⁰God re tame remne wen wesowte tuma rem kemne wete, er tuma kem mu kap wete.

²¹Kem aboyei tumakene wulekene heyar se pen late. Wos yenbo kem potte.

²²Aboyei wule yaper kem amekwunte.

²³God re pap yenbo metbo wuleri tobo. Kemri wow, wuribai, wesom re heyar lakerebet. Haneyen Jisas Krais re sene yate yabelke re kemne op wete tetane. Kem yaper wos be nenem.

²⁴Kemne tam tame eter webokap re etopwou nenbo. Reri nente webo tuma re nenbo.

²⁵Gesmase, kem nemne God rekene tuma wemette, re nemne kwobo late.

²⁶God rene omuteke habobo tatame remri wulekap kem aboyei gesmase remne pir wese an ragi boite.

²⁷Haneyen reri sigke an kemne omuteke op webo. Aboyei gesmase remne kem gwor sigelow lan wesowte.

²⁸Nemri Haneyen Jisas Krais re kemne pap meten kwobo labet.