Read Yamano Hibru 1 Bible Online

Hibru 1 - Yamano bible

Hibru 1

¹Kiyi God re nemri yeiwarege remne agerbo agerbo yabelke re remne agerbo agerbo wulek tuma ek wesowbem. Re reri tuma wesowbem tame remne kiyi wesowbemke, sene rem er tuma nemri yeiwarege remne ek wesowbem.

²Gwopte nowsel legete matnaye, God re Reri Yen rene tuma weiwen re nemne er tuma wesowbem. Re kiyi wem, er yen re lip, yabel, nowsel nenem. Nowsel legete, Yen re aboyei wos potte tetane.

³God eter malebokap er yen re etop malebo. Re har God eterkap, re God eterri tame yopkap. Reri tuma et kitimena bukre tetane, eker eter webokap, nowsel re som tetane. Re tatame remri yaper nen wos poten septikeipem, re Hevenke yawun Keryen Yen God eterri mame yokwok sim. God re Keryen Yen bukrewai. God Reri Yen re God reri kwomri tame remne teitkwuntene.

⁴God re Yener rene sig bukrekene yenbokene newom, eker, Yener re God reri kwomri tame remri keryen yen tem, rem eterri kulke tetane.

⁵Kiyi God re Yener rene op wem.Ne ari Yen.Gwopte an neri ha teye. (Buk Song 2:7) Re sene op wem.An eterri Ha. Re Areri Yen. (2Samuel 2:4) God re reri kwom tame remne etop kirkir be wem. Yehow.

⁶Re reri masetebo Yen rene nowselke yerte weraste nenbem, re op wem.Ari kwomri tame rem aboyei eterne lom yokwote.

⁷God re reri kwom tame etemne habon op wem.Ari kwom tame rem polikap tete.Ari kwom tame rem ker taulekap tete. (Buk Song 104:4)

⁸Re Reri Yener rene op wem.God, ne kwom panen si tame somsom temente.Ne neri tatame remne kwom panen sibo,ne yenbo wulewou nenbo.

⁹Wule yenbo ne okbop tebo. Wule yaper ne muwai webo.Juda tame rem etemri keryen yen remne kwar tarek sirbokap,God re nene lebam, nene keryen yen wem.Eker ne okbopwai tebo, ne2 sig bukre tetane.Re nene heyar nenemkap, re agerbo tame remne etop be nenem. (Buk Song 45:6-7)

¹⁰God re rene sene op wem.Haneyen, kiyisapewai ne nowsel nenem.Nelri wos mere, ne neri letke nenem.

¹¹Nelkene selkene rep yaper tete tetane.Neren, ne yaper be tete. Ne som temente tetane.Tame oub rem suba ten weyarbokap,nelkene selkene rep suba ten weyarte tetane.

¹²Tatame rem tame oub lugen gwolben rasbokap, ne nelkene selkene repne etop nente tetane.Tatame rem tame oub lugen agerbo tame oub wubokap, ne nelkene selkene repne etop sene nente tetane.Nerenwou ne etopwou som temente tetane.Ne etopkap som temente tetane. (Buk Song 102:25-27)

¹³Kiyi God re yener rene op wem.Ne areri let mame yokwok site.Yuri an neri peiktame remne poten neri tewo kulke pete wurte tetane. (Buk Song 110:1) God reri kwom tame remne re etop be wem.

¹⁴God reri kwom tame rem mapkap? Aboyei rem wow. Rem God reri yaku nenbo tame. God re remne werasen yibo, God eter potte tatame remne rem kwobo labo. Rem etop nenbo.