Read Yamano Hibru 10 Bible Online

Hibru 10 - Yamano bible

Hibru 10

¹God reri Moses rene newom Wule et wule sekene bo. Nem Moses rene newom Wule labo, nem yuri tete yenbo wos oknelke labokap. Moses rene newom Wule sebo tame rem nabek nabek bulmakau nep som kwar pebo. Op nenbo, er wule re God rene lom yokwobo tatame remri yaper nen wos mapurke aboyei poten septite? Rem tatame yenbo mapurke tete?

²Berke rem God rene kwar som pebo? God rene lom yokwobo tatame remri yaper nen wos God re poten septin rem tatame yenbo tete wem, rem remri yaper nen wos sene be habote wem. Op temente wem, rem God rene kwar sene be pete wem.

³Etopkap bo. Nabek nabek rem God rene kwar som pebo, eker rem remri yaper wos som habobo.

⁴Metye. Bulmakau nepkene meme nepkene et yaper nen wos mapurke poten septite?

⁵Opkap, Krais re nowselke yate nenbem yabel, re God rene op wem.Tatame rem nene wos newobo, rem bulmakau pen nene kwar pebo, ne etop be selbo.Eker ne anne more tame remri wesow newote nenbo.

⁶Tatame rem bulmakau o sipsip pen wiywiy kerke lisen nene kwar pebo.Rem agerbo agerbo wos kwar pebo.Rem remri yaper nen wos tupate kirkir kwar pebo.Rem etop nenbo, et ne okbop sou be tebo.

⁷Sene an rene op wem. God, an gwor.An neri wuribaike habobokapwou nente yawo.Kiyi rem anne habon basrasemkap,an neren webokap etop nente tetane. (Buk Song 40:6-8)

⁸Re kiyi op wem. God, tatame rem nene kwar pebo, nene wos newobo, ne etop be selbo.Moses rene newom Wule rem gwopkap nenbo. Rem bulmakau pen kerke lisen remri yaper nen wos tupate kwar pebo. Ne op labo, ne okbop be tebo.

⁹Sene re op wem. God, an neri wuribaike habobokap nente yawo. Op wem, re kiyiri kwar pebo wule teitkwunen re God reri yuri wem wule heyar meten nenem.

¹⁰Jisas Krais re God reri wuribai tobom. Tewo wuriketwou re reri wesomke God rene kwar pem. Eker nem God reri tatame yenbo tem. Krais re God rene kwar pem, re nemri yaper wos kebese poten septim.

¹¹Kwokwos kwokwos God Reri Akeke yaku nenbo tame rem teten yaku nenbo. Kwar pebo wule rem etopwou tewok tewok nenbo. Op nenbo, rem tatame remri yaper nen wos kebese be poten septibo.

¹²Tewo wuriketwou Krais re God rene kwar pen tatame remri yaper nen wos kelmenam. Re somsom aboyei kelmenakeipem. Kelmenakeipem, re God eterri mame yokwok yin sitene.

¹³Re etek sin kowtene. God re reri peiktame remne poten reri tewo kulke piti wurte tetane.

¹⁴Krais re God rene tewo wuriket kwar pen re tatame remri yaper nen wos poten septikeipem. Eker, rem tatame yenbo somsom temente.

¹⁵God Reri Wou re nemne kiyi etop kirkir wem.

¹⁶Haneyen re op wem. Sene an gwopkap tuma Israel tatame remkene natebote.Yuri tete yabelke an remne gwopkap nente.Ari wule an remri wuribaike raste.Ari wule an remri papke basraste.

¹⁷Re sene op wem. Remri yaper nen wos, remri yaper nenbokap an aboyei serte. An sene sene be habote.

¹⁸God re tatame remri yaper nen wos sene be habote, eker rem kwar sene be pete. Nem God rene omuteke habon rene meknik yin tete.

¹⁹Ari gesmase, Jisas re nemri yaper nenbem wos poten septim, nem eterri nepke nem sebera be yabo, eker re sam, nem God Reri Akeri Puri Yenbosubuwai kebese wurte, nem be akte.

²⁰Jisas re nemne somsom temente wule ager nemne peteram. Reri wesom et God eterri ake purik eistene matekap. Jisas re sam, re er mate tagwerasem, nem God eterri emi yenbowai kebese wurbo.

²¹God Reri Akeri yaku nen tame remri keryen yen wuri tetane. Re God reri tatame remne lakerebo.

²²Reri nep re nemri wuribai yaper aboyei nibiram, nem wuribai yenbo sene tem. Ok yenbok re nemne wiyruwem. Eker, nem wuribai yenbo poten God rene omuteke habon rene mekni yin tete.

²³God re nemne wemkap, re etop nente tetane. Eker, nemri kowtene wos, nemri wesowbo wos nem etop omutekewai habote. Nem wuribai pes kap tete.

²⁴Nem wulare wulare nem God rene omuteke habobo gesmase remne kwobo late. Rem gesmase remne kwobo late, remne yaku yenbowou nente.

²⁵Kem God rene omuteke habobo tatame kem wuriwouke sin God rene lom yokwobet. Kem kap mesengente. Rane tatame rem etop be nenbo, et yaper. Kem mettene, Haneyen re sene yate Yabel matnaye, eker kem wulare wulare kem yaku murese nenbet, tatame rem God rene omutekewai habote. Nem God Reri Yen rene kap magel taite.

²⁶God Reri Tuma sekene metbo tatame rem remri wuribaike yaper wos som nenbet wete, rem God rene kwar sene mapurke pen God re remri yaper nenbo wos mapurke poten septite?

²⁷Yehow. Er tatame rem aken God eter remne tuma nente tetane yabel kowtene. Er yabel God re reri peiktame remne ker bukrek seitte tetane.

²⁸Moses rene newom Wule sebo tatame rem gwopkap nenbo. Yike Moses Reri Wule biragiyete, agerbo tame pes o mur rem etop late, rem rene tuma nente. Rem rene pap be mette, rem rene pen sate.

²⁹God Reri Yen rene magel taibo tame rene kem map habobo? Er tame rene yaper wos nugwapewai tete tetane. Krais reri nepke God reri natebom tuma ager re kitimena potem, er tame re God reri yen tem, re tame yenbowai tem. Sene re God Reri Yen rene magel tayem, re Krais reri nep yaper webo. Re God reri pap meten kwobo labo Wow rene tame kwuyebo. Opkap tame God re rene kenakem pete tetane.

³⁰God reri webokap nem mettene. Re op webo. Aren, an remne yaper sein nente. Aren, an etop nente tetane. Sene re op webo. Haneyen re reri tatame remne se pen tuma nente tetane.

³¹Somsom tetane God re tame remne yaper sein nente wete, er tame re kenakem akte tetane. Nem God rene omutekewai som habobet.

³²Kiyi kem God Reri Tuma omuteke meten rene omuteke habom. Er yabel kem sene habote. Er yabel tatame rem kemne yaper nenbem, kem mus bukre metbem. Mus metbem, kem mol pan teten taskurbem.

³³Rane yabel rem kemne nugwape tatame etemri bitmik wen teten rem kemne tame kwuyen kemne pebem. Rane yabel rem kemri God rene omuteke habom gesmase remne yaper nenbem, kem remne kwobo labem.

³⁴God rene omuteke habobem gesmase rem ake yaperke temenem, kem remne pap meten heyar nenbem. God reri peiktame rem kemri wosbas potbem, kem pap yaper be tebem. Kem pap yenbo som ten omuteke op habobem. Yuri God re nemne som temente wos yenbowai newote tetane.

³⁵God re kemne heyarwai nente tetane, eker kem God rene omuteke habobo wule kap mesegente.

³⁶God reri wem tuma kem som nenbet. Kem kap pwoite. Kem etop nente, reri tuma kem be mesegente, God re newote wem woskap, kem etop potte tetane.

³⁷Ekeya. God reri siglow op webo.Keraket tete, yate webo tame re yate. Re sou be kowte.

³⁸Ari tatame yenbo rem anne omuteke som habote, rem heyar somsom temente.Remri rane rem anne mesegente, an remne okbop be tete.

³⁹God rene mesegenbo tatame rem yaper tete tetane. Nem etopkap bo. Nem God rene omuteke som habobo, eker nem heyar somsom temente tetane. Nem God rene omuteke habon murese tetete. (Sapta 11—13)