Read Yamano Hibru 3 Bible Online

Hibru 3 - Yamano bible

Hibru 3

¹God rene omuteke habobo gesmase, God re kemne wepotem. Kerem, kem Jisas eterne heyar habo. Re God reri werasen yi tame. Re God Reri Ake Keryen Yen Bukre tem. Nem rene omuteke habobo, eterri sigke nem tuma wesowbo.

²Rene lebam tame eterri yaku re heyar nenkeipem. Kiyi Moses re God eterri tatame remri borke yaku heyar nenbemkap, Jisas re etop nenbem.

³God re Jisas rene sig bukrewai newom, re Moses reri sig teitkwunem. Berke re etop nenem? Tame re ake nenbo, nem ake reri sig bukre be webo. Yehow. Ake nenbo tame reri sig nem bukre webo. Etopkap God re Jisas rene sig bukre newom, et sig re Moses reri sig teitkwuntane.

⁴Wulare wulare ake tame rem nenem. Aboyei wos God eter nenem.

⁵Moses re God reri yaku nenbem tame, re God reri akek yaku nenbem. Re yaku nen tame, re God re yuri wetekap re etop wesowem.

⁶Krais eter, re God Reri Yen, re God reri ake lakerebo, reri tatame remne lakerebo. Nerem, nem eterri tatame, nem eterri ake. Nem omuteke som habon okbop ten Haneyen reri nentekap rene heyar som kowte wete, re nemne heyar nente, opkap nem God reri akekap. Sekene. Mangure tebo tatame, rem ege be site.

⁷Eker God Reri Wow reri webo tuma nem etop mette. Re op webo.Gwopte kem God Reri Tuma mette wete,

⁸Kem mangure kap tete. Kiyi kemri yeiwarege rem mangure tebem, rem ari tuma muwen anne magel taibem.Rem tamekene bo emik temenem, rem anne seilabem. Rem mangure tebem.

⁹Rem etek temenem, nabe nugwape (40) rem ari nenbemkap labem.Labem, rem anne som seilabem.

¹⁰Op nenbem, an er tatame remne pap nugwape yoken remne op wem.Kwokwos kwokwos remri wuribai et yaper sene tebo.Ari wule rem be sebo. Op wem.

¹¹An pap bukre yokem, an areri sigke puromon op wem.Ari tetane emi rem ege be yan site. (Buk Song 95:7-ll)

¹²Gesmase, kem heyar la. Keremri tame wuri re wuribai yaper kap poten re omuteke habobo wule kap mesegenen re somsom temente God rene kap magel taite.

¹³Gwopte yabel som tetane wete, kem wule yenbowou nente, kem tuma yenbowou awosein awosein weiwebet. Aboyei yabel kem etop nenbet. Yaper nenbo wule et keremri tame wuri rene kap yikokon re mangure kap tete.

¹⁴Nem Krais rene ager yeki omuteke habomkap, nem etopkap omuteke som habon yin nem woryu me pe sa warte, nem Krais eterri tatame sekene tete. Tete, eter potte wos nem kirkir potte.

¹⁵God Reri Tuma op webo.Gwopte kem God Reri Tuma mette wete, kem mangure kap tete.Kiyi kemri yeiwarege rem mangure tem, rem ari tuma muwen anne magel tayem.Remri nenbemkap kem etop kap nente. (Buk Song 95:7-8)

¹⁶Yike rem mangure ten God Reri Tuma muwen rene magel tayem? Moses eter panen Isip nowsel mesegenen yim tatame etem, rem aboyei mangure ten rene magel tayem.

¹⁷Nabe nugwape (40) God re yaper wos nenbem tame rem tamekene bo emik sayewom, etemne God re pap yokem.

¹⁸God re et mangure tem tatame etemne re puromon op wem. Rem ari tetane emi ege be yan site.

¹⁹Op tem, nem sanebo, rem God rene omuteke be habom, eker rem reri egesi emik be yim.