Read Yamano Revelesen 11 Bible Online

Revelesen 11 - Yamano bible

Revelesen 11

¹Sene re ake kubusel anne newon op wem. Ne wayen teten gwor kubusel poten sen yin God Reri Kwoborkene God rene kwar pebo tiykene kubusel seylan yite. Op nenkeipte, sene ne God rene Kwoborke lom yokwobo tatame, remri tame ok karte.

²God Reri Kwobor makele kubusel kap seylate. Er makele et God rene be habobo tatame etem wurbo makele. Liyp tame pesri ok pes kere (42), Jerusalem kwom yenbowai er tatame rem teitkerete tetane.

³Ari Tuma wesowbo yen pes repne an werasen rep ari tuma wesowte. Rep mokwo sibo tame oub wumente. Yabel nugwape (1,260) rep ari tuma wesowbet.

⁴Er yen pes rep oliv me peskap, rep lam peskap. Aboyei nowselri Keryen Yen God eterri bitmi yokwok rep etek tetetane.

⁵Yike tame rem repne yaper nente seilate, ker repri tumaske wuran peiktame remne etek ein sate. Yike repne yaper nente seilate, rem etopkapwou sate tetane.

⁶Rep God Reri Tuma wesowte, God re repne agerbo agerbo kitimena bukre newote. Rep wete, mou be tite. Rep wasipeik remne wete, wasipeik ok nep tete. Rep wete, metkereke yaper wos nowselri tatame remne tete. Rep etop tewok tewok nente habote, rep nente.

⁷Rep God Reri Tuma wesowen yaku legete, mowyis por re selmei bukrek mesegenen wayen repkene naite. Re repne teitkwunen taraste.

⁸Repri kupa kwom sag bukreri kelowke raste. Sikur sakur tuma er kwom sag sig op webo. Sodomkene Isipkene. Er kwom rem Haneyen Jisas rene mek kwuren peikkeren sam.

⁹Yabel mur tep, nina let kere tem, repri kupa bupo me rasmente. Agerbo agerbo nowselri tatame, agerbo agerbo tame beig, agerbo agerbo tuma namrebo tatame, agerbo agerbo wes ten yatene tatame, rem yan repri kupa leklek tete. Rem sewayen repri kupa kap pertaite.

¹⁰God Reri Tuma wesowbo tame pes rep sate, nowselri tatame rem okbopkene tete. Rep aboyei tatame remne mus bukre newote. Eker rem sekwo lomun yage taite, awos an wos awosein awosein ip yi gwop yate.

¹¹Yabel mur nina let kere tem, God re repne yumu newon rep wow sene poten wayen tetem. Op lam, tatame rem kenakem akem.

¹²God Reri Berastene Tuma wesow yen pes rep God reri kwomke yam tuma wuskiy op metem. Kep gwotek waye. Repri peiktame rem lam, rep sel mesegenen gwan purik wuren God reri kwomke yawum.

¹³Sou be tem, nina bukre yam. Kwom sag kelare wuri yaper tem. Letrane kelare eis kere rem yaper be tem. Tatame nugwape (7,000) rem sam. Be samenem tatame rem kenakem akem, rem Hevenke tetane Keryen Yen God rene pir wem.

¹⁴Yaper wos peswe tem. Metye. Kereket tete, yaper wos murwe tete nenbo. God reri kwomri tame letrane kelare pes kerewe re reri puw tem.

¹⁵Sene God reri kwomri tame letrane kelare pes kerewe, re reri puw tem. God reri kwomri tuma wuskiy nugwape rem yaye op wem.Gwopte nemri Keryen Yen Godkene reri Lebam Tamekenerep nowselri tatame etemri Keryen Yen tete.Haneyen re aboyei kwom somsom panen simente tetane. (Kisim Bek 15:18; Daniel 2:44; 7:14,27)

¹⁶Op wemke, tame wuriri ok eis kere keryen tame, rem remri wolbayek God eterri bitmi yokwok simenem. Sene rem gulke pan waren bitmi selke rasen yan God rene lom yokwom.

¹⁷Rem lom yokwon op wem.Kitimena Sikabewaikene Keryen Yen God.Kiyisape ne temenem, gwopte ne som tetane.Ne reri kitimena bukre poten ne aboyei kwom panen site yaku tobotam.Eker nem nene wese abo.

¹⁸Neri pap yokbo yabel teye. Ne sam tatame remne tuma nente, yabel teye.Eker nene be habobo tatame rem nene pap yokbo.Ne neri yaku nenbo tatamekene neri tuma wesow tamekenenene habobo tatamekene, ne remne yenbo sein nente, yabel teye.Sigkene tatame, sig bo tatameremne ne kirkir yenbo sein nente.Nowsel yaper nenbo tatame remne ne yaper sein nente, yabel teye. (Buk Song 2:5; 110:5; 115:13)

¹⁹Keryen tame rem etop wem, God reri kwomri tame rem God reri kwomke tetane Kwobor eru tagwom. God Reri Tuma Yewomenem Yeka rem eter Kwobor purik lam. Pelale abem, ken bukre yabem, wakte kutebem, nina yabem, negel met pa moukap tibem. Satankene reri sukuwkene rem yaper tekeipem. (Sapta 12—20)