Read Yamano Revelesen 5 Bible Online

Revelesen 5 - Yamano bible

Revelesen 5

¹Sene an lam, wolbaye bukrek simenem Keryen Yen re gwolbemenem siglow let mamek semenem. Er siglow kulkene eilikene tuma basrasmenem. Er siglow kep letrane kelare pes kere peiken gwas keremenem.

²Sene an lam, God reri kwomri kitimenakene tame wuri re teten yaye op tem. Yike tame yenbo re kep kebese sauken siglow ek berarete?

³Op tem, God reri kwomke tetane tame, nowselke tetane tame, gambo kwomke tetane tamekene, remri yike be wuri er gwolbemenem siglow beraren lam.

⁴Siglow beraren tuma late tame yenbosubuwai rem soplaweyem. An etop lam, an pap yaper ten kenakem kiram.

⁵Sene keryen tame wuri re anne sewayen op wem. Ne kap kirate. Ekla. Juda tame beig remri Laion mow wale re tetane. Re Keryen Yen Devit eterri Nan. Re wule yaperkene peiktamekene remne teitkwunem, eker re kep letrane kelare pes kere kebese saukte, siglow ek berarete. (Stat 49:9; Aisaia 11:1,10) Jon re Sipsip Yen rene lam.

⁶Sene an lam, Sipsip Yen wuri re tetemenem. Rene kiyi pen samkapker lam. Re Keryen Yen eterri wolbaye bukre borke tetemenem. Kelpe wos eiskene tame wuriri ok wuriri eis kere keryen tamekene rem rene kur rasmenem. Reri tare akiykap wos letrane kelare pes kere etek temenem. Reri le rem letrane kelare pes kere temenem. Er akiykap woskene lekene et God Reri Wow letrane kelare pes kere. God re remne kiyi werasen rem agerbo agerbo nowselke yikwute yakwutem. (Aisaia 53:7; Sekaraia 4:10)

⁷Sipsip Yen re Keryen Yenri wolbayek simenem Tame reri let mamek semenem siglow potem.

⁸Kelpe wos eiskene tame wuriri ok wuriri eis kere keryen tamekene, rem Sipsip Yen eterri tewo tobok gulke pan waren tuknam. Rem wulare wulare gitakap woskene golke nenem warekene semenem. Er ware wulare wulare rem boskene wos lisen yewomenem. Aseneka boskap wayebem. Er boskene wos et God eterri tatame etem God rekene namrebo tuma bos.

⁹Rem sekwo ager rene op lomum.Nerenwou ne siglow kebese poten kep ek saukte.Kiyi rem nene pen sam, nereri nepke ne tatame remne tupam. Tupam, rem God reri tatame tem.Ekeya. Agerbo agerbo tame beig,agerbo agerbo tuma namrebo tatame,agerbo agerbo wes ten yatene tatame,agerbo agerbo nowselri tatame remne ne tupam,eker ne siglow kep kebese saukyewote. (Buk Song 33:3; 98:1; Aisaia 42:10)

¹⁰Ne remne wem, rem neremri God eterri Kwoborke yaku nenbo tatame tem.Rem God eterri kulke tetane, rem reri yaku nenbo.Rem nugwape nowselri tatame remne panen site tetane. (Kisim Bek 19:6) Rem Sipsip Yen reri sig bukre wem.

¹¹Sene an op lam. God reri kwomri tame nugwape nugwape, nugwapesubuwai remri tuma wuskiy an metem. Rem Keryen Yen reri wolbaye, kelpe wos eis, keryen tamekene remne teten kur rasmenem.

¹²Aboyei rem yaye op lomum.Kiyi pen sam Sipsip Yen re yenbosubuwai,eker aboyei wos reri kulke tete.Re nugwape wos yenbo kebese potte.Re nugwape purere yenbo potte.Re kitimena bukre potte.Tatame rem reri sig bukre wete.Rem rene tuma yenbowai wete.Rem rene pir wen wese ate.

¹³An metem, aboyei God reri kwomke tetane wos, nowselke tetane wos, nowsel kik tetane wos, kersepkap okke tetane wos, rem aboyei sekwo kirkir op lombo. Aboyei wos agerbo nelri emik tetane rem sekwo kirkir etop lombo.Keryen Yen eterri wolbayek sitene Tamekene Sipsip Yenkene repne nem pir bukre webo.Nem repri sig hadebaswai webo.Nem repne tuma yenbowai webo.Rep kitimena bukrewai. Nem etop sekwo som lombet.

¹⁴Etop lomum, kelpe wos eis rem op wem.Et sekenewai. Keryen tame rem gulke pan waren tuknan repne lom yokwobem.