Read Yambeta Maʼtɛ́as 1 Bible Online

Maʼtɛ́as 1 - Yambeta bible

Maʼtɛ́as 1

¹Táá wɔnɔ́ ná yoog ɛ pɔɔd yɛ́ Yə́sus Kilíʼtus, kɛnannán kɛ́ Tə́fid nyɔ́ ayɛ́ɛ nyɔ́lɛ́nyɔ́amɔɛ́d tɛn kɛnannán kɛ́ Ábɛlaam əyə́biə́níí a yɛ́lɛ́ aa yɛ́ɛnɛ pálɛɛ́ ɔsɔ́g pɔ́nɔ́:

²Ábɛlaam yiíbíən Ɛ́sag, Ɛ́sag əə́bíən Yáʼkɔb. Yáʼkɔb əə́bíən Yúda na pɔɔ́n pə́mmú pɛ́ndɛ́ŋ, pomóŋŋí pá Yúda.

³Yúda əə́bíən na oʼkán Tamáal lɛ́ na Fálɛs, na Sɛ́la. Fálɛs əə́bíən Ɛ́sɛlɔm, Ɛ́sɛlɔm əə́bíən Álam,

⁴Álam əə́bíən Amɛnadáab, Amɛnadáab əə́bíən Násɔŋ, Násɔŋ əə́bíən Sálmɔn,

⁵Sálmɔn əə́bíən Póos. (Ŋŋí o Póos ayɛ́ɛ niiŋ lɛ́ Ɛlaáab.) Póos aáság kubíən Obɛ́ɛd. (Ŋŋí wo Obɛ́ɛd ayɛ́ɛ niiŋ lɛ́ Ulúud.) Obɛ́ɛd əə́bíən Yəsə́ə,

⁶Yəsə́ə əə́bíən Tə́fid nyɔ́ yɛɛ́bág nkúm yɛ Ɛ́sɛlayɛl. Tə́fid əə́bíən Salomɔ́ɔŋ. (Əyímubíən na oʼkán ó Úli.)

⁷Salomɔ́ɔŋ əə́bíən Olobóam, Olobóam əə́bíən Ábɛa, Ábɛa əə́bíən Asáaf,

⁸Asáaf əə́bíən Yosafáad, Yosafáad əə́bíən Yoláam, Yoláam əə́bíən Osɛ́as,

⁹Osɛ́as aáság kubíən Yoáʼtam, Yoáʼtam əə́bíən Aʼkáas, Aʼkáas əə́bíən Ɛsɛ́ʼkɛas,

¹⁰Ɛsɛ́ʼkɛas əə́bíən Manasə́ə, Manasə́ə əə́bíən Amɔ́ɔŋ, Amɔ́ɔŋ əə́bíən Yosɛ́as,

¹¹Yosɛ́as əə́bíən Yɛʼkonɛ́as na pɔɔ́n tɛn pɛ́ndɛ́ŋ, pomóŋŋí pá Yɛʼkonɛ́as. A kɛnɛŋ kɛ́ pə́yíbugúmin a ɔsaa a Pabɛlɔ́ɔn aa Yosɛ́as yiíbiə́nə pɔɔ́n póob piim[1]

¹²Kɔ́gɔ́ɔg a ɔsaa a Pabɛlɔ́ɔn, Yɛʼkonɛ́as aáság kubíən Salaʼtíɛl, Salaʼtíɛl əə́bíən Solobabɛ́ɛl,

¹³Solobabɛ́ɛl əə́bíən Əbíud, Əbíud əə́bíən Ɛlɛáʼkim, Ɛlɛáʼkim əə́bíən Asɔ́ɔl,

¹⁴Asɔ́ɔl əə́bíən Sadɔ́ɔg, Sadɔ́ɔg əə́bíən Əʼkíim, Əʼkíim əə́bíən Əlíud,

¹⁵Əlíud əə́bíən Ɛlɛasáal, Ɛlɛasáal əə́bíən Maʼtáan, Maʼtáan əə́bíən Yáʼkɔb,

¹⁶Yáʼkɔb əə́bíən Yósɛb nyɔ́ yɛɛ́goán Malɛ́a, ŋŋí ɛ Yə́sus nyɔ́ alɛɛ́ Məsíi.

¹⁷Kəə́bə́ə́ a Ábɛlaam, agɛɛn əgiig a Tə́fid, nsɛg ɛlɛ yówád na íniʼ. Kodɛ́ɛmɛn tɛn a Tə́fid, agɛɛn əgiig a kɛnɛŋ kɛ́ páyɛ́ɛ a ɔsaa a Pabɛlɔ́ɔn, nsɛg ɛlɛ tɛn yówád na íniʼ. Kodɛ́ɛmɛn tɛn áay a kɛnɛŋ kɛ́ páyɛ́ɛ a ɔsaa a Pabɛlɔ́ɔn, agɛɛn əgiig a niə́bíən nɛ́ Məsíi, nsɛg ɛlɛ tɛn yówád na íniʼ.

¹⁸A kóonɛ lɛ́ Yə́sus Kilíʼtus yə́bíən a nsí, kɛ́ɛ́dáŋána lɛ́: Ŋŋí Malɛ́a ayɛ́ɛ aáʼkodɛ́lɛm lɛ́ ɔɔdɔn na Yósɛb. Kólɛ́ aa, a kóonɛ lɛ́ pə́díin páálad, Malɛ́a aáság kolon na nium nɛ́ yɛɛ́sɛ́m a toɛn tó Uŋun wó Ufúlúʼtú.

¹⁹Wɔnɔ́ ná kɛɔŋɔn kiə́ŋ Yósɛb ayɛ́ɛ sáád ɛ mɔɔd, adɛʼkɛ́ɛ anyɔ́ŋɛn kɛɛ́ʼkɛn Malɛ́a oʼto kono a əngis á pɔɔd. Aáság kusəə agá kɔ a ɔʼtɛ́m wə́ə́ŋ a kaadɛ lɛ́, nyɔ́lɛ́ ədiə́giiʼkini komogóan kə́mmú.

²⁰Wɔnɔ́ ná ayɛ́ɛ aándɛ na mafɛgaʼ móom a ɔʼtɛ́m, uŋun ó maʼtom ó Sə́dúk wááság kiim əmubúnigi kɛlɛm, wɔ́nɔ́ na nyɔ́lɛ́: «Yósɛb, wɛ mɔɔ́n nyɔ́ a yoog ɛ pɔɔd ɛ Tə́fid. Odɛʼtámmána kusiəd Malɛ́a, oʼkán waaŋ lɛ́ wɔnɔ́ ná aándɛɛ́ na nium. Ndóo. Nium nɛ́ɛn nɛ́ alɛɛ́ na nɛ́lɛ́, əə́siəd a toɛn tó Uŋun wó Ufúlúʼtú.

²¹Əəbíən mɔɔ́n ɔnɔ́mɛɛd, ólog mɔɔ́n nyóon lɛ́ Yə́sus. Nyɔ́lɛ́ aa alɛ́ɛ́ kɔɔyɛɛ́ pɔɔd a mabɛ́ mɔ́ɔ́bɔn.»

²²Pɛbán pɛ́ɛb piim, pɛ́yɛ́ɛ agodáŋana náan agɛɛlɛ lɛ́ nkə kɛ́ Sə́dúk yiísə́ə́ a unuʼ wó ɔndɔɛgɛʼ pɛbán wəəŋ, kɛ́as.

²³Kɛ́lɛ́ kɛ́go aa ɔndɔɛgɛʼ pɛbán o Táán yiísə́ə́ lɛ́: «Ɔmbɔ́dɔ́m wo ɔʼkɛ́ɛd nyɔ́ adɛ́ndɛŋɛɛ́ panɔ́mɛɛd alɛ́ɛ́ kusiəd nium ná ə́bíən mɔɔ́n ɔnɔ́mɛɛd. Mɔɔ́n nyóon, pálɛ́ɛ́ komoólog niiŋ lɛ́, Ɛmánɔ́wɛɛ.» Áay lɛ́: «Táán alɛ na pəsi[2]»

²⁴Ná Yósɛb əyíím yóndig ɛnɔ, aáság kɛɛlɛ əgín wɔnɔ́ ná uŋun ó maʼtom ó Sə́dúk óyɛ́modɛánɛ, əə́siəd oʼkán, amáág a yoog.

²⁵Náa, ɔmbɔ́ wɔnɔ́ ná əyímusiə́d náan, adɛʼkáagaálad na nyɔ́lɛ́ agɛɛn əgiig əgín wɔnɔ́ ná Malɛ́a yiíbíən mɔɔ́n wəəŋ, Yósɛb aálog lɛ́ Yə́sus.