Read Yambeta Maʼtɛ́as 10 Bible Online

Maʼtɛ́as 10 - Yambeta bible

Maʼtɛ́as 10

¹Yə́sus yɛɛ́dɔ́ŋɔn paaʼkan pə́ə́ŋ pá pówád na pábaan, aáság koboyɛ́ʼkɛn toɛn tó koŋɛŋ məŋun má mabɛ́, na tóonɛ lɛ́ mɔɔd alɛ abany páyɛmoyóómɛ. Nyɔ́ alɛɛ́ na kɛnɛ́m, páyɛɛlɛ lɛ́ kɛ́man.

²Táá əngiŋ á pɔɔ́n pá maʼtom págo pá pówád na pábaan aa yɛ́ɛnɛ lɛ́: O na oʼto na oʼto ayɛ́ɛ niiŋ lɛ́ Simɔ́ɔŋ nyɔ́ páyɛ́ɛ agodɔ́ŋɔn tɛn lɛ́ Píɛ na móŋŋí Əndələ́ə, na pa Sɛ́ag pɔ́lɛ́ na móŋŋí Sɛ́aŋ, pɔɔ́n pá Səbədə́ə;

³na Filíib, na Pəʼtələmíi, na Tómas, na Maʼtɛ́as, ɔʼkɔ́mmanɛʼ mag, na Sɛ́ag mɔɔ́n wo Əlifə́ə, na Tadə́ə;

⁴na Simɔ́ɔŋ tɛn nyummú, ɔnnɔnaʼ pɛbán pɛ́ nigúu, na Siudáa Ɛsɛʼkalɛyóod nyɔ́ yɛɛ́lɛ́g Yə́sus.

⁵Nto yɛ́ɛy yówád na ɛ́baan, Yə́sus ayɛ́boyɛ́ʼkɛn oʼtom. Agɛɛn koɔ́bɔn, ayɛ́boyáágánan a ntóɛŋ ɔnɔ́: «Ná poándagɛɛnɛɛ́, podɛnjɛ́ɛ́nan a pɛnɔ pɛ́ pɔɔd pá pándɛŋɛnɛɛ́ Táán pálɛɛ́. Podɛsɔ́d a pálɛ́ɛg ɛ Pasamalɛʼtɛ́ɛŋ ɔmbɔ́ mmuʼ.

⁶Póɛn agá a pɛnɔ pɛ́ pɔɔ́n pá Yúdɛn pálɛɛ́. Pálɛ wɔnɔ́ todóm tó tuíním.

⁷Púim pólɔɛgɛ na ngə́ na ngə́ lɛ́ Nɛlaamɛʼ nɛ́ a mɔɛn nɛándɛ ndúmiʼ.

⁸Mɔɔd alɛ abany, póomoyóómɛ. Puóndɛganɛ pɛlóŋ. Mɔɔd alɛ abany nkún póomoósɔgɛn yɛ́lɛ́, poáŋɛ́ŋŋaŋ məŋun má mabɛ́. Mɛ, mbáboyɛ́ʼkɛn pəŋi a náan iyó, pəŋi tɛn poɛ́ʼkɛnan na pɔsɔ́g náan iyó.»

⁹«Poándagɛɛn, pudisiə́d ɔmbɔ́ kóol, ɔmbɔ́ mɔɔnɛ́, ɔmbɔ́ əgín ndólaʼ podɛnjáyáágɛ́ɛ́ a pɛbalɛ́.

¹⁰Podɛnjábóŋɛ́náá moom wɔnɔ́ pɛbalɛ́ pɛ́ ongɛn, pilə́ə́ pɛ́baan pɛ́baan, pabalábá a ambaan. Ɔmbɔ́ oʼtɔ́ŋ pudisíəd lɛ́ ungim nyɔ́ alɛɛ́ agɛɛlɛ pigólí, ogóódi lɛ́ yɔ́sɔ́sɛd ombɔg a pɛ́lɛ́.

¹¹A pálɛ́ɛg ngim na moyaa mó əʼkúu muim mó puə́giig kɔ, Uunə́ən kolɛŋ mɔɔd nyɔ́ alɛɛ́ ugubuúsiəd kɔŋɛʼ. Púləndin kɔ súʼtə́ə́ a wɔɔ́s wó poádɛ́ɛmɛn áay agosan.

¹²Yoog yɛ́ poɔ́sɔd a yɛ́lɛ́, púsoyidi pɔɔd pá pálɛɛ́ kɔ poɔʼkɔ́: “Uŋóón wɛ́ɛn na pəŋi aá[34]!”

¹³Pɔɔd pá a yoog yɛ́ɛy pə́məʼkəə́liʼtini kubuúsiəd, uŋóón wááŋan wáagɛɛn na pɔ́lɛ́. Náa, pámaʼkosáŋɛnɛ kubuúsiəd, póyɛɛn na pisoyidiʼ pɛáŋan pɛ́ uŋóón.

¹⁴Puməʼkiig a yoog yimmú, oó lɛ́ pálɛ́ɛg yimmú náa pə́dibuúsiədinií kɔ kɔŋɛʼ, pánnyɔ́ŋɛn tɛn ɔmbɔ́ lɛ́ póob nkə kɛ́ poálɔɛgɛ, lónáan, pósan. Poándaasan, puə́gidə ummúndúŋ wó a ambaan yááŋan.

¹⁵Ndabodɛ́anɛ a fɔ́lɔ́b lɛ́, a wɔɔ́s ó pɛyɔm, Táán adɛndɛ́ɛ́ kolaŋ konyɛ́nɛn pɔɔd pá a Sodóom[35] na Kɔmɔ́ɔl wɔnɔ́ ná alɛ́ɛ́ konyɛ́nɛnɛɛ́ pɔsɔ́g pá a pálɛ́ɛg yɛ́ɛy.»

¹⁶«Taa, mɛ mbáboodóm wɔnɔ́ todóm a kɛgaágadɛ kɛ́ pəŋəŋúug; álɛ́ndɛ́ŋɛ́an wɔnɔ́ nkud aá! Ɛgom fiɛ́d wɔnɔ́ piɛm áaá!»

¹⁷«Lóʼkɔ́dɔɔn oó! Pálɛ́ɛ́ kɛɛn na pəŋi a puog pó pɛyɔm. Pálɛ́ɛ́ kobobáam a puog poɔ́bɔn pó pɛɔ́sɔ́gɔ́lɔ́n.

¹⁸Pálɛ́ɛ́ kubudə́nigi a pɛyɔm a udi ó pongɔ́mɛnaʼ na a oó puʼkúm a kidíídí kɛ́am. Polɛ́ɛ́ kɛʼtɛ́lɛmɛn mbaasɔ́ a udi wɔ́ɔ́bɔn na a oó pandɛŋ Táán.

¹⁹Ná pálɛ́ɛ́ kɛɛnɛɛ́ na pəŋi a puog pó pɛyɔm, podɛyáságɛ́máá nkə kɛ́ puə́səə kɔ na tuə́ áa poágaánɔna, ndóo. Tɔgɛ́ɛ́ tuim tó tólɛ́ɛ́ kubuyíminií lɛ́ púsəə a kɛnɛŋ kɛ́go kɛ́ɛg

²⁰Uŋun ó Sɛ waaŋan aa ólɛ́ɛ́ koboyɛ́ʼkɛnɛɛ́ tólɛ́ lɛ́ púsəə. Tódɛndɛ́ɛ́ kɛɛn tɔgɛ́ɛ́ tó pomáyɛ́ɛ́ŋɛ́nɛ́ɛ́ pəŋibáamɔɛ́d lɛ́ pósɔyɔ.

²¹Kɛ́lɛ́ɛ́ kɛɛn a kɛnɛŋ kɛ́ɛg lɛ́: Móŋŋí wo nsun mmuʼ aalɛg móŋŋí wəəŋ wo nsun mmuʼ lɛ́ pámoyóon. Sɛ a mɔɔ́n áyɛɛlɛ tɛn náan yoom ímuʼ na pɔɔ́n, pɔɔ́n páyaágasɛnɛ tɛn pasɛ pɔ́ɔ́bɔn lɛ́ ná páboyóóna.

²²Ungim alɛ́ɛ́ koboóbɛnɛn a kidíídí kɛ́am. Náa, wɛ nyɔ́ olɛ́ɛ́ kubisií ongoo súʼtə́ə́ a nɛman, wɛ nyóon aa Táán alɛ́ɛ́ kogoyɔ́yɛɛ́.

²³Pálɛ́ɛg yɛ́ pálɛ́ɛ́ koboónɔɛyɛɛ́ a yɛ́lɛ́, pósan, póɛn a yɛndɛ́ŋ. Ndabodɛ́anɛ a fɔ́lɔ́b lɛ́ podɛndɛ́ɛ́ kodáŋana, póyaálaʼtɛ pálɛ́ɛg ngim ɛ nigúu nɛ́ Ɛ́sɛlayɛl ná mɛ Mɔɔ́n o mɔɔd ntínjíim.

²⁴Ongaaʼkan ɔmbɔ́ úmmuʼ ɔdɛɔ́gɔ ogobáʼkanan kɛlág kiə́ŋ. Uʼkudin tɛn ɔmbɔ́ úmmuʼ, ambáʼkánan sə́dúg wəəŋ.

²⁵A ongaaʼkan, kíəguunə əgín agá lɛ́ yɛ́ɛn wɔnɔ́ kɛlág kiə́ŋ, uʼkudin áyɛɛn wɔnɔ́ sə́dúg wəəŋ. Págálɛ agodɔ́ŋɔn mɔɔd ɔmmɔɛ́d nyɔ́ alɛɛ́ lɛ́ alɛ mɔɔd o noádɛʼ pɔ́nɔ́ “Pə́lə́səbul”, pɛnɛŋ pɛ́sɛ́g anɛ́ɛ́n na pá pálɛɛ́ agá lɛ́ pálɛ yoog yəəŋ ɛ pɔɔd!»

²⁶«Podɛʼtámmána yoom na yoom lɛ́, yiim yɛ́ ɛ́yɛ́ɛ a nuníb ɛ́lɛ́ɛ́ kolon táán. Yɛ́ ɛ́lɛɛ́ agaáyɛ́ɛlɛ a pɛɔsɛ́g, pálɛ́ɛ́ kolɛŋ.

²⁷Nkə kɛ́ ndɛɛ́ agobodɛ́anɛ a mbin a kaadɛ, todáan əsəə kɛ́lɛ́ a táyááŋ. Nkə kɛ́ pámábodɛánɛ a ɛdɔɔgɛ, póbag a kɛbon a mɔɛn, pólɔɛgɛ kɛ́lɛ́.»

²⁸«Podɛʼtámmána pá pálɛɛ́ lɛ́, páagoon mɔɔd, náa pádɛáʼkɛ koon ɛdáányɛ́ yɛ́ ɛ́lɛɛ́ na nyɔ́lɛ́. Tammánáan agá Táán nyɔ́ alɛɛ́ lɛ́, aagoyóon wɛ mɔɔd, áyoon tɛn uŋun wááŋ, áadagɛdɛ wólɛ́ a yug yɛ́ ɛgóón.

²⁹Adɛ́ pálɛ agolɛg múlundúún móbaan a síísi mmuʼ əə? Kɔmɔɛ́d lɛ́ ílundúún əgín ɔmbɔ́ ímuʼ, ɛ́dɛɔ́gɔ ígunim, Táán andɛŋ.

³⁰Pɛnɛŋ pɛ́sɛ́g anɛ́ɛ́n na pəŋi pá aálɛŋ ɔmbɔ́ na tuyə́ən toáŋan kɛ́ tósɛ́g áa pugódíí oʼto.

³¹Podɛʼtámmána anɛ́ɛ́n yoom na yoom. A əngis á Táán, pəŋi pomááyɛn múlundúún muim.»

³²«Nyɔ́ alɛ́ɛ́ kinjəə́gidənií a udi ó pɔɔd, ɔɔ́sɔyɔ lɛ́ nyɔ́lɛ́ alɛ waam, mɛ tɛn ndɛ́ɛ́ kodɛ́lɛm a udi ó Paabá nyɔ́ alɛɛ́ a mɔɛn, əgusəə lɛ́ alɛ waam.

³³Náa, nyɔ́ alɛ́ɛ́ kiʼtəmií a əngis á pɔɔd, mɛ ndɛ́ɛ́ kumuúʼtəm tɛn nyɔ́lɛ́ a udi ó Sɛ waam nyɔ́ alɛɛ́ a mɔɛn.»

³⁴«Podɛfɛ́g lɛ́ kiwiiyiʼ aa mbíim agaag a nsí, ndóo. Ntiimin na kiwiiyiʼ, pɛdá aa mbíim na pɛ́lɛ́

³⁵lɛ́ mbíim agɛɛlɛ lɛ́ sɛ a mɔɔ́n ásaalɛg na mɔɔ́n wəəŋ, ŋŋí a mɔɔ́n áasaalɛg tɛn na mɔɔ́n nyɔ́ ɔʼkɛ́ɛd, ɔmbɔ́ tɛn ŋŋíin áasaalɛg na oʼkán ó mɔɔ́n.

³⁶Pɔɔd pá a yoog yaaŋ ɛ pɔɔd aa pálɛ́ɛ́ kogoónɔɛyɛɛ́ pɛdá[36]»

³⁷«Nyɔ́ aányɔ́ŋɛn sɛ wəəŋ, ɔmbɔ́ lɛ́ ŋŋí wəəŋ agosan wɔnɔ́ ná ogódíí lɛ́ yɛ́nnyɔ́ŋɛn mɛ, nyóon ɔdɛɔ́gɔ nyóonɛ lɛ́ mmoyáág a ondáŋ wáam. Nyɔ́ aányɔ́ŋɛn tɛn mɔɔ́n agosan wɔnɔ́ ná ogódíí lɛ́ yɛ́nnyɔ́ŋɛn mɛ, nyóon tɛn ɔdɛɔ́gɔ waam.

³⁸Nyɔ́ ədiə́lúlinií ɔmbásá wə́ə́ŋ əgiim yínjə́ən, nyóon ɔdɛɔ́gɔ waam.

³⁹Nyɔ́ alɛ́ɛ́ kuunə lɛ́ yə́gəʼkəəŋəni ɔlaa wə́ə́ŋ, nyóon alɛ́ɛ́ koʼtaŋ wólɛ́. Nyɔ́ alɛ́ɛ́ koʼtaŋɛɛ́ ɔlaa wə́ə́ŋ a kidíídí kɛ́am, nyóon aa alɛ́ɛ́ kɛɛnɛɛ́ na ɔlaa ó pɛnɛŋ piim.»

⁴⁰«Nyɔ́ əmə́busiə́d pəŋi kɔŋɛʼ, mɛ aa əmísiə́d náan kɔŋɛʼ. Nyɔ́ əmísiə́d mɛ kɔŋɛʼ, əə́siəd tɛn anyóon nyɔ́ əyíím yɛ́ʼtom.

⁴¹Nyɔ́ əə́siəd ɔndɔɛgɛʼ pɛbán o Táán kɔŋɛʼ lɛ́ alɛ ɔndɔɛgɛʼ pɛbán o Táán, nyóon alɛ́ɛ́ kɛɛn na pɛsáábɔ́n pɛ́ pɛ́lɛɛ́ pɛ́ palɔɛgɛʼ pɛbán pá Táán. Nyɔ́ əə́siəd mɔɔd o sáád kɔŋɛʼ lɛ́ alɛ mɔɔd o sáád, nyóon alɛ́ɛ́ kɔɔŋ pɛsáábɔ́n pɛ́ pɛ́lɛɛ́ pɛ́ pɔɔd pá pálɛɛ́ sáád. A fɔ́lɔ́b, ndabodɛ́anɛ lɛ́

⁴²nyɔ́ alɛ́ɛ́ kɛɛ́ʼkɛnɛɛ́ ɔmbɔ́ əgín mayaa má məní má koŋo náanɛ sɔɔŋ na ɛyaa ɛ́ moóngaa wɔnɔ́ yɛ́ɛnɛ a oʼto wóonɛ lɛ́ ɛ́lɛ ongaaʼkan waam, nyóon adɛndɛ́ɛ́ koʼtaŋ pɛsáábɔ́n piə́ŋ.»