Read Yambeta Maʼtɛ́as 11 Bible Online

Maʼtɛ́as 11 - Yambeta bible

Maʼtɛ́as 11

¹Ná Yə́sus ayɛ́ɛ aáʼkoman kodɛ́ananɛ pɛbán pɛ́ɛb na paaʼkan pə́ə́ŋ, aáság kodɛ́ɛmɛn áay agɛɛn a pálɛ́ɛg yɛndɛ́ŋ yɛ́ a kɛnɔ kɛ́ɛg, agɛɛn agaaʼkananɛ pɔɔd, áaboólɔɛgɛnɛ Tɔsɔm Tólaŋ.

²Kɔ́gɔ́ɔg a yoog yɛ njaan yɛ́ ayɛ́ɛ a yɛ́lɛ́, Sɛ́aŋ Ɔsɔgɛn pɔɔd ayóób nkə kiim kɛ́ Məsíi ayɛ́ɛ əgiim yɛ́ɛlɛ, aáság kudə́əmini paaʼkan pə́ə́ŋ pə́mmú, ɔnɔ́ na pɔ́lɛ́, pɛ́ɛn amoóboan, pə́muŋíən pɔ́nɔ́:

³«Wɛ áa olɛɛ́ Məsíi ogo nyɔ́ tɛlɛɛ́ agobóŋan oóm, wɛndɛ́ŋ alɛ ngim ə́?» Paaʼkan póob pááság kɛɛn. Ná pə́yííg kɔ, pə́yímuŋíən náan.

⁴Əyíbuyúlísíni ɔnɔ́ na pɔ́lɛ́: «Todáan adɛ́anɛ na Sɛ́aŋ nkə kiim kɛ́ poádála, na nkə kiim kɛ́ pomóób.

⁵Táá powongwóg pándadɛ́ʼtɛganan, pɔɔd pá pɛnɛ́m páalɛŋ kodáŋana, pá páyɛ́ɛ abany nkún pándɛ paŋɛʼ, pɔlɔ́ndɔ́g páagoóbanan, pɛlóŋ pɛ́agoóndɛgan, Tɔsɔm Tólaŋ tóagaálɔɛgɛ a nó mɔsɔ́gasɔ́gá[37]

⁶Kɔŋɛʼ na nyɔ́ adɛndɛ́ɛ́ kudə́ŋií kəə́liʼtiniʼ a oʼto wáam ó!»

⁷Ná pɔɔd póob pá Sɛ́aŋ əyíím ádom páyɛ́ɛ páʼkɛɛn, Yə́sus əə́bə́ə́ kosɔyɔ kɛbán kɛ́ Sɛ́aŋ ogo nyóon na kiʼtúú kɛ́ pɔɔd pá pə́yə́yiilin kɔ áay, ɔnɔ́: «Ná poyɛ́ɛ agɛɛnan a kɛnɔ kɛ́ kifələ́ə́n ə́ə, nkə aa poyɛ́ɛ agɛɛn adɛ́ʼtɛg kɔ ə́? Niob nɛ́ ɔfɛfɛm óyɛ́ɛ əgunyigən əə́?

⁸Ndóo. Nkə anɛ́ɛ́n áa poyɛ́ɛ agɛɛn adɛ́ʼtɛg kɔ ə́? Mɔɔd nyummú nyɔ́ yiíníigin pisig pɛ́ pilə́ə́ ə́? Ɔmbɔ́ tɛn, lɛ́ mbod ɛ pɔɔd yɛ́ yəə́gəə́níigən pilə́ə́ pɛ́ mɔɔnɛ́ wɔnɔ́ pɛ́ɛb, a puog pó puʼkúm áa pálɛanɛɛ́.

⁹Náa, nkə anɛ́ɛ́n áa poyɛ́ɛ agɛɛn adɛ́ʼtɛg əə́? Ɔndɔɛgɛʼ pɛbán o Táán á? Ɛɛ́ɛ, ndabodɛ́anɛ lɛ́ nyɔ́lɛ́. Amááyɛn kɔmɔɛ́d Ɔndɔɛgɛʼ pɛbán.

¹⁰Kɛbán kɛ́ Sɛ́aŋ ogo nyóon aa kíyə́dílə́ə́ a kálaʼtaʼ lɛ́ Táán ɔnɔ́: “Taa, mɔɔd waam wo oʼtom anyóon mbáyaŋ ádom a udi wááŋ lɛ́ yɛ́ɛn əguúbuənin ngə́[38]”

¹¹Ndabodɛ́anɛ a fɔ́lɔ́b lɛ́: Úmmuʼ na úmmuʼ nyɔ́ əmə́biə́níí a nsun yɛ ɔʼkɛ́ɛd ɔdɛɔ́gɔ nyɔ́ amáábɛ́gɛn Sɛ́aŋ Ɔsɔgɛn pɔɔd ombɔg a oʼto. Kɔmɔɛ́d lɛ́ a Nɛlaamɛʼ nɛ́ a mɔɛn, ɔmbɔ́ əgín isúgəniʼ ngim ɛ́mámoyááyɛn.

¹²Əgəə́bə́ə a kɛnɛŋ kɛ́ Sɛ́aŋ Ɔsɔgɛn pɔɔd yɛɛ́lɔɛ́gɛ Tɔsɔm, əgiim əgiig nɛ́gɔŋ, Nɛlaamɛʼ nɛ́ a mɔɛn nɛ́yɛ́ɛ a pɛdá. Panɔɛyɛʼ pɛdá pálɛ əguunə kusiəd nɛ́lɛ́.

¹³Palɔɛgɛʼ pɛbán pá Táán piim, na nkə kɛ́ kɛ́lɛɛ́ a pɛcɛm pɛ́ Moyíis, kɛ́ɛ́sɔ́yɔ kɛbán kɛ́ a Nɛlaamɛʼ nɛ́ a mɔɛn, kəə́bə́ə́ a niə́bə́ə, agɛɛn əgiig a kɛnɛŋ kɛ́ Sɛ́aŋ.

¹⁴Nyɔ́lɛ́ ogo aa alɛɛ́ Ɛlɛ́as nyɔ́ píísə́ə́ lɛ́ alɛ́ɛ́ kimbuúlini, ná pumə́líʼtíníí.

¹⁵Taa, wɛ nyɔ́ olɛɛ́ na ntóɛŋ ɛgoob, óyoob!

¹⁶Náa, na ánɛ aa nfɛgɛɛ́ ɔsɛg wóonɛ ó nɛ́gɔŋ aáŋ! Pálɛ wɔnɔ́ poómbaa pá pálɛɛ́ pələndínə́ə́n a pɛdom, páasásananɛ tɔgɛ́ɛ́, pɔ́nɔ́:

¹⁷“Tɛyɛ́bogoɛ́n kubin a nudəə, pumbín! Tiə́də́ə́míni mandɛɛ, podɛálɛ́lɛ́ɛ́!”

¹⁸«Kɛ́lɛ lɛ́, ná Sɛ́aŋ əyíím, ayɛ́ɛ annɛ́ɛ́nɛ, aŋŋó! Pɔ́nɔ́ “Oʼto wə́ə́ŋ wándɛ ɔmbɛ́”.

¹⁹Mɔɔ́n o mɔɔd əə́ʼkiim. Nyɔ́lɛ́ alɛ lɛ́ aánɛ, aáŋo. Pɔ́nɔ́ “Poádála ə́, alɛ na kɛniɛ́niɛ́n, na kɛŋoɛ́ŋoɛ́n! Alɛ a nɛsɔ́g na Pagɔ́mmanɛʼ mag, na pɛɛlanɛʼ mabɛ́!” Náa, a niɛlɛʼ niə́ŋ áa pɔɔd pɛ́ɛ́lɛ́ŋ lɛ́ nsiŋ ɛ Táán ɛlɛ sáád.»

²⁰Yə́sus əə́bə́ə́ kosɔyɔn pɔɔd pá a pálɛ́ɛg ngim yɛ́ mangán miíŋ máyáyɛ́ɛ́lánɛ́ɛ́ kɔ. Ayɛ́ɛ agoboósɔyɔn a masɛd mɔ́ɔ́bɔn lɛ́ pádɛʼkáagasɛ ɔlaa wɔ́ɔ́bɔn. Yiísə́ə́ ɔnɔ́:

²¹«Maan na wɛ Kɔlasɛ́ɛŋ! Maan na wɛ Pɛdsáyída lɛ́ mangán má máyáyɛ́lɛ́ɛ́ a pəŋi, máyáyɛ́ɛlɛnɛ náan a Tíil na a Sɛdɔ́ɔŋ ná pɔɔd pá a pabálɛ́ɛg póob páyɛ́ɛ́lɛ ɔndɛɛ kɔ́gɔ́ɔg kalaʼ, pə́ə́ləndin kidí, pámáagasɛ ɔlaa wɔ́ɔ́bɔn[39]!

²²Kólɛ́ aa ndábodɛ́anɛ lɛ́ a wɔɔ́s ó pɛyɔm, Táán adɛndɛ́ɛ́ kolaŋ konyɛ́nɛn pɔɔd pá a Tíil na pá a Sɛdɔ́ɔŋ wɔnɔ́ ná alɛ́ɛ́ kobonyɛ́nɛnɛɛ́ pəŋi.

²³A wɛ Kaʼpɛlɛnáyum, waafɛg lɛ́ pálɛ́ɛ́ kogobágɛdɛ súʼtə́ə́ a mɔɛn á? Ndóo, pálɛ́ɛ́ kuguúsuuli a piíd lɛ́ mangán miim má máyáyɛ́lɛ́ɛ́ a ambaan yááŋ máyáyɛ́ɛlɛnɛ náan a Sodóom, ná pálɛ́ɛg yɛ́ɛy iligi a ɔlaa súʼtə́ə́ na nɛ́gɔŋ kɛ́[40]

²⁴Kólɛ́ aa ndábodɛ́anɛ lɛ́ a wɔɔ́s ó pɛyɔm Táán adɛndɛ́ɛ́ kolaŋ konyɛ́nɛn pɔɔd pá a Sodóom wɔnɔ́ ná alɛ́ɛ́ kogonyɛ́nɛnɛɛ́ wɛ.»

²⁵Ɛyaa ɛ́ kɛnɛŋ sɔɔŋ a ngim yɛ́ɛy, Yə́sus yiísiə́d tɔgɛ́ɛ́ əə́bə́ə́ kosɔyɔ nɛŋo a mɔɛn, ɔnɔ́: «Pisoyidiʼ na wɛ, Paabá, Sə́dúk wo nsí na mɔɛn! Nkə kɛ́ oyɔ́sɛ́gɛn na pá pálɛɛ́ afɛga lɛ́ pɔ́lɛ́ pálɛ na nsiŋ, páálɛŋ agaáyɛn pɔsɔ́g, oyásɛ́nɛn na pá pə́əgəə́siəd wɔnɔ́ muyənjə́g.

²⁶Ɛɛ́ɛ Paabá, náan aa kíyígugə́mmi lɛ́ wɛ́ɛlɛ a kɔdɛ́ɛ ɔʼtɛ́m koáŋ.

²⁷Mbáa ayɛ́nyɛɛ́ʼkɛn muim a ɔmbɔg yáam. Mɔɔd ɔdɛɔ́gɔ kɔ nyɔ́ aálɛŋ Mɔɔ́n ná kɛ́sánɛn əgín lɛ́ Mbáa nyɔ́lɛ́nyɔ́əsíŋ. Mɔɔd ɔdɛɔ́gɔ tɛn kɔ nyɔ́ aálɛŋ Mbáa ná kɛ́sánɛn əgín lɛ́ Mɔɔ́n nyɔ́lɛ́nyɔ́əsíŋ na pá aányɔ́ŋɛn lɛ́ ə́buúloodi Sɛ.

²⁸«Pəŋi piim pá poáʼkodɔmɛɛ́, pəŋi pá ponyáŋɛ́nɛ́nɛ́ɛ́ kɛnó kɛ́ kɛ́máboónyɔ́ŋ, mɛ́naan ná ndɛɛ́, ndaboyɛ́ʼkɛn kioyig.

²⁹Puə́liʼtini mɛ kɛnó, pósɔd a mɛ sugúluʼ. Mɛ, ndɛ na ɔʼtɛ́m ó kiwiiyiʼ, ntɛágaábágɛdɛ. Na mɛ, modáányɛ́ moáŋan móagɛɛn na kioyig[41]

³⁰lɛ́, sugúluʼ yaam ɛdɛɔ́gɔ nnasáŋ, kɛnó kɛ́am kɛfɛ́fɛ́n.»