Read Yambeta Maʼtɛ́as 12 Bible Online

Maʼtɛ́as 12 - Yambeta bible

Maʼtɛ́as 12

¹Wɔɔ́s ó kisúgiʼ kɛ́ Yúdɛn wúmmú a ngim yɛ́ɛy, Yə́sus ayɛ́ɛ agosan yɛ́ a malɛ́m má ngəŋ. Njaan ɛyɛ́ɛ abany paaʼkan pə́ə́ŋ. Wɔnɔ́ ná páyɛ́ɛ agosan kɔ, pə́ə́bə́ə́ kosɔɛ́lɛla nto yɛ ngəŋ, páanɛ[42]

²Ná Pafalɛsɛyɛ́ɛŋ pɛ́ɛ́dála náan, pííŋíən na Yə́sus pɔ́nɔ́ əə: «Waádála nkə kɛ́ paaʼkan pááŋ pálɛɛ́ agɛɛlɛ ə́? Adɛ́ kɛ́lɛ kɛcɛm lɛ́ pɛ́ɛlɛ náan wɔɔ́s ó kisúgiʼ ə́[43]!»

³Náa Yə́sus əə́buyúúlisini ɔnɔ́: «Podɛ́mbana nkə kɛ́ Tə́fid na pɔsɔ́g pá páyɛ́ɛ na nyɔ́lɛ́, páyɛ́ɛ́lɛ wɔɔ́s wó njaan ɛyɛ́boobány á?

⁴Kɛbán kɛ́ɛnɛ wɔnɔ́ ná yɛɛ́sɔ́d uʼkóó ó Táán, əə́siəd pɛlɛ́ɛd pɛ́ pɛ́ɛ́fɔ́nyɛn Táán, páánɛ́ pɔ́lɛ́ piim na pɔsɔ́sɔ́g pə́ə́ŋ ə́? Kɔmɔɛ́d lɛ́ pə́diʼkóogóodi toɛn tóonɛ lɛ́ pánɛ moom móom əə́? Adɛ́ moom móom móyɛ́ɛ kɛcɛm lɛ́ mɔɔd wɛndɛ́ŋ adɛnnɛ́ ná kɛ́sánɛn əgín lɛ́ payaaganɛʼ pɛfɔny pɔ́lɛ́bə́əsíŋ ə́[44]?

⁵Ɔmbɔ́ a pɛcɛm pɛ́ Moyíis tɛn oʼ, podɛʼkáabana kɔ lɛ́ payaaganɛʼ pɛfɔny póʼkóodi nsɔ́ɔ́ lɛ́ pálɛ əgud a Tɛ́mpɛl wɔɔ́s ó kisúgiʼ ə[45]?

⁶Kɛbán kímuʼ, mɛ ndabodɛ́anɛ lɛ́, nyɔ́ amááyɛn Tɛ́mpɛl alɛ kɔ áanɛ.

⁷Poyóbɛn kɔŋɛʼ nkə kɛ́ɛnɛ kɛ́ Táán yiísə́ə́ ɔnɔ́: Nkə kɛ́ ndɛɛ́ anyɔ́ŋɛn na pəŋi kɛ́lɛ lɛ́ póɛn na ntɛ́m ɛlaŋ. Adɛ́njaŋ ponyam aa ndɛɛ́ anyɔ́ŋɛn lɛ́ ná pomɛ́fɔnyan[46] Náan podɛʼkɛ́ɛ agɛɛ́ʼkɛn nsɔ́ɔ́ na pɔɔd póonɛ pá pádiɛlɛnɛɛ́ yoom yɛ́ ɛbɛ́.

⁸Lɛŋáan lɛ́ mɛ Mɔɔ́n o mɔɔd aa ndɛɛ́ nkúm ɛ kisúgiʼ.»

⁹Yə́sus aáság kodɛ́ɛmɛn, amɛ́ɛn ɔsɔd a yoog yɔɔbɔn ɛ pɛɔ́sɔ́gɔ́lɔ́n.

¹⁰Náan aa mɔɔd nyummú ayɛ́ɛ kɔ a yoog ɛ pɛɔ́sɔ́gɔ́lɔ́n, ombɔg úmmuʼ uʼkuə́n. Náa Pafalɛsɛyɛ́ɛŋ pɔ́nɔ́ na Yə́sus: «Ngɔ́ɔ́, pálɛ págoómɛ mɔɔd wɔɔ́s ó kisúgiʼ ə?» Pə́yímuŋíən náan lɛ́ ná pɔ́ɔŋ ɛgom ɛ́gomosɔ́mɛn lɛ́ alɛ agɛɛlanɛ kɔbɛ́.

¹¹Yə́sus əyíbuyúlísíni ɔnɔ́ na pɔ́lɛ́: «Oyaán úmmuʼ a ondáŋ wááŋan aa alɛɛ́ ogɛɛn lɛ́ alɛ na nodóm nuə́ŋ náa nuə́də́əŋ a niɛ́ wɔɔ́s ó kisúgiʼ, ɔ́ɔlɔb lɛ́ adɛálónɛ nólɛ́ ə́?

¹²Ánɛ úmmuʼ a ondáŋ wááŋan aa alɛɛ́ ogɛɛn lɛ́, alɛ na nodóm nuə́ŋ náa nuə́də́əŋ a niɛ́, ɔ́ɔlɔb lɛ́ adɛágɛɛn alónɛ ə́? Kɛ́maʼkɛɛn náan na nnyam, pɛnɛŋ pɛ́sɛ́g anɛ́ɛ́n na mɔɔd nyɔ́ amááyɛn yɛ́lɛ́! Pɛcɛm piə́s pɛ́mábɛyɛ́ʼkɛn anyóon filí lɛ́ tíɛlɛ kɔŋɛʼ wɔɔ́s ó kisúgiʼ!»

¹³Náa ɔnɔ́ na mɔɔd nyóon: «Tə́ə́míni ombɔg.» Mɔɔd aáság kudə́əmini ombɔg, wándɛ kə́lə́ŋ wɔnɔ́ wó ódɛʼkɛ́ɛ agobányɛ́ɛ́.

¹⁴Pafalɛsɛyɛ́ɛŋ pá páyɛ́ɛ kɔ áay pááság kolónan, pámɛ́ɛn agonyɛd ɛgɔny yɔ́ɔ́bɔn yɛ́ ɛgóón əguunə pungə́, tuə́ áa pálɛɛ́ págɛɛlɛ agomoyóon.

¹⁵Ná Yə́sus ayóób náan lɛ́ páʼkɛɛn amoyɔ́dɔɔgɛnɛ, aáság kodɛ́ɛmɛn áay, aásán. Ɛ́fɔlɛ́ ɛ́ pɔɔd íyímuyə́ən. Ungim nyɔ́ ayɛ́ɛ abany, Yə́sus ayɛ́moyóómɛ.

¹⁶Ayɛ́boyáágánan mbaŋ, ɔnɔ́: «Ná poándagɛɛnɛɛ́, podɛyɛ́ʼkwaaŋɛ.»

¹⁷Kɛ́yáyɛ́lɛ́ɛ́ náan lɛ́ ná nkə kɛ́ Ɛsayíi, ɔndɔɛgɛʼ pɛbán o Táán yiísə́ə́, kɛ́as. Yiísə́ə́ lɛ́:

¹⁸«Táán ɔnɔ́: Taa uʼkudin waam nyɔ́ njííyid aa nyóonɛ. Alɛ waam wo ɔʼtɛ́m. Ndɛ na tɔnyɔ́g na nyɔ́lɛ́. Ndamoyɛ́ʼkɛn Uŋun wáam. Alɛ́ɛ́ kɔlɔɛgɛnɛ mɔnɔŋ lɛ́ mbə́ʼkudə́nigəni pasáád.

¹⁹Adɛndɛ́ɛ́ kiim ásáŋa na pɔɔd, ədiim ásása. Pádɛndɛ́ɛ́ komoyóob aásása a angag á pungə́.

²⁰Adɛndɛ́ɛ́ kuyibənən kubúnə niob nɛ́ nɛáʼkoyómbɛlɛdɛɛ́, ammanánɛ kuwíiyi kius kɛ́ yug kɛ́ kíligíí əgusúiŋ. Alɛ́ɛ́ kɛɛnanan náan súʼtə́ə́ əgín aáʼkɛɛlɛ lɛ́ pasáád pə́siəd oʼkɔɔ.

²¹Mɔnɔŋ miim málɛ́ɛ́ komɛna pɛda na nyɔ́lɛ́[47]»

²²Pááság kiimin Yə́sus na mɔɔd nyummú nyɔ́ ayɛ́ɛ lɛ́ nyɔ́lɛ́ na woog, nyɔ́lɛ́ mummug lɛ́ uŋun wó ɔmbɛ́ óyɛ́ɛ na nyɔ́lɛ́. Yə́sus ayóómɛ mɔɔd nyóon, əə́bə́ə́ kosɔyɔ, aádɛ́ʼtɛganan.

²³Ungim nyɔ́ ayɛ́ɛ a kiʼtúú kɛ́ pɔɔd kɛ́ɛg yiígə́g. Páyɛ́ɛ agosɔyɔ pɔ́nɔ́ əə: «Nyóonɛ əə, ɔdɛɔ́gɔ Mɔɔ́n o Tə́fid aa alɛɛ́ náan əə́?»

²⁴Ná Pafalɛsɛyɛ́ɛŋ páyóób náan, pə́ə́bə́ə́ kosɔyɔ pɔ́nɔ́: «Pə́lə́səbul, nkúm ɛ məŋun má mabɛ́ aa ɛmoyɛ́ʼkɛ́nɛ́nɛ́ɛ́ toɛn tóod tó alɛɛ́ agoŋɛ́ŋŋaŋ məŋun má mabɛ́ na tólɛ́.»

²⁵Náa, Yə́sus yɛɛ́lɛŋɛn mafɛgaʼ má páyɛ́ɛ na mɔ́lɛ́ a ɔʼtɛ́m. Náa ɔnɔ́ na pɔ́lɛ́: «Nigúu niim nɛ́ pɔɔd pɔ́dɛɔ́gɔ unuʼ úmmuʼ, páagaánɔɛyɛ pɛdá pɔ́lɛ́ na pɔ́lɛ́, nɛ́lɛ nigúu nɛ́ níəwu. Pálɛ́ɛg ngim, na yoog ɛ pɔɔd ngim yɛ́ pɔɔd páagaánɔɛyɛ pɛdá pɔ́lɛ́ na pɔ́lɛ́, ɛdɛɔ́gɔ ɛgɛɛn yuudi.

²⁶Kɛ́maʼkɛɛn lɛ́ Sáʼtan aaŋɛŋ Sáʼtan, áay lɛ́ aagaánɔɛyɛ pɛdá nyɔ́lɛ́nyɔ́amɔɛ́d, tuə́ anɛ́ɛ́n áa Nɛlaamɛʼ niə́ŋ nɛ́lɛɛ́ nɛ́gɛɛn yuudi ə́?

²⁷A nɛáŋan polɛ afɛga poɔʼkɔ́ a toɛn tó Pə́lə́səbul aa ndɛɛ́ agoŋɛ́ŋŋaŋ məŋun má mabɛ́, pááŋan pɔɔd oóoʼ, a tó ánɛ aa pɔ́lɛ́ pálɛɛ́ agoŋɛ́ŋŋaŋ mɔ́lɛ́ ə́? A niɛlɛ nɛɔ́bɔn nɛ́ɛn, póóloodi pɔ́lɛ́báamɔɛ́d anyóon lɛ́ polɛ na nsɔ́ɔ́.

²⁸A fɔ́lɔ́b, a toɛn tó Uŋun ó Táán áa mɛ ndɛɛ́ agoŋɛ́ŋŋaŋ məŋun má mabɛ́. Pólɛŋ anyóon lɛ́ Nɛlaamɛʼ nɛ́ Táán niə́ʼkiim əgiig ná polɛɛ́.

²⁹Mɔɔd na mɔɔd ɔdɛɔ́gɔ ogosɔd a yoog ɛ sɔ́g nyummú nyɔ́ alɛɛ́ na toɛn, áanyáŋɛna moom muə́ŋ agosan na mólɛ́ fiɛ́d koyaŋ amoósanya. Əgín aáʼkomoogóda, áay aa aányáŋɛna muim mó mólɛɛ́ a noádɛʼ nó mɔɔd o toɛn nyóon agosan na mólɛ́.

³⁰Nyɔ́ ɔdɛɔ́gɔ na mɛ, alɛ nyɔ́ alɛɛ́ agɛnnɔɛyɛ. Nyɔ́ ɔdɛɔ́gɔ əgiʼkóminií kodáaŋɛ, alɛ agofámɛ kofámɛán.

³¹«Kólɛ́ aa nyɔʼkɔ́, Táán alɛ́ɛ́ kulisin pɔɔd kɔbɛ́ kuim kó páamoyɛ́ɛlanɛ, na pɛdog tɛn piim pɛ́ páamoodóga. Náa, nyɔ́ alɛ́ɛ́ kosɔyɔɔ́ niiŋ nɛ́ Uŋun wó Ufúlúʼtú kɔbɛ́, Táán adɛndɛ́ɛ́ kumuúlisin kóog kɔbɛ́.

³²Táán alɛ́ɛ́ kulisin nyɔ́ alɛ́ɛ́ kosɔyɔɔ́ niiŋ nɛ́ Mɔɔ́n o mɔɔd kɔbɛ́. Náa, nyɔ́ alɛ́ɛ́ kosɔyɔɔ́ niiŋ nɛ́ Uŋun wó Ufúlúʼtú kɔbɛ́, Táán adɛndɛ́ɛ́ kumuúlisin kɛ́lɛ́ ɔmbɔ́ a kɛnɛŋ kɛ́ɛnɛ kɛ́ nɛ́gɔŋ, ɔmbɔ́ a mədúg má yuudi.»

³³«Kɛnɛŋ kɛ́ kiɛd kɛ́lɛɛ́ kɛŋɛʼ, modámádám muə́ŋ tɛn mólɛ mɔŋɛʼ. Kɛ́maʼkɛɛn lɛ́ kɛ́abany, modámádám muə́ŋ móabany tɛn. Pálɛ agolɛŋ kiɛd áa modámádám muə́ŋ mó əə́guum.

³⁴Pəŋi ndɛg yɛ nfɛn yɛ́ɛnɛ, pəŋi pabɛ́ póonɛ! Nɔgɛ́ɛ́ nólaŋ nódɛɔ́gɔ nó kɛɛn a nnuʼ yaaŋan. Nkə kɛ́ kɛ́lɛɛ́ a ɔʼtɛ́m ó mɔɔd a kaadɛ aa kɛ́lɛɛ́ agolon a unuʼ wə́ə́ŋ.

³⁵Mɔɔd nyɔ́ alɛɛ́ ɔŋŋɛʼ, alɛ alónɛ pɛbán pɛ́ pɛŋɛʼ pɛ́ pɛ́lɛɛ́ a tugúm tuə́ŋ tó tɔŋɛʼ. Nyɔ́ alɛɛ́ ɔmbɛ́, alɛ alónɛ tɛn pɛbán pɛ́ pɛbɛ́ pɛ́ pɛ́lɛɛ́ a tugúm tuə́ŋ tó tobɛ́.

³⁶Náa, ndabodɛ́anɛ anɛ́ɛ́n lɛ́, wɔɔ́s ó pɛyɔm, pɔɔd pálɛ́ɛ́ kodɛ́lɛm a pɛyɔm a oʼto ó tɔgɛ́ɛ́ tó pɛ́ɛ́sɔ́yɔ, tɔgɛ́ɛ́ tó fiɛ́d na oʼto ó kɛbán

³⁷lɛ́, tɔgɛ́ɛ́ toáŋ áa tólɛ́ɛ́ kogoyɛ́ʼkɛnɛɛ́ kilumiʼ, ɔmbɔ́ lɛ́ nsɔ́ɔ́».

³⁸Palɛŋ pɛcɛm na Pafalɛsɛyɛ́ɛŋ pə́mmú pááság kodɛ́anɛ na Yə́sus pɔ́nɔ́: «Kɛlág, ɛɛlɛ kɛálɛ́ʼkán kɛ́ kíəbiíloodi lɛ́ olɛ Mɔɔ́n o Táán!»

³⁹Náa Yə́sus ɔnɔ́ na pɔ́lɛ́: «Pəŋi ɔsɛg wóonɛ ó nɛ́gɔŋ wó poyɛ́bɛ́nɛ́ɛ́, podɛágoóbɛnɛɛ́ Táán. Polɛ əgiŋíən lɛ́ nyɛ́ɛlɛ kɛálɛ́ʼkán. Ndóo, pudiə́giim agɛɛn na kɛálɛ́ʼkán kɛ́ndɛ́ŋ ná kɛ́sánɛn əgín kɛ́ɛg kɛ́ kɛ́yáyɛ́lɛ́ɛ́ na Sɛonáas, ɔndɔɛgɛʼ pɛbán o Táán.

⁴⁰Kɛ́lɛ lɛ́, yoom ímuʼ wɔnɔ́ ná Sɛonáas ayɛ́ɛ́lɛ mɔɔ́s mádáád na mədúg mádáád a kaadɛ ká kɛdám kɛ́ nsú, náan aa mɛ Mɔɔ́n o mɔɔd ndɛ́ɛ́ kɛɛlɛɛ́ tɛn mɔɔ́s mádáád na mədúg mádáád a nsí a kaadɛ.

⁴¹A wɔɔ́s ó pɛyɔm, pɔɔd pá a Niníif pálɛ́ɛ́ kodɛ́lɛm a udi wó ɔsɛg wóonɛ ó nɛ́gɔŋ páyɛ́boyɛ́ʼkɛn nsɔ́ɔ́ lɛ́ ná pɔ́lɛ́ páyóób nkə kɛ́ Sɛonáas ayɛ́bolɔɛ́gɛ́nɛ, pɛ́ɛ́gásɛ ɔlaa wɔ́ɔ́bɔn. Lɛŋáan lɛ́ nyɔ́ amááyɛn Sɛonáas alɛ áanɛ[48]

⁴²A wɔɔ́s ó pɛyɔm, ɔʼkɛ́ɛd nyummú, nkúm yɛ́ a nigúu nɛ́ kusuu, ɛlɛ́ɛ́ kodɛ́lɛm a udi wó ɔsɛg wóonɛ ó nɛ́gɔŋ. Ɛlɛ́ɛ́ koboyɛ́ʼkɛn nsɔ́ɔ́ lɛ́ yɛ́lɛ́ iyíím ɛ́dɛ́ɛmɛn laálá kɔ́gɔ́ɔg a əʼkúu yɛ́ nɛsom nɛ́ nsí nímmú əgiim agoob tɔgɛ́ɛ́ tó nsiŋ tó Salomɔ́ɔŋ[49] Lɛŋáan lɛ́ nyɔ́ amááyɛn Salomɔ́ɔŋ alɛ áanɛ.»

⁴³«Kɛnɛŋ kɛ́ uŋun wó ɔmbɛ́ wáálón a nkó ɛ mɔɔd, wə́bə́ə́ kiim úyə́yəə a pɛnɔ pɛ́ pifələ́ə́n, wə́əguunə kɛnɔ kɛ́ wáagɛɛn ələndin. Ódɛɔ́ŋɛn

⁴⁴ná úsəə kɔ na wólɛ́wóamɔɛ́d wɔnɔ́: “Ndəguúlini a yoog yaam, kɛnɔ kɛ́ njɛ́ɛ”. Ná wə́əgimbuúlini, wóaboan yoog ɛlɛ iyó, pámóóla, páálɛŋ kusóboni.

⁴⁵Ná wɛ́ɛn anɛ́ɛ́n anyama məŋun mɛ́ndɛ́ŋ máʼtáan na mábaan má mə́míʼkíni kɔyɛb a komoyááyɛn nyɔ́lɛ́, píimənən, pɔ́dɔsɛm a oʼkɔɔ wɔ́ɔ́bɔn. A komananɛ, oʼtɛ́lɛm ó mɔɔd nyóon wə́əgiiʼkini kɔyɛb agaáyɛn wɔnɔ́ ná ayɛ́ɛ kalaʼ. Taa əgín náan tɛn aa kɛ́lɛ́ɛ́ kɛɛnɛɛ́ na ɔsɛg wóonɛ ó nɛ́gɔŋ wó ólɛɛ́ ɔmbɛ́.»

⁴⁶Yə́sus alɛ agosɔyɔ kɔ na pɔɔd pá pə́yə́yiilin ə, na ŋŋí, na pomóŋŋí foáy. Pɛ́ɛ́lɔ́b a táán, pɔ́sɔ́d. Páyɛ́ɛ əguunə lɛ́ pɔ́sɔyɔ na nyɔ́lɛ́. [

⁴⁷Náa mɔɔd nyummú aámodɛ́anɛ ɔnɔ́: «Táá ŋŋí waaŋ na pomóŋŋí pááŋ áa póonɛ pálɛɛ́ a táán, páanyɔ́ŋɛn kosɔyɔ na wɛ.»]

⁴⁸Yə́sus əyímuyúlísíni ɔnɔ́: «Ánɛ aa alɛɛ́ ŋŋí waam əə́? Pa ánɛ aa pálɛɛ́ pomóŋŋí páam əə́?»

⁴⁹Aáság kaágasɛ ná paaʼkan pə́ə́ŋ pálɛɛ́, əmə́bulóódi na ombɔg, ɔnɔ́: «Taa ŋŋí waam aa nyóonɛ. Pomóŋŋí tɛn páam aa póonɛ.

⁵⁰Kɛ́lɛ lɛ́, nyɔ́ alɛɛ́ agɛɛlɛ nɛnyɔ́ŋɛn nɛ́ Sɛ waam nyɔ́ alɛɛ́ a mɔɛn, nyóon aa alɛɛ́ móŋŋí waam nyɔ́ ɔnɔ́mɛɛd, na móŋŋí waam nyɔ́ ɔʼkɛ́ɛd na ŋŋí waam.»