Read Yambeta Maʼtɛ́as 14 Bible Online

Maʼtɛ́as 14 - Yambeta bible

Maʼtɛ́as 14

¹A kɛnɛŋ kɛ́go kɛ́ɛg, Ɛlóod aa ayɛ́ɛ alaamɛ a Kalilə́ə. Ná ayóób nugəm nó Yə́sus,

²yiísə́ə́ ɔnɔ́ na pəgudin pə́ə́ŋ: «Sɛ́aŋ Ɔsɔgɛn pɔɔd aa əə́ʼkiiʼkini kiim yóndɛgɛɛ́, kólɛ́ aa alɛɛ́ na toɛn tóod tó kɛɛlɛ mangán.»

³Kɛ́lɛ lɛ́, Ɛlóod aa ayɛ́ɛ́lɛ lɛ́ pə́gumin Sɛ́aŋ, pámoyáág a kɛáŋ kɛ́ pasɛŋ, pámoódagɛdɛ a yoog yɛ njaan. Ayɛ́moyáág náan a yoog yɛ njaan a oʼto wó Ɛlodɛ́ad, oʼkán ó móŋŋí Filíib lɛ́ əyímusíəd, aágóan.

⁴Yiílíŋ lɛ́ Sɛ́aŋ ayɛ́modɛánɛ ɔnɔ́ na nyɔ́lɛ́: «Ɛlóod, omɛ́ɛ́lɛ kɔbɛ́ əgusiəd oʼkán ó móŋŋí waaŋ[53]!»

⁵Ɛlóod ayɛ́ɛ əguunə komoyóon, náa ayɛ́ɛ agodammana Yúdɛn lɛ́ ungim yɛɛ́lɛŋɛn lɛ́ Sɛ́aŋ alɛ ɔndɔɛgɛʼ pɛbán o Táán.

⁶Wɔɔ́s wúmmú anɛ́ɛ́n wó Ɛlóod ayɛ́ɛ agɛɛlɛ wɔɔ́n wə́ə́ŋ wó a kɛalɛn kɛ́ əyə́biə́níí, mɔɔ́n nyɔ́ ɔʼkɛ́ɛd wó Ɛlodɛ́ad yiíbín a udi ó pɔɔd pá pə́yíímən a wɔɔ́n. Kubin kuə́ŋ kuísóbin Ɛlóod kɛ́fɔlɛ́,

⁷aáság kaácɛm ɔnɔ́ na moóngaa ɔʼkɛ́ɛd nyóon: «Nkə kiim kɛ́ wəə́giŋíən a pibúnə́n, ndagoyɛ́ʼkɛn.»

⁸Ŋŋí əyímuulə́b, aáság kɛɛn əŋíən na Ɛlóod ɔnɔ́: «Ɛ́nyɛɛ́ʼkɛn áanɛ nɛ́gɔŋ, oʼto ó Sɛ́aŋ Ɔsɔgɛn pɔɔd a maʼtɛ́ngɛ́lɛ́!»

⁹Ná nkúm Ɛlóod ayóób náan, ɔʼtɛ́m wə́ə́ŋ wɛ́ɛ́yɛ́b. Náa, wɔnɔ́ ná ayɛ́ɛ aáʼkolɛg unuʼ, amáyaácɛma a udi ó pɔɔd pá yɛɛ́dɔ́ŋɔ́nɔ a wɔɔ́n, aáság kusəə lɛ́ pɛ́ɛn asom Sɛ́aŋ oʼto, pámoyɛ́ʼkɛn.

¹⁰Náan aa páyɛ́ɛ́n asom Sɛ́aŋ oʼto a yoog yɛ njaan,

¹¹pə́míim páág a maʼtɛ́ngɛ́lɛ́, pámɛ́ʼkɛn na moóngaa ɔʼkɛ́ɛd. Nyɔ́lɛ́ tɛn aáság kusiəd, amɛ́ɛn agɛɛ́ʼkɛn na ŋŋí.

¹²Paaʼkan pá Sɛ́aŋ pááság kiim, pə́ə́siə́d kɛlóŋ, pámɛ́ɛn əni. Páyɛ́ɛ́n adɛ́anɛ na Yə́sus nkə kɛ́ kɛ́yásánɛ́ɛ́.

¹³Ná Yə́sus ayóób náan, yiísiə́d kɛʼkɔ́m agɛɛn a kɛnɔ kɛ́ kifələ́ə́n. Ayɛ́ɛ́n kɔ nyɔ́lɛ́nyɔ́əsíŋ. Wɔnɔ́ ná pɔɔd pɛ́ɛ́lɛ́ŋ lɛ́ kɔ́gɔ́ɔg aa amɛ́ɛn, pə́yíím pə́bugig pálɛ́ɛg ngim, kiʼtúú kilúd əgumuyə́ən. Pɛ́ɛ́dáŋána na ambaan, na ɛbá ɛ́ məní na ɛbá ɛ́ məní.

¹⁴A nisuu niə́ŋ nɛ́ kɛʼkɔ́m ná páyɛ́ɛ́n əgiig kɔ, Yə́sus yɛɛ́dála kɛnɔ kɛándɛ miíi. Maan mə́yímusíəd na pɔ́lɛ́, əə́bə́ə́ koómanɛ pabámbany pá pɔɔd pə́yíímən na pɔ́lɛ́.

¹⁵Ná niób níyíím əgiig, paaʼkan pə́ə́ŋ páyáyɛ́ʼtɛ́nɛ́ɛ́ a ɛbá yə́ə́ŋ, pɔ́nɔ́ na nyɔ́lɛ́: «Sə́dúk, kɛnɔ kɛ́ɛnɛ kɛ́ tɛlɛɛ́ a kɛ́lɛ́ kɛ́lɛ a kifiidi, náan aa wɔɔ́s tɛn wáʼkɛɛnɛɛ́. Tɛánɛ́ na pɔɔd póonɛ, pɛ́ɛn a moyaa mó əʼkúu mó mólɛɛ́ áanɛ ndúmiʼ, pɛ́ɛn əgəə́dumin kɔ́gɔ́ɔg, páwɛɛn yoom yɛ́ pálɛɛ́ págonɛ.»

¹⁶Yə́sus əyíbuyúlísíni ɔnɔ́: «Íʼi, kɛ́dɛɔ́gɔ lɛ́ pɛ́ɛn əgəə́dumin. Ɛ́boyɛ́ʼkɛ́naan moom mó konɛ pəŋibáamɔɛ́d.»

¹⁷Náa pɔ́nɔ́ na nyɔ́lɛ́ əə: «Pəsi tigóódi pɛlɛ́ɛd pɛ́ʼtáan súg áanɛ, na pusú póbaan.»

¹⁸Yə́sus aáság kusəə ɔnɔ́ na pɔ́lɛ́: «Puínyiimin na moom móom áanɛ.»

¹⁹Náa ɔnɔ́ na pɔɔd, pányɛŋ mbɛ́n, pə́ləndin kɔ. Yiísiə́d pɛlɛ́ɛd pɛ́ɛb pɛ́ʼtáan na pusú póbaan, aábágɛ əngis a mɔɛn, amɛ́ʼkɛn pisoyidiʼ na Táán, aábɛ́ŋa, amɛ́ʼkɛn na paaʼkan pə́ə́ŋ lɛ́ páaban ungim ánɛ. Pááság kaaba.

²⁰Ungim nyɔ́ ayɛ́ɛ kɔ, yɛɛ́nɛ́, əə́yíid, moom moɔ́lɔb. Pɛbɛŋ pɛ́ pɛ́ɛ́lɔ́b, paaʼkan pɛ́ɛ́gómmánɛ, piə́yə́ə́g mɔsaŋɛʼ mówád na móbaan[54]

²¹Pá pɛ́ɛ́nɛ́ pɛlɛ́ɛd pɛ́ɛb páyɛ́ɛ yoom wɔnɔ́ tɔ́ɔ́sɛn ɛ pɔɔd ɛ́ʼtáan. Fiɛ́d kobana pagɛ́ɛd na poómbaa.

²²Əgín kɔ áay a ngim yɛ́ɛy, Yə́sus aáság kusəə na paaʼkan pə́ə́ŋ lɛ́ pə́siəd kɛʼkɔ́m, páyaag nsɛ́ɛ́ ɛ noom yɛ́ɛy káag, nyɔ́lɛ́ əədíin yiim ə́buyə́ən a ngim, aayag kɛɛlɛ lɛ́ pɔɔd púúləni.

²³Ná ayɛ́ɛ əə́ʼkudíin yɛɛlɛ lɛ́ ungim yɛ́ɛn, yɛɛ́bág agɛɛn ɔgɔɔ́sɔ́gɔlɔn Táán a oʼkon a mɔɛn. Niób nɛ́ɛ́mán kusuu nyɔ́lɛ́ əgín kɔ́gɔ́ɔg nyɔ́lɛ́nyɔ́əsíŋ.

²⁴Kɛʼkɔ́m kɛ́ pɔɔ́n pə́ə́ŋ pá maʼtom páyɛ́ɛ a kɛ́lɛ́ kɛ́yɛ́ɛ kiə́ʼkəə́súid, kɛándɛ laálá na ɛbá. Kigud kɛ́yɛ́ɛ əgufiŋ na toɛn a udi wɔ́ɔ́bɔn, pɛmɔ́s pɛ́ məní pɛ́agaádóɛdan a kɛʼkɔ́m, wɔnɔ́ kɛámɛ́ngɛsɛ.

²⁵Əgiim əgiig a pɛbáŋɛn pɛ́ koany, pádála agá Yə́sus alɛ əgiim ná pɔ́lɛ́ pálɛɛ́. Ayɛ́ɛ agodáŋana a məní na ambaan wɔnɔ́ alɛ agá a nsí mmɔɛ́d, ənnímin.

²⁶Ná páyɛ́moodála, wɛɛ́y úyíbugúmin, pə́ə́bə́ə́ kuliminə kwag kwag, kwag, páagaányam pɔ́nɔ́: «Tiə́gú o, kiíd áa kɛ́lɛɛ́nɔ.»

²⁷Náa, nyɔ́lɛ́ aáság koság kobodɛ́anɛ ɔnɔ́: «Wiiyíən ɔʼtɛ́m, podɛʼtámmána, mɛ áa ndɛɛ́nɔ.»

²⁸Náa Píɛ ɔnɔ́ na nyɔ́lɛ́: «Sə́dúk, kɛ́maʼkɛɛn fɔ́lɔ́b lɛ́ wɛ áa olɛɛ́nɔ, ɛ́ʼtɛánɛ́, mɛ tɛn nsɔd a məní, ntáŋana, tiə́bun na wɛ.»

²⁹Náa Yə́sus ɔnɔ́ na nyɔ́lɛ́: «Píɛ, Mɛ́ɛn.» Píɛ aáság kusuu a kɛʼkɔ́m, əə́bə́ə́ kodáŋana a məní agɛɛn əgəə́bun na Yə́sus.

³⁰Alɛ agodáŋana anɛ́ɛ́n kɔ agɛɛn ná Yə́sus alɛɛ́, aáság kodála wɔnɔ́ ná kigud kɛ́lɛɛ́ əgufiŋ na toɛn. Wɛɛ́y wááság kumuúgumin, əə́ndəsuu məní. Píɛ aáság kudóʼtin kiʼkíŋ, ɔnɔ́: «Əə́əy Sə́dúk, sɛ́gɔɔ o! Ɛ́njɔɔyɛ́!»

³¹Yə́sus aáság koság komodámɛn ombɔg, əmə́mugúmin. Náa ɔnɔ́ na nyɔ́lɛ́: «Píɛ, wəə́sún a ɔʼtɛ́m lɛ́ nkə? Kəə́liʼtiniʼ koáŋ kúligi kudom ə́ə!»

³²Pááság kuúlini kobag a kɛʼkɔ́m. Əgín tɛn ná páyáág ongoo a kɛʼkɔ́m, kigud kɛ́ kɛ́yɛ́ɛ əgufiŋ na toɛn kɛáság kodɔɔ.

³³Ungim nyɔ́ ayɛ́ɛ a kɛʼkɔ́m a kaadɛ əyímudúmin əndu a nsí, ɔnɔ́: «A fɔ́lɔ́b, wɛ olɛ Mɔɔ́n o Táán!»

³⁴Pííyíbə́nən koyaag nsɛ́ɛ́, pámɛ́ɛn alon a nigúu nɛ́ Kɛnɛsalɛ́ɛd.

³⁵Pɔɔd pá a kɛnɔ kɛ́ɛg páyɛ́moólɛ́ŋ, pááság kolaamɛ kɛnɔ kiim lɛ́ aándɛ áay. Pə́yímuyíímin kɔ na pabámbany piim.

³⁶Páyɛ́ɛ amoyɔ́sɔ́gɔlɔn lɛ́ ə́buudi pɔ́lɛ́ pɔ́dɔ́bɛd ɔmbɔ́ əgín ɔmbɛb ó kilə́ə́ kiə́ŋ. Ungim tɛn nyɔ́ yɛɛ́dɔ́bɛd ɔmbɛb wə́ə́ŋ ó kilə́ə́, ɔyɔ́ɔ́y.