Read Yambeta Maʼtɛ́as 15 Bible Online

Maʼtɛ́as 15 - Yambeta bible

Maʼtɛ́as 15

¹Pafalɛsɛyɛ́ɛŋ na palɛŋ pɛcɛm pə́yíím pádɛ́ɛmɛn a Yolósalɛm, pámɛ́ɛn aboan Yə́sus, náa pɔ́nɔ́ na nyɔ́lɛ́:

²«A igə aa paaʼkan pááŋ pɔ́lɛ́ pɔ́dɛɔ́gɔ agonyádɛɛ́ pisiə́g pɛ́ pɛmbáa əə́. Pálɛ agonɛ́ɛnɛ pádɛásɔ́gɛ́ɛ́ ɔmbɔg agaásɔgɛn lɛ́ nkə ə́?»

³Yə́sus əyíbuyúlísíni ɔnɔ́ na pɔ́lɛ́: «Pəŋibáamɔɛ́d óoʼ, a igə aa podɛɔ́gɔ agoóbɛnɛɛ́ pɛcɛm pɛ́ Táán, polɛ agá əguyə́ən pisiə́g pɛáŋan pɛ́ pəŋibáamɔɛ́d ə́?

⁴Kɛ́lɛ lɛ́, Táán yiísə́ə́ ɔnɔ́: “Nyáádɛ sɛ waaŋ na ŋŋí waaŋ.” Wɛ nyɔ́ wəə́səə na sɛ waaŋ, oó lɛ́ na ŋŋí waaŋ wɔʼkɔ́: “Tuúdudúú.” Wɛ nyóon olɛ lɛ́ págoyóon[55]

⁵Náa, pəŋi anɛ́ɛ́n óoʼ! Adɛ́ polɛ agaaʼkananɛ poɔʼkɔ́, “mɔɔd alɛ ogodɛ́anɛ na sɛ ɔmbɔ́ lɛ́ na ŋŋí lɛ́: Ngab yɛ́ nyiígóodi lɛ́ nkoyɛ́ʼkɛn agogoɛ́bɛ yaáʼkodɛ́lɛm a oʼto ó Táán á!

⁶Náan oóoʼ, adɛ́ poɔʼkɔ́ póob pə́diyíʼkíni konyáadɛ aa nyóon sɛ wɔɔbɔn na ŋŋí wɔɔbɔn kə́mmú ə́.” A niɛlɛʼ nɛ́ɛn, adɛ́ kuyúnjugəni aa polɛɛ́ əguyúnjugəni nkə kɛ́ Táán alɛɛ́ əgusəə, lɛ́ ná pə́yə́ən agá nkə kɛ́ pisiə́g pɛáŋan pɛ́ pəŋibáamɔɛ́d pɛ́lɛɛ́ əgusəə ə!

⁷Polɛ fɔ́lɔ́b moɔ́ŋɛ́ná pusú wɔnɔ́ ná Ɛsayíi, ɔndɔɛgɛʼ pɛbán o Táán yiísə́ə́ a kidíídí kɛáŋan ɔnɔ́,

⁸Táán ɔnɔ́: “Ndɛg yɛ́ɛnɛ ɛlɛ agɛnyáadɛ əgín na unuʼ na unuʼ, kɔmɔɛ́d lɛ́ a ntɛ́m yɔɔbɔn a kaadɛ, pálɛ afɛga ndɛ́ŋ.

⁹Pɛɔ́sɔ́gɔ́lɔ́n pɛɔ́bɔn na nkə kiim kɛ́ pálɛɛ́ agɛɛlɛ agɛnyɛɛ́ʼkɛn nnyáádɛ́ kɛ́lɛ iyó lɛ́ ndə́b ngim yɛ́ pálɛɛ́ agaaʼkananɛ pɔɔd, ɛlɛ yɛ́ ɛlɛɛ́ a pisiə́g pɛ́ pɔɔd[56]”»

¹⁰Yə́sus aáság kodɔ́ŋɔn kiʼtúú kɛ́ɛg, náa ɔnɔ́ na pɔ́lɛ́: «Ɛ́njaádámɛ́gɛ́an pəŋi piim kɔŋɛʼ, puób nkə kɛ́ɛnɛ kɛ́ ndɛɛ́ əgusəə.

¹¹Adɛ́njaŋ nkə kɛ́ mɔɔd aágaáyáág a unuʼ aa kíəmuúfiləni, ndóo. Nkə kɛ́ kɛ́lɛɛ́ agolon a unuʼ wə́ə́ŋ áa kíəmuúfiləni.»

¹²Paaʼkan pə́ə́ŋ pááság kaáyɛʼtɛnɛ a ɛbá yə́ə́ŋ, náa pɔ́nɔ́ na nyɔ́lɛ́: «Sə́dúk, waálɛŋ lɛ́ Pafalɛsɛyɛ́ɛŋ pɛ́ɛ́yɛ́b kusiəd tɔgɛ́ɛ́ toáŋ tóod a?»

¹³Náa Yə́sus ɔnɔ́ na pɔ́lɛ́: «Lɛŋáan lɛ́ yoom yiim yɛ́ Sɛ waam nyɔ́ alɛɛ́ a mɔɛn aʼkónɛnɛɛ́, pálɛ́ɛ́ kuwu yɛ́lɛ́.

¹⁴Íbudíən pɔ́lɛ́, pálɛ pɔɔd pá woog pá pə́ədulə pɔsɔ́g pɔɔd pá woog. Ongwongwóg əməʼkudulə sɔ́g ongwongwóg, pɔ́lɛ́ piim pə́ədə́əŋ a niɛ́.»

¹⁵Píɛ aáság kusiəd tɔgɛ́ɛ́, ɔnɔ́ na Yə́sus: «Ɛ́bɛyásɛ́nɛn yisí yɛ́ ɛlɛɛ́ a nkaʼtɛ́n yɛ́ɛy yi.»

¹⁶Yə́sus ayɛ́bodɛánɛ ɔnɔ́ na pɔ́lɛ́: «Pəŋi tɛn podɛ́njɔ́ɔ́ŋ nsiŋ ə́?

¹⁷Podɛ́njóób lɛ́ nkə kiim kɛ́ mɔɔd aágaáyáág a unuʼ, kíəmuúsuu a kaadɛ ná ánɛaŋɛn a oʼkɔ́g ɔ́?

¹⁸Kɔmɔɛ́d lɛ́ nkə kɛ́ kíəgiim kɛ́lon a unuʼ ó mɔɔd, kɛ́lɛ nkə kɛ́ kíəgiim kɛ́lon a ɔʼtɛ́m wə́ə́ŋ a kaadɛ. Kɛ́lɛ́ aa kíəmuúfiləni

¹⁹lɛ́ a ɔʼtɛ́m ó mɔɔd a kaadɛ aa mafɛgaʼ má mabɛ́ málɛɛ́ əgiim. A ɔʼtɛ́m wə́ə́ŋ a kaadɛ aa mɔɔd aáfɛga lɛ́ nyɔ́lɛ́ yóon sɔ́g, yɛ́ɛlɛ kɛdaŋ, yɛ́ɛlɛ pɛɔg, yííbə, ádɛ́lɛm mbaasɔ́ yɛ́ mbɛ́, ádóga pɔsɔ́g.

²⁰Táá pɛbán pɛ́ píəfiləni mɔɔd a pɛ́ɛb. Adɛ́njaŋ lɛ́ waánɛ́ɛ́nɛ odɛásɔ́gɛ́ɛ́ ɔmbɔg, ndóo.»

²¹Yə́sus aáság kodɛ́ɛmɛn áay agɛɛn a kɛsom kɛ́ nsí kɛ́ Tíil na kɛ́ Sɛdɔ́ɔŋ[57]

²²Ɔʼkɛ́ɛd nyummú, ntóón ɛ Kanaáŋ yɛ́ ɛyɛ́ɛ kɔ áay yaáság kiim, yəə́bə́ə́ kodam ɛ́sɔyɔ na Yə́sus yɔ́nɔ́: «Əə́əy Sə́dúk, sɛ́gɔɔ ɛ́ɛʼtá maan, wɛ Mɔɔ́n o Tə́fid! Mɔɔ́n waam nyɔ́ ɔʼkɛ́ɛd əndigi kə́mmú na ngə́, uŋun wó ɔmbɛ́ ólɛ əgumuyə́bi na toɛn.»

²³Yə́sus yiílə́ndin əgín sáb, ambaalɛ ɔʼkɛ́ɛd nyóon. Paaʼkan pə́ə́ŋ pááság kaáyɛʼtɛnɛ agomoyɔ́sɔ́gɔlɔn pɔ́nɔ́ na nyɔ́lɛ́: «Mayɛ́ɛ́lɛ́nɛ ɔʼkɛ́ɛd nyóonɛ nkə kɛ́ aányɔ́ŋɛn aáŋ, ná yɛ́ɛn, ədiyíʼkíni kɛbɛlɛ́san.»

²⁴Náa Yə́sus ɔnɔ́ na pɔ́lɛ́: «Táán əyíím yɛ́ʼtom a nsí yɛ́ɛnɛ əgín a oʼto wó ndɛg yɛ Ɛ́sɛlayɛl yɛ́ ɛlɛɛ́ wɔnɔ́ todóm tó tuíním ngə́.»

²⁵Ná ɔʼkɛ́ɛd nyóon ayóób náan, aáság kɛɛn ədə́əŋənən Yə́sus a ambaan, ɔnɔ́ na nyɔ́lɛ́: «Sə́dúk, sɛ́gɔɔ ɛ́nyɛɛ́bɛ́!»

²⁶Yə́sus əyímuyúlísíni ɔnɔ́ na nyɔ́lɛ́: «Ndóo, kɛ́dɛɔ́gɔ kɛŋɛʼ lɛ́ pə́siəd moom mó konɛ mó pɔɔ́n pá pɔɔd agodo na pobo.»

²⁷Ɔʼkɛ́ɛd əyúlísíni na Yə́sus ɔnɔ́: «Ɛɛ́ɛ Sə́dúk! Kɛ́lɛ náan fɔ́lɔ́b. Náa, adɛ́ pubum pó pólɛɛ́ əgudə́əŋən kɛnɛŋ kɛ́ pəsə́dúg pɔ́ɔ́bɔn pálɛ agonɛ́ɛnɛ, ándɛ pɔɔ́n pá pobo páabáda ə́!»

²⁸Áay anɛ́ɛ́n áa Yə́sus yɛɛ́dɛánɛ na ɔʼkɛ́ɛd nyóon ɔnɔ́: «Íyowó, omáág fɔ́lɔ́b oʼto na Táán. Ágoyɛ́ʼkɛn nkə kɛ́ɛg kɛ́ olɛɛ́ amoyálɛɛlɛn aá.» Əgín tɛn ná Yə́sus yiísə́ə́ náan, mɔɔ́n wo ɔʼkɛ́ɛd nyóon aáság koság koom.

²⁹Yə́sus aáság kodɛ́ɛmɛn áay agɛɛn a ɛbá ɛ́ noom nó Kalilə́ə. Ayɛ́ɛ́n ələndin a oʼkon a mɔɛn.

³⁰Pɔɔd pááság kiimən kɔ piíŋ, a piʼtúú a piʼtúú. Pə́yíímən kɔ lɛ́ na pɔɔd pá pɛnɛ́m, na powongwóg, na pɛgɔd, na pəmummug, na pabámbany tɛn pə́mmú piíŋ. Pááság kuyiilə pɔɔd póob piim a udi ó Yə́sus, amáboyóómánɛ.

³¹Náan aa pɔɔd páyɛ́ɛ əgəə́wúnəni, páagɛɛ́ʼkɛn nugəm na Táán yɛ Ɛ́sɛlayɛl, ná pɛ́ɛ́dála pəmummug pɔ́ndɔɔsɔyɔ, pɛgɔd pɛ́adáŋana, pɔɔd pá pɛnɛ́m páʼtiɛsa kə́mmú, powongwóg páadɛ́ʼtɛganan.

³²Yə́sus yɛɛ́dɔ́ŋɔn paaʼkan pə́ə́ŋ, ɔnɔ́ na pɔ́lɛ́: «Mbilígɔɔ́ʼkɔn yəə́ʼkisiəd kɛ́fɔlɛ́ na pɔɔd póonɛ lɛ́ mədúg mádáád áa móonɛ pálɛɛ́ əgiim pínjə́njən, pə́ndigi kə́mmú na yoom ɛ́ konɛ. Ntɛányɔ́ŋɛn kubuudi lɛ́ púúləni pagaadɛ iyó, ongɛn wáaboyag, pə́mmú pə́ədə́əŋ a ngə́.»

³³Náa paaʼkan pə́ə́ŋ pɔ́nɔ́ na nyɔ́lɛ́: «Ə́lə́ə́ áa tɛɔ́gɔɔŋ anɛ́ɛ́n moom mó tɛlɛɛ́ págɛɛ́ʼkɛn na kiʼtúú kɛ́ pɔɔd kɛ́ɛnɛ kiim, kíiyíid əə́? Pəsi a póonɛ tɛlɛɛ́ a kɛnɔ kɛ́ kifələ́ə́n!»

³⁴Yə́sus əyíbuŋíən ɔnɔ́ na pɔ́lɛ́ əə: «Pugóódi pɛlɛ́ɛd pɛ́sɛ́g áay əə́?» Náa pɔ́nɔ́ na nyɔ́lɛ́: «Tigóódi áanɛ, pɛlɛ́ɛd pɛ́ʼtáan na pɛ́baan, na musúúsú.»

³⁵Náa ɔnɔ́ ungim ə́ləndin a nsí.

³⁶Yiísiə́d pɛlɛ́ɛd pɛ́ɛb pɛ́ʼtáan na pɛ́baan na musúúsú, amɛ́ʼkɛn pisoyidiʼ na Táán, aábɛ́ŋa, amɛ́ʼkɛn na paaʼkan pə́ə́ŋ lɛ́ páaban ungim. Pááság kaaba.

³⁷Ungim nyɔ́ ayɛ́ɛ kɔ yɛɛ́nɛ́, əə́yíid. Paaʼkan pɛ́ɛ́gómmánɛ pɛbɛŋ pɛ́ pɛ́ɛ́lɔ́b, piə́yə́ə́g mɔsaŋɛʼ móʼtáan na móbaan.

³⁸Əgín panɔ́mɛɛd na panɔ́mɛɛd pá pɛ́ɛ́nɛ́ moom móom páyɛ́ɛ tɔ́ɔ́sɛn ɛ pɔɔd íniʼ, fiɛ́d kobana pagɛ́ɛd na poómbaa.

³⁹Yə́sus aáság kɛɛlɛ anɛ́ɛ́n lɛ́ pɔɔd púúləni. Ná ungim ayɛ́ɛ aáʼkɛɛn, nyɔ́lɛ́ aáság kudíin abag a kɛʼkɔ́m agɛɛn a kɛsom kɛ́ nsí kɛ́ Magadáan[58]