Read Yambeta Maʼtɛ́as 16 Bible Online

Maʼtɛ́as 16 - Yambeta bible

Maʼtɛ́as 16

¹Pafalɛsɛyɛ́ɛŋ na Pasadosɛyɛ́ɛŋ páyɛ́ɛ əguunə kudə́əŋi Yə́sus a kisindiʼ. Náan aa páyɛ́ɛ́n amoóboan, pɔ́nɔ́ na nyɔ́lɛ́: «Ɛɛlɛ kɛálɛ́ʼkán kɛ́ kíəbiíloodi lɛ́ Táán áa əyíím ágoodom.»

²Náa Yə́sus ɔnɔ́ na pɔ́lɛ́: «Pəŋi polɛanɛ lɛ́ ná niób níəsuu, poɔʼkɔ́ kɛnɛŋ kɛ́ naánɛ́ kɛádɛ́ɛ́, mbálámɔɛn ɛlɛ póóʼkóʼkóʼkó.

³Ná koany kóagaáyɛnɛ, poɔʼkɔ́ wɔɔ́s ó naánɛ́ wóayɛb, mbálámɔɛn ɛlɛ túgúgúgú. Əgín a nɛdɛ́ʼtɛg nɛ́ɛn nɛ́ poádɛ́ʼtɛg mbálámɔɛn, polɛ agolɛŋ kaanɛn nkə aa kɛ́agaásan wɔɔ́s wóow. Náa, pɛálɛ́ʼkán pɛ́ pɛ́lɛɛ́ agaásan a kɛnɛŋ kɛ́ɛnɛ kɛ́ tigódíí, podɛɔ́gɔ agolɛŋ kaanɛn pɛ́lɛ́!

⁴Pəŋi ɔsɛg wóonɛ ó nɛ́gɔŋ wó poyɛ́bɛ́nɛ́ɛ́, podɛágoóbɛnɛɛ́ Táán. Polɛ əgiŋíən lɛ́ nyɛ́ɛlɛ kɛálɛ́ʼkán. Ndóo, pudiə́giim agɛɛn na kɛálɛ́ʼkán kɛ́ndɛ́ŋ ná kɛ́sánɛn əgín kɛ́ɛg kɛ́ kɛ́yáyɛ́lɛ́ɛ́ na Sɛonáas.» Yə́sus aáság kudi ə́mə́buudí, aásán.

⁵Agoyaag koɔ́bɔn nsɛ́ɛ́ ɛ noom, paaʼkan pə́yə́bə́líí kusiəd pɛlɛ́ɛd agɛɛn na pɛ́lɛ́.

⁶Yə́sus yiísiə́d tɔgɛ́ɛ́, ɔnɔ́ na pɔ́lɛ́: «Pólóʼkɔd na kinudiʼ umbúb kɛ́ Pafalɛsɛyɛ́ɛŋ na kɛ́ Pasadosɛyɛ́ɛŋ pógódíí!»

⁷Ná yiísə́ə́ náan, paaʼkan pə́ə́bə́ə́ kəə́lúluu kɔ pɔ́lɛ́ na pɔ́lɛ́, pɔ́nɔ́: «Alɛ əgusəə náan lɛ́ wɔnɔ́ ná tidiiminií tísiəd pɛlɛ́ɛd pɛ́ tɛánɛ!»

⁸Yə́sus yɛɛ́lɛ́ŋ nkə kɛ́ɛg kɛ́ páyɛ́ɛ afɛga. Náa ɔnɔ́ na pɔ́lɛ́: «Nkə áa polɛɛ́ na mafɛgaʼ móom poɔʼkɔ́ mbə́səə náan a oʼto wóonɛ lɛ́ pudiimin púsiəd pɛlɛ́ɛd pɛ́ poánɛ ə́? Kəə́liʼtiniʼ koáŋan kúligi kudom ə́!

⁹Puligi podɛób əgín ə́? Pundigi agaáyɔ́ɔ́ŋɛ pɛlɛ́ɛd pɛ́ʼtáan pɛ́ poyáában tɔ́ɔ́sɛn ɛ pɔɔd ɛ́ʼtáan, páánɛ́ á! Mɔsaŋɛʼ mósɛ́g áa puíyə́ə́gi na pɛbɛŋ pɛ́ pɛ́ɛ́lɔ́bɔn, poányáŋɛn agɛɛn na mólɛ́?

¹⁰Podɛɔ́gɔ agaáyɔ́ɔ́ŋɛ tɛn pɛlɛ́ɛd pɛ́ʼtáan na pɛ́baan pɛ́ poyáában tɔ́ɔ́sɛn ɛ pɔɔd íniʼ, páánɛ́ á! Mɔsaŋɛʼ mósɛ́g áa puíyə́ə́gi na pɛbɛŋ pɛ́ pɛ́ɛ́lɔ́b, poányáŋɛn agɛɛn na mólɛ́?

¹¹Tuə́ áa podɛágoóbɛ́ɛ́ lɛ́ kinudiʼ umbúb kɛ́ Pafalɛsɛyɛ́ɛŋ na Pasadosɛyɛ́ɛŋ kɛ́ mbə́səə lɛ́ pólóʼkɔd na kɛ́lɛ́, adɛ́njaŋ kɛbán kɛ́ pɛlɛ́ɛd aa ndɛɛ́ əgusəə?»

¹²Áay anɛ́ɛ́n aa páyálɛ́ŋɛ́ɛ́ lɛ́ adɛ́njaŋ toan tó kunudi umbúb ó pɛlɛ́ɛd aa Yə́sus ayɛ́ɛ əgusəə. Ayɛ́ɛ əgusəə lɛ́ pə́ə́nuŋ na nkə kɛ́ Pafalɛsɛyɛ́ɛŋ na Pasadosɛyɛ́ɛŋ pálɛ́ɛ́ agaaʼkananɛ.

¹³Ná Yə́sus ayɛ́ɛ́n əgiig a pálɛ́ɛg yɛ́ pɔ́ɔdɔ́ŋɔn lɛ́ Səsalə́ə ɛ Filíib, yiíŋíən na paaʼkan pə́ə́ŋ ɔnɔ́: «Kɛnɛŋ kɛ́ pɔɔd pálɛ agosɔyɔ əə, pálɛ əgusəə lɛ́ mɛ Mɔɔ́n o mɔɔd ndɛ ánɛ ə́?»

¹⁴Náa pɔ́nɔ́ na nyɔ́lɛ́: «Pɔsɔ́g pə́mmú pálɛ əgusəə lɛ́ olɛ Sɛ́aŋ Ɔsɔgɛn pɔɔd. Pə́mmú pɔ́nɔ́ olɛ Ɛlɛ́as. Pɔsɔ́g pə́mmú tɛn pɔ́nɔ́ olɛ Siələmíi, oó lɛ́ ɔndɔɛgɛʼ pɛbán o Táán nyummú.»

¹⁵Náa Yə́sus ɔnɔ́ na pɔ́lɛ́: «Ooʼó. A nɛáŋan nɛ́ pəŋibáamɔɛ́d anɛ́ɛ́n ə́ə, poɔʼkɔ́ ndɛ ánɛ ə́?»

¹⁶Simɔ́ɔŋ Píɛ əyímuyúlísíni ɔnɔ́: «Olɛ Məsíi, olɛ Mɔɔ́n o Táán nyɔ́ alɛɛ́ a ɔlaa.»

¹⁷Yə́sus yiísə́ə́ ɔnɔ́ na nyɔ́lɛ́: «Olɛ kɔŋɛʼ, wɛ Simɔ́ɔŋ! Wɛ mɔɔ́n ó Sɛ́aŋ. Olɛ kɔŋɛʼ lɛ́ nkə kɛ́ɛg kɛ́ wəə́ʼkusəlií, adɛ́njaŋ mɔɔd aa amɛ́ɛ́lɛ lɛ́ ólɛŋ, ndóo. Sɛ waam nyɔ́ alɛɛ́ a mɔɛn áa amágoyɛ́ɛ́lɛ lɛ́ úsəə náan.

¹⁸A mɛ, ndagodɛ́anɛ lɛ́, olɛ niiŋ lɛ́ Nɛdáán, a nɛdáán nɛ́ɛn, ndawáag Yoog ɛ pɔɔd yaam ɛ Táán kɔ. Kugu kódɛndɛ́ɛ́ kɔɔŋ ngə́ na yɛ́lɛ́.

¹⁹Ndagoyɛ́ʼkɛn mulibəʼ mó a Nɛlaamɛʼ nɛ́ a mɔɛn. Nkə kɛ́ olɛ́ɛ́ kusúŋíí a nsí, kɛ́lɛ́ɛ́ kəə́súŋ tɛn a mɔɛn. Kɛ́ olɛ́ɛ́ kondinií a nsí, kɛ́lɛ́ɛ́ koóyóndin tɛn a mɔɛn.»

²⁰Ná ayɛ́ɛ aáʼkosɔyɔ náan na Píɛ, ayágásɛ́ɛ́ ná paaʼkan pə́ə́ŋ pálɛɛ́, aáság koboyááganan mbaŋ na toɛn, ɔnɔ́ pádɛʼtɛánɛ na mɔɔd wɛndɛ́ŋ náan lɛ́ nyɔ́lɛ́ alɛ Məsíi.

²¹A kəə́siəd a kɛnɛŋ kɛ́ɛg, Yə́sus əə́bə́ə́ kodɛ́ananɛ na paaʼkan pə́ə́ŋ ɔnɔ́: «Nkóódi lɛ́ mbág a Yolósalɛm ná ponnom pó nigúu, na puʼkúm pó payaaganɛʼ pɛfɔny, na palɛŋ pɛcɛm píʼkumin kɔ, pɛ́nnɛ́ɛyɛ ntɔ́b, pɛ́njoon. Náa, mɔɔ́s mádáád a ngim yɛ́ɛy yɛ́ páagɛnjoon, ndəgiiʼkini kiim ndon a kəəniʼ ongóm.»

²²Píɛ aáság kəə́súidin Yə́sus a ɛbá agosɔyɔ na nyɔ́lɛ́. Ayɛ́moóbɛ́n a nkə kɛ́ɛg kɛ́ yɛɛ́sɔ́yɔ, ɔnɔ́ na nyɔ́lɛ́: «Ndóo Sə́dúk! Yoom ɛ́dɛ́agoyɛ́ɛlɛ, Táán əəguúnuŋ.»

²³Ná Píɛ yiísə́ə́ náan, Yə́sus əyímuyə́dúgídíí, ɔnɔ́ na nyɔ́lɛ́: «Sáʼtan wɔnɔ́ wɛ! Liog a mɛ udi, ə́suídíí laálá. Tuə́ áa waányɔ́ŋɛn lɛ́ wáádádɛg a ngə́ yaam əə́? Mafɛgaʼ mááŋ móom má olɛɛ́ na mɔ́lɛ́, mɔ́dɛɔ́gɔ mafɛgaʼ má Táán, málɛ má pɔɔd.»

²⁴Náa ɔnɔ́ na paaʼkan pə́ə́ŋ: «Mɔɔd əməʼkusəə lɛ́ əəginjə́ən, óliogi ɔʼtɛ́m na nyɔ́lɛ́nyɔ́amɔɛ́d, yə́lúú ɔmbásá wə́ə́ŋ ná yíim anɛ́ɛ́n yínjə́ən.

²⁵Kɛ́lɛ lɛ́, wɛ nyɔ́ wɔʼkɔ́ wamaʼkanɛ ɔlaa wááŋ, wɛ nyóon olɛ́ɛ́ koʼtaŋ wólɛ́. Kɔmɔɛ́d lɛ́ wɛ nyɔ́ olɛ́ɛ́ koʼtaŋɛɛ́ ɔlaa a kidíídí kɛ́am, wɛ nyóon aa olɛ́ɛ́ kɛɛnɛɛ́ na wólɛ́.

²⁶Mɔɔd amaʼkɛɛn na tugúm tuim tó a nsí, náa ɔlaa wə́ə́ŋ olɛɛ́ undióŋóón, amɛ́ɛ́lɛ nkə aa nyóon? Ímuʼ na ímuʼ yɛ́ mɔɔd alɛɛ́ ogɛɛ́ʼkɛn agɛɛlɛ lɛ́ áwɛɛna ɔlaa wə́ə́ŋ, ɛ́dɛɔ́gɔ.

²⁷Kɛ́lɛ lɛ́, mɛ Mɔɔ́n o mɔɔd, ndɛ́ɛ́ kimbuúlini a nugəm nó Táán Sɛ waam. Ndɛ́ɛ́ kiim ondáŋ na məŋun máam má maʼtom. Áay anɛ́ɛ́n aa ndɛ́ɛ́ kaabaá pɛsáábɔ́n lɛ́ na wɛ ogo na pɛáŋ. Əgín tɛn wɔnɔ́ a niə́siəd nɛáŋ[59]

²⁸A fɔ́lɔ́b ndabodɛ́anɛ lɛ́, a pəŋi póonɛ pá polɛɛ́ póob, pə́mmú pálɛ kɔ pá pádɛndɛ́ɛ́ kugúú ná pádɛ́yɛ́ʼtála mɛ Mɔɔ́n o mɔɔd ndə́əgiim nsuu a nɛ́ ɔndaamɛʼ a mɔɛn.»