Read Yambeta Maʼtɛ́as 18 Bible Online

Maʼtɛ́as 18 - Yambeta bible

Maʼtɛ́as 18

¹A kɛnɛŋ kɛ́ɛg, paaʼkan pááság kaáyɛʼtɛnɛ a ɛbá ɛ́ Yə́sus, náa pɔ́nɔ́ na nyɔ́lɛ́: «A Nɛlaamɛʼ nɛ́ mɔɛn ə́ə, ánɛ aa amáábɛ́gɛn pɔsɔ́g ombɔg a oʼto ə́?»

²Yə́sus aáság kodɔ́ŋɔn ɛyaa ɛ́ moóngaa, əmə́mudə́nígi a kɛgaágadɛ kɛɔ́bɔn,

³náa ɔnɔ́ na pɔ́lɛ́: «A fɔ́lɔ́b ndabodɛ́anɛ lɛ́, poʼkasɛnɛ ɔlaa, póyaan wɔnɔ́ moyaa mó poómbaa, podɛndɛ́ɛ́ kosɔd a Nɛlaamɛʼ nɛ́ a mɔɛn.

⁴Nyɔ́ alɛ́ɛ́ kusiədií ɛyaa ɛ́ moóngaa wɔnɔ́ yɛ́ɛnɛ kɔŋɛʼ a niiŋ nɛ́am, nyóon aa alɛ́ɛ́ kɛɛnɛɛ́ oʼkóʼkóón a Nɛlaamɛʼ nɛ́ a mɔɛn.

⁵Mɔɔd əməʼkusiəd ɛyaa ɛ́ moóngaa wɔnɔ́ yɛ́ɛnɛ kɔŋɛʼ a niiŋ nɛ́am, mɛ áa əmísiə́d náan.»

⁶«Náa, nyɔ́ alɛ́ɛ́ kɛɛlɛɛ́ lɛ́ ɛyaa ɛ́ moóngaa wɔnɔ́ yɛ́ɛnɛ yɛ́ ɛ́máág oʼto na mɛ ídə́əŋ a kɔbɛ́, kɛ́lɛ kɔŋɛʼ lɛ́ pámoodoŋ kɛdám kɛ́ nɛdáán a kɛnág, pámoódagɛdɛ a noom, ə́suu.

⁷Maan igə na pɔɔd pá a nsí! Maan na pɔ́lɛ́ lɛ́ pɛbán pɛ́lɛ kɔ piíŋ pɛ́ pɛ́agɛɛlɛ lɛ́ mɔɔd ə́də́əŋ a kɔbɛ́. Ngə́ yɛ́ɛnɛ lɛ́ pɛbán pɛ́ɛb pɛ́dɛyáyɛ́lɛ́ɛ́, ɛdɛɔ́gɔ. Náa, maan na nyɔ́ kɛ́lɛ́ɛ́ kɛɛnɛɛ́ lɛ́ nyɔ́lɛ́ aa alɛɛ́ nɛdáán nɛ́ mbúʼtə́n.

⁸Kɛ́maʼkɛɛn lɛ́ ombɔg wááŋ, oó lɛ́ ongoo wááŋ áa ólɛɛ́ agooyɛ́ɛlɛ lɛ́ údə́əŋ a kɔbɛ́, pɛ́ʼtaʼ lɛ́ wáásom wólɛ́, ódo laálá lɛ́ kɛ́lɛ kɔŋɛʼ na wɛ lɛ́ wɛ́ɛn a ɔlaa ó pɛnɛŋ piim na ombɔg úmmuʼ, oó lɛ́ na ongoo úmmuʼ, agosan lɛ́ págoódagɛdɛ a yug ɛ́ pɛnɛŋ piim na ɔmbɔg yááŋ ábaan, oó lɛ́ na ambaan yááŋ ábaan.

⁹Kɛ́maʼkɛɛn lɛ́ niis nɛáŋ áa nɛ́lɛɛ́ agooyɛ́ɛlɛ lɛ́ údə́əŋ a kɔbɛ́, pɛ́ʼtaʼ lɛ́ wə́ə́dus nɛ́lɛ́, ódo laálá. Kɛ́lɛ kɔŋɛʼ na wɛ lɛ́ ósɔd a ɔlaa ó pɛnɛŋ piim na niis nímuʼ, agosan lɛ́ págoódagɛdɛ a yug yɛ́ ɛgóón na əngis yááŋ əngim ábaan.

¹⁰Pólóʼkɔd o! Pudifə́n ɛyaa ɛ́ moóngaa wɔnɔ́ yɛ́ɛnɛ ɔmbɔ́ ímuʼ lɛ́, ndabodɛ́anɛ nyɔʼkɔ́, məŋun má maʼtom má málɛɛ́ na pɔ́lɛ́, málɛ pɛnɛŋ piim a udi ó Paabá nyɔ́ alɛɛ́ a mɔɛn».[

¹²«A nɛáŋan əə, poádála tuə́ ə́? Tísəə lɛ́ mɔɔd ogóódi todóm əʼtin áʼtáan, náa númuʼ nuə́ním. Aagɛɛlɛ tuə́? Adɛáyaŋ kudi ə́mə́dí tóonɛ tó əʼtin ə́niʼ na puuniʼ na túniʼ a oʼkon a mɔɛn, agoyag kɛɛn əguunə nó nuə́ním ə́?

¹³A fɔ́lɔ́b ndabodɛ́anɛ lɛ́ ná ɔɔ́gɔɔŋ, aagɛɛn na tɔnyɔ́g agaáyɛn tóonɛ tó əʼtin ə́niʼ na puuniʼ na túniʼ tó túnníminií.

¹⁴Náan tɛn yoom ímuʼ aa, Sɛ waaŋan nyɔ́ alɛɛ́ a mɔɛn, adɛányɔ́ŋɛnɛɛ́ lɛ́ ná ɛyaa ɛ́ moóngaa ɔmbɔ́ ímuʼ yə́ə́ním.»

¹⁵«Woómóŋŋí amaʼkɛɛlɛ kɔbɛ́, tod amoóboan a pəŋi pábaan, ɔ́sɔyɔ na nyɔ́lɛ́, úmuúloodi kɔbɛ́ kó amɛ́ɛ́lɛ. Amaʼkogoyóob, umə́mudə́nígi kə́mmú a ngə́.

¹⁶Adɛgoyóbɛn, siəd mɔɔd úmmu, oó lɛ́ pábaan, púiʼkini kɛɛn amoóboan, púsóbini kɛbán kɛ́man a udi wááŋan wó nto yɛ́ɛy ɛ́baan, oó lɛ́ ɛ́dáád[63]

¹⁷Adɛóbanan tɛn a udi ó pɔsɔ́g póob, tod na kɛbán a Ɛgɔny ɛ́ pəə́liʼtiniʼ. Amaʼkolaŋanan tɛn áay a udi ó pɔɔ́n pá Táán, ímusiə́d wɔnɔ́ mɔɔd nyɔ́ ɔdɛɔ́gɔ kə́mmú a ondáŋ wááŋan, úmuúsiəd tɛn wɔnɔ́ ɔʼkɔ́mmanɛʼ mag.

¹⁸A fɔ́lɔ́b, ndabodɛ́anɛ lɛ́ nkə kɛ́ polɛ́ɛ́ kusúŋíí a nsí, kɛ́lɛ́ɛ́ kəə́súŋ tɛn a mɔɛn. Kɛ́ polɛ́ɛ́ kondinií a nsí, kɛ́lɛ́ɛ́ koóyóndin tɛn a mɔɛn.»

¹⁹Ndəgiiʼkini kobodɛ́anɛ lɛ́: «Nto ɛ́baan a ondáŋ wááŋan ɛmaʼkaáyóbanan a nsí yɛ́ɛnɛ əguŋíən yoom na Paabá, pálɛŋ lɛ́ nkə kɛ́ pə́ə́ŋíən, kɛ́dɛ́ɔlɔb lɛ́ Paabá nyɔ́ alɛɛ́ a mɔɛn, adɛboyɛ́ʼkɛnɛn.

²⁰Kɛ́lɛ lɛ́, kɛnɔ kiim kɛ́ nto ɛ́baan, ɔmbɔ́ lɛ́ ɛ́dáád ɛmágɔ́nyɛ́dɛ́ɛ́ a niiŋ nɛ́am, ndɛ a kɛgaágadɛ kɛɔ́bɔn.»

²¹Píɛ aáság kaáyɛʼtɛnɛ a ɛbá ɛ́ Yə́sus əgumuŋíən kɛbán, ɔnɔ́: «Sə́dúk, kɛnɛŋ kɛ́ móŋŋí waam aágɛnjɛɛlanɛ kɔbɛ́ pɛnɛŋ piim, nkóódi lɛ́ mmuúlisin əgiig pɛnɛŋ pɛ́sɛ́g ə́? Pɛ́ʼtáan na pɛ́baan á?»

²²Náa Yə́sus ɔnɔ́ na nyɔ́lɛ́: «Ndóo, Píɛ. Ntɛgodɛ́anɛnɛ lɛ́, əgín pɛnɛŋ pɛ́ʼtáan na pɛ́baan súg. Náa, úmuúlisin əʼtin á pɛnɛŋ ádáád na pɛnɛŋ pɛówád. Náan annam áʼtáan na ábaan.»

²³«Taa, Nɛlaamɛʼ nɛ́ a mɔɛn nɛ́lɛ náanɛ wɔnɔ́ nkə kɛ́ nkúm yimmú ɛyɛ́ɛ́lɛ. Nkúm yimmú a yɛ́ɛy yɛɛ́dɔ́ŋɔ́nɔ pəgudin pə́ə́ŋ piim lɛ́, píimən, pɔ́lɛ́ pásóngɛ moom muə́ŋ.

²⁴Pə́ʼkəə́bə́ə́ anɛ́ɛ́n kosóngɛ a, pááság kumuyíimin na mɔɔd nyummú nyɔ́ əyímugóodini kɛdám kɛ́ uŋín, mɔɔnɛ́ miíŋ.

²⁵Wɔnɔ́ ná mɔɔd ogo nyóon adɛʼkɛ́lɛɛ́ na ngə́ igumuyúlisini ɛdám ɛ́ mɔɔnɛ́ yɛ́ɛy, nkúm yaáság kusəə lɛ́, pə́muúgumin, pɛ́ɛn amoólɛg, na oʼkán kɛ́, na pɔɔ́n kɛ́, na moom muim mó yiígóodi, agɛɛlɛ lɛ́ mɔɔnɛ́ mə́ə́ŋ málon».

²⁶Ná uʼkudin nyóon ayóób náan, ayɛ́ɛ́n ədə́əŋənən sə́dúg wəəŋ a ambaan, əə́bə́ə́ komoyálɛɛlɛn, ɔnɔ́ na nyɔ́lɛ́: «Sɛ́gɔɔ əgín paabá, suuli ɔʼtɛ́m wááŋ a kaadɛ, ɛ́nnóʼtan, ndagaábáam nkuyúlisini uŋín wááŋ ungim.»

²⁷Ná nkúm yɛ́ɛy yɛɛ́dála náan, maan mááság kumuúsiəd na mɔɔd nyóon, aáság kumuúlisin uŋín wóow ungim, ə́mə́muudí lɛ́ yúúli.

²⁸«Mɔɔd aáság kolon əguúli. A ngə́, pááság kodam pə́ə́bun na sɔ́g wəəŋ ó pigólí nyummú nyɔ́ əyímugóodini tɛn uŋín, ɛyaa yɛ́ uŋín, mɔɔnɛ́ sɔɔŋ. Ná yɛɛ́dála sɔ́g wəəŋ nyóon, aáság kumuúgumin, əə́bə́ə́ komogámɛsa kɛnág, ɔnɔ́ na nyóon, ámoyɛ́ʼkɛn mɔɔnɛ́ mə́ə́ŋ.

²⁹Sɔ́g wəəŋ aáság kumudə́əŋənən a udi na əndu, əə́bə́ə́ komoyɔ́sɔ́gɔlɔn, ɔnɔ́ na nyɔ́lɛ́: “Sɛ́gɔɔ əgín paabá, suuli ɔʼtɛ́m wááŋ a kaadɛ, ɛ́nnóʼtan, ndagaábáam nkuyúlisini uŋín wááŋ”.

³⁰Mɔɔd ɔnɔ́ tɛɔ́d. Yiíbís, amɛ́ɛn agaag sɔ́g wəəŋ a yoog yɛ njaan, ɔnɔ́ əgín nyóon aáʼkoman kaálɛba uŋín wə́ə́ŋ, áay aa aálon a yoog yɛ njaan.

³¹Nyɔ́lɛ́ ayɛ́ɛ agɛɛlɛ náan pɔsɔ́g pəgudin pə́mmú páamodɛ́ʼtɛg. Ná pɛ́ɛ́dála lɛ́ aáʼkɛɛn agaag sɔ́g nyóʼkáag a yoog yɛ njaan, páyóób ɔʼtɛ́m kogany kɛ́fɔlɛ́. Pááság kɛɛn adɛ́ananɛ na nkúm, nkə kiim kɛ́ɛg kɛ́ kɛ́yásánɛ́ɛ́.

³²Ná nkúm ɛyóób náan, yiísə́ə́ lɛ́ pɛ́ɛn əmuúsiədin uʼkudin nyóon, pə́muyíimin na nyɔ́lɛ́. Pááság kɛɛn əmuúgumin, pə́míim na nyɔ́lɛ́. Nkúm yəə́bə́ə́ kodam ɛ́mosásan, yɔ́nɔ́: “Ɔmbɛ́ wo uʼkudin wɔnɔ́ wɛ! Adɛ́ wɛ omɛ́nyɔɔ́sɔ́gɔ́lɔ́nɛ́ɛ́ áanɛ nɛ́gɔŋ mbáság kuguúlisin kɛdám kɛ́ uŋín kɛ́ uyíʼkóodini ə?

³³Wɛ óoʼ, odɛʼkɛ́ɛ lɛ́ óda tɛn sɔ́g waaŋ maan wɔnɔ́ ná mɛ mbágoodá wɛ áa?”

³⁴Nkúm ɛyóób ilúún kɛ́fɔlɛ́ na mɔɔd nyóon, yaáság kusəə lɛ́ pə́muúgumin, pɛ́ɛn amoyáág a yoog yɛ njaan, pámonɛ́ɛyɛ ntɔ́b kɔ. Əgín aáʼkoman kaálɛba uŋín wə́ə́ŋ ungim, áay aa aálon.»

³⁵Yə́sus aáság kuyibənən tɔgɛ́ɛ́ tuə́ŋ ɔnɔ́: «Taa, náan tɛn aa Sɛ waam nyɔ́ alɛɛ́ a mɔɛn, alɛ́ɛ́ kɛɛlɛɛ́ na pəŋi, ná pundisinin pɔsɔ́g a nilisin nɛ́ fɔ́lɔ́b.»