Read Yambeta Maʼtɛ́as 19 Bible Online

Maʼtɛ́as 19 - Yambeta bible

Maʼtɛ́as 19

¹Ná Yə́sus ayɛ́ɛ aáʼkoman kosɔyɔ náan, aáság kodɛ́ɛmɛn áay a Kalilə́ə agɛɛn a kɛsom kɛ́ nsí kɛ́ a Siudə́ə, nsɛ́ɛ́ ɛ́ noom nó Siuludɛ́ɛŋ.

²Kiʼtúú kɛ́ pɔɔd kɛáság kumuyə́ən kɔ́gɔ́ɔg, amóómánɛ pabámbany pɔ́ɔ́bɔn.

³Ngab ɛ Pafalɛsɛyɛ́ɛŋ yimmú ɛyáyɛ́ʼtɛ́nɛ́ɛ́ a ɛbá yə́ə́ŋ. Wɔnɔ́ ná páyɛ́ɛ əguunə kumudə́əŋi a kisindiʼ kɛɔ́bɔn, pə́yímuŋíən pɔ́nɔ́ əə: «Pɛcɛm piə́s pɛ́lɛ agɛɛ́ʼkɛn mɔɔd toɛn lɛ́ ágada kodɔn na oʼkán a igúg ɔmbɔ́ ɛ́yaán á?»

⁴Yə́sus əyíbuyúlísíni ɔnɔ́ na pɔ́lɛ́: «Podɛ́mbana nkə kɛ́ɛnɛ kɛ́ kɛ́lɛɛ́ kidiídílə́ a Kálaʼtaʼ ɛ Táán lɛ́: “Əgín kɔ́gɔ́ɔg a niə́bə́ə, Ɔngɛɛlɛʼ ayɛ́ɛ́lɛ mɔɔd lɛ́ na ɔnɔ́mɛɛd na ɔʼkɛ́ɛd[64]”

⁵Kɛ́lɛ tɛn kɔ lɛ́ yiísə́ə́ ɔnɔ́: “Kólɛ́ aa ɔnɔ́mɛɛd alɛ́ɛ́ kudi ə́mə́dí sɛ na ŋŋí agɛɛn agaálad na oʼkán, páyɛɛn wɔnɔ́ mɔɔd úmmu[65]”

⁶Pándɛ anyóon úmmuʼ súg, pə́ndigi kə́mmú nto ɛ pɔɔd ɛ́baan. Mɔɔd oʼkóodi anɛ́ɛ́n lɛ́ ásaa nkə kɛ́ Táán áálad!»

⁷Náa pɔɔd póob pə́əmuyúúlisini pɔ́nɔ́: «Ooo, a igə anɛ́ɛ́n áa Moyíis ayɛ́ʼkɛn toɛn lɛ́ mɔɔd aándaaŋɛŋ oʼkán, ə́dilə nufuuʼ nóonɛ lɛ́ kodɔn koáman, ámoyɛ́ʼkɛn a ombɔg ə́[66]?»

⁸Náa Yə́sus ɔnɔ́ na pɔ́lɛ́: «Ɛɛ́ɛ, Moyíis ayɛ́ʼkɛn toɛn tó koŋɛŋ ɔʼkɛ́ɛd náan lɛ́ polɛ na ntɛ́m yɛ́ nnasáŋ. Náa, a niə́bə́ə kɛ́dɛʼkɛ́ɛ náan.

⁹A fɔ́lɔ́b, ndabodɛ́anɛ lɛ́, mɔɔd amaʼkoŋɛŋ oʼkán lɛ́ kodɔn koáman ná kɛ́diɛnɛn əgín lɛ́ əmə́mugúmin a kɛdaŋ, əməʼkusiəd wɛndɛ́ŋ, mɔɔd nyóon alɛ uʼtə́ŋə́ə́n a kɛdaŋ.»

¹⁰Náa paaʼkan pɔ́nɔ́ na nyɔ́lɛ́: «Kɛ́maʼkɛɛn anɛ́ɛ́n lɛ́ náan aa kɛ́lɛɛ́, kɔŋɛʼ lɛ́ mɔɔd ɔ́lɔb anɛ́ɛ́n fiɛ́d kogóan ɔʼkɛ́ɛd!»

¹¹Náa Yə́sus ɔnɔ́ na pɔ́lɛ́: «Ungim ɔdɛɔ́gɔ ogoob tɔgɛ́ɛ́ tóonɛ. Əgín wɔʼkɔ́ pá Táán amɛ́ɛ́lɛ lɛ́ póob tólɛ́.

¹²Pungə́ puə́dəg pó póagɛɛlɛ lɛ́ mɔɔd adɛʼkóan. Pə́mmú pálɛ kɔ pá pə́yə́biə́níí náan lɛ́ pɔ́dɛɔ́gɔ pə́gubúlim na ɔʼkɛ́ɛd. Pɔsɔ́g tɛn pə́mmú pálɛ kɔ pá pɔsɔ́g pɔɔd aa páyɛ́boyáánɛ toag. Pə́mmú tɛn pálɛ kɔ pá pɛ́ɛ́sáŋɛ́nɛ kogóan lɛ́ ná pááyɛ́ʼkɛn a pigólí pɛ́ a Nɛlaamɛʼ nɛ́ a mɔɛn. Wɛ nyɔ́ olɛɛ́ ogoob, óyoob!»

¹³Pɔɔd pə́yíímín Yə́sus na poómbaa lɛ́ ná áboyábɛgɛn ombɔg a oʼto, ɔ́yɔɔ́sɔ́gɔlɔn Táán. Náa, paaʼkan páyɛ́bosásan lɛ́ púúlini ngim na pɔ́lɛ́.

¹⁴Náa Yə́sus ɔnɔ́ na pɔ́lɛ́: «Tíən poómbaa póob píim ná ndɛɛ́, pudiyíbuugíd lɛ́ Nɛlaamɛʼ nɛ́ a mɔɛn nɛ́agoob na pá pálɛɛ́ wɔnɔ́ pɔ́lɛ́.»

¹⁵Ayɛ́boyábɛ́gan ombɔg a oʼto, aáság kodɛ́ɛmɛn anɛ́ɛ́n agosan.

¹⁶Mɔɔd ayáyɛ́ʼtɛ́nɛ́ɛ́ a ɛbá ɛ́ Yə́sus, aáság kumuŋíən ɔnɔ́ na nyóon əə: «Kɛlág, nkə aa nyɛ́lɛɛ́ kɛ́ kɛŋɛʼ agɛɛlɛ lɛ́ nyɛ́ɛn na ɔlaa ó pɛnɛŋ piim əə́?»

¹⁷Náa Yə́sus ɔnɔ́ na nyɔ́lɛ́: «A igə aa wəə́giŋíən lɛ́ nkə aa kɛ́lɛɛ́ kɛŋɛʼ ə́? Úmmuʼ súg áa alɛɛ́ ɔŋŋɛʼ, Táán nyɔ́lɛ́nyɔ́əsíŋ. Nga waanyɔ́ŋɛn kosɔd a ɔlaa ó pɛnɛŋ piim, nuŋ pɛcɛm.»

¹⁸Náa mɔɔd ɔnɔ́ na Yə́sus: «Pɛcɛm pɛ́yaán áa nyə́nuŋií ə́?» Náa Yə́sus ɔnɔ́ na nyɔ́lɛ́: «Taa pɛ́ aa pɛ́ɛnɛ lɛ́: “Odɛnjóón mɔɔd, udiʼtə́əŋ a kɛdaŋ, udinjííbə, odɛʼtɛ́lɛ́mɛn mɔɔd mbaasɔ́ ɛ pɛfaa,

¹⁹nyáádɛ sɛ waaŋ na ŋŋí waaŋ, nyɔ́ŋɛn sɔ́g mɔɔd wɔnɔ́ wɛɛ́nyɔ́amɔɛ́d[67]”»

²⁰Náa ɔnyɔmmɔ́n nyóon ɔnɔ́ na nyɔ́lɛ́: «Mɛ ndɛ əgəə́nuŋ a pɛcɛm pɛ́ɛb piim. Nkə aa nyɛ́lɛɛ́ kə́mmú ə́?»

²¹Náa Yə́sus ɔnɔ́ na nyɔ́lɛ́: «Omaʼkɔnyɔ́ŋɛn kɛɛn wɔnɔ́ ná kiə́gə́mmi Táán, tod, ólɛga nkə kiim kɛ́ ugódíí. Mɔɔnɛ́ móom wáaban mɔsɔ́gasɔ́gá, ná wíim anɛ́ɛ́n wínjə́ən. Wagɛɛn na tugúm a mɔɛn.»

²²Náa, əgín ná ɔnyɔmmɔ́n nyóon ayóób náan, yɛɛ́ság kosan udi suúúm lɛ́ ayɛ́ɛ na tugúm tuíŋ.

²³Yə́sus ayágásɛ́ɛ́ ná paaʼkan pə́ə́ŋ pálɛɛ́, náa ɔnɔ́ na pɔ́lɛ́: «A fɔ́lɔ́b ndabodɛ́anɛ lɛ́ kɛágány na mɔɔd o tugúm lɛ́ ɔ́sɔd a Nɛlaamɛʼ nɛ́ a mɔɛn ə́!

²⁴Náa ndə́əgiiʼkini kobodɛ́anɛ lɛ́: Kɛ́lɛ kɛgányáán agɛɛlɛ lɛ́ kiʼtóg kɛ́ nnyam yɛ́ pɔ́ɔdɔ́ŋɔn lɛ́ sɛamóo ɛ́sɔd a kiwoo kɛ́ níloʼ nɛ́ kolada pilə́ə́. Náa a mɔɔd o tugúm, kímíʼkíni kogany kə́mmú agaáyɛn náan agɛɛlɛ lɛ́ ɔ́sɔd a Nɛlaamɛʼ nɛ́ Táán.»

²⁵Ná paaʼkan páyóób náan, pə́yə́wúnə́níí kɛ́fɔlɛ́, pɔ́nɔ́ əə: «Áay oóoʼ, ánɛ aa aágaáʼkɛ anɛ́ɛ́n kɔɔy əə́?»

²⁶Yə́sus ayɛ́bodɛ́ʼtɛg a udi log log log, náa ɔnɔ́ na pɔ́lɛ́: «Ɛɛ́ɛ, kɛ́lɛ náan fɔ́lɔ́b lɛ́ a mɔɔd na mɔɔd, ngə́ ɛgɔɔ́yɔ́ɔyɛ ɛdɛɔ́gɔ. Náa a Táán, ímuʼ na ímuʼ yɛ́ ɛ́lɛɛ́ ɛ́gomoyag kɛɛlɛ ɛ́dɛɔ́gɔ.»

²⁷Náa Píɛ əə́siəd tɔgɛ́ɛ́, ɔnɔ́ na nyɔ́lɛ́: «Ooo Sə́dúk, pəsi anɛ́ɛ́n pá tiídí tímə́dí yiim yɛ́ tiígóodi əguguyə́ən oóoʼ, tuə́ áa kiə́s kɛ́lɛ́ɛ́ kɛɛnɛɛ́ ə́?»

²⁸Náa Yə́sus ɔnɔ́ na pɔ́lɛ́: «A pəŋi, ndabodɛ́anɛ a fɔ́lɔ́b lɛ́, ná yoom yiim ɛ́lɛ́ɛ́ kimbuúlinií ɛwa, mɛ Mɔɔ́n o mɔɔd nság kusiəd Nɛlaamɛʼ a oʼkɔɔ wáam ó nugəm[68], pəŋi tɛn polɛ́ɛ́ kuləndin a mɔʼkɔɔ má puʼkúm mówád na mábaan agoyɔmɛ əʼkúu a Ɛ́sɛlayɛl yówád na ábaan.

²⁹Ungim nyɔ́ yiídí ə́mə́dí lɛ́ na toádɛʼ, na pomóŋŋí, na sɛ, na ŋŋí, na pɔɔ́n, na malɛ́m a niiŋ nɛ́am, alɛ́ɛ́ kɔɔ́ŋɔnɔn a ngim agaáyɛn náan. Alɛ́ɛ́ kɔɔŋ ɛ́nɛ́ yoom əʼtin áʼtáan áʼtáan, áyɛɛn tɛn na ngab a ɔlaa ó pɛnɛŋ piim.

³⁰Piíŋ pá pálɛɛ́ nɛ́gɔŋ yuudi, pálɛ́ɛ́ kuúlini ngim. Piíŋ tɛn pá pálɛɛ́ nɛ́gɔŋ ngim, pálɛ́ɛ́ kosan yuudi.»