Read Yambeta Maʼtɛ́as 2 Bible Online

Maʼtɛ́as 2 - Yambeta bible

Maʼtɛ́as 2

¹Yə́sus əyə́biə́níí a Pɛ́ʼtɛlɛɛm, pálɛ́ɛg yimmú yɛ́ a nigúu nɛ́ Siudə́ə. A kɛnɛŋ kɛ́go kɛ́ɛg, Ɛlóod aa ayɛ́ɛ nkúm. Náan aa pɔɔd pə́mmú pə́yíím pádɛ́ɛmɛn kɔ́gɔ́ɔg a noá nó ándɛ koany kóagaáyɛnɛ, pááság kiim alon a Yolósalɛm. Páyɛ́ɛ pɔɔd pá páyɛ́ɛ agobógɛla na muə́dədəʼ.

²Ná pə́yíím əgiig a Yolósalɛm, pááság kəə́bə́ə́ kiim pə́ŋíənə, pɔ́nɔ́: «Nkúm ɛ Yúdɛn ɛgo yɛ́ imə́biə́níí ə́lə́ə́ áa ɛlɛɛ́ ə́? Tɛádála yəə́dədəʼ yə́ə́ŋ əgín kɔ́gɔ́ɔg a nigúu nɛ́ koany yáanom, kólɛ́ aa tɛlɛɛ́ əgumuyúunə lɛ́ ná tɛ́monyáadɛ.»

³Ná Ɛlóod ayóób náan, əə́bə́ə́ kaáságɛma, na pɔɔd piim pá a Yolósalɛm kɛ́.

⁴Ɛlóod yɛɛ́dɔ́ŋɔ́nɔ puʼkúm pó payaaganɛʼ pɛfɔny puim na palɛŋ pɛcɛm piim aáság kubuŋíən ɔnɔ́ na pɔ́lɛ́ ə: «Ɛ́ʼtɛánɛ́an áŋ. Kɛ́lɛ kidiídílə́ kɔmɔɛ́d lɛ́ ə́lə́ə́ áa Məsíi ɛlɛ́ɛ́ kəə́bíən əə́?»

⁵Náa pɔ́nɔ́ na nyɔ́lɛ́: «Kɛ́lɛ kidiídílə́ lɛ́ Məsíi ɛlɛ́ɛ́ kəə́bíən a Pɛ́ʼtɛlɛɛm, a nigúu nɛ́ Siudə́ə lɛ́, ɔndɔɛgɛʼ pɛbán o Táán nyummú yiísə́ə́ lɛ́:

⁶«Wɛ Pɛ́ʼtɛlɛɛm, pálɛ́ɛg yɛ́ a nigúu nɛ́ Siudə́ə, odɛɔ́gɔ iyənjə́g ɛ́ pálɛ́ɛg a pálɛ́ɛg ngim yɛ́ a Siudə́ə lɛ́ áay aa nkúm yɛ́ ɛlɛ́ɛ́ kodáŋananɛɛ́ Ɛ́sɛlayɛl ndɛg yaam, ɛlɛ́ɛ́ kolónɛ́ɛ́[3]»

⁷Ná páyɛ́ɛ páʼkomodɛ́anɛ náan, Ɛlóod aáság kodɔ́ŋɔn pabógán póob kə́mmú ɔgɔɔ́dɔɔgɛ na pɔ́lɛ́, ɔnɔ́: «Poɛ́ʼtɛ́anɛ kɔŋɛʼ kɔŋɛʼ naanɛ́g áa yəə́dədəʼ ɛgo yɛ́báá, poɛ́dála.»

⁸Pááság komodɛ́anɛ. Ná páyɛ́modɛánɛ, yiísə́ə́ ɔnɔ́ na pɔ́lɛ́: «Todáan a Pɛ́ʼtɛlɛɛm, pólɛŋ kuunə kɛnɔ kɛ́ mɔɔ́n ogo əmə́biə́níí. Pomɔʼkɔɔŋ, púim agɛʼtɛ́anɛ, mɛ tɛn nyɛ́ɛn amonyáadɛ.»

⁹Ná nkúm ɛyɛ́ɛ yaáʼkoman kosɔyɔ náan na pɔ́lɛ́, pááság kodɛ́ɛmɛn agɛɛn. Ná páyɛ́ɛ pándɛ a ngə́, yəə́dədəʼ ɛgo yɛ́ pɛ́ɛ́dála kɔ́gɔ́ɔg a nigúu nɛ́ koany, yááság kiiʼkini kiim ɛ́lon. Ná pɛ́ɛ́dála yəə́dədəʼ yɛ́ɛy, tɔnyɔ́g túyíbuyə́ə́g a ɔʼtɛ́m síɛ́ɛ́d. Pə́ə́bə́ə́ kɛɛn, yəə́dədəʼ yuudi, pɔ́lɛ́ ngim. Agɛɛn əgiig a yoog ɛgo yɛ́ mɔɔ́n nyóon əyə́biə́níí, yəə́dədəʼ yááság kodam ɛ́dɛ́lɛm kɔ cág.

¹¹Pɔ́lɛ́ tɛn pááság kɛɛn, pɔ́ɔ́sɔ́d a yoog ɛgo. Pɛ́ɛ́dám páboan lɛ́ na mɔɔ́n, na ŋŋí Malɛ́a. Pááság kudə́əŋ a nsí na əndu agomonyáadɛ. Pə́ə́bə́ə́ kondinə pɛnó pɛɔ́bɔn, páálónánɛ moom mó pə́yíímən na mólɛ́ agɛɛ́ʼkɛnan na mɔɔ́n nyóon. Moom mógo móyɛ́ɛ lɛ́ na kóol, na ɛdɛm, na Míilə.

¹²Udúg ogo wóow, Táán aáság kububúnigi kɛlɛm ɔnɔ́ na pɔ́lɛ́: «Pudinjíʼkíni kuúlini yɛ́ a nó Ɛlóod.» Náan aa píísiə́d ngə́ yɛndɛ́ŋ əguúlini a nigúu nɛɔ́bɔn.

¹³Ná pabógán pá na muə́dədəʼ páyɛ́ɛ páʼkɛɛn, uŋun ó maʼtom ó Sə́dúk wááság kiim əbúnigi Yósɛb kɛlɛm wɔ́nɔ́ na nyɔ́lɛ́: «Tɛ́ɛ́mɛn, siəd lɛ́ na mɔɔ́n na ŋŋí, póɛn ɔgɔɔsɛm a Əsíibtə, Ɛlóod əəguunə kiim agoon mɔɔ́n nyóon. Púləndin kɔ́gɔ́ɔg agɛɛn əgiig əgín a kɛnɛŋ kɛ́ ndɛ́ɛ́ kiiʼkini kiim agodɛ́anɛɛ́ lɛ́ poándɛ pə́gimbuúlini.»

¹⁴Yósɛb aáság kodɛ́ɛmɛn udúg ogo wóow na pɔ́lɛ́ agɛɛn a Əsíibtə.

¹⁵Píílə́ndin kɔ́gɔ́ɔg agɛɛn əgiig əgín a kɛnɛŋ kɛ́ Ɛlóod ayɛ́ɛ əə́ʼkugu. Kɛ́yáyɛ́lɛ́ɛ́ náan lɛ́ ná a ngim yɛ́ɛy, nkə kɛ́ Sə́dúk yiísə́ə́ a unuʼ wó ɔndɔɛgɛʼ pɛbán o Táán nyummú kɛ́as, lɛ́ ɔndɔɛgɛʼ pɛbán o Táán ogo nyóon yiísə́ə́ lɛ́ Táán ɔnɔ́: «Nyɛɛ́dɔ́ŋɔn mɛ mɔɔ́n lɛ́ yíim álon kɔ́gɔ́ɔg a kɛnɔ kɛ́ ayɛ́ɛ, a Əsíibtə[4]»

¹⁶Ná Ɛlóod ayálɛ́mbɛ́dɛ́ɛ́ lɛ́ pabógán póob páyɛ́moyɔ́ndɔ́nɔn, ilúún yááság komoosan oʼto, aádóm pɔɔd a Pɛ́ʼtɛlɛɛm, na a əʼkúu yɛ́ a mobá, lɛ́ póóna pɔɔ́n pá panɔ́mɛɛd piim, kəə́siəd a monyɛɛnyɛgɛʼ, agɛɛn əgiig a pɔsɔ́g pá pándɛɛ́ pɛag pɛ́baan. Yɛɛ́sóm náan əguyə́ən osom wó pabógán Píísə́ə́.

¹⁷Náan aa pɛbán pɛ́ɛb pɛ́yásánɛ́ɛ́ əgín wɔnɔ́ ná Siələmíi, ɔndɔɛgɛʼ pɛbán o Táán, yiísə́ə́, ɔnɔ́:

¹⁸«Nɛŋo níyíím nɛ́dɛ́ɛmɛn a Lááma. Nɛ́yɛ́ɛ nɛŋo nɛ́ ɔndɛɛ, nɛányam. Ɛlásɛl aa alɛɛ́ agolɛɛ pɔɔ́n pə́ə́ŋ. Ɔdɛɔ́gɔ əgəə́liʼtini lɛ́ pə́mugídigi lɛ́ pɔɔ́n pə́ndigi a ɔlaa[5]»

¹⁹Kɛnɛŋ kɛ́ Ɛlóod kɛáság kiim əgiig, əə́gú. Uŋun ó maʼtom ó Sə́dúk wááság kiiʼkini kiim əbúnigi Yósɛb kɛlɛm a Əsíibtə,

²⁰wɔ́nɔ́ na nyɔ́lɛ́: Tɛ́ɛ́mɛn, siəd na mɔɔ́n na ŋŋí, púúlini a nigúu nɛ́ Ɛ́sɛlayɛl lɛ́ pɔɔd pá páyɛ́ɛ əguunə koon mɔɔ́n nyóon pə́ʼkuguə́ʼkən.

²¹Yósɛb aáság kodɛ́ɛmɛn, əə́siəd na mɔɔ́n na ŋŋí, pááság kaag a ngə́ əguúli a Ɛ́sɛlayɛl.

²²Ná páyɛ́ɛ pándɛ ndúmiʼ na kiig, Yósɛb aáság koob lɛ́ Aʼkɛláos aa alɛɛ́ nkúm ɛ Siudə́ə, a oʼkɔɔ ó sɛ Ɛlóod. Wɛɛ́y wááság kumuúgumin. Na udúg, Táán aáság kiim əmuuləb a kɛlɛm. Yósɛb yiísiə́d ngə́ yɛ ndɛ́ŋ, amɛ́ɛn agá ələndin a Kalilə́ə,

²³a pálɛ́ɛg yimmú pɔ́ɔdɔ́ŋɔn lɛ́ Násalɛd. Pɛbán pɛ́ɛb piim pɛ́yɛ́ɛ agodáŋana náan agɛɛlɛ lɛ́ nkə kɛ́ palɔɛgɛʼ pɛbán pá Táán Píísə́ə́, kɛ́as lɛ́ Píísə́ə́ pɔ́nɔ́: «Pálɛ́ɛ́ komoodɔ́ŋɔn lɛ́: “Mɔɔ́n ó Násalɛd”.»