Read Yambeta Maʼtɛ́as 20 Bible Online

Maʼtɛ́as 20 - Yambeta bible

Maʼtɛ́as 20

¹«Kɛ́lɛ lɛ́, Nɛlaamɛʼ nɛ́ a mɔɛn nɛ́lɛ náanɛ wɔnɔ́ ná mɔɔd nyummú nyɔ́ yiígóodi malɛ́m mə́ə́ŋ, ayɛ́ɛ́lɛ. Yɛɛ́lón na koany púúb agɛɛn əguunə pɔɔd lɛ́ pɛ́ɛn əgud a pɔlɛ́m puə́ŋ.

²Pɔsɔ́g pá yɛɛ́bóan, ayáyóóbánánɛ́ɛ́ na pɔ́lɛ́ lɛ́, pɛsáábɔ́n pɛɔ́bɔn pɛ́agɛɛn nkə kɛ́ kɛásɛʼtan a wɔɔ́s ó pigólí kilúd. Ná páyɛ́ɛ páʼkaáyóbanan náan, aáság kusəə lɛ́ pɛ́ɛn əgud.

³Əgiim əgiig áanɛ na kɛás, aáság kiiʼkini kolon, aáboan pɔsɔ́g pə́mmú pálɛ oʼkɔɔ, pɔ́dɛɔ́gɔ na pigólí.

⁴Náa, ɔnɔ́ na pɔ́lɛ́, pɛ́ɛn tɛn əgud a pɔlɛ́m puə́ŋ, nyɔ́lɛ́ aaboyɛ́ʼkɛn nkə kɛ́ kɛásɛʼtan a pɛsáábɔ́n pɛɔ́bɔn.

⁵Pɔsɔ́g tɛn póob pááság kɛɛn əgəə́bulid na póʼkáag a pigólí a pɔlɛ́m. «Aáság kiiʼkini kolon a tóɛf, əə́siəd pɔsɔ́g pə́mmú. A mangɛn mádáád, əmíʼkíni kolon, əə́siəd tɛn pə́mmú.

⁶Aáság kiiʼkini kolon áanɛ a wɔɔ́s kɛɛn. Əmíʼkíni koboan pɔsɔ́g tɛn pə́mmú pálɛ kɔ oʼkɔɔ. Náa ɔnɔ́ na pɔ́lɛ́, a igə aa póob pə́ələndən áay wɔɔ́s kilúd, pádiɛlɛ yoom ə́?

⁷Náa, pɔsɔ́g póob pɔ́nɔ́ na nyɔ́lɛ́: “Tɛlɛ oʼkɔɔ lɛ́ tɛdɛɔ́ŋɛn mɔɔd ugibiísiəd a pigólí.” Náa mɔɔd ɔnɔ́ na pɔ́lɛ́: “Mɛ́naan, póɛn aboan pɔsɔ́g a mɛ pɔlɛ́m, púgud”.

⁸Na niób, ná kɛnɛŋ kɛ́ kodɛ́ɛmɛn pigólí kɛ́yɛ́ɛ kiə́ʼkiim əgiig, mɔɔd o pɔlɛ́m aáság kodɛ́anɛ na uʼkudin wəəŋ nyummú lɛ́ ɔ́dɔ́ŋɔn ungim nyɔ́ yiígúd a pɔlɛ́m puə́ŋ wɔɔ́s wóow, áboyɛ́ʼkɛnan pɛsáábɔ́n pɛɔ́bɔn, kəə́bə́ə́ na pá pííyíbə́nən kiim, əgusúgəni na pɔsɔ́g pá na oʼto na oʼto.

⁹Pɔsɔ́g pá pə́yíím a wɔɔ́s kɛɛn pááság kiim adɛ́lɛm, pə́ə́siə́d pɛsáábɔ́n pɛɔ́bɔn, nkə kɛ́ kɛ́ɛ́sɛ́ʼtan a wɔɔ́s ó pigólí kilúd. Pɔsɔ́g póʼkáag tɛn piim pɔ́yɔ́ɔ́ŋ əgín tɛn yoom ímuʼ.

¹⁰Ná kɛnɛŋ kɛ́ pɔsɔ́g pá na koany púúb kíyíím əgiig, pááság kɛɛn adɛ́lɛm. Páyɛ́ɛ agofɛg lɛ́ pɔ́lɛ́ pɔ́ɔgɔɔŋ agaáyɛn pɔsɔ́g. Aáság koboyɛ́ʼkɛnan tɛn pɔ́lɛ́ əgín nkə kɛ́ kɛásɛʼtan a wɔɔ́s ó pigólí kilúd wɔnɔ́ pɔsɔ́g.

¹¹Páyɛ́ɛ əgusiəd mɔɔnɛ́ móom pɔ́ɔgɔɔ́gɔ́dɔ mɔɔd o pɔlɛ́m,

¹²pɔ́nɔ́, a igə aa pɔ́lɛ́ pá pááʼpɛ́ma yoóy, na ɛdɔm wɔɔ́s kilúd a pigólí, nyóon aáboyɛ́ʼkɛn pɛsáábɔ́n əgín yoom ímuʼ na pɔsɔ́g pá pə́ʼkimií áanɛ a ngim, pə́ə́gud áwaʼ mmuʼ súg ə́!

¹³Náa mɔɔd o pɔlɛ́m əə́guúlisini na sɔ́g nyummú ɔnɔ́: “Sɔ́g waam, nkə kɛ́ kɛbɛ́ aa mbɛ́ɛ́lɛ, náa waágɛmbɛn əə́? Tɛdɛáyóbanan pəsi na wɛ lɛ́, a pigólí pɛáŋan pɛ́ wɔɔ́s kilúd, ndaboyɛ́ʼkɛn nkə kɛ́ kɛásɛʼtan a?

¹⁴Siəd pɛsáábɔ́n pɛáŋ, wɛ́ɛn. Kímíʼkə́mmi náan lɛ́ nyɛ́ʼkɛn na pɔsɔ́g pá pə́míim a ngim, yoom ímuʼ wɔnɔ́ wɛ.

¹⁵Mɔɔnɛ́ málɛ máam, ndɛ ogɛɛlɛ na mɔ́lɛ́ wɔnɔ́ ná kímíʼkə́mmi. Olɛ agoob kɔbɛ́ lɛ́ wɔnɔ́ ná mbádɛ́ɛ́ ɔʼtɛ́m á?” »

¹⁶Yə́sus aáság kiiʼkini kaábɛg tɔgɛ́ɛ́, ɔnɔ́: «Taa, náan aa kɛ́lɛ́ɛ́ kɛɛnɛɛ́. Pá pálɛɛ́ yuudi pálɛ́ɛ́ kuúlini ngim. Pá pálɛɛ́ ngim, pálɛ́ɛ́ kosan yuudi.»

¹⁷Ná páyɛ́ɛ pándaabag a Yolósalɛm, Yə́sus yiísiə́d paaʼkan pə́ə́ŋ pá pówád na pábaan lɛ́ pɔ́lɛ́ pə́ə́súid. Páyɛ́ɛ agɛɛn əə́giim ɔ́sɔyɔ na pɔ́lɛ́, ɔnɔ́:

¹⁸«Taa, pəsi a póonɛ tɛándabágɛ́ɛ́ a Yolósalɛm, kɛnɔ kɛ́ páagɛndɛg mɛ Mɔɔ́n o mɔɔd a ɔmbɔg á puʼkúm pó payaaganɛʼ pɛfɔny, na palɛŋ pɛcɛm. Pálɛ́ɛ́ kosom kɛbán kɛ́am lɛ́ pɛ́njoon,

¹⁹Pə́yíʼkumin agɛnyɛɛ́ʼkɛn a ɔmbɔg á pandɛŋ Táán lɛ́ pɛ́sɛ́ga, pɛ́mbáam, pɛ́mbaŋan a ɔmbásá. Náa, mɔɔ́s mádáád a ngim yɛ́ɛy, ndəgiiʼkini kiim ndon a kəəniʼ ongóm.»

²⁰Náa ŋŋí ɛ pa Sɛ́ag pɔ́lɛ́ na Sɛ́aŋ, pɔɔ́n pá Səbədə́ə aágaáyɛʼtɛnɛ na pɔɔ́n pə́ə́ŋ a ɛbá ɛ́ Yə́sus, əmə́mudúmin əndu a udi əgumuŋíən yoom.

²¹Náa Yə́sus ɔnɔ́ na nyɔ́lɛ́: «Nkə aa waányɔ́ŋɛn əə́, íyowó?» Náa ɔʼkɛ́ɛd ɔnɔ́ na nyɔ́lɛ́: «Táá, mɛ pɔɔ́n a póonɛ pábaan. Ndaanyɔ́ŋɛn lɛ́ wɛ́ʼkagɛn lɛ́ ná waágɛɛn a oʼkɔɔ wááŋ ó Nɛlaamɛʼ, waaboyáág lɛ́ nyóonɛ a ombɔg wááŋ ó nɛnom, nyummú a oó kɛmɛs.»

²²Náa, Yə́sus əyíbuyúlísíni ɔnɔ́ na pɔ́lɛ́: «Podɛɔ́gɔ agolɛŋ nkə kɛ́ɛg kɛ́ polɛɛ́ əgiŋíən. Polɛ págaáʼkɛ konɛ ntɔ́b yɛ́ mɛ ndáanɛ a?» Náa pɔ́nɔ́ na nyɔ́lɛ́: «Ɛɛ́ɛ tɛlɛ págaáʼkɛ.»

²³Náa ɔnɔ́ na pɔ́lɛ́: «Ɛɛ́ɛ, a ntɔ́b, kɛ́lɛ náan fɔ́lɔ́b lɛ́ pəŋi tɛn polɛ́ɛ́ konɛ yɛ́lɛ́. Náa, a kɛ́ kuləndin a ombɔg wáam ó nɛnom na a oó kɛmɛs, adɛ́njaŋ mɛ áa ndágɛɛ́ʼkɛn mɔ́lɛ́. Máagoob na pá Mbáa yiísóbíni lɛ́ mɔ́ɔ́bɔn.»

²⁴Ná pɔsɔ́g paaʼkan pə́mmú póob pá pówád páyóób nkə kɛ́ niŋŋí nɛ́ɛn nííŋíən, píílíŋ na pɔ́lɛ́.

²⁵Yə́sus ayɛ́boodɔ́ŋɔn pɔ́lɛ́ piim, náa ɔnɔ́ na pɔ́lɛ́: «Pəŋi, adɛ́ pəŋibáamɔɛ́d poálɛŋ lɛ́ a nsí yɛ́ɛnɛ, puʼkúm pólɛ alaamɛ a toɛn á? Pagóʼkóón póoloodi lɛ́ pɔ́lɛ́ aa pálɛɛ́ na Nɛlaamɛʼ a?

²⁶Náa, a pəŋi, kíʼkóodi lɛ́ kíɛn náan, ndóo. Kíɛn agá lɛ́ nyɔ́ alɛɛ́ anyɔ́ŋɛn kɛɛn kɛgóʼkóón, yáyáánɛ inə́mbí ɛ́ pɔsɔ́g.

²⁷Nyɔ́ aányɔ́ŋɛn kɛɛn oʼtɛ́lɛm yuudi a ondáŋ wááŋan, yɛ́ɛn wɔnɔ́ kɛɔ́lɛ́ kɛáŋan.

²⁸Taa, náan tɛn aa kɛ́lɛɛ́ lɛ́ mɛ Mɔɔ́n o mɔɔd ntiʼkə́əgiim a nsí yɛ́ɛnɛ lɛ́ ná pɔɔd aa pɛ́ɛnɛɛ́ munə́mbí móam, ndóo. Njíím lɛ́ ná mɛ áa nyɛ́ɛnɛɛ́ inə́mbí yɔ́ɔ́bɔn, ndɛ nyɛɛ́ʼkɛn ɔlaa wáam agɛɛlɛ lɛ́ nyááŋɛn ɛ́fɔlɛ́ ɛ́ pɔɔd.»

²⁹A nɛlon nɛ́ɛn wɔnɔ́ ná páyɛ́ɛ pándaalon pálɛ́ɛg ɛ Yəlíʼko, kiʼtúú kɛ́ pɔɔd kɛ́yɛ́ɛ əgiim kíbuyə́ən a ngim.

³⁰Powongwóg pábaan pá páyɛ́ɛ pələndínə́ə́n kɔ áay a ɛbá yɛ́ ngə́ pááság koob lɛ́ Yə́sus aa nyóon alɛɛ́ agosan. Pə́ə́bə́ə́ kumuʼkíŋə pɔ́nɔ́ na nyɔ́lɛ́: «Sɛ́gɔɔ Sə́dúk! Wɛ Mɔɔ́n o Tə́fid, siəd maan na pəsi o!»

³¹Kiʼtúú kɛ́ pɔɔd kɛ́ɛg kiim kiə́bə́ə́ kobosásan, pɔ́nɔ́ na póob, pɔ́lɔg nnuʼ. Náa, pɔ́lɛ́ páyɛ́ɛ agá əgiiʼkini kosása na toɛn, pɔ́nɔ́: «Sɛ́gɔɔ Sə́dúk! Wɛ Mɔɔ́n o Tə́fid, siəd maan na pəsi o!»

³²Yə́sus aáság kodɛ́lɛm, náa ɔnɔ́ na pɔ́lɛ́, píim. Əyíbuŋíən ɔnɔ́ əə: «Nkə aa poányɔ́ŋɛn lɛ́ nyɛ́ɛlɛ na pəŋi ə́?»

³³Náa pɔ́nɔ́ na nyɔ́lɛ́: «Sə́dúk! Tɛanyɔ́ŋɛn lɛ́ óbɛyɛ́ɛlɛ tíiʼkini kodɛ́ʼtɛganan kə́mmú o!»

³⁴Maan mísiə́d Yə́sus na pɔɔd póob, aáság kobodɔ́bɔ a əngis. Əgín tɛn ná ayɛ́ɛ́lɛ náan, pə́ə́bə́ə́ kodɛ́ʼtɛganan, páádɛ́ɛ́mɛn, pə́ə́bə́ə́ kiim pə́muyə́njən.