Read Yambeta Maʼtɛ́as 22 Bible Online

Maʼtɛ́as 22 - Yambeta bible

Maʼtɛ́as 22

¹Yə́sus ayɛ́ɛ agosɔyɛla a poʼkaʼtɛ́n a mɔɛn, ɔnɔ́:

²«Nɛlaamɛʼ nɛ́ a mɔɛn nɛ́lɛ náanɛ wɔnɔ́ nkə kɛ́ kɛ́yáyɛ́lɛ́ɛ́ na nkúm yimmú yɛ́ ɛyɛ́ɛ́lánɛ kɛa kɛ́ kɛsɛɛn a kodɔn kó mɔɔ́n.

³Yɛɛ́dóman pəgudin pə́ə́ŋ lɛ́ pɛ́ɛn anyama pɔɔd pá yɛɛ́dɔ́ŋɔ́nɔ a wɔɔ́n, píimən. Náa, pɛ́ɛ́sáŋɛ́nɛ lɛ́ pə́díəgiim.

⁴Nkúm yaáság kiiʼkini kodom pəgudin pɛ́ndɛ́ŋ lɛ́ pɛ́ɛn adɛ́anɛ na pɔɔd póob lɛ́ paʼkáwoʼ pə́ə́ŋ na mudúg muə́ŋ mólaŋ, páʼkoóna, páʼkonáma. Páʼkoman kusóboni moom muim, píim a wɔɔ́n.

⁵Ɔmbɔ́ náan pɔɔd póob pə́diʼkə́əsiəd kɛnɛŋ. Páyɛ́ɛ́nan agá a maʼtom mɔ́ɔ́bɔn mɛ́ndɛ́ŋ kɛɛlɛ. Páyɛ́ɛ lɛ́ póonɛ páagɛɛn a malɛ́m mɔ́ɔ́bɔn, pə́mmú a məndunə́ mɔ́ɔ́bɔn kɛɛlɛ.

⁶Pɔsɔ́g pə́mmú píígúmən pəgudin pá nkúm, pámábobáám, pámáboyóóna.

⁷Ná nkúm ɛyóób náan, ilúún ɛ́yɛ́moobány, aáság kodom pasɔ́njaa lɛ́ pɛ́ɛn agoóna pacocóo póob piim, páman kubilə pálɛ́ɛg yɔɔbɔn.

⁸«Náa nkúm yɔ́nɔ́ na pəgudin pə́ə́ŋ: “Poádála ə́! Moom mó wɔɔ́n áa móonɛ moáʼkomanɛɛ́ koósóboni. Náa, pɔɔd pá páyɛ́ɛ pɔdɔ́ŋɔ́nɔ́ɔ́n a kɛsɛɛn pádɛʼkóosɛʼtanɛn lɛ́ pánɛ mólɛ́.

⁹Póɛn nɛ́gɔŋ a angag á pungə́ əngim. Ungim nyɔ́ poáboan kɔ, pómodɛ́anɛ lɛ́ yíim a kɛsɛɛn”.

¹⁰Pəgudin pááság kɛɛn, pə́míim pə́bug ungim nyɔ́ pɛ́ɛ́bóan. Páyɛ́ɛ lɛ́ na pɔɔd pá pabɛ́ kɛ́, na pɔsɔ́g pá paŋɛʼ kɛ́. Yoog síɛ́ɛ́d!

¹¹«Nkúm yaáság kosɔd əgiim adála pɔɔd pá pə́yíímən. Ná yɛɛ́sóm əngis, aáság kodála mɔɔd nyummú kɔ nyɔ́ adɛʼkɛ́lɛɛ́ na kilə́ə́ kɛ́ wɔɔ́n.

¹²Náa ɔnɔ́ na mɔɔd ogo nyóon: “Wɛ, tuə́ áa omɛ́ɛ́lɛ agosɔd a yoog ɛ wɔɔ́n fiɛ́d na kilə́ə́ kɛ́ wɔɔ́n a nkó?” Mɔɔd yiílə́ndin sáb, kɛbán kɛ́ kuúlisini na nkúm fiɛ́d.

¹³Náa nkúm yɔ́nɔ́ na pəgudin pə́ə́ŋ: Kumínəən mɔɔd nyóonɛ, pómoogóda ɔmbɔg na ambaan, pómoódagɛdɛ káag a táán, a mbin. Kɔ́gɔ́ɔg, əgín mandɛɛ na mandɛɛ, əgín pɛgɛg na pɛgɛg kaágáma aa pɛ́lɛɛ́ kɔ.»

¹⁴Əguyibənən, Yə́sus aáság kusəə ɔnɔ́: «A fɔ́lɔ́b ndabodɛ́anɛ lɛ́ piíŋ pálɛ pɔdɔ́ŋɔ́nɔ́ɔ́n náa, əgín ngab sɔɔŋ aa Táán əyííyid.»

¹⁵Pɔɔd pá a ɛgɔny ɛ́ Pafalɛsɛyɛ́ɛŋ páyágɔ́nyɛ́dɛ́ɛ́ əguunə wɔnɔ́ ná pálɛɛ́ págɛɛlɛ a kóonɛ lɛ́ ɔmbɔ́ əgín a tɔgɛ́ɛ́ tó əə́buyúúlisini, Yə́sus ə́də́əŋ a kisindiʼ kɛɔ́bɔn.

¹⁶Náan aa pə́yííyid ngab ɛ pɔɔd a ondáŋ wɔ́ɔ́bɔn na pɔsɔ́g tɛn pá a ɛgɔny yɛ́ Ɛlóod, pámáboodóm lɛ́ pɛ́ɛn əmuŋíən kɛbán. Ná páyɛ́ɛ́n əgiig kɔ, pə́yímuŋíən pɔ́nɔ́ əə: «Kɛlág, tɛálɛŋ lɛ́ wɛ olɛ əgusəə fɔ́lɔ́b, olɛ agaaʼkananɛ tɛn sáád wɔnɔ́ ná mɔɔd ogódíí lɛ́ ádáŋana a ngə́ yɛ́ yəə́gə́mmi Táán. Udiə́gu niis na mɔɔd, ungim alɛ yoom ímuʼ a əngis yááŋ.

¹⁷Kólɛ́ aa timíim əguŋíən lɛ́ óbɛdɛ́anɛ, a nɛáŋ ə́ə, pɛcɛm piə́s pɛ́lɛ əgusəə lɛ́ tɛ́ʼpɛ́ɛ́ mag na Sɛsáal əə́?»

¹⁸Yə́sus yɛɛ́lɛ́ŋ lɛ́ ambaan yə́ə́ŋ áa pálɛɛ́ əguunə náan. Náa ɔnɔ́ na pɔ́lɛ́: «Poagɛnjaásɔsɛn lɛ́ nkə ə́? Moɔ́ŋɛ́ná pusú wɔnɔ́ pəŋi!

¹⁹Oo, kɛbán kɛ́dɛɔ́gɔ! Mayɛ́nyɛɛ́ʼkɛ́naan kisúg kɛ́ mɔɔnɛ́ má polɛɛ́ agoʼpɛ́ɛ́la mag na mólɛ́ áŋ!» Pááság kolónɛ kisúg kɛ́ mɔɔnɛ́ kímuʼ, pámámonáámɛ́nɛ.

²⁰Náa ɔnɔ́ na pɔ́lɛ́: «Udi wóonɛ wó ólɛɛ́ kɔ əə, wó ánɛ aa ólɛɛ́nɔ ə́? Niiŋ tɛn nɛ́ɛnɛ nɛ́ nɛ́lɛɛ́ kɔ nidilídə́ə́n ə́ə, nɛ́ ánɛ aa nɛ́lɛɛ́nɔ ə́?»

²¹Náa pɔ́nɔ́ na nyɔ́lɛ́: «Udi wóow ólɛ ó Sɛsáal. Ɔmbɔ́ tɛn niiŋ nɛ́ɛn, niə́ŋ áa nɛ́lɛɛ́nɔ.» Náa Yə́sus ɔnɔ́ na pɔ́lɛ́: «Yɛ́ ɛ́lɛɛ́ ɛ́ Sɛsáal, poɛ́ʼkɛn na Sɛsáal. Yɛ́ ɛ́lɛɛ́ ɛ́ Táán, póyɛɛ́ʼkɛn na Táán.»

²²Pə́yə́wúnə́níí kɛ́fɔlɛ́ ná əyíbuyúlísíni náan, pááság kumuudi, páádɛ́ɛ́mɛn agɛɛn.

²³Wɔɔ́s əgín wóow, Pasadosɛyɛ́ɛŋ, (pɔ́lɛ́ aa pádɛʼkɛ́lɛɛ́ əgəə́liʼtini lɛ́ pɛlóŋ pɛ́lɛ́ɛ́ koóndɛg) páyɛ́ɛ́n aboan Yə́sus, pááság kumuŋíən pɔ́nɔ́ əə:

²⁴«Kɛlág! Táá nkə kɛ́ Moyíis yiísə́ə́ áa kɛ́ɛnɛ ɔnɔ́: “Mɔɔd amaʼkogóan ɔʼkɛ́ɛd náa əə́gú, əʼtí pɔɔ́n na oʼkán, móŋŋí ə́díin əsiəd kidí, pə́bíənə pɔɔ́n na kɛ́lɛ́ a niiŋ nɛ́ kɛlóŋ móŋŋí wəəŋ[75]”

²⁵Kɛbán áa anɛ́ɛ́n a kɛ́ɛnɛ kɛ́lɛɛ́ lɛ́: Pɔɔd aa póob páyɛ́ɛ a niŋŋí nɛɔ́bɔn nto ɛ́ʼtáan na ɛ́baan. Sɔ́g nyɔ́ osaá aágóan ɔʼkɛ́ɛd, náa, əə́gú ná pə́dímbíən mɔɔ́n. Móŋŋí nyɔ́ ayɛ́ɛ əgumuyə́ən aáság kudíin əsiəd kidí.

²⁶Nyɔ́lɛ́ tɛn əə́gú, əʼtí mɔɔ́n. Sɔ́g wo annam ádáád tɛn, yoom ímuʼ. Kɛ́yɛ́nánán náan súʼtə́ə́ a sɔ́g wo annam áʼtáan na ábaan, las yɔɔbɔn.

²⁷A komananɛ, ɔʼkɛ́ɛd nyóon tɛn aáság kudíin əgu a ngim.

²⁸Áay oóoʼ! A pɔ́lɛ́ póob nto ɛ́ʼtáan na ɛ́baan, ná pɛlóŋ pɛ́lɛ́ɛ́ koóndɛgan anɛ́ɛ́n óoʼ, oyaán áa alɛ́ɛ́ kɛɛnɛɛ́ onom wəəŋ ə́?»

²⁹Yə́sus əyíbuyúlísíni ɔnɔ́ na pɔ́lɛ́: «Nkə kɛ́ɛg kɛ́ polɛɛ́ əgusəə kɛ́lɛ a ɔsɛd a mɔɛn lɛ́ podɛɔ́gɔ agolɛŋ nkə kɛ́ kɛ́lɛɛ́ kidiídílə́ a kálaʼtaʼ, pondɛŋ tɛn toɛn tó Táán wɔnɔ́ ná tólɛɛ́.

³⁰Kɛ́lɛ lɛ́, ná pɛlóŋ pɛ́lɛ́ɛ́ koóndɛgan, ungim alɛ́ɛ́ kolaa wɔnɔ́ məŋun má maʼtom a mɔɛn, panɔ́mɛɛd páʼkoána pagɛ́ɛd, pagɛ́ɛd pádiɛnán pɛdɔ́ʼtɔn tɛn.

³¹A kɛ́ɛnɛ kɛ́ pɛlóŋ koóndɛg, podɛ́mbana nkə kɛ́ Táán yiísə́ə́ na unuʼ wə́ə́ŋ ɔnɔ́:

³²“Ndɛ Táán yɛ Ábɛlaam, Táán yɛ Ɛ́sag, na Táán ɛ Yáʼkɔb[76]” Táán ɔdɛɔ́gɔ Táán ɛ pɔɔd pá pálɛɛ́ pɛlóŋ, alɛ Táán ɛ pá pálɛɛ́ a ɔlaa.»

³³Ungim nyɔ́ ayɛ́ɛ agoob tɔgɛ́ɛ́ tóod, ayɛ́ɛ əgəə́wúnəni na nɛaʼkananɛʼ nɛ́ Yə́sus.

³⁴Ná Pafalɛsɛyɛ́ɛŋ páyóób lɛ́ Yə́sus yɛɛ́lɔ́g unuʼ ó Pasadosɛyɛ́ɛŋ, páyágɔ́nyɛ́dɛ́ɛ́.

³⁵Náan aa sɔ́g nyummú a ondáŋ wɔ́ɔ́bɔn, ɔndɛŋ pɛcɛm əyímuŋíən agomoásɔsɛn, ɔnɔ́:

³⁶«Kɛlág! A pɛcɛm piim əə, kɛ́yaán áa kɛ́mááyɛn pɔsɔ́g ə́?»

³⁷Náa, Yə́sus ɔnɔ́ na nyɔ́lɛ́: «Táá kɛcɛm kɛ́ kɛ́mááyɛn aa kɛ́ɛnɛ kɛ́lɛɛ́ lɛ́: “Nyɔ́ŋɛn Táán Sə́dúk waaŋ na ɔʼtɛ́m wááŋ ungim, na ɛdáányɛ́ yááŋ yiim, na mafɛgaʼ mááŋ miim[77]”

³⁸Kɛ́lɛ aa kɛ́lɛɛ́ kɛcɛm kɛ́ kɛgóón, kɛcɛm kɛ́ kɛ́mááyɛn piim.

³⁹Kɛ́ kiə́yə́ə́n kɛ́ɛg, kɛ́máamoŋwáŋanan tɛn aa kɛ́ɛnɛ kɛ́lɛɛ́ lɛ́: “Nyɔ́ŋɛn sɔ́g mɔɔd wɔnɔ́ wɛɛ́nyɔ́amɔɛ́d[78]”.

⁴⁰Əgəə́bə́ə a pɛcɛm pɛ́ Moyíis, əgiim agɛɛnanan a nkə kɛ́ palɔɛgɛʼ pɛbán pá Táán píísə́ə́, nidíŋ a nɛ́ɛn nɛ́lɛɛ́ a pɛcɛm pɛ́ɛb pɛ́baan.»

⁴¹Wɔnɔ́ ná Pafalɛsɛyɛ́ɛŋ páyɛ́ɛ kɔ áay paágɔ́nyɛ́dáán, Yə́sus aáság kubuŋíən ɔnɔ́:

⁴²«Pəŋi poádála tuə́ a kɛbán kɛ́ Məsíi əə́? Alɛ mɔɔ́n wo ánɛ ə́?» Náa pɔ́nɔ́ na nyɔ́lɛ́: «Alɛ mɔɔ́n o Tə́fid oo.»

⁴³Yə́sus ayɛ́bodɛánɛ ɔnɔ́ na pɔ́lɛ́: «Tuə́ áa Tə́fid nyɔ́lɛ́nyɔ́amɔɛ́d, ná Uŋun wó Ufúlúʼtú úyímuyə́ə́g a ɔʼtɛ́m ayɛ́modɔ́ŋɔn anɛ́ɛ́n lɛ́ Sə́dúk ə́?

⁴⁴Adɛ́ kɛ́lɛ lɛ́, Tə́fid nyóon aa yiísə́ə́ ɔnɔ́: “Sə́dúk Táán aádɛánɛ na Sə́dúk waam ɔnɔ́: Wɛ, ləndin áanɛ a ombɔg wáam ó nɛnom agɛɛn əgiig əgín wɔnɔ́ ná ndɛ́ɛ́ kɛɛlɛɛ́ lɛ́ úgíʼtən pabɛnɛn pááŋ na ambaan[79]”

⁴⁵Tuə́ áa Məsíi alɛɛ́ ugiiʼkini kɛɛn lɛ́ alɛ mɔɔ́n o Tə́fid, Tə́fid nyɔ́lɛ́nyɔ́amɔɛ́d aámodɔ́ŋɔn lɛ́ Sə́dúk wəəŋ ə́?»

⁴⁶Mɔɔd na mɔɔd adɛʼkɔ́ɔgɔɔŋ kɛbán kɛ́ kumuyúlisini. Əgəə́bə́ə a wɔɔ́s wóow, mɔɔd adɛʼkɛ́ɛ agowɛ́ɛsɛ kumuŋíən kə́mmú kɛbán.