Read Yambeta Maʼtɛ́as 23 Bible Online

Maʼtɛ́as 23 - Yambeta bible

Maʼtɛ́as 23

¹Yə́sus əə́bə́ə́ kosɔyɔ na paaʼkan pə́ə́ŋ, na kiʼtúú kɛ́ pɔɔd kɛ́ kíyə́yiilin kɔ áay, ɔnɔ́ na pɔ́lɛ́:

²«Pigólí pɛ́ palɛŋ pɛcɛm na Pafalɛsɛyɛ́ɛŋ pɛ́lɛ lɛ́ pábomoáŋɛnɛ pɛcɛm pɛ́ Moyíis.

³Pəŋi pugóódi lɛ́ póɛlɛ nkə kɛ́ páabodɛ́anɛ. Náa, kɛbán kímuʼ. Pəŋi pudinjə́ən ongoo wɔ́ɔ́bɔn lɛ́ pɔ́lɛ́báamɔɛ́d pɔ́dɛɔ́gɔ agɛɛlɛ nkə kɛ́ pálɛɛ́ əgusəə.

⁴Pálɛ agobonan agá pɔsɔ́g pɛnó pɛ́ pɛnasáŋ agobonyáŋɛnɛnɛ, pɔ́lɛ́báamɔɛ́d pɔ́ʼtɔ́bɔ konyáŋɛn pɛ́lɛ́ ɔmbɔ́ sɔɔŋ na ɛnoónó.

⁵Pɛbán pɛɔ́bɔn piim pɛ́ páagɛɛlanɛ, pálɛ agɛɛlanɛ pɛ́lɛ́ lɛ́ ná páboodála. Pálɛanɛ na pɛdám pɛ́ mɔlɛɛ́ndɛŋ a nkó yɔɔ́yɔɔ, pə́əgəə́níigən pɛlanda pɛ́ poʼtaa[80]

⁶A pɛsɛɛn na a puog pó pɛɔ́sɔ́gɔ́lɔ́n, pə́əguunə kuləndən əgín a mɔʼkɔɔ má yuudi lɛ́ ná páboodɛ́ʼtɛg.

⁷Páanyóŋɛnɛla lɛ́ kɛnɔ kɛ́ pálɛɛ́, pə́buúsoyidəni na nnyáádɛ́ ngim, pɔɔd páabodɔ́ŋɔnɔ pɔ́nɔ́: “Kɛlág! Kɛlág!”

⁸Náa a pəŋi, pudinjúúnílə lɛ́ páboodɔ́ŋɔnɔ náan: “Pɛlág! Pɛlág!” Ndóo. Pugóódi kɛlág əgín kímuʼ súg. Pəŋi piim polɛ pɔɔ́n pá mɔɔd úmmuʼ.

⁹Podɛʼtɔ́ŋɔn tɛn mɔɔd a nsí yɛ́ɛnɛ lɛ́ “Sɛ waaŋan” lɛ́ pugóódi Sɛ mmuʼ súg yɛ́ ɛlɛɛ́ a mɔɛn.

¹⁰Pudinjúúnə tɛn lɛ́ páboodɔ́ŋɔnɔ lɛ́: “Oʼtɛ́lɛm yuudi! Oʼtɛ́lɛm yuudi!” Ndóo. Pugóódi oʼtɛ́lɛm yuudi úmmuʼ súg, alɛ Məsíi.

¹¹Nyɔ́ alɛɛ́ oʼkóʼkóón a kɛgaágadɛ kɛáŋan ogóódi lɛ́ yɛ́ɛn inə́mbí ɛ́ pɔsɔ́g.

¹²Nyɔ́ alɛ́ɛ́ kaábágɛdɛɛ́, pálɛ́ɛ́ kumuúsuuli. Náa, nyɔ́ alɛ́ɛ́ kəə́sulií nkó a nsí, pálɛ́ɛ́ komobágɛdɛ.

¹³Maan na pəŋi moɔ́ŋɛ́ná pusú móonɛ! Pəŋi palɛŋ pɛcɛm na Pafalɛsɛyɛ́ɛŋ. Polɛ ɔlɔg pɔɔd ngə́ lɛ́ pádɛsɔ́d a Nɛlaamɛʼ nɛ́ a mɔɛn, pəŋibáamɔɛ́d posɔ́d a nɛ́lɛ́, podɛáʼkɛ́nɛ tɛn lɛ́ pá pálɛɛ́ anyɔ́ŋɛn kosɔd kɔ, pɔ́sɔd. [

¹⁵Maan na pəŋi moɔ́ŋɛ́ná pusú móonɛ, pəŋi palɛŋ pɛcɛm na Pafalɛsɛyɛ́ɛŋ. Polɛ əgiim pómaŋ nsí ngim, na toom tuim agɛɛlɛ lɛ́ púsúid a ngə́ yaaŋan, mɔɔd nyɔ́ əə́ʼkəə́liʼtinií. Kɛnɛŋ kɛ́ aándɛɛ́ na pəŋi, póság komoyɛ́ɛlɛ lɛ́ yáán nyɔ́ Táán ándaʼpɔ́nɛsɛɛ́ a yug yɛ́ ɛgóón, agoboyáyɛn pəŋi pɛnɛŋ pɛ́baan!

¹⁶Maan na pəŋi powongwóg pá puə́dulə pɔsɔ́g. Polɛ əgusəə lɛ́ mɔɔd amaʼkaácɛma uʼkóó ó Táán, ncɛm yɛ́ɛy ɛlɛ iyó. Náa, amaʼkaácɛma kóol yɛ́ ɛlɛɛ́ a uʼkóó wóow, ncɛm yɛ́ɛy ɛlɛ nnasáŋ.

¹⁷Piyəg wɔnɔ́ pəŋi! Powongwóg! A moom móom móbaan lɛ́ na kóol na uʼkóó, ɛ́yaán áa ɛ́mááyɛn sɔ́g? Kóol oóm, uʼkóó wó ómɛ́ɛ́lɛ lɛ́ kóol yɛ́ɛy yɛ́ɛn nfúŋiə́n ə́?

¹⁸Polɛ əgusəə tɛn poɔʼkɔ́, mɔɔd amaʼkaácɛma kibóŋ kɛ́ pɛfɔny, ncɛm yɛ́ɛy ɛlɛ iyó. Náa, amaʼkaácɛma yoom yɛ́ pááfɔny a kibóŋ kɛ́ɛg, ncɛm yɛ́ɛy ɛlɛ nnasáŋ.

¹⁹Powongwóg wɔnɔ́ pəŋi! A moom móom móbaan ɛ́yaán aa ɛ́mááyɛn sɔ́g? Nkə kɛ́ kɛ́máfɔ́nyɛ́ɛ́ kɔ óm, kibóŋ kɛ́ kɛ́mɛ́ɛ́lɛ lɛ́ kɛfɔny kɛ́ɛg kíɛn kifúŋiə́n ə́?

²⁰Lɛŋáan lɛ́ mɔɔd amaʼkaácɛma kibóŋ, amácɛ́máá lɛ́ na kibóŋ, na moom muim mó mólɛɛ́ kɔ.

²¹Áyaácɛma uʼkóó, amácɛ́máá lɛ́ na uʼkóó, na Táán nyɔ́ alɛɛ́ lɛ́ uʼkóó wóow ólɛ noádɛʼ nuə́ŋ.

²²Nyɔ́ amácɛ́máá mɔɛn, amácɛ́máá oʼkɔɔ ó Nɛlaamɛʼ ó Táán. Amácɛ́máá Táán nyɔ́ alɛɛ́ a oʼkɔɔ ó Nɛlaamɛʼ wóow[82]

²³«Maan na pəŋi moɔ́ŋɛ́ná pusú móonɛ, pəŋi palɛŋ pɛcɛm na Pafalɛsɛyɛ́ɛŋ. Ɛɛ́ɛ, polɛ agɛɛ́ʼkɛn Táán kɛowád kɛ́ muyənjə́g mó moom wɔnɔ́ pisənduŋ, pondóŋ ndíg, pɛlog[83] Náa, puʼkóodi kɛnɛŋ na pɛbán pɛmɔɛ́d pɛ́ pɛgóón pɛ́ pɛcɛm pɛ́lɛɛ́ agɛbɛyáaʼkananɛ, náanɛ wɔnɔ́: “Pasáád, ɔʼtɛ́m ó kulisənən, kaag oʼto na Táán.” Táá nkə kɛmɔɛ́d kɛ́ puígóodi lɛ́ póɛlɛ aa kɛ́ɛg, poágɛɛlɛ tɛn pɛ́ʼkáanɛ.

²⁴Pəŋi, powongwóg pá puə́súidə pɔsɔ́g. Polɛ agolɛŋ kodɛ́ʼtɛg məní mááŋan má koŋo agɛɛlɛ lɛ́ púliogi ɛyaa ɛ́ nomóny yɛ́ ɛ́lɛɛ́ kɔ a kaadɛ lɛ́ ná podɛmmɛ́n yɛ́lɛ́. Kɔmɔɛ́d lɛ́ kiʼtóg kɛ́ nnyam wɔnɔ́ sɛamóo, polɛ amɛn yɛ́lɛ́!

²⁵«Maan na pəŋi moɔ́ŋɛ́ná pusú móonɛ, pəŋi palɛŋ pɛcɛm na Pafalɛsɛyɛ́ɛŋ! Pilən pɛáŋan na pəʼkúmbəʼ pááŋan pálɛ káanɛ a táán púyúŋ púyúŋ, kɔmɔɛ́d lɛ́ a kaadɛ, moom mó wiib aa múyə́giníí kɔ síɛ́ɛ́d, na pɛbán pɛ́ pɛbɛ́ pɛ́ pɛ́lɛɛ́ əgiim pɛ́lon a ntɛ́m yaaŋan.

²⁶Ongwongwóg wɔnɔ́ wɛ, Falɛsɛyɛ́ɛŋ! Yaŋ ásog kilən kɛáŋ a kaadɛ ná a táán tɛn kɛ́móaŋ.

²⁷Maan na pəŋi moɔ́ŋɛ́ná pusú móonɛ, pəŋi palɛŋ pɛcɛm na Pafalɛsɛyɛ́ɛŋ. Polɛ wɔnɔ́ pəgəəniʼ pá pálɛɛ́ fúlúʼtúʼtúʼtú lɛ́ pə́ə́wú ɔfɛ́m[84] Pálɛ agodɛ́ʼtɛganan kɔŋɛʼ a táán, kɔmɔɛ́d lɛ́ a kaadɛ, pigú pɛ́ pɛlóŋ pɛ́ pɔɔd aa pɛ́lɛɛ́ kɔ síɛ́ɛ́d na mbod ɛ pɛbɔnɔ́bɔ́nɔ́ pɛ́ moom ngim.

²⁸Náan aa kɛ́lɛɛ́ yoom ímuʼ na pəŋi. A táán, puogoóloodi lɛ́ polɛ sáád. Kɔmɔɛ́d lɛ́ a ntɛ́m yaaŋan a kaadɛ polɛ moɔ́ŋɛ́ná pusú mólɛ́ na mólɛ́, polɛ əgín kɔbɛ́ na kɔbɛ́ kɛɛlɛ.

²⁹«Maan na pəŋi moɔ́ŋɛ́ná pusú móonɛ, pəŋi palɛŋ pɛcɛm na Pafalɛsɛyɛ́ɛŋ. Polɛ amaaŋan pisig pɛ́ pəgəəniʼ pá palɔɛgɛʼ pɛbán pá Táán, poálɛŋ kusóboni pá pɔɔd pá páyɛ́ɛ sáád.

³⁰Polɛ əgusəə poɔʼkɔ́, pəŋi poyɛ́ɛnɛn kɔ a kɛnɛŋ kɛ́ pasɛʼkóón pááŋan, ná podɛʼkɛ́ɛ ɔsɔd a ɛdɔɔgɛ ɛ́ koóna palɔɛgɛʼ pɛbán pá Táán.

³¹A niɛlɛʼ nɛáŋan nɛ́ɛn, polɛ əguloodi pəŋibáamɔɛ́d lɛ́ polɛ pɔɔ́n pá pɔɔd pá páyóóna palɔɛgɛʼ pɛbán pá Táán.

³²Nkə anɛ́ɛ́n kímmú! Todáan yuudi, yibə́nəən nkə kɛ́ pɛmbáa pááŋan pə́yə́ʼtúmíí!

³³Pəŋi nkud yɛ́ɛnɛ! Pəŋi ombod wó nfɛn! Poafɛga lɛ́ polɛ págɛɛlɛ lɛ́ podɛnjɛ́ɛ́n na nsɔ́ɔ́, pádɛyɛ́boodágɛ́dɛ a yug yɛ́ ɛgóón á!

³⁴Kólɛ́ aa ádámɛ́gɛ́an, nyɔʼkɔ́ na pəŋi: Ndɛ́ɛ́ kiim mpodómɛn na palɔɛgɛʼ pɛbán pá Táán, na pɔɔd pá nsiŋ, na palɛŋ pɛcɛm pá fɔ́lɔ́b. Polɛ́ɛ́ koóna pə́mmú, póobaŋan pə́mmú a ɔmbásá. Pɔsɔ́g pə́mmú, polɛ́ɛ́ kobobááma na nsuə́ a puog poáŋan pó pɛɔ́sɔ́gɔ́lɔ́n, puə́buyə́njən a pálɛ́ɛg ngim yɛ́ páagɛɛn kɔ lɛ́ ná púbuúyəʼkəni.

³⁵Áay anɛ́ɛ́n, maŋɔ́ má pɔɔd pá sáád piim pá páyóóna málɛ́ɛ́ kɛɛn a nto yaaŋan, Əgəə́bə́ə a maŋɔ́ má Ábɛl nyɔ́ ayɛ́ɛ sáád ɛ mɔɔd, agɛɛn əgiig a má Saʼkalɛ́as, mɔɔ́n ó Palasíi nyɔ́ poyóón a kɛgaágadɛ kɛ́ɛg lɛ́ na uʼkóó na kibóŋ kɛ́ pɛfɔny[85]

³⁶Ndabodɛ́anɛ a fɔ́lɔ́b lɛ́ ndɛg yɛ́ɛnɛ ɛ́ nɛ́gɔŋ aa ɛlɛ́ɛ́ konyáŋɛnɛɛ́ pɔ́nɔ́ɔs ngim yɛ́ a pɛbán pɛ́ɛb.»

³⁷«Əə́əy Yolósalɛm! Yolósalɛm, əə́əy na wɛ nyɔ́ olɛɛ́ agoóna palɔɛgɛʼ pɛbán pá Táán, pɔɔd pá Táán alɛɛ́ agodóman, waábodóan na aʼtáán lɛ́ pə́guə́ʼkən. Njúúnə lɛ́ nyágɔnyɛdɛn pɔɔ́n pááŋ a ɛbá yáam pɛnɛŋ wɔnɔ́ pɛnɛŋ, wɔnɔ́ ná ándɛ nsɛɛ yə́əgəə́gúlig pɔɔ́n a nfaáan yəəŋ. Náa pəŋi podɛʼkáagɛnyaáʼkɛnɛ!

³⁸Táán alɛ́ɛ́ kobodóɛn uʼkóó wááŋan a kúfuʼ[86]

³⁹Náa ndábodɛ́anɛ lɛ́, Əgəə́bə́ə nɛ́gɔŋ, podɛágɛʼtála kə́mmú súʼtə́ə́ ná polɛ́ɛ́ kusəlií poɔʼkɔ́: “Táán ágoyɛ́ɛlɛ kɔŋɛʼ, wɛ nyɔ́ alɛɛ́ əgiim a niiŋ nɛ́ Sə́dúk[87]!” »