Read Yambeta Maʼtɛ́as 24 Bible Online

Maʼtɛ́as 24 - Yambeta bible

Maʼtɛ́as 24

¹Yə́sus aáság kiim álon a Tɛ́mpɛl, alɛ anɛ́ɛ́n agɛɛn a, paaʼkan pə́ə́ŋ pááság kaáyɛʼtɛnɛ a ɛbá yə́ə́ŋ, pɔ́nɔ́ na nyɔ́lɛ́: «Waádála wɔnɔ́ ná pɛ́ɛ́lɛ́ŋ kowáag Tɛ́mpɛl əə́!»

²Náa ɔnɔ́ na pɔ́lɛ́: «Adɛ́ polɛ agodɛ́ʼtɛg nkə kɛ́ɛg kiim ə? Ndabodɛ́anɛ a fɔ́lɔ́b lɛ́, ɔmbɔ́ nɛdáán nímuʼ áay nɛ́dɛndɛ́ɛ́ kolɔb náan a nkó ɛ sɔ́g. Nkə kɛ́ɛg kiim kɛ́lɛ́ɛ́ koman kubumbug.»

³Yə́sus yɛɛ́bág a oʼkon ó pa Olifiyə́ə, əə́ləndin a nsí. Páyɛ́ɛ əgín pɔ́lɛ́ na pɔ́lɛ́, paaʼkan pə́ə́ŋ pááság komoyáyɛʼtɛnɛ a ɛbá. Náa pə́əmuŋíən pɔ́nɔ́ əə: «Sə́dúk, ɛ́bɛdɛánɛ áŋ! Naanɛ́g áa pɛbán pɛ́ɛb pɛ́lɛ́ɛ́ kaáyɛ́lɛɛ́ ə́? Kɛálɛ́ʼkán igə tɛn aa kɛ́lɛ́ɛ́ kibiílodií lɛ́ kimbuúlini koáŋ, na koman kó nsí kuə́ʼkiig əə́?»

⁴Yə́sus əyíbuyúlísíni ɔnɔ́: «Lóʼkɔ́dɔɔn óo! Lóʼkɔ́dɔɔn agɛɛlɛ lɛ́ mɔɔd ədiyíbulígə o!

⁵Kɛ́lɛ lɛ́ ɛ́fɔlɛ́ ɛ́lɛ́ɛ́ kiim na niiŋ nɛ́am a unuʼ. Na nyóon ɔnɔ́ nyɔ́lɛ́ aa alɛɛ́ Məsíi. Pálɛ́ɛ́ kuními ɛ́fɔlɛ́ ɛ́ pɔɔd ngə́.

⁶Polɛ́ɛ́ koob pɔ́ɔsɔyɔ lɛ́ pɛdá pɛ́lɛ agaánɔɛyɛ áanɛ ndúmiʼ, ɔmbɔ́ lɛ́ kága laálá, podɛʼtámmána. Nkə kɛ́ɛg kiim kígóódi lɛ́ kɛáyɛ́ɛlɛ. Náa, kɛ́dɛndɛ́ɛ́ kɛɛn lɛ́ nɛman nɛ́ nsí aa nɛ́ɛn.

⁷Kɛ́lɛ́ɛ́ kɛɛn lɛ́ nigúu nɛ́ɛnɛ nɛ́lɛ agonɔɛyɛ nɛ́ʼkága pɛdá, kɛsom kɛ́ nɛlaamɛʼ kɛ́ɛnɛ kɛ́anɔɛyɛ kɛ́ʼkága. Məyíi málɛ́ɛ́ kudə́əŋ a ombod ó koon mɔɔd. Nsí ɛlɛ́ɛ́ kəə́nyigən a pɛnɔ piíŋ.

⁸Pɛbán pɛ́ɛb piim pɛ́lɛ́ɛ́ kɛɛn wɔnɔ́ ntɔ́b yɛ́ ɔʼkɛ́ɛd alɛanɛɛ́ na yɛ́lɛ́ a kɛnɛŋ kɛ́ ɔsánɛʼ.

⁹Pɔɔd pálɛ́ɛ́ koboólɛg lɛ́ ná pə́buúyəʼkəni, páboyóóna. Pandɛŋ Táán piim pálɛ́ɛ́ koboóbɛnɛn a kidíídí kɛ́am.

¹⁰Pɔɔd piíŋ áa pálɛ́ɛ́ kudə́ŋií a kɛnɛŋ kɛ́ɛg. Pálɛ́ɛ́ kolɛganan pɔ́lɛ́ na pɔ́lɛ́, páabɛmbɛnanan.

¹¹Ɛ́fɔlɛ́ ɛ́ palɔɛgɛʼ pɛbán pá pɛnyaʼ pálɛ́ɛ́ kolónan. Pálɛ́ɛ́ kɛɛlɛ lɛ́ pɔɔd piíŋ pə́nim ngə́.

¹²A kɔbɛ́ kó kólɛ́ɛ́ kosambɛdɛɛ́, nnyɔ́ŋánán yɛ ɛ́fɔlɛ́ ɛ́ pɔɔd ɛlɛ́ɛ́ kodɔɔ.

¹³Náa, nyɔ́ adɛndɛ́ɛ́ koʼtiɛngɛlɛdɛɛ́ súʼtə́ə́ a nɛman, nyóon aa Táán alɛ́ɛ́ komoyɔ́yɛɛ́.

¹⁴Tɔsɔm Tólaŋ tó a Nɛlaamɛʼ tóod, tólɛ́ɛ́ kaálɔɛgɛ a nsí ngim. Tólɛ́ɛ́ kɛɛn mbaasɔ́ a ungim nyɔ́ andɛŋɛnɛɛ́ Táán. Áay anɛ́ɛ́n áa nɛman nɛ́lɛ́ɛ́ kiimií.

¹⁵«Ná polɛ́ɛ́ kodála “Kólógósog nyóon”, “Ɛyósag yɛ́ ɛgóón[88]” undəndínə́ə́n a uʼkóó, nyɔ́lɛ́ nyɔ́ Taníɛl, ɔndɔɛgɛʼ pɛbán o Táán yiísə́ə́. (Wɛ nyɔ́ olɛɛ́ agobana nkə kɛ́ɛnɛ, óób náan ó!)

¹⁶Áay anɛ́ɛ́n, pá pálɛ́ɛ́ kɛɛnɛɛ́ a Siudə́ə pógóódi lɛ́ pádɛ́da agɛɛn ɔgɔɔsɛm a nkon.

¹⁷Nyɔ́ alɛ́ɛ́ kɛɛnɛɛ́ a palándaʼ pə́ə́ŋ, ədinjúúnə kiiʼkini kosɔd a yoog agɛɛn əsiəd moom muə́ŋ.

¹⁸Yoom ímuʼ na nyɔ́ alɛ́ɛ́ kɛɛnɛɛ́ a pɔlɛ́m. Ədinjúlíni a noádɛʼ agɛɛn əsiəd kilə́ə́ kiə́ŋ kɛ́ niŋiʼ.

¹⁹Maan kɛ́fɔlɛ́ a mɔɔ́s móom na pagɛ́ɛd pá əngum, na pɔsɔ́g pá pálɛ́ɛ́ kɛɛnɛɛ́ na pɔɔ́n pá páaŋɛ́ʼkɛ!

²⁰Poɔ́sɔ́gɔlɔn Táán agɛɛlɛ lɛ́ kɛnɛŋ kɛ́go kɛ́ɛg kɛ́ kodɛ́da, kɛ́dɛnjɛ́ɛ́n a kɛnɛŋ kɛ́ tɔɔ́, ɔmbɔ́ lɛ́ a wɔɔ́s ó kisúgiʼ

²¹lɛ́ a kɛnɛŋ kɛ́ɛg, ntɔ́b ɛlɛ́ɛ́ kɛɛn kɔ kɛ́fɔlɛ́ a ombod wó pɛ́go pɛ́ nsí ɛyásáŋɛ́ɛ́, mɔɔd adɛ́ʼtálaá əgiim əgiig na nɛ́gɔŋ kɛ́. Yimmú tɛn ɛdɛndɛ́ɛ́ kɛɛn kɔ igiig wɔnɔ́ yɛ́ɛy[89]

²²Táán ədíʼkúusəəlin lɛ́ mədúg móom mɛ́ɛn masɔ́sɔ́m, ngə́ yɛ́ɛnɛ lɛ́ mɔɔd yɔ́ɔy ɛdɛʼkɛ́ɛ agɛɛn kɔ. Náa, alɛ́ɛ́ kosom mɔ́lɛ́ a kidíídí kɛ́ pá əyííyid.

²³Mɔɔd əməʼkiim abodɛ́anɛ anɛ́ɛ́n lɛ́: “Táá Məsíi aa yɛ́ɛnɛ taa!” Ɔmbɔ́ lɛ́: “Taa ogo aa nyóon kága!” Pudiyə́líʼtíníí.

²⁴Kɛ́lɛ lɛ́, ɛ́fɔlɛ́ ɛ́ pa Məsíi pá pɛfaa, na palɔɛgɛʼ pɛbán pá pɛfaa pálɛ́ɛ́ kiimən. Pálɛ́ɛ́ kɛɛlanɛ ɛ́fɔlɛ́ ɛ́ mangán na pɛálɛ́ʼkán pɛ́ pɛgóón əgulígə pɔɔd. Ngə́ ɛmaʼkɛɛn kɔ, pálɛ́ɛ́ kulígə tɛn ɔmbɔ́ pɔsɔ́g pá Táán əyííyid.

²⁵Táá, ɛkwaŋ aa yɛ́ɛy mbáyaŋ abooníɛn ó!»

²⁶«Mɔɔd əməʼkiim anɛ́ɛ́n abodɛ́anɛ lɛ́: “Táá, Mɔɔ́n o mɔɔd a nyóʼkága alɛɛ́ a kɛnɔ kɛ́ kifələ́ə́n!” Podɛnjɛ́ɛ́n kɔ. Áabodɛ́anɛ ɔmbɔ́ lɛ́: “Taa, ogo aa nyóʼkága yɔsɛ́ɛ́”, pudiyə́líʼtíníí

²⁷lɛ́ wɔnɔ́ ná ándɛ ɛdáányɛ́ yáasaa mbálámɔɛn, kodɛ́ɛmɛn a noá nó wɔɔ́s wə́əgiim ódɛ́ɛman súʼtə́ə́ a nó ándɛ wáagɛɛn agɛ́mmɛŋɛn, náan aa nimbuúlini nɛ́am nɛ́ mɛ Mɔɔ́n o mɔɔd nɛ́lɛ́ɛ́ kɛɛnɛɛ́.

²⁸Kɛnɔ kɛ́ anjɛŋ yɛ́ɛ́lɔ́b, kɔ tɛn aa kogad kúyúúli.

²⁹A ngim ɛ mədúg móom ná ntɔ́b yɛ́ nkóʼkóón yɛ́ɛy yaáʼkosan, niis nɛ́ wɔɔ́s nɛ́lɛ́ɛ́ kunim, údiiʼkíni kolɛŋ konom kə́mmú. Ɔmbɔ́ tɛn wəə́ ódɛndɛ́ɛ́ konom na udúg. Muə́dədəʼ mólɛ́ɛ́ kiim mógásɛg a mbálámɔɛn əgudə́əŋ a nsí. Toɛn tó túgumíníníí moom móom muim a mɔɛn tólɛ́ɛ́ kəə́nyigid[90]

³⁰Kɛálɛ́ʼkán kɛ́ Mɔɔ́n o mɔɔd kɛ́lɛ́ɛ́ koólodií a mbálámɔɛn, mɔnɔŋ miim málɛ́ɛ́ kaányam. Áay aa pálɛ́ɛ́ kɛʼtálaá mɛ Mɔɔ́n o mɔɔd ndə́əgiim nsuu a kɛbɛd a mɔɛn. Ndɛ́ɛ́ kiim na toɛn tuim, na nugəm nuim[91]

³¹Isə́ə́ yɛ́ ɛgóón ɛ́lɛ́ɛ́ kodaŋ, ná yíim ádom məŋun mə́ə́ŋ má maʼtom a əʼkid yɛ́ nsí əngim ə́niʼ, kodɛ́ɛmɛn a ongam wóonɛ agɛɛn agaádɛ a wóow kága. Málɛ́ɛ́ kogonyɛd pá Sə́dúk əyííyid[92]»

³²Yə́sus əyíbusiə́din nkaʼtɛ́n yɛ́ɛnɛ, ɔnɔ́: «Óbáan yisí yɛ́ ɛlɛɛ́ a nkaʼtɛ́n yɛ́ɛnɛ na figiyə́ə. Əgín ná poádála lɛ́ ntab yəəŋ yoóndosomi, toáŋánán tóɔdɔs, pólɛŋ lɛ́ kɛloo kɛándɛ ndúmiʼ.

³³Yoom tɛn náan ímuʼ ná polɛ́ɛ́ kodálaá lɛ́ nkə kɛ́ɛg kiim kɛándagaáyɛ́ɛlɛ. Póság kolɛŋ tɛn áay lɛ́ kɛnɛŋ kɛ́am kɛ́ mɛ Mɔɔ́n o mɔɔd kimbuúlini kɛándɛ ndúmiʼ, kíəgəə́bisig kiim əgiig.

³⁴A fɔ́lɔ́b ndabodɛ́anɛ lɛ́ ɔsɛg wóonɛ ó nɛ́gɔŋ ódɛndɛ́ɛ́ kuwu ungim ná nkə kɛ́ɛnɛ kiim kɛ́dɛ́njáásan.

³⁵Mbálámɔɛn ɛlɛ́ɛ́ kosan, nsí tɛn yɛ́ɛnɛ yɛ́ɛsan, náa tɔgɛ́ɛ́ tóam tólɛ a pəliə́g.»

³⁶«Náa, mɔɔd na mɔɔd andɛŋɛn wɔɔ́s ogo na kɛnɛŋ kɛ́go kɛ́ pɛbán pɛ́ɛb pɛ́lɛ́ɛ́ kaásánɛ́ɛ́. Ɔmbɔ́ məŋun má maʼtom má málɛɛ́ a mɔɛn mándɛŋɛn, ɔmbɔ́ mɛ nyɔ́ ndɛɛ́ Mɔɔ́n, ntɛlɛŋɛn. Mbáa nyɔ́lɛ́nyɔ́əsíŋ áa aálɛŋ.

³⁷Nkə kɛ́ kɛ́yásánɛ́ɛ́ a kɛnɛŋ kɛ́ Nówə kɛ́lɛ́ɛ́ kaásan tɛn náan yoom ímuʼ ná mɛ Mɔɔ́n o mɔɔd ndɛ́ɛ́ kimbuúlini.

³⁸Kɛ́lɛ lɛ́, əgín wɔnɔ́ nkə kɛ́ kɛ́yásánɛ́ɛ́ a kɛnɛŋ kɛ́ɛg ná Táán ayɛ́ɛ ədíʼtə́əŋi noó nó noɛ́mɛ́n nsí ngim, pɔɔd páyɛ́ɛ əgín moom mó konɛ kɔɔ́nyɔg, poloʼ koŋo, poban kusiədə, na pɛdɔ́ʼtɔn kɛɛnan súʼtə́ə́ əgiig a wɔɔ́s wó Nówə yɛɛ́sɔ́d a siʼtíməʼ[93]

³⁹Ɔmbɔ́ mɔɔd ayɛ́ɛ adɛáságɛ́mɛ́ɛ́ yoom. Wɔɔ́s wóow wááság kiim əgiig, noó nuə́də́əŋ, ungim əə́wú[94] Náan tɛn yoom ímuʼ aa kɛ́lɛ́ɛ́ kaásánɛ́ɛ́ ná mɛ Mɔɔ́n o mɔɔd ndɛ́ɛ́ kimbuúlinií.

⁴⁰A kɛnɛŋ kɛ́go kɛ́ɛg, kɛ́lɛ́ɛ́ kɛɛn lɛ́ panɔ́mɛɛd pábaan pálɛ a pɔlɛ́m, pə́əsiəd úmmuʼ, pə́ədi nyummú.

⁴¹Pagɛ́ɛd pábaan pálɛ́ɛ́ kɔɔb moom ondáŋ a nɛdáán, pə́əsiəd úmmuʼ, pə́ədi nyummú.

⁴²Podɛyádóó anɛ́ɛ́n kaádoán lɛ́ podɛálɛŋ naanɛ́g áa Sə́dúk waaŋan əə́ndəgimbuúlinií.

⁴³Poálɛŋ lɛ́ mɔɔd o noádɛʼ yɛɛ́lɛŋɛn naanɛ́g áa piíbən pə́əgiim əmuyííbənən na udúg, ədiə́búdig niis udúg wóow ungim agobóŋan lɛ́ adɛáboyáʼkɛnɛ lɛ́ pábáŋa yoog yəəŋ.

⁴⁴Kólɛ́ aa ndábodɛ́anɛ lɛ́ púləndin poágaáboŋ pɛnɛŋ piim lɛ́ Mɔɔ́n o mɔɔd alɛ́ɛ́ kiim alon a kɛnɛŋ kɛ́ podɛáfɛgɛɛ́ lɛ́ alɛ ugiim.»

⁴⁵«Ánɛ anɛ́ɛ́n áa alɛɛ́ uʼkudin nyɔ́ pálɛ́ɛ́ kaágɛ́ɛ́ oʼto na nyɔ́lɛ́, nyɔ́ alɛɛ́ tɛn na nsiŋ? Taa, nyummú aa nyóonɛ nyɔ́ sə́dúg wəəŋ əyímuudí lɛ́ ə́díin adɛ́ʼtɛg pɔsɔ́g pəgudin, aáboomɛ́nɛ lɛ́ kɛnɛŋ kɛ́ konɛ́ɛnɛ kíməʼkiig áaboyáabɛn.

⁴⁶Kɔŋɛʼ na uʼkudin nyóon náan nyɔ́ sə́dúg wəəŋ alɛ́ɛ́ komoóboanɛɛ́ lɛ́ alɛ agɛɛlɛ pigólí piə́ŋ.

⁴⁷A fɔ́lɔ́b ndabodɛ́anɛ lɛ́ sə́dúg alɛ́ɛ́ kumudə́nigi lɛ́ ádáŋananɛ moom muə́ŋ muim.

⁴⁸Kɔmɔɛ́d lɛ́ amaʼkɛɛn lɛ́ alɛ uʼkudin nyɔ́ ɔmbɛ́, uʼkudin nyɔ́ alɛɛ́ afɛga agá a ɔʼtɛ́m wə́ə́ŋ ɔnɔ́: “Sə́dúg waam aáʼkɛɛn ayɛ́ɛn ə́!”

⁴⁹Əə́bə́ə́ agá kocɔʼkɔnɛ pɔsɔ́sɔ́g pə́ə́ŋ pá pigólí, aánɛ moom, aáŋo poloʼ na moŋo poloʼ.

⁵⁰Nyóon náan, sə́dúg wəəŋ alɛ́ɛ́ kiim alon wɔɔ́s wó ɔdɛɔ́gɔ agaábóŋɛ́ɛ́, na a kɛnɛŋ kɛ́ adɛágaálɛŋɛɛ́.

⁵¹Alɛ́ɛ́ komooŋɛŋ. Alɛ́ɛ́ komoyɛ́ʼkɛn ntɔ́b yoom ímuʼ wɔnɔ́ yɛ́ alɛ́ɛ́ kɛɛ́ʼkɛnɛɛ́ na pá pálɛɛ́ moɔ́ŋɛ́ná pusú. Kɔ́gɔ́ɔg, əgín mandɛɛ na mandɛɛ áa málɛɛ́ kɔ, əgín pɛgɛg na pɛgɛg kaágáma.»