Read Yambeta Maʼtɛ́as 25 Bible Online

Maʼtɛ́as 25 - Yambeta bible

Maʼtɛ́as 25

¹«Nɛlaamɛʼ nɛ́ a mɔɛn nɛ́lɛ́ɛ́ kɛɛn náanɛ wɔnɔ́ kɛbán kɛ́ modɔŋ mó pabódóm mó múyíím moáboŋɛn na pəbiʼtíləʼ pɔ́ɔ́bɔn agɛɛn aboŋ ɔndad kodɔn a ngə́. Páyɛ́ɛ nto yɔɔbɔn yówád.

²Náa, kɛbán kímuʼ əgín nto ɛ́ʼtáan aa ɛyɛ́ɛ na nsiŋ, pɔsɔ́g pá nto ɛ́ʼtáan tɛn pə́mmú, fiɛ́d na nsiŋ.

³Pɔsɔ́g pá pádɛʼkɛ́lɛɛ́ na nsiŋ, pə́yíím pə́siəd əgín pəbiʼtíləʼ pɔ́ɔ́bɔn pɛ́lɛ́ na pɛ́lɛ́, pádɛáyóŋɛ́ɛ́ kiim pə́ə́guminin kələsíin yimmú a ɛbá.

⁴Kɔmɔɛ́d lɛ́ pɔsɔ́g pá páyɛ́ɛ na nsiŋ pə́yíím pááboŋɛn lɛ́ na pəbiʼtíləʼ pɔ́ɔ́bɔn, na kələsíin yimmú a ɛbá. Pááság kuləndin anɛ́ɛ́n pɔ́lɛ́ piim agoboŋ lɛ́ mɔɔd nyɔ́ yɛɛ́lád kodɔn yíim alon.

⁵Wɔnɔ́ ná ədiʼkə́əgəə́bisigií kiim alon, ɛnɔ yə́bə́ə́ kubuúʼtəŋ pɔ́lɛ́ piim, yáásán na pɔ́lɛ́.

⁶«Na ɔʼtɛ́m wó udúg, nɛŋo nɛáság kosásɛd, nɛɔ́nɔ́: “Táá ɔndad kodɔn anɛ́ɛ́n áa nyóonɛ aándɛɛ́ kɔ o! Tɛ́mɛ́naan, póɛn amooboŋ a ngə́.”

⁷Pááság kondigən pɔ́lɛ́ piim, pə́ə́bə́ə́ kusóboni pəbiʼtíləʼ pɔ́ɔ́bɔn.

⁸Náa pɔsɔ́g pá pádɛʼkɛ́lɛɛ́ na nsiŋ pə́əŋíən na pá páyɛ́ɛ na nsiŋ pɔ́nɔ́: “Sɛ́gɔɔ, ɛ́bɛfáŋɛ́an mayaa má kələsíin, pəbiʼtíləʼ pə́ə́s pə́ndəəwu.”

⁹Pɔsɔ́g pá páyɛ́ɛ na nsiŋ pááság kubuyúlisini pɔ́nɔ́ na pɔ́lɛ́: “Ndóo óo! Ɛdɛɔ́gɔ ɛgosɛʼtan lɛ́ na pəsi na pəŋi. Kɔŋɛʼ lɛ́ póɛn agooŋɛnɛ yaaŋan a fáʼtɛlɛʼ.”

¹⁰«Pááság kolon agɛɛn awɛɛn yɔɔbɔn. Ayɛ́ɛ pɔ́lɛ́ páalon, ɔndad kodɔn əə́díin yiim əgiig. Pɔsɔ́g pá pə́yíím pááboŋɛn, pááság kosɔd na nyɔ́lɛ́ a yoog ɛ wɔɔ́n, pə́ə́buəg.

¹¹A ngim yɛ́ɛy, pɔsɔ́g pá páyɛ́ɛ́n awɛɛn kələsíin pááság kimbuúlini. Pə́ə́bə́ə́ kodam pɔdɔ́ŋɔnɔ mɔɔd o kodɔn, pɔ́nɔ́: “Sə́dúg, sə́dúg wɛ! Íbibuə́n!”

¹²Náa ɔnɔ́ na pɔ́lɛ́: “Ndóo, a fɔ́lɔ́b ntɛboólɛŋɛn ó!” »

¹³Əguyibənən, Yə́sus yiísə́ə́ ɔnɔ́: «Pudinním anɛ́ɛ́n ɛnɔ lɛ́ podɛálɛŋ wɔɔ́s, pondɛŋ tɛn ɔmbɔ́ kɛnɛŋ kɛ́ mɛ Mɔɔ́n o mɔɔd ndɛ́ɛ́ kimbuúlinií.»

¹⁴«Kɛ́lɛ́ɛ́ kɛɛn náanɛ wɔnɔ́ ná mɔɔd nyummú ayɛ́ɛ́lɛ ná ayɛ́ɛ aándagɛɛn ongɛn. Ná ayɛ́ɛ aándadɛ́ɛmɛn agɛɛn, yɛɛ́dɔ́ŋɔ́nɔ pəgudin pə́ə́ŋ, amáboyáában mɔɔnɛ́.

¹⁵Na sɔ́g nyummú, ayɛ́ʼkɛn pɛfág pɛ́ mɔɔnɛ́ pɛ́ʼtáan. Na nyummú, amɛ́ʼkɛn pɛfág pɛ́baan. Na wó annam ádáád amɛ́ʼkɛn kɛfág kímuʼ súg. Ayɛ́boyɛ́ʼkɛ́nan náan agofɛg na mɔɔd na niɛŋ niə́ŋ, əə́siəd ngə́, amɛ́ɛn.

¹⁶Ayɛ́ɛ aáman kudum ngim, sɔ́g nyɔ́ páyɛ́ʼkɛn pɛfág pɛ́ mɔɔnɛ́ pɛ́ʼtáan aáság koság kəə́bə́ə́ kaágasanɛ undunə́ na mɔɔnɛ́ móom. Mə́yímubiə́nin pɛfág tɛn pímmú pɛ́ʼtáan.

¹⁷Sɔ́g nyɔ́ ɔyɔ́ɔ́ŋ pɛfág pɛ́baan aáság kɛɛlɛ tɛn náan yoom ímuʼ. Pímə́mubiə́nin tɛn pímmú pɛ́baan.

¹⁸Sɔ́g anɛ́ɛ́n nyɔ́ sə́dúg ayɛ́moyɛ́ʼkɛn kɛfág kímuʼ aáság kusiəd mɔɔnɛ́ móom, əə́dímə nsí, ɔmɔ́ɔ́sɛg kɔ.

¹⁹«Mədúg miíŋ a ngim yɛ́ɛy, sə́dúg wɔɔbɔn aáság kimbuúli ongɛn wə́ə́ŋ. Náa ɔnɔ́ na pəgudin pə́ə́ŋ píim anɛ́ɛ́n əmuúloodi tuə́ áa pə́ə́díin pádáŋananɛ moom muə́ŋ.

²⁰Sɔ́g nyɔ́ ɔyɔ́ɔ́ŋ pɛfág pɛ́ʼtáan aáság kiim adɛ́lɛm na pímmú tɛn pɛ́ʼtáan a mɔɛn, ɔnɔ́ na sə́dúg wɔɔbɔn: “Paabá taa. Uyíʼtíin pɛfág pɛ́ mɔɔnɛ́ pɛ́ʼtáan. Táá, pɛ́ a pɛ́ɛnɛ! Wɔnɔ́ ná njágásánɛ́ɛ́ undunə́ na mɔ́lɛ́, ngim ɛ́ nion yɛ́ mbɔ́ɔ́ŋ kɔ aa yɛ́ɛnɛ. Ɛlɛ pɛfág tɛn pɛ́ʼtáan”.

²¹Náa sə́dúg wəəŋ ɔnɔ́ na nyɔ́lɛ́: “Waálɛŋ kɛɛlɛ. Olɛ uʼkudin olaŋ. Pálɛ págaág oʼto na wɛ. Wɔnɔ́ ná waálɛŋ kodáŋananɛ ɛyaa ɛ́ yoom wɔnɔ́ yɛ́ɛy, ndagoobágɛ a oʼkɔɔ wó ómááyɛn wóow. Mɛ́ɛn əsiəd ngab a tɔnyɔ́g tó sə́dúg waaŋ”.

²²Sɔ́g tɛn nyɔ́ ɔyɔ́ɔ́ŋ pɛfág pɛ́baan aáság kiim adɛ́lɛm. Náa ɔnɔ́: “Paabá, uyíʼtíin pɛfág pɛ́baan, njágásánɛ́ɛ́ na pɛ́lɛ́. Táá, pɛ́ a pɛ́ɛnɛ! Ngim ɛ́ nion tɛn yɛ́ mbɔ́ɔ́ŋ kɔ aa yɛ́ɛnɛ. Ɛlɛ pɛfág tɛn pɛ́baan”.

²³Náa sə́dúg wəəŋ ɔnɔ́ na nyɔ́lɛ́: “Waálɛŋ kɛɛlɛ. Olɛ uʼkudin olaŋ. Pálɛ págaág oʼto na wɛ. Wɔnɔ́ ná waálɛŋ kodáŋananɛ ɛyaa ɛ́ yoom wɔnɔ́ yɛ́ɛy, ndagoobágɛ a oʼkɔɔ wó ómááyɛn wóow. Mɛ́ɛn əsiəd ngab a tɔnyɔ́g tó sə́dúg waaŋ.”

²⁴Sɔ́g nyɔ́ páyɛ́ʼkɛn kɛfág kímuʼ súg aáság kiim adɛ́lɛm tɛn anɛ́ɛ́n kuə́ŋ. Náa ɔnɔ́ na sə́dúg wɔɔbɔn: “Paabá! Mɛ mbágoólɛ́ŋ. Olɛanɛ na ɔʼtɛ́m wó ɔnnasáŋ ə́y! Wɛ, olɛ lɛ́, oʼkóna, úubug! Ummisə, óosaŋ!

²⁵Kólɛ́ aa wɛɛ́y óyɛ́nyɛɛlɛ mbáság kudímə nsí, mbə́ni. Táá, má aa móonɛ! Siəd mɔɔnɛ́ mááŋ!”

²⁶Náa sə́dúg ɔnɔ́ na nyɔ́lɛ́: “Kɛbɛ́ kɛ́ uʼkudin, ɔlɛáŋ! Wɛ ondɛŋáán anɛ́ɛ́n náan lɛ́ ndɛanɛ lɛ́: Ntɛgóna, ndə́əbug! Ntimisə, ndáasaŋ!

²⁷Omɛ́ɛ anɛ́ɛ́n agɛɛn agaag mɔɔnɛ́ máam a páaŋ lɛ́ mbəʼkimbuúli, ntam nsiəd kɔ na ngim ɛ́ nion.”

²⁸Náa ɔnɔ́: “Ɛ́mobɔ́gɔ́ɔn móom má ogódíí, poɛ́ʼkɛn na nyɔ́ alɛɛ́ na pɛfág pɛówád

²⁹lɛ́ ungim nyɔ́ ogódíí, pálɛ́ɛ́ komosáayɛnɛ múmmú agɛɛlɛ lɛ́ yɛ́ɛn na mólɛ́ ilubənən. Náa, nyɔ́ oʼkódií, pálɛ́ɛ́ komogábɛn ɔmbɔ́ əgín ngab yɛ́ ɔnɔ́ nyɔ́lɛ́ ogóódi.” »

³⁰Əguyibənən, sə́dúg wɔɔbɔn yiísə́ə́ ɔnɔ́: «A kifód kɛ́ uʼkudin kɛ́ɛg, púmuúgumin, pómoódagɛdɛ káag a táán, a mbin a kaadɛ. A kɛnɔ kɛ́ mandɛɛ na pɛgɛg kaágáma.

³¹«Ná mɛ Mɔɔ́n o mɔɔd ndɛ́ɛ́ kimbuúlinií a nugəm nóam sɔɔd, ndɛ́ɛ́ kɛɛn ondáŋ na məŋun má maʼtom miim, oʼtɔsɛ́máán a oʼkɔɔ wáam ó Nɛlaamɛʼ.

³²Mɔnɔŋ má a nsí miim málɛ́ɛ́ kəə́yii a udi wáam ná mbáʼkodɛ́lɛm ogosálɛna pɔɔd polɛ́ŋ polɛ́ŋ wɔnɔ́ ná unnuŋ mudúg ándɛ aásálɛna mudúg muə́ŋ lɛ́ aágaag pobon ndɛ́ŋ, todóm ndɛ́ŋ.

³³Ndɛ́ɛ́ kudə́nigəni lɛ́: Todóm a ombɔg wáam ó nɛnom, pobon a oó kɛmɛs.

³⁴Áay aa nkúm ɛlɛ́ɛ́ kodɛ́anɛɛ́ na pá pálɛɛ́ a ombɔg wə́ə́ŋ ó nɛnom ɔnɔ́: “Pəŋi póonɛ pá Sɛ waam ayɛ́boyɛ́ɛ́lɛ kɔŋɛʼ, mɛ́naan! Mɛ́naan əsiəd nigúu nɛ́ Əyíbusóbíníni kɔ́gɔ́ɔg kalaʼ ná nsí ɛdɛ́njáyɛ́ɛlɛ.

³⁵Kɛ́lɛ lɛ́, ná njɛ́ɛ njaan, poyɛ́nyɛɛ́ʼkɛn moom mó konɛ. Ná nɛŋɔ́ɛd nɛ́yɛ́ɛ agɛmbany, poyɛ́nyɛɛ́ʼkɛn məní má koŋo. Ná njɛ́ɛ ungən a pəŋi, puyísiə́d kɔŋɛʼ.

³⁶Ná njɛ́ɛ nsun iyó, puyínníígi kilə́ə́. Ná njɛ́ɛ abany, puísiə́d kɛnɛŋ na mɛ. Ná njɛ́ɛ a yoog yɛ njaan, puyíím agɛʼtála”.

³⁷«Áay aa pá pə́yə́siə́díí wɔnɔ́ ná Táán alɛɛ́ anyɔ́ŋɛn pálɛ́ɛ́ kiŋŋíənií pɔ́nɔ́ na mɛ əə: “Sə́dúk naanɛ́g áa tɛyɛ́goodála njaan, tɛmáagoyɛ́ʼkɛn moom mó konɛ ə́? Naanɛ́g áa tɛyɛ́goodála nɛŋɔ́ɛd nɛ́agoobany, tɛmáagoyɛ́ʼkɛn məní ə́?

³⁸Naanɛ́g áa oyɛ́ɛ ungən, timə́əguúsiəd kɔŋɛʼ ə́? Naanɛ́g áa tɛyɛ́goodála nsun iyó, timə́yiguníigi kilə́ə́ ə́?

³⁹Naanɛ́g áa tɛyɛ́goodála waábany, oó lɛ́ wɛ a yoog yɛ njaan timə́yiim agodála ə́?”

⁴⁰«Nkúm ɛlɛ́ɛ́ kubuyúlisini yɔ́nɔ́: “A fɔ́lɔ́b, ndabodɛ́anɛ lɛ́, kɛnɛŋ kiim kɛ́ poyɛ́ɛ́lɛ nkə kɛ́ɛg kiim na moyaa mó poómbaa wɔnɔ́ móonɛ, pomóŋŋí páam, mɛ áa poyɛ́nyɛɛlɛ kɔŋɛʼ náan”.

⁴¹«Ná nkúm yáágasɛ anɛ́ɛ́n ná pɔsɔ́g pá pálɛɛ́ a ombɔg wə́ə́ŋ ó kɛmɛs. Ɔnɔ́ na pɔ́lɛ́: “Pəŋi póonɛ pá polɛɛ́ na pulumisi, todáan káag laálá na mɛ. Póɛn a yug ɛ́ pɛnɛŋ piim, yug yɛ́ pɛ́ɛ́góny a oʼto wó Omɔlɛɔ́g, na məŋun mə́ə́ŋ má maʼtom.

⁴²Kɛ́lɛ lɛ́, ná njɛ́ɛ njaan, puyíín kɛnyɛɛ́ʼkɛn moom mó konɛ. Ná nɛŋɔ́ɛd nɛ́yɛ́ɛ agɛmbany, podɛʼkáyɛnyɛɛ́ʼkɛn məní má koŋo.

⁴³Ná njɛ́ɛ ungən a pəŋi, pudiʼkə́əgisiəd kɔŋɛʼ. Ná njɛ́ɛ nsun iyó, pudiʼkə́əginníigi kilə́ə́. Ná njɛ́ɛ abany, pudiʼkə́əsiəd kɛnɛŋ na mɛ. Ná njɛ́ɛ a yoog yɛ njaan, pudiʼkə́əgiim agɛʼtála”.

⁴⁴«Pɔ́lɛ́ tɛn pálɛ́ɛ́ kiŋŋíən pɔ́nɔ́ na mɛ əə: “Sə́dúk, naanɛ́g áa tɛyɛ́goodála njaan, oó lɛ́ nɛŋɔ́ɛd nɛ́agoobany, ɔmbɔ́ lɛ́ nsun iyó, oó lɛ́ ungən ə́? Naanɛ́g áa wɛɛ́bány, oó lɛ́ oyɛ́ɛ a yoog yɛ njaan náa tidiʼkə́siədií kɛnɛŋ na wɛ ə́?”

⁴⁵«Nkúm ɛlɛ́ɛ́ kubuyúlisini yɔ́nɔ́: “A fɔ́lɔ́b, ndabodɛ́anɛ na pəŋi lɛ́, kɛnɛŋ kiim kɛ́ poɛ́sáŋɛ́nɛ kɛɛlɛnɛ nkə kɛ́ɛg na ɛyaa ɛ́ moóngaa wɔnɔ́ yɛ́ɛnɛ ímuʼ, pólɛŋ lɛ́ mɛ áa poɛ́sáŋɛ́nɛ kɛnyɛɛlɛnɛ kɔŋɛʼ náan.”

⁴⁶«Taa, náan aa kɛ́lɛ́ɛ́ kɛɛnɛɛ́ lɛ́ pɔsɔ́g póonɛ páagɛɛn a ntɔ́b ɛ pɛnɛŋ piim, pá páyɛ́ɛ sáád páagɛɛn a ɔlaa ó pɛnɛŋ piim[95]»