Read Yambeta Maʼtɛ́as 26 Bible Online

Maʼtɛ́as 26 - Yambeta bible

Maʼtɛ́as 26

¹Ná Yə́sus ayɛ́ɛ aáʼkoman kosɔyɔ pɛbán pɛ́ɛb piim na pɔɔd, aáság kodɛ́anɛ na paaʼkan pə́ə́ŋ ɔnɔ́: «Poálɛŋ lɛ́ wɔɔ́n ó Páska ólɛ mədúg mábaan[96], ngɔ́ɔ́?

²Áay aa pándagɛndɛgɛɛ́, mɛ Mɔɔ́n o mɔɔd ná pɛ́mbaŋan a ɔmbásá.»

³Puʼkúm pó payaaganɛʼ pɛfɔny na ponnom pó nigúu póyágɔ́nyɛ́dɛ́ɛ́ a nó Kayíif, Ɔnjaaganɛʼ pɛfɔny nyɔ́ oʼkóʼkóón,

⁴pááság kogod unuʼ úmmuʼ lɛ́ pə́əgumin Yə́sus pɔɔd pándɛŋ ná pámoyóon.

⁵Náa, páyɛ́ɛ ɔgɔɔ́cɔcɔb kɔ pɔ́lɛ́ na pɔ́lɛ́ pɔ́nɔ́: «Tɛdɛɔ́gɔ pə́gumuúgumin wɔɔ́s ó wɔɔ́n, inyuunyugiʼ yə́ədə́əŋ.»

⁶Yə́sus ayɛ́ɛ a Pɛʼtaníi, a nó Simɔ́ɔŋ, mɔɔd nyummú nyɔ́ ayɛ́ɛ abany nkún.

⁷Náa ɔʼkɛ́ɛd nyummú əə́giim alon kɔ. Ayɛ́bobóan pálɛ agonɛ́ɛnɛ, aáság kaáyɛʼtɛnɛ a ɛbá ɛ́ Yə́sus. Yiígóodi isisíg yɛ́ igəd ɛ́ lamɛ́ndaʼ ɛ mɔɔnɛ́ a ombɔg, əə́bə́ə́ kusumənən Yə́sus lamɛ́ndaʼ yɛ́ɛy a oʼto.

⁸Ná paaʼkan pɛ́ɛ́dála náan, pə́ə́bə́ə́ komoyɔ́gɔ́dɔ pɔ́nɔ́: «A igə aa nyóon aáyósag lamɛ́ndaʼ yɛ́ɛy náan əə́?

⁹Pádɛʼkɛ́ɛ págolɛg yɛ́lɛ́ a mɔɔnɛ́ miíŋ, páyɛɛ́ʼkɛn mɔɔnɛ́ móom na mɔsɔ́gasɔ́gá ə́!»

¹⁰Yə́sus yɛɛ́lɛ́ŋ lɛ́ náan aa pálɛɛ́ agosɔyɔ, náa ɔnɔ́ na pɔ́lɛ́: «A igə aa poágɛɛlɛ lɛ́ ɔʼkɛ́ɛd nyóon yóób ɔʼtɛ́m kogany ə́? Nkə kɛ́ɛnɛ kɛ́ amɛ́ɛ́lɛ na mɛ kɛ́lɛ kisig kɛ́ yoom.

¹¹Pugóódi pasɔ́gasɔ́gá pɛnɛŋ piim a kɛgaágadɛ kɛáŋan[97] Náa, mɛ ntɛndɛ́ɛ́ kɛɛn na pəŋi pɛnɛŋ piim.

¹²Lamɛ́ndaʼ yɛ́ɛy yɛ́ əmísumə́nən, amɛ́ɛ́lɛ náan agoboŋɛn kɛlóŋ kɛ́am wɔnɔ́ ná pálɛ́ɛ́ kinnií.

¹³Ndabodɛ́anɛ a fɔ́lɔ́b lɛ́ kɛnɔ kiim kɛ́ pálɛ́ɛ́ kɔlɔɛgɛɛ́ Tɔsɔm Tólaŋ tóonɛ a nsí yɛ́ɛnɛ ngim, pálɛ́ɛ́ kaáyɔ́ɔ́ŋɛ ɔʼkɛ́ɛd nyóonɛ, pɔ́ɔsɔyɔ nkə kɛ́ɛnɛ kɛ́ amɛ́ɛ́lɛ.»

¹⁴Náan aa, a paaʼkan pá pówád na pábaan, sɔ́g nyummú niiŋ lɛ́ Siudáa Ɛsɛʼkalɛyóod, ayɛ́ɛ́n aboan puʼkúm pó payaaganɛʼ pɛfɔny,

¹⁵ɔnɔ́ na pɔ́lɛ́: «Mbaʼkɛɛlɛ lɛ́ púgumin Yə́sus əə, poagɛnyɛɛ́ʼkɛn nkə ə́?» Náa pɔ́nɔ́ na nyɔ́lɛ́: «Tɛagoyɛ́ʼkɛn pisúg niʼtin na pɛówád[98]»

¹⁶A kəə́bə́ə́ a kɛnɛŋ kɛ́ɛg, Siudáa əə́bə́ə́ kuunə tuə́ áa aágɛɛlɛ agoboólɛgɛn Yə́sus.

¹⁷Wɔɔ́s ó na oʼto na oʼto ó wɔɔ́n wó Yúdɛn ɛyɛ́ɛ ɛnɛ́alɛla pɛlɛ́ɛd pɛ́ páánám pádɛág toan tó kunudi umbúb, paaʼkan pííŋíən na Yə́sus pɔ́nɔ́ əə: «Kɛlág, ə́lə́ə́ áa tíɛn agoonámɛnɛɛ́ wɔɔ́n ó Páska ə́?»

¹⁸Əyíbuyúlísíni ɔnɔ́ na pɔ́lɛ́: «Todáan áay a pálɛ́ɛg, a nó pímbuəm, pómodɛ́anɛ poɔʼkɔ́: “Mɛ Kɛlág nyɔʼkɔ́ kɛnɛŋ kɛ́am kɛándɛ ndúmiʼ. Ndaasánɛ wɔɔ́n ó Páska wóonɛ a noádɛʼ noáŋ na paaʼkan páam”.»

¹⁹Páyɛ́ɛ́n, pámɛ́ɛ́lɛ əgín wɔnɔ́ ná Yə́sus ayɛ́bodɛánɛ, páánám wɔɔ́n ó Páska.

²⁰Niób nɛáság kiim əgiig, Yə́sus əə́ləndin agonɛ́ɛnɛ na paaʼkan pə́ə́ŋ pá pówád na pábaan.

²¹Pálɛ anɛ́ɛ́n kɔ agonɛ́ɛnɛ a, Yə́sus aáság kusiəd tɔgɛ́ɛ́, ɔnɔ́: «A fɔ́lɔ́b ndabodɛ́anɛ lɛ́ úmmuʼ áanɛ a ondáŋ wááŋan, aagɛndɛg.»

²²Ɔʼtɛ́m ó paaʼkan wɛ́ɛ́yɛ́b, pə́ə́bə́ə́ kumuŋíənə a pɛlɔ́g a pɛlɔ́g, nyóon ɔnɔ́ əə: «Sə́dúk, adɛ́njaŋ mɛ áa ndáagoólɛg, ngɔ́ɔ́?»

²³Yə́sus əyúúlísi ɔnɔ́ na pɔ́lɛ́: «Nyɔ́ tiə́gəə́nə́əyəni táasaʼ mmuʼ na nyɔ́lɛ́, nyɔ́lɛ́ aa aágɛndɛg.

²⁴Mɛ Mɔɔ́n o mɔɔd ndəəgu əgín wɔnɔ́ ná kíyə́dílə́ə́ a Kálaʼtaʼ ɛ Táán lɛ́ ndəəgu[99] Náa, maan kɛ́fɔlɛ́ na nyɔ́ kugu kóam kóamoógom. Kɛ́mɛ́ɛ agɛɛn kɔŋɛʼ na nyɔ́lɛ́ lɛ́ ədiyə́biə́níí!»

²⁵Siudáa nyɔ́ kɛ́yɛ́ɛ lɛ́ nyɔ́lɛ́ aa aálɛg Yə́sus, aáság kudə́əmini tɔgɛ́ɛ́, ɔnɔ́: «Kɛlág, adɛ́njaŋ mɛ áa ndáagoólɛg, ngɔ́ɔ́?» Yə́sus əyímuyúlísíni ɔnɔ́: «Wɛ! Kɛ́ aa kɛ́ɛg wəə́səə!»

²⁶Pálɛ kɔ agonɛ́ɛnɛ, Yə́sus aáság kudə́əmini pɛlɛ́ɛd, amɛ́ʼkɛn pisoyidiʼ na Táán, aábɛ́ŋa, amɛ́ʼkɛn na paaʼkan pə́ə́ŋ, ɔnɔ́ na pɔ́lɛ́: «Siə́dəən, pónɛ. Nkó yaam aa yɛ́ɛy.»

²⁷A ngim yɛ́ɛy, yiídə́ə́míni tɛn kilən kɛ́ maloʼ, əmíʼkíni kɛɛ́ʼkɛn pisoyidiʼ na Táán, amábonáámɛ́nɛ, ɔnɔ́ na pɔ́lɛ́: «Siə́dəən, póŋo pəŋi piim

²⁸lɛ́ móonɛ málɛ maŋɔ́ máam. Mɔ́lɛ́ aa málɛɛ́ kisuŋ kɛ́ kíoloodi nɛálad nɛ́ Táán amáládɛ́ɛ́ na pɔɔd[100] Ndɛ́ɛ́ kusub mɔ́lɛ́ a kidíídí kɛ́ ɛ́fɔlɛ́ ɛ́ pɔɔd agɛɛlɛ lɛ́ Táán ə́buúlisin mabɛ́ mɔ́ɔ́bɔn.

²⁹Ndabodɛ́anɛ lɛ́ Əgəə́bə́ə nɛ́gɔŋ, Ntiə́giiʼkini koŋo maloʼ kə́mmú agɛɛn əgiig əgín a wɔɔ́s wó ndə́əgiiʼkini koŋo má mawa ondáŋ na pəŋi a Nɛlaamɛʼ nɛ́ Paabá.»

³⁰Pááság kusisinin pɛʼkwáá pɛ́ wɔɔ́n kudúmə[101] Ná páyɛ́ɛ páʼkoman kudúmə, pááság kolon agɛɛn a oʼkon ó pa olifiyə́ə.

³¹Náa Yə́sus ɔnɔ́ na paaʼkan pə́ə́ŋ: «Udúg ó naánɛ́ yɛ́ɛnɛ, pəŋi piim poagɛʼtɛ́da lɛ́ náan aa kɛ́lɛɛ́ kidiídílə́ a kálaʼtaʼ lɛ́, Táán ɔnɔ́: “Ná ndáagoon unnuŋ mudúg, mudúg muim moágólɛ́gɛd[102]”.

³²Náa, ná ndɛ́ɛ́ kiim ndónɛ́ɛ́ a kəəniʼ, ndɛ́ɛ́ koboóyaŋɛnɛ a Kalilə́ə.»

³³Náa Píɛ əə́siəd tɔgɛ́ɛ́, ɔnɔ́ na nyɔ́lɛ́: «Ɔmbɔ́ ungim nyóonɛ agoodɛ́da, mɛ ntiə́guudi!»

³⁴Yə́sus əyímuyúlísíni ɔnɔ́ na nyɔ́lɛ́: «A fɔ́lɔ́b ndagodɛ́anɛ lɛ́, əgín a udúg ó naánɛ́ yɛ́ɛnɛ, kɛbaŋ kɛ́ nsɛɛ kíədíin kɛdaŋ ná wəə́ʼkiʼtəm pɛnɛŋ pɛ́dáád wɔʼkɔ́ odɛndɛŋɛn.»

³⁵Píɛ əyímuyúlísíni ɔnɔ́: «Kɛ́yɛɛn kɛ́ɛnɛ lɛ́ pəsi na wɛ tígu ondáŋ, tiəgu. Kóonɛ lɛ́ mɛ nkuúʼtəm, ndóo!» Paaʼkan piim píísə́ə́ náan yoom ímuʼ.

³⁶Páyɛ́ɛ́n, pááság kɛɛn alon a kɛnɔ kímmú pɔ́ɔdɔ́ŋɔn lɛ́ Kɛdsɛmaníi[103] Kɔ́gɔ́ɔg, Yə́sus yɛɛ́dɛánɛ na paaʼkan pə́ə́ŋ ɔnɔ́: «Pəŋi, lɔbɔ́ɔn áanɛ, mɛ mbɛ́ɛn ɔgɔɔ́sɔ́gɔlɔn kága.»

³⁷Yiísiə́d Píɛ na pɔɔ́n pá Səbədə́ə pábaan agɛɛn na pɔ́lɛ́. Ɔʼtɛ́m wə́ə́ŋ óyɛ́ɛ wándɛ ɔmbɛ́. Wɛɛ́y óyɛ́ɛ wə́ʼkumuúgumin.

³⁸Ná páyɛ́ɛ pə́ʼkəə́súid yuudi sɔɔŋ, ayɛ́bodɛánɛ ɔnɔ́ na pɔ́lɛ́: «Ɔʼtɛ́m wáam wándɛ ɔmbɛ́ a las. Pəŋi tɛn púləndin áanɛ, púgúlə na mɛ, pudinním ɛnɔ.»

³⁹Nyɔ́lɛ́ ayáyɛ́ʼtɛ́nɛ́ɛ́ kə́mmú yuudi, əmə́súʼkíníí pigúbíʼkub. Ayɛ́ɛ ɔgɔɔ́sɔ́gɔlɔn Táán, ɔnɔ́: «Paabá, ngə́ ɛmaʼkɛɛn kɔ, ɛɛlɛ lɛ́ ntɔ́b yɛ́ɛnɛ yɛ́nyaágɛɛŋɛ. Náa, kɛ́dɛnjɛ́ɛ́n a nɛnyɔ́ŋɛn nɛ́am, kíɛn a nɛáŋ!»

⁴⁰Aáság kiim ádɛ́ɛmɛn əguúlini kɛnɔ kɛ́ yiídí ə́mə́dí pa Píɛ na paaʼkan pə́mmú póob pábaan. Ayɛ́bobóan pə́ʼkugu ɛnɔ tɔ́g. Aáság kubuyóndigi, ɔnɔ́ na Píɛ: «Tuə́ ə́ən? Podɛáʼkɛnɛ kugúlə na mɛ ɔmbɔ́ əgín áwaʼ mmuʼ ə?

⁴¹Kúlə́ən, poɔ́sɔ́gɔlɔn Táán agɛɛlɛ lɛ́ pudiʼtə́əŋ a pɛásɔ́sɛ́n. Mɔɔd alɛ na ɔʼtɛ́m wóonɛ lɛ́ yɛ́ɛlɛ kɔŋɛʼ, náa nkó yəəŋ áa ɛlɛɛ́ ntom.»

⁴²Aáság kiiʼkini kəə́súid agɛɛn ɔgɔɔ́sɔ́gɔlɔn a pɛnɛŋ pɛ́baan, ɔnɔ́: «Paabá waam, ngə́ yɛ́ɛnɛ lɛ́ ntɔ́b yɛ́ɛnɛ yɛ́nyaágɛɛŋɛ ɛdiɛnɛn kɔ, náa kɛ́lɛɛ́ əgín lɛ́ nnɛ yɛ́lɛ́, ooʼó, nɛnyɔ́ŋɛn nɛáŋ nɛáyɛ́ɛlɛ!»

⁴³Əyíʼkíni kiim ádɛ́ɛmɛn əguúlini kɛnɔ kɛ́ paaʼkan páyɛ́ɛ. Ayɛ́bobóan anɛ́ɛ́n kóog pálɛ tɔ́g a ɛnɔ ɛ́ kúfuʼ. Pádɛʼkɛ́ɛ agaáʼkɛ kolɔb əngis angóm.

⁴⁴Aáság kubuudi, əmə́suídíí kə́mmú agɛɛn ɔgɔɔ́sɔ́gɔlɔn Táán a pɛnɛŋ pɛ́dáád. Ayɛ́ɛ ɔgɔɔ́sɔ́gɔlɔn yoom əgín ɛgo ímuʼ.

⁴⁵Náa əə́giiʼkini kimbuúlini. Páyɛ́ɛ əgín a ɛnɔ tɔ́g. Əyíbuyóndígi, ɔnɔ́ na pɔ́lɛ́: «Pəŋi polɛ əgín ɛnɔ yi! Polɛ ogooyig! Oo, Táá kɛnɛŋ aa kɛ́ɛnɛ kiə́ʼkiigií. Páagɛndɛg mɛ Mɔɔ́n o mɔɔd nɛ́gɔŋ a ɔmbɔg á pɛɛlɛʼ mabɛ́.

⁴⁶Tɛ́mɛ́naan, tiɛ́naan! Táá mɔɔd ogo nyɔ́ aágɛndɛg na pɔ́lɛ́ aa nyóonɛ aándɛɛ́ kɔ.»

⁴⁷Yə́sus alɛ kɔ na tɔgɛ́ɛ́ a unuʼ ə, Siudáa, ongaaʼkan wəəŋ nyummú nyɔ́ a pá pówád na pábaan foáy. Ayɛ́ɛ na pɔɔd a ngim súuu lɛ́ póonɛ na mobag mó pɛdá, pə́mmú na mufun a ɔmbɔg. Pɔɔd póob náan piim, puʼkúm pó payaaganɛʼ pɛfɔny na ponnom pó a nigúu aa púyíím póboodom.

⁴⁸Siudáa nyɔ́ ayɛ́bolɛ́gɛn Yə́sus, əyíím yááganan na pɔ́lɛ́ ɔnɔ́: «Nyɔ́ ndáadam nyə́súʼkənən, póság kolɛŋ lɛ́ nyɔ́lɛ́ ogo aa nyóon, púmuúgumin.»

⁴⁹Əgín tɛn ná Siudáa əyíím əgiig, ayɛ́ɛ́n ná Yə́sus alɛɛ́, ɔnɔ́ na nyɔ́lɛ́: «Kisig kɛ́ koany na wɛ óo, kɛlág!» Aáság kumuə́súʼkənən.

⁵⁰Náa Yə́sus ɔnɔ́ na nyɔ́lɛ́: «Sɔ́g waam, ɛɛlɛ agá nkə kɛ́ umíim agɛɛlɛ[104]!» Pááság kaag ombɔg na Yə́sus, pə́mə́mugúmin.

⁵¹Sɔ́g nyummú nyɔ́ ayɛ́ɛ na Yə́sus aáság kusooyin ɛbag yə́ə́ŋ ɛ́ pɛdá a kɛbágáá soád, ɔnɔ́ na uʼkudin wo ɔnjaaganɛʼ pɛfɔny nyɔ́ oʼkóʼkóón ə́siəd a oʼtóɛŋ foáb, oʼtóɛŋ kwə́s.

⁵²Yə́sus ayɛ́mosásɛ́dɛn ɔnɔ́: «Ndóo, úúlísi ɛbag yááŋ a kɛbágáá lɛ́ ungim nyɔ́ alɛ́ɛ́ kɔnɔɛyɛɛ́ na ɛbag, na yɛ́lɛ́ tɛn aa pálɛ́ɛ́ komoyónɛ́ɛ́.

⁵³Waafɛg lɛ́ mbɛ́ɛ agaálɛɛlɛn Sɛ waam, adɛʼkɛ́ɛ əgiim yɛ́ʼtómɛn məŋun má maʼtom, piʼtúú ɔmbɔ́ pɛówád na pɛ́baan á?

⁵⁴Náan, tuə́ áa nkə kɛ́ kíyə́dílə́ə́ a Kálaʼtaʼ ɛ Táán kɛ́mɛ́ɛ agaáyɛ́ɛlɛ anɛ́ɛ́n ə́? Kɛ́lɛ lɛ́, náan aa pɛbán pígódíí lɛ́ pɛásan, wɔnɔ́ ná kíyə́dílə́ə́.»

⁵⁵A ngim yɛ́ɛy, Yə́sus yiísə́ə́ ɔnɔ́ na kiʼtúú kɛ́ pɔɔd kɛ́ɛg: «Puígóodi lɛ́ púim poáboŋɛn lɛ́ na mufun, na mobag mó pɛdá əgiim əgiʼkumin wɔnɔ́ ndɛ agá ungiíbən ə? Adɛ́ mɔɔ́s miim njɛ́ɛ agaaʼkananɛ pɔɔd a Tɛ́mpɛl a? A igə aa pudiʼkə́əgiʼkuminií áay?

⁵⁶Náa, nkə kɛ́ɛnɛ kiim kɛ́lɛ agodáŋana náan lɛ́ ná nkə kɛ́ palɔɛgɛʼ pɛbán pá Táán píísə́ə́, kɛ́as. Paaʼkan piim pááság kaásɔɛ́da na ɔʼtɛ́d, pə́mə́muudí.»

⁵⁷Pɔɔd pá píígúmin Yə́sus, páyɛ́ɛ́n na nyɔ́lɛ́ a nó Kayíif, Ɔnjaaganɛʼ pɛfɔny nyɔ́ oʼkóʼkóón, kɛnɔ kɛ́ palɛŋ pɛcɛm na ponnom pó a nigúu páyɛ́ɛ́n agaágɔnyɛd.

⁵⁸Píɛ ayɛ́ɛ əgiim ə́yə́njən Yə́sus laálá a ngim súʼtə́ə́ a oʼtómódáán wó ɔnjaaganɛʼ pɛfɔny nyɔ́ oʼkóʼkóón, ɔɔ́sɔ́d kɔ, əə́ləndin na pəgudin agodála wɔnɔ́ ná kɛ́amananɛ.

⁵⁹Puʼkúm pó payaaganɛʼ pɛfɔny na ungim nyɔ́ ayɛ́ɛ a ɛgɔny yɔ́ɔ́bɔn ɛ́ pɛyɔm yɛ́ ɛgóón yɛ́ɛy pə́ə́bə́ə́ kuunə pɔɔd pá pə́əgiim adɛ́lɛmɛn Yə́sus mbaasɔ́ ɔmbɔ́ ɛ pɛfaa yɛ́ pándagɛɛ́ʼkɛnɛɛ́ Yə́sus nsɔ́ɔ́ a yɛ́lɛ́, pámoyóon.

⁶⁰Ɔmbɔ́ ná piíŋ pɛ́ɛ́dɛ́lɛ́man mbaasɔ́ ɛ pɛfaa, pádɛʼkɔ́ɔgɔɔŋ ɛgom[105] A komananɛ, pɔɔd pábaan pə́yíím áadɛ́lɛm,

⁶¹náa pɔ́nɔ́: «Mɔɔd nyóonɛ yiísə́ə́ lɛ́ nyɔ́lɛ́ alɛ ugubugə Tɛ́mpɛl ɛ Táán, ə́yiʼkini kowáag yɛndɛ́ŋ a mədúg mádáád.»

⁶²Ɔnjaaganɛʼ pɛfɔny nyɔ́ oʼkóʼkóón aáság kodɛ́ɛmɛn kidə́níʼtən, náa ɔnɔ́ na Yə́sus: «Odɛɔ́gɔ na kɛbán kɛ́ kusəə ə? Nkə kɛ́ɛg kɛ́ pálɛɛ́ əgusəə a nkó yaaŋ óoʼ?»

⁶³Yə́sus ayɛ́ɛ sáb, ɔmbɔ́ pɛbɛɛ, aʼkááŋánan. Ɔnjaaganɛʼ pɛfɔny nyɔ́ oʼkóʼkóón aáság kumuŋíən ɔnɔ́ əə: «Ɛ́bɛdɛánɛ, a niiŋ nɛ́ Táán nyɔ́ alɛɛ́ na ɔlaa, olɛ Məsíi ə? Olɛ Mɔɔ́n o Táán á?»

⁶⁴Əyímuyúlísíni ɔnɔ́ na nyɔ́lɛ́: «Kɛ́ aa kɛ́ɛg olɛɛ́ əgusəə. Náa, ndabodɛ́anɛ lɛ́: Əgəə́bə́ə nɛ́gɔŋ polɛ́ɛ́ kɛʼtála mɛ Mɔɔ́n o mɔɔd, undəndínə́ə́n a ombɔg ó nɛnom ó Táán o toɛn tuim. Polɛ́ɛ́ kɛʼtála tɛn ndə́əgiim nsuu kɔ́gɔ́ɔg a kɛbɛd a mɔɛn[106]»

⁶⁵Ná Ɔnjaaganɛʼ pɛfɔny nyɔ́ oʼkóʼkóón ayóób náan, yiígúmin kilə́ə́ kiə́ŋ, aáwag waás, ɔnɔ́: «Poádála wɔnɔ́ ná mɔɔd alɛɛ́ agofánan Táán ə́! Pɔɔd pá mbaasɔ́ pá igə pə́mmú aa tiə́guunə? Pəŋibáamɔɛ́d pomóób wɔnɔ́ ná alɛɛ́ agofánan Táán!

⁶⁶Tíɛlɛ tuə́ na nyɔ́lɛ́ ə́?» Náa pɔ́nɔ́: «Alɛ lɛ́ pámoyóon o[107]»

⁶⁷Pə́ə́bə́ə́ kumudúəŋənən pɛda a udi, páamodóan pɛʼkam, pɔsɔ́g pə́mmú páamosában ambany a ombáŋ[108],

⁶⁸pɔ́nɔ́ na nyɔ́lɛ́: «Məsíi, aanɛn ánɛ aa amágoogó yi!»

⁶⁹A kɛnɛŋ kɛ́ɛg, Píɛ ayɛ́ɛ undəndínə́ə́n káanɛ a oʼtómódáán. Náa moóngaa ɔʼkɛ́ɛd nyummú nyɔ́ ayɛ́ɛ əgud kɔ áay aágaáyɛʼtɛnɛ a ɛbá yə́ə́ŋ, ɔnɔ́ na nyɔ́lɛ́: «Wɛ, oyɛ́ɛ tɛn a ondáŋ ó Yə́sus, mɔɔd o Kalilə́ə nyóon!»

⁷⁰Náa, Píɛ ayácɛ́mɛ́ɛ́, ɔnɔ́: «Ndóo, ntɛálɛŋ kɔmɔɛ́d nkə kɛ́ɛg kɛ́ olɛɛ́ əgusəə.»

⁷¹Aáság kodɛ́ɛmɛn kɔ áay, amɛ́ɛn ələndin a nɛlon, a udíyoog wó oʼkág. Uʼkudin tɛn nyummú, əgín tɛn moóngaa ɔʼkɛ́ɛd aáság komoodála. Náa ɔnɔ́ na pɔɔd pá páyɛ́ɛ kɔ: «Mɔɔd nyóonɛ ayɛ́ɛ a ondáŋ ó Yə́sus, mɔɔd o Násalɛd.»

⁷²Píɛ əə́bə́ə́ kiiʼkini kaácɛma, ɔnɔ́: «Taa, əgín kɛ́ Táán, ntɛlɛŋɛn mɔɔd nyóon!»

⁷³Ɛyaa ɛ́ kɛnɛŋ sɔɔŋ ɔ, pɔɔd pá páyɛ́ɛ kɔ áay pááság kaáyɛʼtɛnɛ a ɛbá ɛ́ Píɛ, náa pɔ́nɔ́ na nyɔ́lɛ́: «A fɔ́lɔ́b, olɛ a ondáŋ wɔ́ɔ́bɔn! Pɛnɔɔgɛʼ pɛ́ pɛ́lɛɛ́ a tɔgɛ́ɛ́ toáŋ pióloodi oyaán áa olɛɛ́.»

⁷⁴Náa Píɛ ɔnɔ́: «Táá módáád a mɔɛn, ntɛlɛŋɛn mɔɔd nyóon! Mbaʼkosom, Táán yɛ́mbɔ́nɛsɛ!» Əgín tɛn ná yiísə́ə́ náan, kɛbaŋ kɛ́ nsɛɛ kɔʼkɔ́lɛ́ɔʼkɔɔ.

⁷⁵Aáság kaáyɔ́ɔ́ŋɛ tɔgɛ́ɛ́ tó Yə́sus ayɛ́modɛánɛ. Yə́sus yiísə́ə́ ɔnɔ́ na nyɔ́lɛ́: «Kɛbaŋ kɛ́ nsɛɛ kíədíin kɛdaŋ ná wəə́ʼkiʼtəm pɛnɛŋ pɛ́laŋ pɛ́dáád wɔʼkɔ́ odɛndɛŋɛn». Aáság kolon agɛɛn alɛɛ. Yɛɛ́lɛ́ɛ́ a kúfuʼ.