Read Yambeta Maʼtɛ́as 27 Bible Online

Maʼtɛ́as 27 - Yambeta bible

Maʼtɛ́as 27

¹A koany kaáyɛnɛ, puʼkúm pó payaaganɛʼ pɛfɔny na ponnom pó nigúu póyágɔ́nyɛ́dɛ́ɛ́ agoyɔm kɛbán kɛ́ Yə́sus, páábaasɛ lɛ́ pógóódi lɛ́ pámoyóon.

²Pə́yímuusúŋ tuwoo a ombɔg, pámɛ́ɛn na nyɔ́lɛ́ a nó Pɛláad nyɔ́ ayɛ́ɛ ngɔ́mɛnaʼ yɛ́ nkóʼkóón yɛ́ a Ɔlɔ́ma.

³Ná Siudáa nyɔ́ ayɛ́ɛ́n amoólɛg yɛɛ́dála náan lɛ́ páʼkobaasɛ lɛ́ páagoon Yə́sus, əə́bə́ə́ kəə́lə́ʼkəni. Əyúúlíni ná puʼkúm pó payaaganɛʼ pɛfɔny pólɛɛ́, na ponnom pó nigúu, əgubuyúúlisini mɔɔnɛ́ má páyɛ́moyɛ́ʼkɛn.

⁴Ayɛ́bodɛánɛ ɔnɔ́: «Mbɛ́ɛ́lɛ kɔbɛ́ agoboólɛgɛn mɔɔd nyɔ́ adiɛlɛnɛɛ́ kɔbɛ́ lɛ́ pómoyóon.» Pə́yímuyúlísíni pɔ́nɔ́: «Kɛ́ɛg kɛándɛ kɛáŋ óo! Kɛ́dɛábɛdɛ́ʼtɛg pəsi!»

⁵Siudáa aáság kudi ámádó mɔɔnɛ́ móom kɔ a yoog ɛ Táán, amɛ́ɛn agaádoŋ.

⁶Puʼkúm pó payaaganɛʼ pɛfɔny poáság kusiəd mɔɔnɛ́ móom, náa poɔ́nɔ́: «Pɛcɛm piə́s pɛ́lɛ agosáŋɛnɛ lɛ́ ombod ó mɔɔnɛ́ wɔnɔ́ wóow ódɛsɔ́d a igóó ɛ́ mɔɔnɛ́ má a Yoog ɛ Táán lɛ́ málɛ mɔɔnɛ́ má maŋɔ́[109]»

⁷Pááság kaáyóbanan lɛ́ póoŋɛnɛ kɛsom kɛ́ nsí na mɔɔnɛ́ móom, na ommaaŋan muyə́sə́n. Páyóóŋɛ́nɛ kɛ́lɛ́ lɛ́ ná pə́niəŋən pəən kɔ.

⁸Náan aa, əgiim əgiig na nɛ́gɔŋ kɛ́, pálɛ agodɔ́ŋɔn əgín kɛsom kɛ́ nsí kɛ́ɛg lɛ́: «Kɛsom kɛ́ nsí kɛ́ maŋɔ́».

⁹Taa, náan aa nkə kɛ́ Siələmíi, ɔndɔɛgɛʼ pɛbán o Táán yiísə́ə́, kɛ́yáás. Yiísə́ə́ lɛ́: «Píísiə́d pisúg niʼtin na pɛówád pɛ́ pɔɔ́n pá Ɛ́sɛlayɛl páyáyóóbánánɛ́ɛ́ a oʼto wə́ə́ŋ.

¹⁰Pámóóŋɛ́nɛ kɛsom kɛ́ nsí na ommaaŋan muyə́sə́n, na mɔɔnɛ́ móom əgín wɔnɔ́ ná Sə́dúk yiísə́ə́[110]»

¹¹Yə́sus aáság kɛɛn adɛ́lɛm a pɛyɔm a udi wo ngɔ́mɛnaʼ yɛ́ nkóʼkóón. Ngɔ́mɛnaʼ əə́bə́ə́ komolóoya ɔnɔ́: «Olɛ nkúm ɛ Yúdɛn a, ngɔ́ɔ́?» Yə́sus əyímuyúlísíni ɔnɔ́: «Náan ó! Kɛ́lɛ náan wɔnɔ́ ná olɛɛ́ əgusəə.»

¹²Náa, adɛʼkɛ́ɛ agogáaŋanan a nkə kiim kɛ́ puʼkúm pó payaaganɛʼ pɛfɔny na ponnom pó nigúu páyɛ́ɛ amoosóman a nkó.

¹³Náa Pɛláad ɔnɔ́ na nyɔ́lɛ́: «Tuə́! Odɛɔ́gɔ agoob pɛsɔ́mɛn pɛ́ɛnɛ piim pɛ́ pálɛɛ́ əgusuginə a nkó yaaŋ á?»

¹⁴Ɔmbɔ́ pɛbɛɛ a kɛbán əgín kímuʼ, Yə́sus adɛʼkáabaalɛ. Ngɔ́mɛnaʼ yɛ́ nkóʼkóón ɛyáfɛ́máá kɛ́fɔlɛ́ na kaásab kóog kó ayásábɛ́ɛ́ náan.

¹⁵A wɔɔ́n ó Páska ungim kɛ́yɛ́ɛlanɛ lɛ́ ngɔ́mɛnaʼ yɛ́ nkóʼkóón yəəlis mɔɔd o yoog yɛ njaan úmmuʼ nyɔ́ nigúu níəŋíən lɛ́ ə́lis.

¹⁶Náan aa a kɛnɛŋ kɛ́go kɛ́ɛg, mɔɔd nyummú ayɛ́ɛ a yoog yɛ njaan, niiŋ lɛ́ Yə́sus Palábas. Páyɛ́ɛ agomoyɔ́gɔ́dɛla kɛ́fɔlɛ́ lɛ́ ayɛ́ɛ agɛɛlanɛ pɛbán pɛ́ pɛbɛ́.

¹⁷Pɛláad aáság kuŋíən na kiʼtúú kɛ́ pɔɔd kɛ́ kíyə́yiilin kɔ áay ɔnɔ́: «Poanyɔ́ŋɛn lɛ́ ndis ánɛ ə́? Yə́sus Palábas[111] oóm, Yə́sus nyɔ́ pɔ́ɔdɔ́ŋɔn lɛ́ Məsíi əə́?»

¹⁸Pɛláad yiísə́ə́ náan lɛ́ yɛɛ́lɛŋɛn lɛ́ a yaág yɛ́ əngis aa puʼkúm pó Yúdɛn puígúmin Yə́sus əgiim amosɔ́mɛn na nyɔ́lɛ́.

¹⁹Pɛláad alɛ anɛ́ɛ́n kɔ agolóoya Yə́sus ə, oʼkán aáság kiim ámodómɛn mɔɔd lɛ́ yíim amodɛ́anɛ lɛ́ adɛnjáág unuʼ a kɛbán kɛ́ sáád ɛ mɔɔd yɛ́ɛy lɛ́, kɛlɛm kímə́muyə́bi kɛ́fɔlɛ́ na udúg ó naánɛ́ a oʼto wə́ə́ŋ.

²⁰Puʼkúm pó payaaganɛʼ pɛfɔny na ponnom pó nigúu pɛ́ɛ́báya kiʼtúú kɛ́ pɔɔd kɛ́ɛg lɛ́ pádɛ́anɛ na ngɔ́mɛnaʼ yɛ́ nkóʼkóón, ə́buúlisin Palábas, yɛ́ʼkɛn toɛn pɛ́ɛn agoon Yə́sus.

²¹Náa ngɔ́mɛnaʼ yɛ́ nkóʼkóón yɔ́nɔ́ na pɔ́lɛ́: «A pɔɔd póonɛ pábaan ə́ə, oyaán áa poányɔ́ŋɛn lɛ́ ndis əə́?» Náa pɔ́nɔ́ na nyɔ́lɛ́: «Lis Palábas o!»

²²Náa ɔnɔ́ na pɔ́lɛ́ əə: «Nyɛ́ɛlɛ anɛ́ɛ́n tuə́ na Yə́sus nyóonɛ nyɔ́ pɔ́ɔdɔ́ŋɔn lɛ́ Məsíi əə́?» Ungim əyímuyúlísíni ɔnɔ́: «Tɛánɛ́ pɛ́ɛn amoóbaŋan a ɔmbásá o!»

²³Náa ɔnɔ́ na pɔ́lɛ́: «Kɔbɛ́ igə anɛ́ɛ́n áa amɛ́ɛ́lɛ ə́?» Pə́ə́bə́ə́ agá kosása kə́mmú na toɛn pɔ́nɔ́: «Ɛ́ʼkɛn toɛn pámoóbaŋan a ɔmbásá o!»

²⁴Pɛláad aáság kodála lɛ́ ngə́ yɛndɛ́ŋ ɛdɛɔ́gɔ. Pɔɔd páyɛ́ɛ agoyáa agá kə́mmú na toɛn. Aáság kusiəd məní agaásog ɔmbɔg a udi o pɔɔd piim[112], ɔnɔ́: «Táá, ɔmbɔg aa yɛ́ɛnɛ ndágaásog. Maŋó má mɔɔd nyóonɛ mádɛnjɛ́ɛ́n a oʼto wáam oo! Mɛ́ɛn a nto yaaŋan!»

²⁵Náa ungim ɔnɔ́: «Ɛɛ́ɛ óo, timə́líʼtíníí náan! Maŋó mə́ə́ŋ mɛ́ɛn a nto yəəs na a nto ɛ pɔɔ́n pə́ə́s!»

²⁶Pɛláad aáság kubuúlisin Palábas, amáboyɛ́ʼkɛn Yə́sus lɛ́ pámobáam ná pámoóbaŋan a ɔmbásá.

²⁷Pasɔ́njaa páyɛ́ɛ́n na Yə́sus a yoog ɛ Nɛlaamɛʼ yɛ ngɔ́mɛnaʼ yɛ́ nkóʼkóón. Pɔ́lɛ́ piim páyágɔ́nyɛ́dɛ́ɛ́ kɔ́gɔ́ɔg kɛnɔ kɛ́ páyɛ́ɛ́n na Yə́sus.

²⁸Pə́yímudíŋínə pilə́ə́, pə́mə́muníígi ntaa yɛ́ mbógógó.

²⁹Píísiə́d nuwoo nó pɔsɛ́n, páánog, pámámosɔ́nɛg a oʼto, wɔnɔ́ nodám nó nkúm, pə́ə́siə́d niob pámámoyɛ́ʼkɛn lɛ́ ə́gumin a ombɔg ó nɛnom. Páyɛ́ɛ əgiim ədúmə əndu a udi wə́ə́ŋ, páamoónyɛɛŋanɛ pɔ́nɔ́: «Timə́gusóyídi o! Nkúm ɛ Yúdɛn, calɛʼ calɛʼ calɛʼ!»

³⁰Páyɛ́ɛ əgumudúəŋənən pɛda, pə́əsiəd niob, páyɛmoogo na nɛ́lɛ́ a oʼto.

³¹Ná páyɛ́ɛ páʼkoman ɛnyɛɛŋɛʼ yɛ́ɛy náan a nkó yəəŋ, pááság kumudíŋin ntaa yɛ́ pə́yímuníígi, pə́mə́muyúlísíni pilə́ə́ piə́ŋ. A ngim yɛ́ɛy aa pə́yímusíəd, pámɛ́ɛn amoóbaŋan a ɔmbásá.

³²Ná páyɛ́ɛ pándaalon pálɛ́ɛg na nyɔ́lɛ́, pə́yə́búníí na mɔɔd nyummú niiŋ lɛ́ Simɔ́ɔŋ, mɔɔd nyɔ́ a pálɛ́ɛg ɛ Silɛ́ɛn. Pasɔ́njaa pááság komoogóda ambaan lɛ́ ógóomin Yə́sus konyáŋɛn ɔmbásá.

³³Pááság kɛɛn, pámɛ́ɛn əgiig na Yə́sus a kɛnɔ kímmú pɔ́ɔdɔ́ŋɔn a tɔgɛ́ɛ́ tó Əbələ́ə lɛ́ Kologóʼta. Áay lɛ́: «Kɛnɔ kɛ́ kɛ́yɛ́ɛ wɔnɔ́ kɛlɛ́ʼtɛ́g kɛ́ oʼto».

³⁴Páyɛ́moyɛ́ʼkɛn maloʼ məbuúbúlə́ na yoom yímmú yáanɔ, pɔ́ɔdɔ́ŋɔn lɛ́ míil[113], pɔ́nɔ́ áŋo. Ná ayóʼtɛn, yɛɛ́sáŋɛ́nɛ lɛ́ nyɔ́lɛ́ adɛáŋo.

³⁵Páyɛ́mobáŋan a ɔmbásá. A ngim yɛ́ɛy, agɛɛlɛ lɛ́ páabanan pilə́ə́ piə́ŋ, pɛ́ɛ́lá ntɔŋ[114],

³⁶pə́ə́ləndin a kinuŋ kiə́ŋ.

³⁷Kɔ a ɔmbásá, a oʼto ó Yə́sus a mɔɛn, píídílid a igúg igə aa páyɛ́moyóón a yɛ́lɛ́. Náan aa píídílid pɔ́nɔ́: «Táá, Yə́sus aa nyóonɛ, nkúm ɛ Yúdɛn.»

³⁸Pɛ́ɛ́báŋan tɛn pɔɔd pə́mmú kɔ áay pábaan a ɛbá ɛ́ Yə́sus. Páyɛ́boyáágan lɛ́ ɛ́nɛ́ sɔ́g a ɔmbásá wə́ə́ŋ lɛ́ nyóonɛ a ombɔg ó Yə́sus ó nɛnom, nyummú a oó kɛmɛs[115] Pɔ́lɛ́ páyɛ́ɛ piíbən pá pagóón, páagoóna pɔɔd.

³⁹Pɔɔd pá páyɛ́ɛ agosánan kɔ áay, páyɛ́ɛ agodam pámoodóga tɛn, pə́əgəə́liʼtəni na nto[116],

⁴⁰pɔ́nɔ́: «Ɛɛ́ɛ, Wɛ nyɔ́ oyɛ́ɛ əgusəə wɔʼkɔ́ wəəbugə Tɛ́mpɛl, wíiʼkini kowáag yɛndɛ́ŋ a mɔɔ́s mádáád súg, ɔ́yɔ́yɛ́ɛ́ wɛɛ́nyɔ́amɔɛ́d anɛ́ɛ́n, wə́díŋin a ɔmbásá wóow, úsuu, nga fɔ́lɔ́b olɛ Mɔɔ́n o Táán!»

⁴¹Yoom tɛn náan ímuʼ na puʼkúm pó payaaganɛʼ pɛfɔny, na Palɛŋ pɛcɛm, na ponnom pó nigúu. Pɔ́lɛ́ tɛn páyɛ́ɛ agomoónyɛɛŋanɛ pɔ́nɔ́:

⁴²«Iíi, ayɛ́ɛ ɔgɔɔyɔnɛ pɔsɔ́g. Nɛ́gɔŋ anɛ́ɛ́n óoʼ, ɔdɛɔ́gɔ ogɔɔ́yɔ́ɔyɛ nyɔ́lɛ́nyɔ́amɔɛ́d! Nga fɔ́lɔ́b alɛ nkúm ɛ nigúu nɛ́ Ɛ́sɛlayɛl, ə́suu a ɔmbásá wóow nɛ́gɔŋ. Əməʼkusuu, tɛagaag oʼto na nyɔ́lɛ́!

⁴³Oyɛ́ɛ əgusəə lɛ́ waágɛn oʼto wááŋ ungim na Táán. Táán ágoyɔ́ɔyɛ anɛ́ɛ́n áay nɛ́gɔŋ yi nga amágɔɔnyɔ́ŋɛn[117], lɛ́ oyɛ́ɛ əgusəə wɔʼkɔ́ olɛ Mɔɔ́n wəəŋ!»

⁴⁴Ɔmbɔ́ tɛn piíbən pá pɛ́ɛ́báŋan kɔ áay a yɔɔbɔn mbásá, páyɛ́moyágásɛ́nɛ́ɛ́ tɛn agomoodóga wɔnɔ́ pɔsɔ́g.

⁴⁵Ná tóɛf iyííg, mbin yiídə́əŋ a nsí ngim pilíb, súʼtə́ə́ a mangɛn mádáád.

⁴⁶Ná mangɛn mádáád máyɛ́ɛ mə́ndəgiim əgiig, Yə́sus yiídóʼtin kiʼkíŋ na toɛn, ɔnɔ́: «Ɛlɛ́as, Ɛlɛ́as, lɛ́má sabágtáni?» Áay lɛ́: «Táán yaam, Táán yaam, tuə́ áa umíʼtúmín ngim náan[118]?»

⁴⁷Ná ngab ɛ pɔɔd yɛ́ ɛyɛ́ɛ kɔ áay ɛyóób náan, pə́ə́bə́ə́ kosɔyɔ pɔ́nɔ́: «Pomóób ə́, ɔɔ́ndɔdɔ́ŋɔn Ɛlɛ́as.»

⁴⁸Sɔ́g nyummú kɔ áay a ondáŋ wɔ́ɔ́bɔn aáság kɛɛn na ɔʼtɛ́d, əə́nyum ɛʼpɔ́ɔnsɛ a pɛŋwáŋwáŋá pɛ́ maloʼ, əmíim áfanyɛg a oʼto ó niob, amɛ́ʼkɛn na Yə́sus lɛ́ ɔ́sɔ́sɔ[119]

⁴⁹Náa pɔsɔ́g pɔ́nɔ́ na nyɔ́lɛ́: «Póŋ, tɛ́dála nga Ɛlɛ́as əəgiim amoyɔ́ɔyɛ.»

⁵⁰Yə́sus aáság kiiʼkini kudóʼtin kiʼkíŋ na toɛn, əmíísímid, aádó oʼto.

⁵¹Əgín a kɛnɛŋ kɛ́go kɛ́ɛg, sanjaʼ yɛ́ pɛ́ɛ́sandɛgɛnɛ a Tɛ́mpɛl[120] yaáság kosaalɛg pɛsaa pɛ́baan paáám, kəə́bə́ə́ a oʼto agɛɛn əgiig a nsun. Nsí iyə́nyígídíí, aʼtáán yásasáa,

⁵²pəgəəniʼ pə́əgəə́buənə, pɛlóŋ pɛ́ pɔɔd piíŋ pá páyɛ́ɛ sáád pɛ́móndɛ́gan.

⁵³Ná Yə́sus ayóndɛg, pɛlóŋ pɛ́ pɛ́ɛ́lónan a pəgəəniʼ pɛ́ɛ́sɔ́d a Yolósalɛm, pálɛ́ɛg yɛ́ ɛlɛɛ́ pulúʼkə́n pó Táán. Pɔɔd piíŋ páyɛ́boodála.

⁵⁴Ná nkúm ɛ pasɔ́njaa, na pɔɔd pá páyɛ́ɛ kɔ áay a kinuŋ kɛ́ kɛlóŋ kɛ́ Yə́sus pɛ́ɛ́dála wɔnɔ́ ná nsí iyə́nyígídíí, na nkə kiim kɛ́ kɛ́yɛ́ɛ agaásan, ngililiʼ iyíbugúmin, pə́ə́bə́ə́ kosɔyɔ pɔ́nɔ́: «A fɔ́lɔ́b, mɔɔd nyóonɛ ayɛ́ɛ Mɔɔ́n o Táán!»

⁵⁵Pagɛ́ɛd páyɛ́ɛ kɔ áay piíŋ. Pɛ́ɛ́dɛ́lɛ́man laálá, pə́ədíin pánadɛna agá pɛnág agodɛ́ʼtɛg kiim kɛ́ kɛ́yɛ́ɛ agaásan. Páyɛ́ɛ pagɛ́ɛd pá pə́yíím pə́yə́njən Yə́sus əgín kɔ́gɔ́ɔg a Kalilə́ə, páamoyɛ́ɛlanɛ maʼtóʼtóm.

⁵⁶Kɔ a ondáŋ ó pagɛ́ɛd wóow, Malɛ́a nyɔ́ a Magdala ayɛ́ɛ kɔ, na Malɛ́a tɛn nyummú, ŋŋí ɛ pa Sɛ́ag pɔ́lɛ́ ná Yósɛb, na ɔʼkɛ́ɛd tɛn nyummú, ŋŋí ɛ pɔɔ́n pá Səbədə́ə.

⁵⁷Na niób, mɔɔd nyummú niiŋ lɛ́ Yósɛb, kibíəniʼ kɛ́ pálɛ́ɛg yɛ Əliməʼtə́ə aáság kiim alon. Ayɛ́ɛ mɔɔd tɛn nyɔ́ ayɛ́ɛ lɛ́ amaʼkosɔyɛd a ɛgɔny yɔ́ɔ́bɔn yɛ́ ɛgóón yɛ́ɛy, páyɛmoyóob. Nyɔ́lɛ́ tɛn ayɛ́ɛ aándɛ a ondáŋ ó paaʼkan pá Yə́sus.

⁵⁸Ayɛ́ɛ́n əŋíən na Pɛláad lɛ́ ámoyɛ́ʼkɛn kɛlóŋ kɛ́ Yə́sus nyɔ́lɛ́ yɛ́ɛn əni. Pɛláad aáság kɛɛ́ʼkɛn toɛn lɛ́ pámoyɛ́ʼkɛn kɛlóŋ.

⁵⁹Yósɛb yiísiə́d kɛlóŋ, aágóda na ombɔ́m ó lɛ́ɛŋ ongwa, wə́əfúŋə púyúŋ púyúŋ.

⁶⁰Əyímuúní a kəəniʼ ká káyɛ́ɛ kɔ áay kawa. Yiídím kəəniʼ kágo kóog lɛ́ pálɛ́ɛ́ kumuúni nyɔ́lɛ́nyɔ́amɔɛ́d kɔ. Káyɛ́ɛ kədímə́ə́n a kɛgon wɔnɔ́ kɛbaŋ. Ná ayɛ́ɛ əə́ʼkumuúni, aáság kusiəd kɛa kɛ́ kɛdám kɛ́ nɛdáán, əə́míngílídə́ni agolɔ́g unuʼ ó kəəniʼ na nɛ́lɛ́.

⁶¹Pɛbán pɛ́ɛb piim pɛ́yɛ́ɛ agaáyɛ́ɛlɛ, pa Malɛ́a nyɔ́ a Magdala pɔ́lɛ́ na Malɛ́a tɛn nyummú páyɛ́ɛ kɔ áay a udi ó kəəniʼ, páadɛ́ʼtɛg.

⁶²A koany kaáyɛnɛ, áay lɛ́ a wɔɔ́s wó wə́əyə́ən wɔɔ́s ó kaáboŋɛn kisúgiʼ[121], puʼkúm pó payaaganɛʼ pɛfɔny na Pafalɛsɛyɛ́ɛŋ páyɛ́ɛ́n ondáŋ a nó Pɛláad,

⁶³pɔ́nɔ́ na nyɔ́lɛ́: «Ngɔ́mɛnaʼ, tɛmáyóŋɛ́ɛ́ nkə kɛ́ mɔɔd o pɛnyaʼ nyóon yiísə́ə́ ná ayɛ́ɛ əligi ongóm. “Yiísə́ə́ lɛ́, əgiig a mɔɔ́s mádáád, nyɔ́lɛ́ əgiiʼkini kiim álon a kəəniʼ ongóm”.

⁶⁴Kólɛ́ aa timíim agodɛ́anɛ lɛ́ úsəə, pálɛŋ kunuŋ kəəniʼ kə́ə́ŋ, agɛɛn əgiig a mɔɔ́s móom mádáád lɛ́ paaʼkan pə́ə́ŋ pálɛ pə́giim əgiib kɛlóŋ kiə́ŋ ná pə́səə lɛ́ amóndɛg. Ná pɛ́ɛb a pɛnyaʼ anɛ́ɛ́n pɛ́agɛɛn kɛlaŋanan agaáyɛn pɛ́ yuudi.»

⁶⁵Náa Pɛláad ɔnɔ́ na pɔ́lɛ́: «Ooo, táá pasɔ́njaa a póob, todáan na pɔ́lɛ́, pálɛŋ kunuŋ kəəniʼ wɔnɔ́ ná poányɔ́ŋɛn.»

⁶⁶Pááság kɛɛn, páálɛŋ kofɛnya nɛdáán nɛ́ píígúb unuʼ ó kəəniʼ na nɛ́lɛ́, pə́ə́dí pə́mə́dí pasɔ́njaa kɔ a kinuŋ.