Read Yambeta Maʼtɛ́as 28 Bible Online

Maʼtɛ́as 28 - Yambeta bible

Maʼtɛ́as 28

¹Na pɛbáŋɛn pɛ́ koany kó a wɔɔ́s wó pɔ́nɔ́ kisúgiʼ kɛ́ Yúdɛn kɛ́ɛ́sán puə́y, pa Malɛ́a nyɔ́ a Magdala pɔ́lɛ́ ná Malɛ́a tɛn nyóʼkáag nyummú, pɛ́dɛ́ɛ́mɛn agɛɛn adála kəəniʼ.

²Pálɛ kɔ ɔ, nsí yaáság kəə́nyigid na toɛn, uŋun ó maʼtom ó Sə́dúk úmíim úsuu, ómɛ́ɛn a kəəniʼ, wə́míngílídi nɛdáán, wə́ə́ləndin a nɛ́lɛ́ a mɔɛn.

³Uŋun ó maʼtom wóow óyɛ́ɛ əguwəŋə kuwəŋə́ə́n. Kilə́ə́ kiə́ŋ fúlúʼtúʼtúʼtú náan wɔnɔ́ ndiɛb.

⁴Wɛɛ́y wááság kugumin pasɔ́njaa, pə́ə́bə́ə́ kuliminə kwag kwag kwag, pándɛ wɔnɔ́ pɛlóŋ.

⁵Náa uŋun ó maʼtom wɔnɔ́ na pagɛ́ɛd póob: «Pɔɔ́n pá ɛ́yaʼ! Podɛʼtámmána aá! Mbálɛŋ lɛ́ Yə́sus nyɔ́ pɛ́ɛ́báŋan a ɔmbásá aa polɛɛ́ əguunə.

⁶Əndigi áanɛ, amóndɛg wɔnɔ́ ná yiísə́ə́. Táá kɛnɔ kɛ́ pə́yíngígi kɛlóŋ kiə́ŋ áa kɛ́ɛnɛ.

⁷Ə́bísígíən kɛɛn adɛ́anɛ na paaʼkan pə́ə́ŋ poɔʼkɔ́: “Aálón a kəəniʼ ó! Aáʼkoboóyaŋɛnɛ a Kalilə́ə, poamoodála kɔ́gɔ́ɔg.” Nkə kɛ́ mɛ njɛ́ɛ anyɔ́ŋɛn kobodɛ́anɛ a kɛ́ɛg aá!»

⁸Pɛ́ɛ́sán, pə́mə́bísígíí kɛɛn alɔɛgɛnɛ paaʼkan tɔsɔm tóod. Páyɛ́ɛ lɛ́ pə́əliminə na wɛɛ́y, ɔʼtɛ́m wɔ́ɔ́bɔn síɛ́ɛ́d na tɔnyɔ́g.

⁹Ɛyaa ɛ́ kɛnɛŋ sɔɔŋ ɔ, pááság kəə́bun na Yə́sus əə́giim a udi wɔ́ɔ́bɔn, náa ɔnɔ́ na pɔ́lɛ́: «Mbə́busóyídi aá!» Pááság kaáyɛʼtɛnɛ a ɛbá yə́ə́ŋ, pə́mə́mudə́ə́ŋə́nən a ambaan, nti a nsí, páamonyáadɛ.

¹⁰Náa ɔnɔ́ na pɔ́lɛ́: «Podɛʼtámmána, todáan adɛ́anɛ na paaʼkan páam lɛ́ pɛ́ɛn a Kalilə́ə, kɔ́gɔ́ɔg aa tɛádɛ́ʼtɛganan.»

¹¹Pálɛ anɛ́ɛ́n kɔ a ngə́ agɛɛn adɛ́anɛ na paaʼkan a, ngab ɛ pasɔ́njaa yimmú yaáság kɛɛn a pálɛ́ɛg lɛ́ pɛ́ɛn adɛ́anɛ na puʼkúm pó payaaganɛʼ pɛfɔny nkə kiim kɛ́ kɛ́yásánɛ́ɛ́.

¹²Puʼkúm pó payaaganɛʼ pɛfɔny na ponnom pó nigúu pááság kaágɔnyɛd. A nɛlon nɛ́ ɛgɔny yɛ́ɛy, páyɛ́ʼkɛn ɛ́fɔlɛ́ ɛ́ mɔɔnɛ́ na pasɔ́njaa,

¹³pɔ́nɔ́ na pɔ́lɛ́: «Pəŋi, tɛánɛ́an na pɔɔd lɛ́ paaʼkan pə́ə́ŋ aa pə́míim əgiib kɛlóŋ kiə́ŋ na udúg, pəŋi a ɛnɔ.

¹⁴Ɔmbɔ́ ngɔ́mɛnaʼ yɛ́ nkóʼkóón yoób lɛ́ poyɛ́ɛ a ɛnɔ, pəsi tɛalɛŋ wɔnɔ́ ná tɛágɛɛlɛ lɛ́ adɛɛ́boʼpɔ́nɛ́sɛ.»

¹⁵Pasɔ́njaa pááság kusiəd mɔɔnɛ́ móom, pámɛ́ɛ́lɛ wɔnɔ́ ná páyɛ́bodɛánɛ. Náan aa pɛ́ɛ́sánánɛ kɛbán kɛ́ɛg a nigúu nɛ́ Yúdɛn niim. Kɛ́lɛ əgəə́səə əgín náan na pa nɛ́gɔŋ kɛ́.

¹⁶Paaʼkan pá Yə́sus pááság kɛɛn a Kalilə́ə. Páyɛ́ɛ nto yɔɔbɔn yówád na úmmuʼ. Pɛ́ɛ́bág a oʼkon a mɔɛn, kɛnɔ kɛ́ yiísə́ə́ lɛ́ pɔ́lɛ́ pə́əgəə́bun.

¹⁷Ná páyɛ́moodála, píídə́əŋ a nsí na əndu, agomonyáadɛ. Náa, kɛbán kímuʼ, ngab yimmú ɛyɛ́ɛ kɔ na isuŋ, pɔ́nɔ́ adɛ́njaŋ nyɔ́lɛ́ aa alɛɛ́nɔ.

¹⁸Yə́sus aáság kaáyɛʼtɛnɛ a ɛbá yɔ́ɔ́bɔn, náa ɔnɔ́ na pɔ́lɛ́: «Táán ayɛ́nyɛɛ́ʼkɛn toɛn tuim, a nsí na a mɔɛn.

¹⁹Todáan anɛ́ɛ́n a mɔnɔŋ miim, póɛlɛ lɛ́ pɔɔd páán paaʼkan páam, póboósɔgɛn a niiŋ nɛ́ Sɛ, na a nɛ́ Mɔɔ́n, na a nɛ́ Uŋun wó Ufúlúʼtú,

²⁰poáboyáʼkananɛ tɛn kɛɛlɛ nkə kiim kɛ́ mɛ njɛ́bodɛánɛ. Pəŋi pólɛŋ lɛ́ ndɛ́ɛ́ kɛɛn na pəŋi pɛnɛŋ piim, súʼtə́ə́ a nɛman nɛ́ nsí».