Read Yambeta Maʼtɛ́as 3 Bible Online

Maʼtɛ́as 3 - Yambeta bible

Maʼtɛ́as 3

¹A mədúg móom, Sɛ́aŋ Ɔsɔgɛn pɔɔd yɛɛ́lón a Siudə́ə, a kɛnɔ kɛ́ kifələ́ə́n. Ayɛ́ɛ əgiim álɔɛgɛ ɔnɔ́:

²«Ə́súʼkíən óo! Liogíən ongoo a mabɛ́! Kɛnɛŋ kɛ́ Táán kiim alaamɛɛ́ kɛándɛ kɔ!»

³Kɛbán kɛ́ Sɛ́aŋ ogo nyóon aa Ɛsayíi, ɔndɔɛgɛʼ pɛbán o Táán nyummú yiísə́ə́ ɔnɔ́: «Nɛŋo nɛ́ mɔɔd nɛ́lɛ asáŋa a kɛnɔ kɛ́ kifələ́ə́n, nɛɔ́nɔ́: “Sóbíníən pungə́ pó Sə́dúk óo! Tə́nígə́níən pɛáŋ piə́ŋ pɛ́dɛ́lɛm sáád”[6]»

⁴Kilə́ə́ kɛ́ Sɛ́aŋ əyə́níigin, páyɛ́ɛ́lɛ kɛ́lɛ́ na pinum pɛ́ nnyam yɛ́ pɔ́ɔdɔ́ŋɔn lɛ́ sɛamóo, kandá yɛ́ əyə́súŋin a nɛdáá ɛyɛ́ɛ kandá ɛ kiob[7] Moom mó konɛ muə́ŋ móyɛ́ɛ: Pagantɛ́d na woóŋ.

⁵Pɔɔd pá a pálɛ́ɛg ɛ Yolósalɛm, na pá a kɛsom kɛ́ nsí kɛ́ Siudə́ə kiim, na pɔsɔ́g tɛn pá a əʼkúu əngim yɛ́ a ɛbá ɛ́ noom nó Siuludɛ́ɛŋ, páyɛ́ɛ piimən kɛnɔ kɛ́ Sɛ́aŋ alɛɛ́.

⁶Náa, wɛ nyɔ́ umíim, waayaŋ kaáwála unuʼ a mabɛ́ mááŋ, a udi ó mɔɔd ungim ná ágoósɔgɛn anɛ́ɛ́n a noom nó Siuludɛ́ɛŋ.

⁷Ná Sɛ́aŋ yɛɛ́dála lɛ́ pɔɔd piíŋ lɛ́ na pɔsɔ́g pá a ɛgɔny ɛ́ Pafalɛsɛyɛ́ɛŋ, na pá a ɛgɔny ɛ́ Pasadosɛyɛ́ɛŋ pálɛ əgiimən lɛ́ píim əsiəd ɔsɔgɛn, ayɛ́ɛ əgusəə ɔnɔ́ na pɔ́lɛ́: «Pəŋi musə́sə́d mó pɛlɔ́ngɛʼ móonɛ, ánɛ aa amábodɛánɛ lɛ́ ngə́ ɛgaágɛɛŋɛ ilúún ɛ́ Táán yɛ́ɛnɛ yɛ́ yə́ndəgimií ɛlɛ kɔ?

⁸Ooo yi, kɛbán kɛ́dɛɔ́gɔ! Ɛlɛ́an anɛ́ɛ́n pɛbán pɛ́ píoloodi lɛ́ puə́ʼkəə́suʼki, puóʼkuliogi ongoo a pɛbán pɛ́ pɛbɛ́.

⁹Podɛfɛ́g lɛ́ kɛ́lɛ əgín a niə́səə nɛ́ na unuʼ na unuʼ lɛ́ Ábɛlaam alɛ sɛʼkóón waaŋan, ndóo. Ndabodɛ́anɛ lɛ́ ɔmbɔ́ əgín aʼtáán yɛ́ɛnɛ yɛ́ poádɛ́ʼtɛg, Táán alɛ ogɛɛlɛ lɛ́ yáán ndɛg yɛ Ábɛlaam.

¹⁰Taa, yaá áa yɛ́ɛnɛ yándɛɛ́ a ombɔg lɛ́ pásóma piɛd a ngaŋ. Kiɛd kiim kɛ́ kídiə́guúmíí modámádám mólaŋ, pálɛ́ɛ́ kosom, páadagɛdɛ a yug.

¹¹Mɛ Sɛ́aŋ, ndɛ aboósɔgɛn na məní əguloodi lɛ́ poáʼkogasɛ ntɛ́m yaaŋan. Náa, mɔɔd alɛ kɔ nyɔ́ əə́ndəgimií a ngim yaam. Nyɔ́lɛ́ alɛ na toɛn amɛ́njaáyɛn. Ntiigin ɔmbɔ́ nyóonɛ lɛ́ mbodɛm a udi wə́ə́ŋ əgumuyóndin palábá a ambaan. Nyɔ́lɛ́ alɛ́ɛ́ koboósɔgɛn na Uŋun wó Ufúlúʼtú, na a yug.

¹²Ogóódi maʼtɛ́ngɛ́lɛ́ a ombɔg, alɛ́ɛ́ kofɛm ngəŋ na mɔ́lɛ́. Alɛ́ɛ́ kɛɛlɛ lɛ́, ngəŋ yɛ́ ɛlɛɛ́ ɛlaŋ, ə́əsiəd agɛɛ́ngɛg a kɛságɛʼ kiə́ŋ. Ə́əsiəd pifum a kogɔ́lɔnɛ a yug yɛ́ ɛ́dɛndɛ́ɛ́ kuwúú.»

¹³Náan aa Yə́sus əyíím ádɛ́ɛmɛn a Kalilə́ə, əmíim alon a Siuludɛ́ɛŋ. Ayɛ́ɛ́n a ɛbá ɛ́ Sɛ́aŋ lɛ́ ámoósɔgɛn.

¹⁴Sɛ́aŋ aáság kosáŋɛnɛ, ɔnɔ́ na nyɔ́lɛ́: «Ndóo, mɛ áa nkódíí lɛ́ nyíim ná wɛ olɛɛ́ lɛ́ wɛ́sɔgɛn. Tuə́ áa wɛ agá aa wəə́ʼkimií lɛ́ nkoósɔgɛn əə́!»

¹⁵Náa Yə́sus ɔnɔ́ na nyɔ́lɛ́: «Ə́líʼtíníí lɛ́ kɛáyɛ́ɛlɛ náan a nɛ́gɔŋ lɛ́ náan, tɛágɛɛlɛ nkə kɛ́ Táán alɛɛ́ anyɔ́ŋɛn lɛ́ kɛáyɛ́ɛlɛ.» Sɛ́aŋ aáság kəə́liʼtini.

¹⁶Ná Sɛ́aŋ ayɛ́mosɔ́gɛn, a nɛlon anɛ́ɛ́n nɛ́ɛn nɛ́ ayɛ́ɛ əə́ndəgiim álon a kɛdɛ́ɛ́, mbálámɔɛn yaáság kəə́buən, Uŋun ó Táán úmíim úsuu wɔnɔ́ kiɛm, ómámoláʼtɛ́mɛn a nkó.

¹⁷Nɛŋo nɛáság kiim nísuu tɛn kɔ́gɔ́ɔg a mɔɛn, nɛɔ́nɔ́: «Taa, nyóonɛ alɛ mɛ Mɔɔ́n wo ɔʼtɛ́m. Tɔnyɔ́g tóam tuim tólɛ na nyɔ́lɛ́[8]»