Read Yambeta Maʼtɛ́as 4 Bible Online

Maʼtɛ́as 4 - Yambeta bible

Maʼtɛ́as 4

¹Ayɛ́ɛ əgín Sɛ́aŋ aáman kɔsɔgɛn Yə́sus, Uŋun ó Táán wááság komoyɛ́ɛlɛ lɛ́ yɛ́ɛn a kɛnɔ kɛ́ kifələ́ə́n lɛ́ ná omɔlɛɔ́g ámoyásɔsɛn.

²Yə́sus ayɛ́ɛ́lɛ kɔ əʼtin á mədúg ábaan annɛ́ɛ́nɛ. Njaan yəə́bə́ə́ komoobany.

³Alɛ kɔ́gɔ́ɔg náan a, ongaásɔsɛnaʼ pɔɔd nyóon aáság kaáyɛʼtɛnɛ a ɛbá yə́ə́ŋ, ɔnɔ́ na nyɔ́lɛ́: «Nga olɛ Mɔɔ́n o Táán, ɛɛlɛ lɛ́ aʼtáán yɛ́ɛy yáán moom mó konɛ, ónɛ yi.»

⁴Yə́sus əyímuyúlísíni ɔnɔ́ na nyɔ́lɛ́: «Kɛ́lɛ kidiídílə́ a Kálaʼtaʼ ɛ Táán lɛ́ ɔlaa ó mɔɔd ódɛɔ́gɔ əgín a moom mó konɛ, náa ólɛ a tɔgɛ́ɛ́ tó tóalon a unuʼ ó Táán[9]»

⁵Omɔlɛɔ́g aáság kɛɛn anɛ́ɛ́n na Yə́sus a Yolósalɛm, pálɛ́ɛg yɛ́ ɛlɛɛ́ pulúʼkə́n pó Táán. Ayɛ́ɛ́n əmudə́nigi a ɛnɔn ɛ́ Tɛ́mpɛl a mɔɛn

⁶náa ɔnɔ́ na nyɔ́lɛ́: «Nga olɛ Mɔɔ́n o Táán, ə́lísíí a ɛnɔn yɛ́ɛnɛ a mɔɛn, úcilib a nsí lɛ́ kɛ́lɛ tɛn kidiídílə́ a Kálaʼtaʼ ɛ Táán lɛ́: Táán alɛ́ɛ́ kodɛ́anɛ na məŋun mə́ə́ŋ má maʼtom lɛ́ mágonyáŋɛn kogonyáŋɛ́náán a ɔmbɔg yɔ́ɔ́bɔn agɛɛlɛ lɛ́ udimbúʼtən ɔmbɔ́ kubúʼtən a nɛdáán[10]»

⁷Yə́sus əyímuyúlísíni ɔnɔ́: «Ɛɛ́ɛ, kɛ́lɛ náan! Náa, áyóŋɛ́ɛ́ tɛn lɛ́ kɛ́lɛ kidiídílə́ kɔ lɛ́, “Odɛyásɔ́sɛ́nɛ́ɛ́ Sə́dúk Táán waaŋ”[11]»

⁸Omɔlɛɔ́g aáság kumuúsiəd kə́mmú, amɛ́ɛn na nyɔ́lɛ́ a kɛa kɛ́ oʼkon a mɔɛn lóóŋ, əmə́mulóódi nsí ngim na əʼkúu əngim yá álɛɛ́ kɔ, na tugúm tuim tó tólɛɛ́ kɔ.

⁹Náa ɔnɔ́ na nyɔ́lɛ́: «Taa, uməʼkiʼtúmin əndu agɛnyáadɛ, nkə kɛ́ɛg kiim kɛ́ olɛɛ́ agodɛ́ʼtɛg, ndagoyɛ́ʼkɛn kiim.»

¹⁰Náa Yə́sus ɔnɔ́ na nyɔ́lɛ́: «Índiogin a əngis, Sáʼtan! Kɛ́lɛ kidiídílə́ a Kálaʼtaʼ ɛ Táán lɛ́: “Əgín Sə́dúk Táán waaŋ nyɔ́lɛ́nyɔ́əsíŋ áa ónyádɛɛ́. Əgín nyɔ́lɛ́nyɔ́əsíŋ áa úmudúminií əndu agomonyáadɛ[12]”»

¹¹Áay anɛ́ɛ́n áa Omɔlɛɔ́g əyímuudí, məŋun má maʼtom má Táán mááság kiim mə́suu, máyɛ́ɛ amooyáabɛna.

¹²Ná Yə́sus ayóób náan lɛ́ páʼkaag Sɛ́aŋ a yoog yɛ njaan, ayɛ́ɛ́n a Kalilə́ə.

¹³Yɛɛ́dɛ́ɛ́mɛn tɛn áay a Násalɛd amɛ́ɛn ələndin a Kaʼpɛlɛnáyum, pálɛ́ɛg yimmú yɛ́ a ɛbá ɛ́ noom nó ɛbá fiɛ́d nó a Kalilə́ə, a əʼkúu á Səbulóon na Nɛftalíi.

¹⁴Nkə kɛ́ Táán yiísə́ə́ a unuʼ wó Ɛsayíi, ɔndɔɛgɛʼ pɛbán wəəŋ a kɛ́ɛg kɛ́yáás lɛ́, yiísə́ə́ ɔnɔ́:

¹⁵«Pɔɔd póonɛ piim lɛ́ na pɔsɔ́g pá a Səbulóon, na pá a Nɛftalíi, na pɔsɔ́g pá a nsɛ́ɛ́ ɛ noom nó Siuludɛ́ɛŋ, na pá a Kalilə́ə, a ngə́ ɛgɛɛn a noom nó ɛbá fiɛ́d, kɛnɔ kɛ́ mɔnɔŋ miim málɛɛ́ əgiim əgəə́búnən. Pɔ́lɛ́ póob piim pálɛŋ lɛ́

¹⁶pɔɔd pá páyɛ́ɛ a mbin, pándɛ a kɛa kɛ́ kisəə. Kisəə kɛ́ɛg kɛándaanom a əʼkúu yɛ́ mbin ɛ liɛ́d ɛyɛ́ɛ kɔ[13]»

¹⁷Əgəə́bə́ə a kɛnɛŋ kɛ́ɛg aa Yə́sus əyə́ʼtúmíí kiim álɔɛgɛ ɔnɔ́: «Ə́súʼkíən óo! Nɛlaamɛʼ nɛ́ a mɔɛn áa nɛ́ɛnɛ nɛándɛɛ́ a ɛbá yááŋan!»

¹⁸Wɔnɔ́ ná Yə́sus ayɛ́ɛ agosan a ɛbá ɛ́ noom nó a Kalilə́ə, yɛɛ́dála pɔɔd pábaan, niŋŋí lɛ́ na Simɔ́ɔŋ nyɔ́ ayɛ́ɛ tɛn niiŋ lɛ́ Píɛ na Əndələ́ə móŋŋí wəəŋ, páadagɛdɛ nibúnjə́ lɛ́ pigólí pɛɔ́bɔn aa pɛ́ɛb pɛ́yɛ́ɛ lɛ́ nibuəd.

¹⁹Náa ɔnɔ́ na pɔ́lɛ́: «Mɛ́naan puínjə́ən, ndaboyɛ́ɛlɛ púbə́ə́ agá kiim póɛnnɔ́bɛnɛ pɔɔd.»

²⁰Əgín ná yiísə́ə́ náan, pa Simɔ́ɔŋ pɔ́lɛ́ na móŋŋí pááság kudi pámáyáyɛ́dɛ́ɛ́ əmbúnjə́ yɔ́ɔ́bɔn əguyə́ən Yə́sus.

²¹Pə́ə́bə́ə́ kɛɛn. Əgiig yuudi sɔɔŋ, Yə́sus aáság kodála tɛn nto yimmú ɛ́baan, niŋŋí lɛ́ na Sɛ́ag na móŋŋí wəəŋ Sɛ́aŋ, pɔɔ́n pá Səbədə́ə. Páyɛ́ɛ a kɛʼkɔ́m kɛɔ́bɔn a kaadɛ, póosóboni əmbúnjə́ yɔ́ɔ́bɔn ondáŋ na sɛ wɔɔbɔn. Yə́sus ayɛ́boodɔ́ŋɔn tɛn pɔ́lɛ́, ɔnɔ́: «Mɛ́naan tɛn puínjə́ən.»

²²Əgín ná pɔ́lɛ́ tɛn páyóób ntɔ́ŋɔ́nɔ́n ɛ Yə́sus, píídí pə́mə́dí sɛ wɔɔbɔn na kɛʼkɔ́m kɛ́, pə́ə́yə́ə́n Yə́sus.

²³Yə́sus ayɛ́ɛ əgiim ádáŋana a nigúu nɛ́ Kalilə́ə niim, əə́giim yáaʼkananɛ pɔɔd a puog pó pɛɔ́sɔ́gɔ́lɔ́n poɔ́bɔn, aálɔɛgɛ Tɔsɔm Tólaŋ tó a Nɛlaamɛʼ nɛ́ a mɔɛn, aágoómanɛ pɔɔd a mbod ɛ mabámbany ngim yɛ́ páyɛ́ɛ agobányɛla.

²⁴Nugəm nuə́ŋ noáság kaálam a nigúu nɛ́ Silíi niim. Náan aa pɔɔd pə́yíímən pányáŋɛna pabámbany piim, na mbod ɛ mabámbany ngim lɛ́ na pɔsɔ́g pá məŋun má mabɛ́ máyɛ́ɛ na pɔ́lɛ́, na pá pidiʼ kɛ́, na pɛgɔd kɛ́. Yə́sus aáság koómanɛ pabámbany póob.

²⁵Pɔɔd páyɛ́ɛ a ngim ɛ Yə́sus súuu, kiʼtúú kilúd. Pə́yíím pádɛ́ɛman lɛ́, póonɛ a Kalilə́ə, pə́mmú a nigúu nɛ́ pálɛ́ɛg yówád, pə́mmú tɛn a Yolósalɛm na a Siudə́ə na a nigúu nɛ́ a nsɛ́ɛ́ ɛ noom nó Siuludɛ́ɛŋ.