Read Yambeta Maʼtɛ́as 5 Bible Online

Maʼtɛ́as 5 - Yambeta bible

Maʼtɛ́as 5

¹Ná Yə́sus yɛɛ́dála kiʼtúú kɛ́ pɔɔd kɛ́ kɛ́yɛ́ɛ əgiim kímuyə́ən, yɛɛ́bág a oʼkon a mɔɛn, əə́ləndin a nsí. Paaʼkan pə́ə́ŋ pááság kiim ələndin tɛn kɔ a ɛbá yə́ə́ŋ.

²Aáság kəə́bə́ə́ koboyáʼkananɛ pɛbán. Ɔnɔ́:

³«Kɔŋɛʼ na pá pálɛɛ́ na ntɛ́m ɛ muyənjə́g; Nɛlaamɛʼ nɛ́ a mɔɛn nɛ́lɛ nɛɔ́bɔn.

⁴Kɔŋɛʼ na pá pálɛɛ́ na piwiiyiʼ pɛ́ ntɛ́m; nsí ɛlɛ́ɛ́ koob na pɔ́lɛ́.

⁵Kɔŋɛʼ na pá pálɛɛ́ a ɔndɛɛ; Táán alɛ́ɛ́ kubuúŋiənə pɛlɛɛ.

⁶Kɔŋɛʼ na pá pálɛɛ́ na njaan na nɛŋɔ́ɛd lɛ́ pɛbán pɛ́dáŋana a sáád; pálɛ́ɛ́ kuyíid.

⁷Kɔŋɛʼ na pá pálɛɛ́ na ɔʼtɛ́m ó maan; Táán alɛ́ɛ́ kobooda tɛn maan.

⁸Kɔŋɛʼ na pá ntɛ́m yɔɔbɔn ɛlɛɛ́ mmoáŋáán; pálɛ́ɛ́ kodála Táán.

⁹Kɔŋɛʼ na pá pálɛɛ́ agɛɛlɛ lɛ́ pɔɔd pɛ́ɛn a uŋóón; Táán alɛ́ɛ́ kusəə lɛ́ pálɛ pɔɔ́n pə́ə́ŋ.

¹⁰Kɔŋɛʼ na pá, pɔsɔ́g pálɛɛ́ agocoʼkonɛ lɛ́ pálɛ agodáŋana wɔnɔ́ ná Táán alɛɛ́ anyɔ́ŋɛn; Nɛlaamɛʼ nɛ́ a mɔɛn nɛ́agoob na pɔ́lɛ́.

¹¹Kɔŋɛʼ na pəŋi pá pɔɔd pálɛɛ́ agoboodóga, pə́əbuúyəʼkəni, páabosóman pɛbán a nkó a oʼto wóonɛ lɛ́ poágɛn oʼto na mɛ.

¹²Pəŋi póob náan pɔ́nyɔ́ga, púbin lɛ́ pɛsáábɔ́n pɛ́ pɛgóʼkóón pɛ́lɛ agobooboŋ a mɔɛn. Əgín tɛn náan aa pííyə́ʼkə́ni palɔɛgɛʼ pɛbán pá Táán pá pɛ́ɛ́yáŋ na pəŋi[14]»

¹³«Pəŋi, polɛ məbə́lí a nsí. Kɛnɛŋ kɛ́ məbə́lí máʼkosolɛɛ́, mə́ndigi kə́mmú tɛn məbə́lí. Mə́ndigi kə́mmú na pigólí. Mándɛ agá lɛ́ pádo kodoán a táán, pɔɔd pə́gíʼtən na ambaan.

¹⁴Polɛ tɛn kisəə a əngis á pɔɔd. Pálɛ́ɛg ngim yɛ́ ɛlɛɛ́ ngoágáán a oʼkon a mɔɛn, ɛdɛɔ́gɔ ɛgɔɔsɛm.

¹⁵Pə́díəguug tɛn ɛláam lɛ́ ná páág a ilúlúú a kaadɛ, ndóo. Pálɛ agɛɛdɛg a mɔɛn lɛ́ ná ungim nyɔ́ alɛɛ́ a yoog, ádɛ́ʼtɛganan.

¹⁶Yoom ímuʼ tɛn náan aa kɛ́lɛɛ́ na pəŋi. Polɛ kisəə. Nomáan, ná pɔɔd páadála wɔnɔ́ ná polɛɛ́ agolɛŋ kəə́siəd, ná pɛ́ʼkɛn nugəm na Sɛ waaŋan nyɔ́ alɛɛ́ a mɔɛn».

¹⁷«Podɛfɛ́ga lɛ́ njíím a nsí yɛ́ɛnɛ lɛ́ nyíim əwíiyi pɛcɛm pɛ́ Moyíis na nkə kɛ́ palɔɛgɛʼ pɛbán pá Táán páyɛ́boyáʼkánánɛ, ndóo. Njíím lɛ́ nyíim əyə́əgi pɛ́lɛ́, adɛ́njaŋ lɛ́ ngwíiyi.

¹⁸A fɔ́lɔ́b ndabodɛ́anɛ lɛ́ nsí na mɔɛn ɛlɛ́ɛ́ kobod yíiwu, ɛyaa ɛ́ kɛlɛŋ ɔmbɔ́ ímuʼ, na nufuuʼ ɔmbɔ́ tɛn númuʼ núdiə́nyígídíí a kálaʼtaʼ ɛ pɛcɛm ná pɛbán pɛ́ɛnɛ piim pɛ́dɛ́mman kaas.

¹⁹Kólɛ́ aa kɛ́lɛɛ́ lɛ́, mɔɔd nyɔ́ alɛ́ɛ́ kosɛ́ɛdɛɛ́ ɔmbɔ́ əgín iyənjə́g ɛ́ kɛcɛm ímuʼ, annyɔ́ŋɛn kɛɛ́ngɛg kɛ́lɛ́, aágɛɛlɛ lɛ́ pɔsɔ́g tɛn pɛ́ndɛ́ŋ pə́yə́ən ongoo wə́ə́ŋ, nyóon alɛ́ɛ́ kɛɛn iyənjə́g a Nɛlaamɛʼ nɛ́ a mɔɛn. Sɔ́g nyɔ́ alɛ́ɛ́ kɛɛ́ngɛgɛɛ́ pɛcɛm, áyɛɛlɛ lɛ́ pɔsɔ́g tɛn pɛ́ndɛ́ŋ pə́yə́ən ongoo wə́ə́ŋ, nyóon alɛ́ɛ́ kɛɛn na niiŋ a Nɛlaamɛʼ nɛ́ a mɔɛn.

²⁰Kólɛ́ aa ndábodɛ́anɛ na pəŋi lɛ́ poɛ́ngɛg pɛcɛm agaáyɛn Pafalɛsɛyɛ́ɛŋ na palɛŋ pɛcɛm. Náan fiɛ́d, podɛndɛ́ɛ́ kosɔd a Nɛlaamɛʼ nɛ́ a mɔɛn».

²¹«Poyóób píísə́ə́ a kɛnɛŋ kɛ́ pɛmbáa pɔ́nɔ́: “Odɛnjóón mɔɔd[15] Wɛ nyɔ́ waágoon sɔ́g, wɛ nyóon waadɛ́lɛm a pɛyɔm”.

²²A mɛ, ndabodɛ́anɛ lɛ́, wɛ nyɔ́ wəə́liŋ na woómóŋŋí, waadɛ́lɛm tɛn a pɛyɔm. Wɛ nyɔ́ waádógɛd sɔ́g kɛdog kɛ́ kɛnasáŋ, wagɛɛn adɛ́lɛm a pɛyɔm a udi ó pɔyɔm pá pagóón. Wɛ nyɔ́ waádɛ́anɛ na woómóŋŋí lɛ́ alɛ kiyəg, wɛ nyóon olɛ lɛ́ wɛ́ɛn a yug yɛ́ ɛgóón.

²³Omaʼkɛɛn a kibóŋ kɛ́ pɛfɔny lɛ́ wɛ́ɛn agɛɛ́ʼkɛn kɛfɔny kɛáŋ na Táán náa omáyóŋɛ́ɛ́ lɛ́ woómóŋŋí nyummú alɛ undiŋə́ə́n na wɛ,

²⁴yaŋ kudi úmə́dí kɛfɔny kɛáŋ kɔ áay a kibóŋ kɛ́ pɛfɔny, óyag kɛɛn ogoósóbini na nyɔ́lɛ́ ná wímbuúlini anɛ́ɛ́n, wíim agɛɛ́ʼkɛn kɛfɔny kɛáŋ na Táán.

²⁵Omaʼkɛɛn a kɛbán na mɔɔd náa poándagɛɛnɛɛ́ lɛ́ póɛn adɛ́lɛm a pɛyɔm, uunə lɛ́ puósóbini na nyɔ́lɛ́ ná pugə́ligi a ngə́. Náan fiɛ́d, aagɛɛn na wɛ a nó onjɔm pɛyɔm, ná onjɔm pɛyɔm ə́guúgumin, ágoyɛ́ʼkɛn na pasɔ́njaa lɛ́ pɛ́ɛn agoyáág a yoog yɛ njaan.

²⁶A fɔ́lɔ́b ndagodɛ́anɛ lɛ́ odɛndɛ́ɛ́ kolon a yoog yɛ njaan yɛ́ɛy ná odɛ́mman kaálɛba uŋín wááŋ ungim. Ɔmbɔ́ əgín síísi mmuʼ ɛdɛndɛ́ɛ́ kolɔb.»

²⁷«Poyóób píísə́ə́ a kɛnɛŋ kɛ́ pɛmbáa pɔ́nɔ́: “Wɛ mɔɔd, udiʼtə́əŋ a kɛdaŋ[16]”. Ɛɛ́ɛ, kɛ́lɛ náan, náa!

²⁸A mɛ ndabodɛ́anɛ lɛ́: Wɛ nyɔ́ waádɛ́ʼtɛg ɔʼkɛ́ɛd kodɛ́ʼtɛg kodɛ́ʼtɛ́gáán na əngis, waámɛna pɛda, wɛ nyóon waáʼkɛɛlɛ kɛdaŋ a ɔʼtɛ́m wááŋ.

²⁹Kɛ́maʼkɛɛn lɛ́ niis nɛáŋ áa nɛ́lɛɛ́ agooyɛ́ɛlɛ lɛ́ údə́əŋ a kɔbɛ́, ə́dúsíí nɛ́lɛ́ ódo laálá. Kɔŋɛʼ na wɛ lɛ́ ólɔ́ɔs kɛʼkab kɛáŋ kɛ́ nkó kímuʼ, agosan lɛ́ págoódagɛdɛ na nkó yaaŋ ngim a yug yɛ́ ɛgóón.

³⁰Kɛ́maʼkɛɛn lɛ́ ombɔg wááŋ ó nɛnom aa ólɛɛ́ agooyɛ́ɛlɛ lɛ́ údə́əŋ a kɔbɛ́, ásómɛ́ɛ́ wólɛ́ ódo laálá. Kɛ́lɛ kɔŋɛʼ na wɛ lɛ́ ólɔ́ɔs kɛʼkab kɛáŋ kɛ́ nkó kímuʼ agosan lɛ́ wɛ́ɛn na nkó yaaŋ ngim a yug yɛ́ ɛgóón.»

³¹«Polɛ palɛŋáán tɛn lɛ́, píísə́ə́ a kɛnɛŋ kɛ́ pɛmbáa pɔ́nɔ́: “Mɔɔd aándaaŋɛŋ oʼkán, ə́dilə nufuuʼ nóonɛ lɛ́ kodɔn koáman, ámoyɛ́ʼkɛn a ombɔg[17]

³²A mɛ, ndabodɛ́anɛ lɛ́ mɔɔd amaʼkoŋɛŋ oʼkán lɛ́ kodɔn koáman ná kɛ́diɛnɛn əgín lɛ́ əmə́mugúmin a kɛdaŋ[18], əmə́mudíʼkíni aa nyóon a nɛbambɛɛ. Nyɔ́lɛ́ əməʼkusiəd tɛn ɔʼkɛ́ɛd nyɔ́ onom əmíim ámooŋɛŋ, mɔɔd nyóon alɛ uʼtə́ŋə́ə́n a kɛdaŋ”»

³³«Poyóób tɛn píísə́ə́ a kɛnɛŋ kɛ́ pɛmbáa pɔ́nɔ́: “Odɛyácɛ́mɛ́ɛ́ niiŋ nɛ́ Sə́dúk a kɛbán. Náa omaʼkomoyácɛm, odɛndɔ́b fiɛ́d kɛɛlɛ nkə kɛ́ omámoyácɛ́mɛ́ɛ́ a kɛ́lɛ́[19]”

³⁴A mɛ, ndabodɛ́anɛ lɛ́: Podɛnjág kaácɛm agá. Podɛyácɛ́mɛ́ɛ́ mɔɛn lɛ́ ɛlɛ oʼkɔɔ ó Nɛlaamɛʼ ó Táán.

³⁵Podɛyácɛ́mɛ́ɛ́ tɛn ɔmbɔ́ nsí, ɛlɛ wɔnɔ́ kɛgaan a ambaan yə́ə́ŋ. Podɛyácɛ́mɛ́ɛ́ tɛn ɔmbɔ́ Yolósalɛm, ɛlɛ pálɛ́ɛg yɛ nkúm yɛ́ nkóʼkóón.

³⁶Podɛyácɛ́mɛ́ɛ́ tɛn ɔmbɔ́ a oʼto wááŋan lɛ́ podɛɔ́gɔ págɛɛlɛ lɛ́ nuyə́ən nó a oʼto wááŋan ɔmbɔ́ númuʼ nuílin, oó lɛ́ núfúŋə.

³⁷Nkə kɛ́ umə́líʼtíníí wɔʼkɔ́ “ɛɛ́ɛ” kɛ́lɔb lɛ́ umə́líʼtíníí. Kɛ́ waásáŋɛ́nɛ lɛ́ ndóo, kɛ́lɔb lɛ́ waásáŋɛ́nɛ óság kodɛ́lɛm áay. Kiim kɛ́ wəə́ndədínií wáábɛg a ngim yɛ́ɛy kɛ́lɛ kɛ́ Omɔlɛɔ́g.»

³⁸«Adɛ́ poyóób, píísə́ə́ tɛn a kɛnɛŋ kɛ́ pɛmbáa lɛ́ sɔ́g əməʼkuguúdus niis, wɛ tɛn úumuúdus niə́ŋ ə́? Amaʼkogoobaŋ niiŋ, óomoobaŋ tɛn niə́ŋ ə́[20]?

³⁹A mɛ, ndabodɛ́anɛ lɛ́: Mɔɔd amaʼkogoyɛ́ɛlɛ kɔbɛ́, udiyímuyə́gúníí. Mɔɔd amaʼkogosábɛn nɛbany a ombáŋ, sɛlɛ́gɛ́nɛ wúmmú yíiʼkini kogosábɛn nɛ́ndɛ́ŋ.

⁴⁰«Mɔɔd əməʼkugunyə́gigi ɔnɔ́ póɛn adɛ́lɛm a pɛyɔm lɛ́ alɛ anyɔ́ŋɛn kusiəd lɛnkóod yaaŋ, ímudíin tɛn ɔmbɔ́ na síngílíid yaaŋ yɛ́ a kaadɛ kɛ́.

⁴¹Mɔɔd amaʼkogoogóda lɛ́ ódáŋana na ambaan, wɛ́ɛn əgiig kága, táŋána na nyɔ́lɛ́, yaagɛ osom wó əə́səə.

⁴²Mɔɔd amaʼkogoyɔ́ɔŋɔn yoom, ɛ́moyɛ́ʼkɛn. Nyɔ́ ɔnɔ́ ómofáŋɛ yoom, odɛsáŋɛ́nɛ komofáŋɛ.»

⁴³«Poyóób tɛn lɛ́, píísə́ə́ na pɛmbáa pɔ́nɔ́: “Nyɔ́ŋɛn sɔ́g mɔɔd[21], óbɛnɛn nyɔ́ aágoóbɛnɛn wɛ”.

⁴⁴Mɛ, ndabodɛ́anɛ nyɔʼkɔ́: Pɔ́nyɔ́ŋɛn pá páaboónɔɛyɛ pəŋi. Poɔ́sɔ́gɔlɔn Táán a kidíídí kɛ́ pá páabonɛ́ɛyɛ ntɔ́b.

⁴⁵Náan poagɛɛn fɔ́lɔ́b lɛ́ polɛ pɔɔ́n pá Sɛ waaŋan nyɔ́ alɛɛ́ a mɔɛn lɛ́ nyɔ́lɛ́ alɛ agɛɛlɛ lɛ́ wɔɔ́s ónom a pɔsɔ́g pá pálɛɛ́ na ntɛ́m yɛ́ mbɛ́, na a pá pálɛɛ́ na ntɛ́m ɛlaŋ kɛ́. Alɛ agɛɛlɛ tɛn lɛ́ noó núdə́əŋ a pá pálɛɛ́ na pɛfaa na a pá pɔ́dɛɔ́gɔ na pɛfaa kɛ́.

⁴⁶Kɛ́lɛ lɛ́, pəŋi pomaʼkɛɛn lɛ́ poanyɔ́ŋɛn əgín pá pálɛɛ́ agobonyɔ́ŋɛn pəŋi, ná pomɛ́ɛ́lɛ nkə aa nyóon kɛ́ poágaáboŋ lɛ́ pábosáábɔn a kɛ́lɛ́? Ɔmbɔ́ tɛn Pagɔ́mmanɛʼ mag pálɛ agɛɛlanɛ náan!

⁴⁷Pəŋi pomaʼkɛɛn lɛ́ poɔsɔyɔ əgín na pá polɛɛ́ agoóbanan na pɔ́lɛ́, podɛfɛ́g lɛ́ polɛ agɛɛlɛ aa nyóon nkə kɛ́ pɛ́ndɛ́ŋ pádɛ́agɛɛlɛɛ́ lɛ́ ɔmbɔ́ pandɛŋ Táán tɛn pálɛ agɛɛlanɛ náan.

⁴⁸Pəŋi, póɛn fiɛ́d na ɛgom wɔnɔ́ ná Sɛ waaŋan nyɔ́ alɛɛ́ a mɔɛn alɛɛ́ fiɛ́d na ɛgom[22]»