Read Yambeta Maʼtɛ́as 6 Bible Online

Maʼtɛ́as 6 - Yambeta bible

Maʼtɛ́as 6

¹«Waándagɛɛlɛ oʼtom wo a yoog yaaŋ ɛ kəə́liʼtiniʼ, udinjúúnə kɛɛlɛ wólɛ́ a əngis á pɔɔd lɛ́ ná págoodála, ndóo. Omaʼkɛɛlɛ náan, odɛágɛɛn kə́mmú na pɛsáábɔ́n pɛ́ndɛ́ŋ a nó Sɛ waaŋan nyɔ́ alɛɛ́ a mɔɛn.

²Waándagɛɛ́ʼkɛn yoom na ɛsɔ́gasɔ́gá, odɛʼkó isə́ə́ wɔnɔ́ ná pɔɔd pə́mmú, moɔ́ŋɛ́ná pusú móom, ándɛ móagɛɛlanɛ a puog pó pɛɔ́sɔ́gɔ́lɔ́n, na a angag á pungə́. Pɔ́lɛ́ pálɛ əguunə lɛ́ ná pábonyáadɛ. Mɛ, ndabodɛ́anɛ na pəŋi a fɔ́lɔ́b lɛ́, póob náan pándɛ na pɛsáábɔ́n pɛɔ́bɔn.

³A pəŋi, póɛn lɛ́ nkə kɛ́ ombɔg wááŋ ó nɛnom wáagɛɛ́ʼkɛn na ɛsɔ́gasɔ́gá, wááŋ ó kɛmɛs ódɛndɛ́ŋ

⁴agɛɛlɛ lɛ́ mɔɔd na mɔɔd adɛʼtála wɔnɔ́ ná waáŋáan. Sɛ waaŋ nyɔ́ aálɛŋ nkə kiim kɛ́ waágɛɛlɛ ɔmbɔ́ a nuníb, alɛ́ɛ́ kogosáábɔn a nuboʼ noáŋ nóon.»

⁵«Kɛnɛŋ kɛ́ waándagɛɛlɛɛ́ pɛɔ́sɔ́gɔ́lɔ́n, odɛnyɛ́ɛ́lɛ wɔnɔ́ moɔ́ŋɛ́ná pusú móom, ndóo. Pɔ́lɛ́ pálɛanɛ lɛ́, kɛnɛŋ kɛ́ pɔ́ndɔgɔɔ́sɔ́gɔlɔnɛɛ́, páadɛ́lɛman əgín pidə́níʼtən a puog pó pɛɔ́sɔ́gɔ́lɔ́n, na a angag á pungə́[23] lɛ́ ná páboodála. Mɛ, ndabodɛ́anɛ a fɔ́lɔ́b lɛ́, póob náan pándɛ na pɛsáábɔ́n pɛɔ́bɔn.

⁶Náa a wɛ, wɔɔ́ndɔgɔɔ́sɔ́gɔlɔn, sɔ́d a nɛsom nɛáŋ nɛ́ yoog a kaadɛ, wə́buəg. Ɔ́sɔ́gɔ́lɔ́nɛ́ɛ́ Sɛ waaŋ nyɔ́ alɛɛ́ kɔ áay na wɛ kɛnɔ kɛ́ wɔsɛ́ɛ́. Nyɔ́lɛ́ nyɔ́ alɛɛ́ agodɛ́ʼtɛg ɔmbɔ́ nkə kɛ́ waágɛɛlɛ a yoog kusuu a kaadɛ. Adɛndɛ́ɛ́ kəə́bəli kɔŋɛʼ koáŋ.

⁷Wɔɔ́ndɔgɔɔ́sɔ́gɔlɔn Táán, odɛʼtáŋ kodáŋáán wɔnɔ́ inonnón yɛ́ uʼtəən, wɔnɔ́ ná pandɛŋ Táán ándɛ páagɛɛlanɛ. Pɔ́lɛ́ pálɛ afɛga lɛ́ a nɛsɔyɔʼ nɛ́ɛn náan kuíŋ áa Táán aágoob pɛɔ́sɔ́gɔ́lɔ́n pɛɔ́bɔn.

⁸Ndóo, pəŋi podɛnjɛ́ɛ́lánɛ wɔnɔ́ pɔ́lɛ́ lɛ́, a pəŋi kudíin pumuŋíən, Sɛ waaŋan nyɔ́lɛ́ aáʼkolɛŋ nkə kiim kɛ́ kɛmábosógɛn.»

⁹«Poɔ́ndɔgɔɔ́sɔ́gɔlɔn, púsəə poɔʼkɔ́: “Sɛ wəəs nyɔ́ alɛɛ́ a mɔɛn, ɛɛlɛ lɛ́ ungim álɛŋ ánɛ aa olɛɛ́,

¹⁰Nɛlaamɛʼ nɛáŋ níim, ungim a nsí yɛ́ɛlɛ nɛnyɔ́ŋɛn nɛáŋ wɔnɔ́ ná nɛ́lɛɛ́ agaáyɛ́ɛlɛ a mɔɛn.

¹¹Ɛ́bɛyɛ́ʼkɛn moom mó konɛ mó moásɛʼtan na pəsi a wɔɔ́s ó naánɛ́,

¹²Íbilísin a nsɛ́ɛ́dɛ́ yɛ́ tɛágosɛ́ɛdanɛ wɛ, wɔnɔ́ ná pəsi tɛlɛɛ́ əgulisin tɛn pá pálɛɛ́ agɛbɛsɛ́ɛdanɛ pəsi.

¹³Udiyíbiidí lɛ́ tídə́əŋ a pɛásɔ́sɛ́n, ɛ́bɛyááŋɛn a kisindiʼ kɛ́ Sáʼtan”.[24]

¹⁴«Kɛ́lɛ lɛ́, pəŋi puməʼkulisin pɔsɔ́g kɔbɛ́ kó pálɛɛ́ agoboyɛ́ɛlanɛ, Sɛ waaŋan nyɔ́ alɛɛ́ a mɔɛn alɛ́ɛ́ kubuúlisin tɛn pəŋi mabɛ́ má poámoyɛ́ɛlanɛ.

¹⁵Náa, pəŋi pundisinin pɔsɔ́g mɔ́ɔ́bɔn mabɛ́, Sɛ waaŋan tɛn adɛndɛ́ɛ́ kubuúlisin pəŋi mááŋan.»

¹⁶«Puməʼkugumin ə́simə́, podɛnjáág nnyam a udi suiííŋ, wɔnɔ́ ná moɔ́ŋɛ́ná pusú móonɛ móagɛɛlanɛ. Pɔ́lɛ́ pálɛ lɛ́, ná pə́əgumin ə́simə́, nti yɔɔbɔn ɛ́ság kɔyɛb lɛ́ ná ungim álɛŋ lɛ́ pálɛ a ə́simə́. A fɔ́lɔ́b, mɛ ndabodɛ́anɛ na pəŋi lɛ́, póob náan pɔ́ʼkɔɔŋ pɛsáábɔ́n pɛɔ́bɔn.

¹⁷Náa wɛ, uməʼkugumin ə́simə́, ásɔ́gɛ́ɛ́ udi wááŋ, ómóaŋ. Áwásɛ́ɛ́ oʼto

¹⁸agɛɛlɛ lɛ́ pádɛndɛ́ŋ lɛ́ olɛ a ə́simə́. Əgín wɔʼkɔ́ Sɛ waaŋ nyɔ́ alɛɛ́ na wɛ ɔmbɔ́ kɔ́gɔ́ɔg a nɛɔs nɛáŋ. Nyɔ́lɛ́ nyɔ́ aálɛŋ yiim yɛ́ waágɛɛlɛ ɔmbɔ́ a nuníb, alɛ́ɛ́ kooyɛ́ʼkɛn pɛsáábɔ́n pɛáŋ.»

¹⁹«Podɛnjágónyánánɛ́ɛ tugúm a nsí yɛ́ɛnɛ yɛ́ ɛlɛɛ́ lɛ́, nɛnɛ́ nɛ́lɛ kɔ, nɛ́aman konɛ, kɛsamasámán kɛ́lɛ kɔ, piíbən páabáŋa mbuús əgiíbə.

²⁰Poágonyan agá tugúm a mɔɛn. Kɛnɔ kɛ́ ɔmbɔ́ nɛnɛ́, ɔmbɔ́ kɛsamasámán kɛ́dɛ́agɛɛlɛɛ́ yoom. Kɛnɔ kɛ́ piíbən pádɛábáŋɛ́ɛ́ umbuús əgiíbə,

²¹lɛ́ kɛnɔ kɛ́ tugúm toáŋ tólɛɛ́, kɔ tɛn aa ɔʼtɛ́m wááŋ ólɛɛ́.»

²²«Niis nɛ́lɛ ɛláam a nkó ɛ mɔɔd. Náa, kɛnɛŋ kɛ́ əngis yááŋ álɛɛ́ aŋŋɛʼ, nkó yaaŋ tɛn ngim ɛlɛ a kɛmoámoáŋ.

²³Náa, kɛnɛŋ kɛ́ waándabányɛ́ɛ́ a əngis, nkó yaaŋ tɛn ngim yaagɛɛn a mbin. Ná kisəə kɛ́ kɛ́lɛɛ́ na wɛ kíəgəə́súʼkin, wɛ ungim wagɛɛn a mbin mmɔɛ́d ɛ pilíb.»

²⁴«Mɔɔd na mɔɔd ɔdɛɔ́gɔ ugugudin pəsə́dúg pábaan. Əgín lɛ́ aabɛnɛn úmmuʼ, áanyɔ́ŋɛn nyummú, ɔmbɔ́ lɛ́ aagoóbɛn úmmuʼ, áasɛ́ɛdɛ nyummú. Podɛɔ́gɔ págɛɛlɛ lɛ́, wɛ ogo úmmuʼ wəə́gudin Táán, wəə́gudin tɛn mɔɔnɛ́.»

²⁵Kólɛ́ aa ndábodɛ́anɛ nyɔʼkɔ́: Podɛndáŋ kaáságɛmɛla a noá na nkə kɛ́ poánɛ, ɔmbɔ́ lɛ́ na nkə kɛ́ puə́gəə́níig. Kɛ́lɛ lɛ́, ɔlaa ómááyɛn moom mó konɛ. Nkó yəəs ɛmááyɛn pilə́ə́.

²⁶Pódála na pɛsag ə́! Pɛ́dɛ́agóna, pɛ́mbáŋa. Píʼkóodi pɛságɛʼ pɛ́ pɛ́agɛɛ́ngɛgan moom moɔ́bɔn kɔ. Kɔmɔɛ́d lɛ́ Sɛ waaŋan nyɔ́ alɛɛ́ a mɔɛn alɛ agoboomɛ́nɛ. Kásɛ́g anɛ́ɛ́n na pəŋi pá pomááyɛn pɛsag ə́?

²⁷Ánɛ úmmuʼ a ondáŋ wááŋan aa alɛɛ́ ogɛɛlɛ lɛ́ mədúg mə́ə́ŋ máyáábɛg a ɔlaa lɛ́ alɛ agaáságɛma ə́?

²⁸«A igə tɛn aa polɛɛ́ agaáságɛma a noá na pilə́ə́ pɛ́ puə́gəə́níig əə́? Táláan pafɛláwaʼ wɔnɔ́ ná pálɛɛ́ a kidun ə́. Táláan wɔnɔ́ ná pálɛɛ́ agoyam. Pə́díəgud, pádɛ́anog pilə́ə́.

²⁹Náa ndábodɛ́anɛ lɛ́ ɔmbɔ́ əgín Salomɔ́ɔŋ na tugúm tuim tó yiígóodi[25], adɛʼkɛ́ɛ na kilə́ə́ kɛ́ kɛ́ɛ́dɛ́ɛ́ əgiig wɔnɔ́ fɛláwaʼ mmuʼ!

³⁰Mbɛ́n yɛ́ a kidun yɛ́ ɛlɛɛ́ lɛ́ nɛ́gɔŋ ɛlɛ kɔ, na koany ná páág a yug, Táán aálɛŋ yɛ́lɛ́ náan əə, pɛnɛŋ pɛ́sɛ́g anɛ́ɛ́n na pəŋi ə́! Kəə́liʼtiniʼ koáŋan kúligi kudom ə́y!

³¹Podɛnjáságɛ́mɛ́láá anɛ́ɛ́n a noá ná nkə kɛ́ poánɛ, nkə kɛ́ poáŋo, ɔmbɔ́ lɛ́ nkə kɛ́ puə́gəə́níig.

³²Pandɛŋ Táán áa ándɛ pɔ́ʼtɔm kuunə mólɛ́. Náa, a pəŋi, Sɛ waaŋan nyɔ́ alɛɛ́ a mɔɛn aálɛŋ lɛ́ polɛ njaan na moom móom muim.

³³Kɛ́ na oʼto na oʼto, Uunə́ən Nɛlaamɛʼ nɛ́ Táán, poágɛɛlɛ nkə kɛ́ alɛɛ́ anyɔ́ŋɛn. Nyɔ́lɛ́ aabosáayɛnɛ pɛ́ʼkáanɛ pɛ́ndɛ́ŋ piim.

³⁴Podɛnjáságɛ́mɛ́láá poɔʼkɔ́, ná koany koándagaáyɛnɛɛ́ əə, tuə́ áa kóagɛɛn əə́? Ndóo. Nkə kɛ́ kɛ́agaáyɛ́ɛlɛ a koany kaáyɛnɛ kɛ́lɛ kɛ́ wɔɔ́s wóow. Ɛ́nɛ́ wɔɔ́s na yəəŋ ntɔ́b.»