Read Yambeta Maʼtɛ́as 7 Bible Online

Maʼtɛ́as 7 - Yambeta bible

Maʼtɛ́as 7

¹Yə́sus ayɛ́ɛ agɛɛn əgín na ndə́b yuudi ɔnɔ́: «Agɛɛlɛ lɛ́ pádɛɛ́boóbɛ́n na koany, pəŋi tɛn podɛmbɛ́n pɔsɔ́g.

²Kɛ́lɛ lɛ́, wɛ omaʼkɛɛn ɔnnasáŋ na pɔsɔ́g, náan tɛn aa pálɛ́ɛ́ kɛɛnɛɛ́ panasáŋ na wɛ. Nɔfɛg nó pəŋi polɛ́ɛ́ kofɛgɛnɛɛ́ pɔsɔ́g, əgín na nólɛ́ aa Táán alɛ́ɛ́ koboófɛgɛnɛɛ́ tɛn pəŋi.

³Kɛ́lɛ tuə́ na wɛ áa waáfɛda ɛyaa ɛ́ kiguŋ yɛ́ ɛ́lɛɛ́ a niis nɛ́ woómóŋŋí, kilumin kilúd kɛ́ kɛ́lɛɛ́ káanɛ a nɛáŋ niis oʼtála ə́?

⁴Ɔmbɔ́ lɛ́ tuə́ aa wɛ olɛɛ́ ogodɛ́anɛ na woómóŋŋí wɔʼkɔ́: “Móŋŋí póŋ nkuúliogi kiguŋ kɛ́ kɛ́lɛɛ́ na wɛ a niis,” kɔmɔɛ́d lɛ́ kilumin kilúd kɛ́ kɛ́lɛɛ́ a niis nɛáŋ, oʼtálan əə́?

⁵Yɔɔ́ŋɛ́ná pusú wɔnɔ́ wɛ! Yaŋ ogoóliogi kilumin kɛ́ kɛ́lɛɛ́ a niis nɛáŋ, áay waalɛŋ kodɛ́ʼtɛganan agɛɛlɛ lɛ́ úliogi kiguŋ kɛ́ kɛ́lɛɛ́ a niis nɛ́ woómóŋŋí.»

⁶«Podɛyɛ́ʼkɛn na pobo, nkə kɛ́ kɛ́lɛɛ́ kifúŋiə́n, pólɛŋ koboyágasɛnɛ agobonóma. Podɛʼtágɛ́dɛ pɔnjɔ́ŋ pááŋan pálaŋ kɛnɔ kɛ́ pɔŋɔnɛá pólɛɛ́, púəgíʼtən agá.»

⁷«Ɔɔŋɔ́nɔɔn, páaboyɛ́ʼkɛn. Uunə́ən, poɔgɔɔŋ. Kɔdɛ́daan a udíyoog, pə́əbuúbuən.

⁸Kɛ́lɛ lɛ́, nyɔ́ ɔɔ́gɔɔŋɔn, páamoyɛ́ʼkɛn. Nyɔ́ əə́guunə, ɔɔgɔɔŋ. Nyɔ́ ɔɔ́gɔdɛd a udíyoog, pə́əmuúbuən.

⁹Wɛ oyaán a ondáŋ wááŋan aa olɛɛ́ ogɛɛlɛ lɛ́, mɔɔ́n waaŋ amaʼkogoyɔ́ɔŋɔn yoom ɛ́ konɛ, óomoyɛ́ʼkɛn agá nɛdáán ə́?

¹⁰Ɔmbɔ́ lɛ́ ɛyɛ́g óomoyɛ́ʼkɛn uʼkud ə́?

¹¹Pəŋi pá polɛɛ́ lɛ́ polɛ pɛbɛ́ pɛ́ pɔɔd, podɛɔ́gɔ agaáʼkɛ kɛɛ́ʼkɛn yoom yɛ́ ɛ́lɛɛ́ ɛbɛ́ na pɔɔ́n pááŋan, pɛnɛŋ pɛ́sɛ́g anɛ́ɛ́n na Sɛ waaŋan nyɔ́ alɛɛ́ a mɔɛn ə́! Nyɔ́lɛ́ alɛ ogolɔb lɛ́ adɛágɛɛ́ʼkɛn yoom ɛ́laŋ na pá páamoyɔ́ɔŋɔn ɔ!»

¹²«Náan, “Nkə kiim kɛ́ wɛ olɛɛ́ waányɔ́ŋɛn lɛ́ pɔsɔ́g pɛ́ɛlɛ na wɛ, ɛɛlɛ tɛn náan wɛɛ́nyɔ́amɔɛ́d na pɔ́lɛ́”. Táá nkə kɛ́ pɛcɛm pɛ́ Moyíis pɛ́lɛɛ́ agɛbɛyáaʼkananɛ a kɛ́ɛg, ɔmbɔ́ tɛn kɛ́ palɔɛgɛʼ pɛbán pá Táán páyɛ́bɛdɛánánɛ.»

¹³«Sɔ́dɔ́ɔn yɛ́ a udíyoog wó ólɛɛ́ ommɔ́ɔ́mɔ́sɛ lɛ́ ngə́ yɛ́ mɔɔd əə́nim a yɛ́lɛ́ ɛlɛ mbubə́ə́n, udíyoog wə́ə́ŋ oʼpoangás. Piíŋ aa pálɛɛ́ əgusiəd ngə́ yɛ́ɛy.

¹⁴Kɔmɔɛ́d lɛ́ ngə́ yɛ́ yaágɛɛn na mɔɔd a ɔlaa, ɛlɛ ngə́ yɛ́ ɛlɛɛ́ mmɔ́ɔ́mɔ́sɛ, udíyoog tɛn wə́ə́ŋ ommɔ́sɛán. Pá pálɛɛ́ əguyə́ən yɛ́lɛ́ pɔ́dɛɔ́gɔ piíŋ.»

¹⁵«Lóʼkɔ́dɔɔn na palɔɛgɛʼ pɛbán pá pɛnyaʼ. Pálɛ əgiim a udi wááŋan wɔnɔ́ pɔɔ́n pá todóm, kɔmɔɛ́d lɛ́ a ntɛ́m yɔɔbɔn a kaadɛ pálɛ pongɔʼ.

¹⁶A niə́siəd nɛɔ́bɔn aa polɛ́ɛ́ koboólɛŋɛɛ́. Pádɛ́agɛ́sa muliómíliómí a ɛŋɔlá, páʼkɛ́sa tɛn pɛʼpɔmá a kiliŋidiŋ.

¹⁷Kiɛd kiim kɛ́ kɛ́lɛɛ́ kɛŋɛʼ kíəguum modámádám mó mólɛɛ́ mɔŋɛʼ. Kɛ́ kɛ́abany kíəguum tɛn modámádám mó móabany.

¹⁸Kiɛd kɛ́laŋ kídiə́guum modámádám mó mobɛ́. Kɛ́ kɛ́abany kídiúm tɛn modámádám mólaŋ.

¹⁹Kiɛd kiim kɛ́ kídiə́guúmíí modámádám mólaŋ, kɛ́agaásom, páság kodagɛdɛ a yug.

²⁰Náan aa kɛ́lɛɛ́ lɛ́, a niə́siəd nɛɔ́bɔn aa polɛ́ɛ́ kolɛŋɛɛ́ palɔɛgɛʼ pɛbán pá pɛnyaʼ póob.»

²¹Náa Yə́sus ɔnɔ́ kə́mmú na pɔ́lɛ́: «Ɔdɛɔ́gɔ ungim nyɔ́ alɛɛ́ əgusəə lɛ́ “Sə́dúk, Sə́dúk áa” alɛ́ɛ́ kosɔ́dɛ́ɛ́ a Nɛlaamɛʼ nɛ́ a mɔɛn, ndóo. Nyɔ́ alɛ́ɛ́ kɛɛlɛɛ́ nɛnyɔ́ŋɛn nɛ́ Sɛ waam nyɔ́ alɛɛ́ a mɔɛn áa alɛ́ɛ́ kosɔ́dɛ́ɛ́ a nɛ́lɛ́.

²²Ná wɔɔ́s ó pɛyɔm ólɛ́ɛ́ kiim əgiigií, piíŋ áa pálɛ́ɛ́ kɛʼtɛ́anɛɛ́ pɔ́nɔ́ na mɛ: “Sə́dúk, Sə́dúk! Adɛ́ a niiŋ nɛáŋ áa tɛyɛ́ɛ alɔɛgɛ pɛbán pɛ́ Táán a? Adɛ́ a niiŋ nɛáŋ áa tɛyɛ́ɛ agɛɛlanɛ mangán, tɛáŋɛ́ŋŋaŋ məŋun má mabɛ́ á?”

²³A kɛnɛŋ kɛ́ɛg aa mɛ ndɛ́ɛ́ kubuyúlisinií na pɔ́lɛ́ nyɔʼkɔ́: “Pəŋi pá poágɛɛlanɛ kɔbɛ́, liógoon a udi wáam, ntɛboólɛŋɛn[26]”»

²⁴Yə́sus aáság kubuúsiədin nkaʼtɛ́n yɛ́ɛnɛ, ɔnɔ́: «Nyɔ́ amóób nkə kɛ́ɛnɛ kɛ́ mbə́səə, áyɛɛlɛ nkə kɛ́ kɛ́lɛɛ́ a tɔgɛ́ɛ́ tóod alɛ wɔnɔ́ mɔɔd wo nsiŋ nyɔ́ yɛɛ́wáag noádɛʼ nuə́ŋ a kɛgon.

²⁵Ná tɔɔ́ tuídə́əŋ, puní puə́yə́ə́gən, piə́nduŋ pímə́súgínə́ə́ kɔ, pigud pɛáfɛma kɔ na toɛn, núdiʼkə́əbugig lɛ́ nóyɛ́ɛ nogónáán a kɛgon.

²⁶Kɔmɔɛ́d lɛ́ nyɔ́ amóób tɔgɛ́ɛ́ tóam, adiɛlɛ nkə kɛ́ ndɛɛ́ əgusəə kɔ, nyóon alɛ wɔnɔ́ kiyəg kɛ́ mɔɔd kɛ́ kɛ́ɛ́wáág noádɛʼ nuə́ŋ a ɔsáyɛ́n a mɔɛn.

²⁷Ná tɔɔ́ tuídə́əŋ, puní puə́yə́ə́gən, piə́nduŋ pímə́súgínə́ə́ kɔ, pigud pɛáfɛma kɔ na toɛn, noáság kudə́əŋ a nsí bgulum, nuə́bumbúg nuim.»

²⁸Ná Yə́sus yɛɛ́mán kɛɛ́ʼkɛnan ndə́b náan, ungim yɛɛ́lɔ́b unuʼ ongás əgəə́wúunəni na wóow ombod ógaaʼkananɛ

²⁹lɛ́ nɛaʼkananɛʼ niə́ŋ nɛ́dɛʼkɛ́ɛ wɔnɔ́ nɛ́ palɛŋ pɛcɛm, nɛ́yɛ́ɛ a nɛ́ mɔɔd nyɔ́ alɛɛ́ na nɛlaamɛʼ a ombɔg.