Read Yambeta Mə́líʼkus 1 Bible Online

Mə́líʼkus 1 - Yambeta bible

Mə́líʼkus 1

¹Taa, niə́bə́ə nɛ́ Tɔsɔm Tólaŋ tó túəsəə ɔlaa ó Yə́sus Kilíʼtus Mɔɔ́n o Táán a nɛ́ɛnɛ nɛ́lɛɛ́ lɛ́.

²A kálaʼtaʼ yɛ́ Ɛsayíi ɔndɔɛgɛʼ pɛbán o Táán yiídílə, kɛ́lɛ kɔ lɛ́, Táán ɔnɔ́: «Mɛ Mɔɔ́n, táá mɔɔd waam wo oʼtom anyóon mbáyaŋ adom a udi wááŋ lɛ́ yɛ́ɛn əguúbuənin ngə́.

³Alɛ mɔɔd nyɔ́ alɛɛ́ əgiim álɔɛgɛ a kɛnɔ kɛ́ kifələ́ə́n, nɛŋo a mɔɛn ɔnɔ́: Sóbíníən pungə́ pó Sə́dúk óo! Tə́nígə́níən pɛáŋ piə́ŋ pɛ́dɛ́lɛm sáád[1]»

⁴Náan əgín wɔnɔ́ ná Ɛsayíi yiídílə aa Sɛ́aŋ Ɔsɔgɛn pɔɔd əyíím álon a kɛnɔ kɛ́ kifələ́ə́n. Ayɛ́ɛ əgiim álɔɛgɛ ɔnɔ́: «Ə́súʼkíən óo! Liogíən ongoo a mabɛ́, púim mpoósɔgɛn ná Táán ə́buúlisin mabɛ́ mááŋan.»

⁵Ungim nyɔ́ a kɛsom kɛ́ nsí kɛ́ Siudə́ə, na ungim nyɔ́ a pálɛ́ɛg ɛ Yolósalɛm, ayɛ́ɛ yiimən kɛnɔ kɛ́ Sɛ́aŋ alɛɛ́ lɛ́ ná áboósɔgɛn. Náa, wɛ nyɔ́ umíim, waayaŋ kaáwála unuʼ a mabɛ́ mááŋ, a udi ó mɔɔd ungim ná ágoósɔgɛn anɛ́ɛ́n a noom nó Siuludɛ́ɛŋ.

⁶Kilə́ə́ kɛ́ əyə́níigin, páyɛ́ɛ́lɛ kɛ́lɛ́ na pinum pɛ́ nnyam yɛ́ pɔ́ɔdɔ́ŋɔn lɛ́ sɛamóo, kandá yəəŋ na kiob[2] Moom mó konɛ muə́ŋ móyɛ́ɛ pagantɛ́d, na woóŋ.

⁷Sɛ́aŋ ayɛ́ɛ əgusəə ɔnɔ́: «Mɔɔd alɛ kɔ nyɔ́ əə́giim a ngim yaam. Nyɔ́lɛ́ alɛ na toɛn amɛ́njaáyɛn. Mɛ ntiigin ɔmbɔ́ nyóonɛ lɛ́ mbodɛm a udi wə́ə́ŋ əgumuyóndin palábá a ambaan.

⁸Na məní má məní aa ndɛɛ́ agoboósɔgɛn. Kɔmɔɛ́d lɛ́ nyɔ́lɛ́ alɛ́ɛ́ koboósɔgɛn na Uŋun wó Ufúlúʼtú.»

⁹Náan aa a mədúg móom, wɔnɔ́ ná Sɛ́aŋ ayɛ́ɛ agosɔgɛna pɔɔd, Yə́sus aáság kiim ádɛ́ɛmɛn a Násalɛd, pálɛ́ɛg yimmú yɛ́ a nigúu nɛ́ Kalilə́ə, amɛ́ɛn a ɛbá ɛ́ Sɛ́aŋ lɛ́ ámoósɔgɛn. Sɛ́aŋ aáság komoósɔgɛn a noom nó Siuludɛ́ɛŋ.

¹⁰Ná Sɛ́aŋ ayɛ́mosɔ́gɛn, a nɛlon anɛ́ɛ́n nɛ́ɛn nɛ́ ayɛ́ɛ əə́ndəgiim álon a kɛdɛ́ɛ́, aáság kodála mbálámɔɛn yəə́gəə́buən, Uŋun wó Ufúlúʼtú wááság kiim úsuu wɔnɔ́ kiɛm, ómámoláʼtɛ́mɛn a nkó.

¹¹Nɛŋo níyíím nísuu tɛn kɔ́gɔ́ɔg a mɔɛn, nɛɔ́nɔ́ na nyɔ́lɛ́: «Wɛ, olɛ mɛ Mɔɔ́n wo ɔʼtɛ́m, tɔnyɔ́g tóam tuim tólɛ na wɛ[3]»

¹²Ayɛ́ɛ əgín Sɛ́aŋ aáman kɔsɔgɛn Yə́sus, uŋun wááság komoyɛ́ɛlɛ lɛ́ yɛ́ɛn a kɛnɔ kɛ́ kifələ́ə́n.

¹³Kɔ́gɔ́ɔg aa Sáʼtan ayɛ́ɛ́n amoyásɔsɛn. Yə́sus ayɛ́ɛ́lɛ kɔ əʼtin á mədúg ábaan. Ayɛ́ɛ alaa na ponyam, məŋun má maʼtom má Táán máyɛ́ɛ amooyáabɛna.

¹⁴Píígúmin Sɛ́aŋ pááság komoyáág a yoog yɛ njaan. Ná Yə́sus ayóób náan lɛ́ páʼkaag Sɛ́aŋ a yoog yɛ njaan, ayɛ́ɛ́n a Kalilə́ə. Ayɛ́ɛ əgiim álɔɛgɛ Tɔsɔm Tólaŋ tó Táán, ɔnɔ́:

¹⁵«Táá kɛnɛŋ kɛ́ píísə́ə́ áa kɛ́ɛnɛ kiə́ʼkiigií ó! Nɛlaamɛʼ nɛ́ Táán áa nɛ́ɛnɛ nɛándɛɛ́ a ɛbá yááŋan o! Ə́súʼkíən óo! Ə́líʼtíníən Tɔsɔm Tólaŋ!»

¹⁶Wɔnɔ́ ná Yə́sus ayɛ́ɛ agosan a ɛbá ɛ́ noom nó a Kalilə́ə, yɛɛ́dála pɔɔd pábaan páadagɛdɛ nibúnjə́. Páyɛ́ɛ lɛ́ na Simɔ́ɔŋ na Əndələ́ə móŋŋí wəəŋ.

¹⁷Náa ɔnɔ́ na pɔ́lɛ́: «Mɛ́naan puínjə́ən, ndaboyɛ́ɛlɛ púbə́ə́ agá kiim póɛnnɔ́bɛnɛ pɔɔd.»

¹⁸Əgín ná yiísə́ə́ náan, pa Simɔ́ɔŋ pɔ́lɛ́ na móŋŋí pááság kudi pámáyáyɛ́dɛ́ɛ́ əmbúnjə́ yɔ́ɔ́bɔn əguyə́ən Yə́sus.

¹⁹Pə́ə́bə́ə́ kɛɛn. Əgiig yuudi sɔɔŋ, Yə́sus aáság kodála tɛn lɛ́ na Sɛ́ag móŋŋí wəəŋ Sɛ́aŋ, pɔɔ́n pá Səbədə́ə. Páyɛ́ɛ a kɛʼkɔ́m kɛɔ́bɔn a kaadɛ, póosóboni əmbúnjə́ yɔ́ɔ́bɔn.

²⁰Náa ɔnɔ́ tɛn na pɔ́lɛ́: «Mɛ́naan puínjə́ən tɛn.» Pɛ́ɛ́ság kudi pə́mə́dí sɛ wɔɔbɔn na pəgudin pə́ə́ŋ kɔ a kɛʼkɔ́m, pə́ə́yə́ə́n Yə́sus.

²¹Na Yə́sus na paaʼkan pə́ə́ŋ páyɛ́ɛ́n alon a Kaʼpɛlɛnáyum. Yə́sus ayɛ́ɛ́n a yoog ɛ pɛɔ́sɔ́gɔ́lɔ́n wɔɔ́s ó kisúgiʼ, əə́bə́ə́ kaaʼkananɛ pɔɔd.

²²Wɔnɔ́ ná nɛásɛnaʼ niə́ŋ nɛ́ pɛbán nɛ́dɛʼkɛ́lɛɛ́ wɔnɔ́ nɛ́ palɛŋ pɛcɛm, pɔɔd pɛ́ɛ́lɔ́b unuʼ ongás lɛ́ ayɛ́ɛ agosɔyɔ əgín a nɛ́ mɔɔd nyɔ́ alɛɛ́ na Nɛlaamɛʼ.

²³Alɛ anɛ́ɛ́n agosɔyɔ kɔ náan a, mɔɔd nyummú nyɔ́ uŋun wó ɔmbɛ́ óyɛ́ɛ əguyə́bi, ayɛ́ɛ kɔ áay. Yiídóʼtin kiʼkíŋ, ɔnɔ́:

²⁴«Wóóʼkó! Yə́sus, mɔɔ́n ó Násalɛd, kɛ́lɛ tuə́ ə́? Nkə aa wəə́guunə na pəsi ə́! Umíim lɛ́ úbiwíiyi ə? Mbálɛŋ ánɛ aa olɛɛ́. Olɛ Ufúlúʼtú nyɔ́ Táán əmíim ádom!»

²⁵Yə́sus yɛɛ́sásɛ́dɛn uŋun wó ɔmbɛ́ wóow na nɛnyɛ́n, ɔnɔ́: «Pab yəə́b! Tí mɔɔd nyóon, wɛ́ɛn!»

²⁶Wááság kofógɛd mɔɔd na toɛn, wáálón agɛɛn, wə́əgiim wáányam.

²⁷Ungim nyɔ́ ayɛ́ɛ kɔ áay əyə́wúnə́níí kɛ́fɔlɛ́. Páyɛ́ɛ əgəə́ŋíənə kɔ pɔ́lɛ́ na pɔ́lɛ́ pɔ́nɔ́: «Wóonɛ ombod oʼ? Niə́ŋ niloodoniʼ nɛ́lɛ nɛwa. Nɛ́lɛ a maŋɔ́ má Nɛlaamɛʼ a mɔɛn! Amaʼkosásɛd, ɔmbɔ́ məŋun má mabɛ́, máamoyóbɛn.»

²⁸Ungim ayɛ́ɛ agɛɛn əgín na niiŋ nɛ́ Yə́sus a unuʼ, pə́əgiim pálɔɛgɛ nkə kɛ́ amɛ́ɛ́lɛ. Nugəm nuə́ŋ noáság kaálam a nigúu nɛ́ Kalilə́ə niim.

²⁹Ná pə́yíím pálón a yoog ɛ pɛɔ́sɔ́gɔ́lɔ́n, páyɛ́ɛ́n a nó pa Simɔ́ɔŋ pɔ́lɛ́ ná móŋŋí Əndələ́ə. Páyɛ́ɛ́n kɔ ondáŋ na Sɛ́ag na Sɛ́aŋ.

³⁰Pɛ́ɛ́bóan lɛ́ ŋŋíin ɛ Simɔ́ɔŋ yiíngi, alɛ agoyáa. Pááság kiim adɛ́anɛ náan na Yə́sus.

³¹Yɛɛ́dɛ́ɛ́mɛn, amɛ́ɛn amoóboan kɔ kɛnɔ kɛ́ əyíngi. Yɛɛ́dám ə́muúgumin a ombɔg, əmə́mudə́ə́míni; ɔʼkɛ́ɛd cacalaʼ, əndigi ayáa kə́mmú, aáság kodɛ́ɛmɛn əgiim aboyáabɛn.

³²Na niób, a kɛnɛŋ kɛ́ wɔɔ́s kosɛlɛm, pɔɔd pə́yíím pányáŋɛna pabámbany, na pɔɔd tɛn pá məŋun má mabɛ́ máyɛ́ɛ əguyə́njəbəni, pə́míímən na pɔ́lɛ́ kɔ áay kɛnɔ kɛ́ Yə́sus ayɛ́ɛ.

³³Pɔɔd pá a pálɛ́ɛg ɛ Kaʼpɛlɛnáyum pə́yíímən kɔ áay, oʼtómódáán ó pa Simɔ́ɔŋ síɛ́ɛ́d.

³⁴Wɔɔ́s ogo wóow, Yə́sus ayóómánɛ ɛ́fɔlɛ́ ɛ́ pɔɔd pá páyɛ́ɛ agobányɛla mbod ɛ mabámbany ngim, aáŋɛ́ŋan tɛn ɛ́fɔlɛ́ ɛ́ məŋun má mabɛ́. Ayɛ́ɛ adɛáʼkɛ́nɛ lɛ́ məŋun má mabɛ́ mɔ́sɔyɛd lɛ́ mɔ́lɛ́ mɛ́ɛ́lɛŋɛn ánɛ aa nyɔ́lɛ́ alɛɛ́.

³⁵A koany kaáyɛnɛ kóog, Yə́sus yɛɛ́dɛ́ɛ́mɛn na pɛbáŋɛn pɛ́ koany agosan. Yɛɛ́lón pálɛ́ɛg agɛɛn a kɛnɔ kɛ́ kifələ́ə́n, əə́ləndin a nsí ɔgɔɔ́sɔ́gɔlɔn.

³⁶Na Simɔ́ɔŋ, na pɔsɔ́sɔ́g pə́ə́ŋ pə́ə́bə́ə́ kumuyúunə.

³⁷Ná páyɛ́ɛ́n amoyɔ́ɔŋ, páyɛ́modɛánɛ pɔ́nɔ́ na nyɔ́lɛ́: «Ungim alɛ əguguyúunə.»

³⁸Náa, ayɛ́bodɛánɛ ɔnɔ́ na pɔ́lɛ́: «Tiɛ́naan a pɛnɔ pɛ́ndɛ́ŋ, a moyaa mó əʼkúu moɛ́ndɛ́ŋ mó a mobá, nyɛ́ɛn alɔɛgɛnɛ tɛn póʼkáag Tɔsɔm Tólaŋ lɛ́ nkə kɛ́ mbíim agɛɛlɛ aa kɛ́ɛg.»

³⁹Náan aa əyíím ádáŋana a nigúu nɛ́ Kalilə́ə niim, aálɔɛgɛ Tɔsɔm Tólaŋ a puog pó pɛɔ́sɔ́gɔ́lɔ́n poɔ́bɔn, aáŋɛ́ŋaŋ tɛn məŋun má mabɛ́.

⁴⁰Mɔɔd nyummú anyóon əyíím aboan Yə́sus. Mɔɔd ogo nyóon ayɛ́ɛ abany nkún. Ná əyíím əgiig, yiídə́ə́ŋə́nən Yə́sus a udi na əndu, ɔnɔ́ na nyɔ́lɛ́: «Sə́dúk! Omaʼkɔnyɔ́ŋɛn, olɛ ogɛnjoómɛ, nkún yaam yɛ́ɛman.»

⁴¹Ná Yə́sus yɛɛ́dála mɔɔd nyóon, maan mááság kumuúsiəd na nyɔ́lɛ́. Aáság kudə́əmini ombɔg, amámodɔ́bɛd, ɔnɔ́ na nyɔ́lɛ́: «Ɛɛ́ɛ, mbányɔ́ŋɛn, nkún ɛ́man na wɛ áaá!»

⁴²Əgín tɛn ná yiísə́ə́ náan, mɔɔd aándɛ kə́lə́ŋ kə́lə́ŋ, nkún yəəŋ yaáʼkoman.

⁴³Yə́sus aáság komodɛ́anɛ lɛ́ yɛ́ɛn, amámoyáágánan mbaŋ kɔŋɛʼ kɔŋɛʼ,

⁴⁴ɔnɔ́: «Nuŋ unuʼ wááŋ kɔŋɛʼ, odɛʼtɛánɛ na mɔɔd nkə kɛ́ kɛ́másánɛ́ɛ́. Tod agá ogoóloodi na payaaganɛʼ pɛfɔny, wɛ́ɛlɛ kɛfɔny kɛ́ Moyíis yiísə́ə́ əguloodi na ungim lɛ́ kobany koáŋ koáʼkoman[4]»

⁴⁵Náa, ná mɔɔd nyɔ́lɛ́ ayɛ́ɛ́n, ədiʼkə́əyə́ən nkə kɛ́ Yə́sus ayɛ́modɛánɛ. Ayɛ́ɛ agá agɛɛn, əə́giim álɔɛgɛ kɛnɔ kiim wɔnɔ́ ná amámoyɛ́ɛ́lɛ, nkún yəəŋ yaáʼkomanɛɛ́. Nɛlaamɛʼ nɛ́ ayɛ́ɛ əgiim álɔɛgɛ niiŋ nɛ́ Yə́sus náan nɛ́yɛ́ɛ́lɛ Yə́sus ədiiʼkíni kosɔd kə́mmú a pálɛ́ɛg náanɛ páamodɛ́ʼtɛg. Ayɛ́ɛ əgiim ádáŋana əgín káag a mobá, a pɛnɔ pɛ́ mangwáag mɔ́dɛɔ́gɔ́ɔ́. Pɔɔd páyɛ́ɛ əgiim pádɛ́ɛman agá a pɛnɔ piim, páagɛɛn amoóboanan kɔ́gɔ́ɔg.