Read Yambeta Mə́líʼkus 10 Bible Online

Mə́líʼkus 10 - Yambeta bible

Mə́líʼkus 10

¹A ngim yɛ́ɛy, Yə́sus aáság kodɛ́ɛmɛn áay a Kaʼpɛlɛnáyum, agɛɛn a kɛsom kɛ́ nsí kɛ́ a Siudə́ə, na a nsɛ́ɛ́ ɛ noom nó Siuludɛ́ɛŋ. Kiʼtúú kɛ́ pɔɔd kɛáság kiiʼkiniʼ kiim əgəə́yii kɛnɔ kɛ́ ayɛ́ɛ, əə́bə́ə́ koboyáʼkananɛ əgín wɔnɔ́ ná ándɛ áagɛɛlanɛ pɛnɛŋ piim.

²Ngab ɛ Pafalɛsɛyɛ́ɛŋ yimmú ɛyáyɛ́ʼtɛ́nɛ́ɛ́ a ɛbá yə́ə́ŋ. Wɔnɔ́ ná páyɛ́ɛ əguunə kumudə́əŋi a kisindiʼ kɛɔ́bɔn, pə́yímuŋíən pɔ́nɔ́ əə: «Pɛcɛm piə́s pɛ́lɛ agɛɛ́ʼkɛn mɔɔd toɛn lɛ́ ágada kodɔn na oʼkán á?»

³Yə́sus əyíbuŋíən tɛn ɔnɔ́ na pɔ́lɛ́ əə: «Moyíis yiísə́ə́ a pɛcɛm ɔnɔ́ nkə a noá na kɛbán kɛ́ɛg kɛ́ kosaa kodɔn ə́?»

⁴Náa pɔ́nɔ́ na nyɔ́lɛ́: «Moyíis yiídílə a pɛcɛm lɛ́ mɔɔd aándaaŋɛŋ oʼkán, ə́dilə nufuuʼ nóonɛ lɛ́ kodɔn koáman, ámoyɛ́ʼkɛn a ombɔg[31]»

⁵Náa Yə́sus ɔnɔ́ na pɔ́lɛ́: «Ɛɛ́ɛ, Moyíis yiídílə kɛcɛm kɛ́ɛg náan a oʼto wááŋan lɛ́ polɛ na ntɛ́m yɛ́ nnasáŋ.

⁶Náa, əgín kɔ́gɔ́ɔg a niə́bə́ə ná Táán ayɛ́ɛ aáʼkɛɛlɛ muim, ayɛ́ɛ́lɛ mɔɔd lɛ́ na ɔnɔ́mɛɛd na ɔʼkɛ́ɛd[32]

⁷Kólɛ́ aa ɔnɔ́mɛɛd alɛ́ɛ́ kudi ə́mə́dí sɛ na ŋŋí agɛɛn agaálad na oʼkán.

⁸Pándɛ anyóon úmmuʼ súg, pə́ndigi kə́mmú nto ɛ pɔɔd ɛ́baan.

⁹Mɔɔd oʼkóodi anɛ́ɛ́n lɛ́ ásaa nkə kɛ́ Táán áálad!»

¹⁰Ná páyɛ́ɛ pándɛ a noádɛʼ, paaʼkan pə́ə́ŋ pə́ə́bə́ə́ kumuŋíənə pɔ́nɔ́ na nyɔ́lɛ́ álɛŋ koboyáásɛnɛn kɛbán kɛ́ kosaa kodɔn kɛ́ɛg aáŋ.

¹¹Náa Yə́sus ɔnɔ́ na pɔ́lɛ́: «Mɔɔd amaʼkoŋɛŋ oʼkán lɛ́ kodɔn koáman, əməʼkusiəd wɛndɛ́ŋ, alɛ uʼtə́ŋə́ə́n a kɛdaŋ a noá na oʼkán wəəŋ o noádɛʼ.

¹²Yoom tɛn náan ímuʼ na ɔʼkɛ́ɛd nyɔ́ aádɛ́da kodɔn agɛɛn ɔdɔn na mɔɔd wɛndɛ́ŋ. Nyɔ́lɛ́ tɛn alɛ uʼtə́ŋə́ə́n a kɛdaŋ a noá na onom.»

¹³Pɔɔd pə́yíímín Yə́sus na poómbaa lɛ́ ná áboyábɛgɛn ombɔg a oʼto. Náa, paaʼkan páyɛ́bosásan lɛ́ púúlini ngim na pɔ́lɛ́.

¹⁴Ná Yə́sus yɛɛ́dála náan pə́əbudíʼkəni, yiílíŋ, ɔnɔ́ na pɔ́lɛ́: «Tíən poómbaa póob píim ná ndɛɛ́, pudiyíbuugíd lɛ́ Nɛlaamɛʼ nɛ́ Táán nɛ́agoob na pá pálɛɛ́ wɔnɔ́ pɔ́lɛ́.

¹⁵A fɔ́lɔ́b ndabodɛ́anɛ lɛ́ nyɔ́ əsiədinií Nɛlaamɛʼ nɛ́ Táán wɔnɔ́ ná ɛyaa ɛ́ moóngaa, nyóon adɛndɛ́ɛ́ kosɔd a nɛ́lɛ́.»

¹⁶Ná ayɛ́ɛ aáʼkoman kosɔyɔ náan, aáság kəə́súidin poómbaa póob, əmə́buyə́gúlígíí, amábɛ́gɛn ɛ́nɛ́ moóngaa ombɔg a oʼto əgumuúbilis.

¹⁷Ná Yə́sus ayɛ́ɛ aándanyɔ́ŋɛn kosan, mɔɔd nyummú aáság kiim alon na ɔʼtɛ́d. Əyímudə́ə́ŋə́nən a udi na əndu, ɔnɔ́ na nyɔ́lɛ́: «Kisig kɛ́ kɛlág! Nkə aa nyɛ́lɛɛ́ agɛɛlɛ lɛ́ nyɛ́ɛn na ɔlaa ó pɛnɛŋ piim əə́?»

¹⁸Náa Yə́sus ɔnɔ́ na nyɔ́lɛ́: «A igə aa waágɛʼtɔ́ŋɔn lɛ́ kisig əə́? Úmmuʼ nyɔ́ alɛɛ́ ɔŋŋɛʼ ɔdɛɔ́gɔ, ná kɛ́sánɛn əgín lɛ́ Táán nyɔ́lɛ́nyɔ́əsíŋ.

¹⁹Waálɛŋ pɛcɛm, ngɔ́ɔ́? Pɛ́ aa pɛ́ɛnɛ lɛ́: Odɛnjóón mɔɔd, udiʼtə́əŋ a kɛdaŋ, udinjííbə, odɛʼtɛ́lɛ́mɛn mɔɔd mbaasɔ́ ɛ pɛfaa, udisiə́dín mɔɔd yoom a kɛcoo, nyáádɛ sɛ waaŋ na ŋŋí waaŋ.»

²⁰Mɔɔd əyímuyúlísíni ɔnɔ́: «Kɛlág, mɛ əgín kɔ a nɛóndaa nɛ́am aa ndɛɛ́ əgəə́nuŋ a pɛcɛm pɛ́ɛb piim.»

²¹Ná mɔɔd nyóon yiísə́ə́ náan, Yə́sus aáság komodɛ́ʼtɛg yəə́b. Yɛɛ́nyɔ́ga na nyɔ́lɛ́, náa ɔnɔ́: «Ɛɛ́ɛ, yoom yáʼkogoólɔbɛn ímuʼ súg: Tod, ólɛga nkə kiim kɛ́ ugódíí. Mɔɔnɛ́ móom wáaban mɔsɔ́gasɔ́gá ná wíim anɛ́ɛ́n wínjə́ən, wagɛɛn na tugúm a mɔɛn.»

²²Náa, əgín ná mɔɔd nyóon ayóób náan, nkó yəəŋ yiísúú. Yɛɛ́ság kosan udi suúúm lɛ́ ayɛ́ɛ na tugúm tuíŋ.

²³Yə́sus ayágásɛ́ɛ́ ná paaʼkan pə́ə́ŋ pálɛɛ́, náa ɔnɔ́ na pɔ́lɛ́: «Kɛágány na pɔɔd pá tugúm lɛ́ pɔ́sɔd a Nɛlaamɛʼ nɛ́ Táán ə́y!»

²⁴Tɔgɛ́ɛ́ tó Yə́sus tóod tuíyə́bi paaʼkan pə́ə́ŋ kɛ́fɔlɛ́. Náa ɔnɔ́ kə́mmú na pɔ́lɛ́: «Pɔɔ́n, kɛágány lɛ́[33] mɔɔd ɔ́sɔd a Nɛlaamɛʼ nɛ́ Táán ə́y!

²⁵Ɛɛ́ɛ, kɛ́lɛ kɛgányáán lɛ́ kiʼtóg kɛ́ nnyam yɛ́ pɔ́ɔdɔ́ŋɔn lɛ́ sɛamóo ɛ́sɔd a kiwoo kɛ́ níloʼ nɛ́ kolada pilə́ə́. Náa a mɔɔd o tugúm, kímíʼkíni kogany kə́mmú agaáyɛn náan agɛɛlɛ lɛ́ ɔ́sɔd a Nɛlaamɛʼ nɛ́ Táán.»

²⁶Ná Yə́sus əyíʼkíni kusəə náan, nsiŋ ɛ paaʼkan yiílióŋ kúfuʼ a oʼto. Páyɛ́ɛ əgəə́ŋíənə kɔ pɔ́lɛ́ na pɔ́lɛ́ pɔ́nɔ́ əə: «Áay oóoʼ, ánɛ aa aágaáʼkɛ anɛ́ɛ́n kɔɔy əə́?»

²⁷Yə́sus ayɛ́bodɛ́ʼtɛg a udi log log log, náa ɔnɔ́ na pɔ́lɛ́: «Ɛɛ́ɛ, kɛ́lɛ náan fɔ́lɔ́b lɛ́ a mɔɔd na mɔɔd, ngə́ ɛgɔɔ́yɔ́ɔyɛ ɛdɛɔ́gɔ. Náa a Táán, ímuʼ na ímuʼ yɛ́ ɛ́lɛɛ́ ɛ́gomoyag ɛ́dɛɔ́gɔ lɛ́ nyɔ́lɛ́ ogóódi toɛn tó kɛɛlɛ yiim.»

²⁸Náa Píɛ ɔnɔ́ na nyɔ́lɛ́: «Ooo Sə́dúk, pəsi anɛ́ɛ́n pá tiídí tímə́dí yiim yɛ́ tiígóodi, əguguyə́ən oóoʼ?»

²⁹Yə́sus əyímuyúlísíni ɔnɔ́ na nyɔ́lɛ́: «A fɔ́lɔ́b ndabodɛ́anɛ lɛ́ ungim nyɔ́ yiídí ə́mə́dí toádɛʼ, pomóŋŋí, ŋŋí, sɛ, pɔɔ́n na malɛ́m a niiŋ nɛ́am na a nɛ́ Tɔsɔm tó Táán,

³⁰yiim yɛ́ɛy yɛ́ yiídí lɛ́ pomóŋŋí, ŋŋí, sɛ, pɔɔ́n, malɛ́m, alɛ́ɛ́ kɛɛn na yɛ́lɛ́ náan əʼtin áʼtáan áʼtáan a mədúʼtugəniʼ əgín móonɛ má tigódíí, ɔmbɔ́ tɛn ntɔ́b. Alɛ́ɛ́ kɛɛn tɛn na ɔlaa ó pɛnɛŋ piim a mədúg má yuudi.

³¹Piíŋ pá pálɛɛ́ nɛ́gɔŋ yuudi pálɛ́ɛ́ kuúlini ngim. Piíŋ tɛn pá pálɛɛ́ nɛ́gɔŋ ngim, pálɛ́ɛ́ kosan yuudi.»

³²Yə́sus ayɛ́ɛ a ngə́ páagɛɛn a Yolósalɛm na paaʼkan pə́ə́ŋ. Nyɔ́lɛ́ aa yiísúidin udi. Wɛɛ́y úyíbugóodi pɔ́lɛ́ piim lɛ́ na paaʼkan na ungim nyɔ́ ayɛ́ɛ əgubuyə́ən. Yɛɛ́dɔ́ŋɔn kə́mmú paaʼkan pə́ə́ŋ pá pówád na pábaan, pə́mə́suídíí agosɔyɔ a ɛbá, əə́bə́ə́ kobodɛ́ananɛ ntɔ́b yɛ́ yaámoóboan kɛnɛŋ sɔɔŋ.

³³Yiísə́ə́ ɔnɔ́ na pɔ́lɛ́: «Taa, Pəsi aa póonɛ tɛándabágɛ́ɛ́ a Yolósalɛm, kɛnɔ kɛ́ páagɛndɛg mɛ Mɔɔ́n o mɔɔd a ɔmbɔg á puʼkúm pó payaaganɛʼ pɛfɔny, na palɛŋ pɛcɛm. Pálɛ́ɛ́ kobaasɛ kɛbán kɛ́am lɛ́ pɛ́njoon, pə́yiʼkumin agɛnyɛɛ́ʼkɛn a ɔmbɔg á pandɛŋ Táán.

³⁴Pandɛŋ Táán pálɛ́ɛ́ kɛnyɛɛŋanɛ, páagɛŋŋɔnɔ, pə́əgiʼtúəŋənən pɛda a udi, páyɛʼpáam na nsuə́, páság kɛnjoon. Náa, mɔɔ́s mádáád a ngim yɛ́ɛy, ndəgiiʼkini kiim ndon a kəəniʼ ongóm.»

³⁵Pa Sɛ́ag pɔ́lɛ́ na Sɛ́aŋ, pɔɔ́n pá Səbədə́ə, páyáyɛ́ʼtɛ́nɛ́ɛ́ a ɛbá ɛ́ Yə́sus, pɔ́nɔ́ na nyɔ́lɛ́: «Kɛlág, tɛanyɔ́ŋɛn lɛ́ tíguŋíən yoom. Sɛ́gɔɔ óbɛyɛ́ɛlɛ nkə kɛ́ tiə́guŋíən.»

³⁶Náa Yə́sus ɔnɔ́ na pɔ́lɛ́: «Poanyɔ́ŋɛn lɛ́ nyɛ́ɛlɛ nkə na pəŋi ə́?»

³⁷Pə́yímuyúlísíni pɔ́nɔ́ na nyɔ́lɛ́: «Tɛanyɔ́ŋɛn lɛ́ ná waágɛɛn a oʼkɔɔ wááŋ ó Nɛlaamɛʼ, a nugəm, óbɛyáág lɛ́ nyóonɛ a ombɔg wááŋ ó nɛnom, nyummú a oó kɛmɛs.»

³⁸Yə́sus əyíbuyúlísíni ɔnɔ́ na pɔ́lɛ́: «Podɛɔ́gɔ agolɛŋ nkə kɛ́ɛg kɛ́ polɛɛ́ əgiŋíən. Polɛ págaáʼkɛ konɛ ntɔ́b yɛ́ mɛ ndáanɛ a? Ɔmbɔ́ lɛ́ yɛ́ ndɔ́ɔgɔɔŋ a ɔsɔgɛn wáam əə́?»

³⁹Náa pɔ́nɔ́ na nyɔ́lɛ́: «Ɛɛ́ɛ, nkə kɛ́ɛg kiim, tɛlɛ págonóʼtan.» Náa ɔnɔ́ na pɔ́lɛ́: «Ɛɛ́ɛ, a ntɔ́b, kɛ́lɛ náan fɔ́lɔ́b lɛ́ pəŋi tɛn polɛ́ɛ́ konɛ yɛ́lɛ́, póyɔɔŋ tɛn njəʼkə́nə́ní wɔnɔ́ mɛ a ɔsɔgɛn.

⁴⁰Náa, a kɛ́ kuləndin a ombɔg wáam ó nɛnom, ɔmbɔ́ lɛ́ a oó kɛmɛs, adɛ́njaŋ mɛ áa ndágɛɛ́ʼkɛn mɔ́lɛ́. Máagoob na pá Mbáa yiísóbíni lɛ́ mɔ́ɔ́bɔn.»

⁴¹Ná pɔsɔ́g paaʼkan pə́mmú póob pá pówád páyóób nkə kɛ́ niŋŋí nɛ́ɛn lɛ́ na Sɛ́ag na Sɛ́aŋ pííŋíən, píílíŋ na pɔ́lɛ́.

⁴²Yə́sus ayɛ́boodɔ́ŋɔn pɔ́lɛ́ piim, náa ɔnɔ́ na pɔ́lɛ́: «Adɛ́ pəŋibáamɔɛ́d poálɛŋ lɛ́ a nsí yɛ́ɛnɛ, pɔɔd pá tɛlɛɛ́ agodɛ́ʼtɛg lɛ́ pálɛ palaamɛʼ, pɔɔd pá pagóón, pálɛ alaamɛ a toɛn, póoloodi lɛ́ pɔ́lɛ́ aa pálɛɛ́ na Nɛlaamɛʼ a?

⁴³Náa, a pəŋi, kíʼkóodi lɛ́ kíɛn náan, ndóo. Kíɛn agá lɛ́ nyɔ́ alɛɛ́ anyɔ́ŋɛn kɛɛn kɛgóʼkóón, yáyáánɛ inə́mbí ɛ́ pɔsɔ́g.

⁴⁴Nyɔ́ aányɔ́ŋɛn kɛɛn oʼtɛ́lɛm yuudi a ondáŋ wááŋan, yɛ́ɛn wɔnɔ́ kɛɔ́lɛ́ kɛ́ ungim.

⁴⁵Kɛ́lɛ lɛ́, mɛɛ́nyɔ́amɔɛ́d Mɔɔ́n o mɔɔd, ntiʼkə́əgiim a nsí yɛ́ɛnɛ lɛ́ ná pɔɔd aa pɛ́ɛnɛɛ́ munə́mbí móam, ndóo. Njíím lɛ́ ná mɛ áa nyɛ́ɛnɛɛ́ inə́mbí yɔ́ɔ́bɔn, ndɛ nyɛɛ́ʼkɛn ɔlaa wáam agɛɛlɛ lɛ́ nyááŋɛn ɛ́fɔlɛ́ ɛ́ pɔɔd.»

⁴⁶Yə́sus ayɛ́ɛ́n əgiig na paaʼkan pə́ə́ŋ a pálɛ́ɛg yimmú niiŋ lɛ́ Yəlíʼko. Ná páyɛ́ɛ pándaalon agɛɛn, kiʼtúú kɛ́ pɔɔd kɛ́yɛ́ɛ əgiim kíbuyə́ən a ngim súuu. Pɛ́ɛ́bóan ongwongwóg nyummú undəndínə́ə́n kɔ a ɛbá yɛ́ ngə́, aálɛ́ba moom na pasan a ngə́. Ayɛ́ɛ niiŋ lɛ́ Paaʼtimə́ə, mɔɔ́n o Timə́ə.

⁴⁷Ná mɔɔd nyóon ayóób lɛ́ Yə́sus mɔɔ́n o Násalɛd aa nyóon əə́ndəgiim asánɛ́ɛ́, əə́bə́ə́ kumuʼkíŋə nɛŋo a mɔɛn ɔnɔ́: «Sɛ́gɔɔ óo, Yə́sus Mɔɔ́n o Tə́fid, siəd maan na mɛ!»

⁴⁸Pɔɔd piíŋ pə́ə́bə́ə́ komosásan pɔ́nɔ́ na nyɔ́lɛ́: «Lɔ́g unuʼ!» Náa nyɔ́lɛ́ ayɛ́ɛ əgiiʼkini kosása agá kə́mmú na toɛn, ɔnɔ́: «Sɛ́gɔɔ Yə́sus Mɔɔ́n o Tə́fid, siəd maan na mɛ o!»

⁴⁹Yə́sus aáság kodɛ́lɛm. Náa ɔnɔ́: «Póɛʼtɔ́ŋɔnɔn mɔɔd nyóon.» Pááság komodɔ́ŋɔn, pɔ́nɔ́ na nyɔ́lɛ́: «Mɔɔ́n wo mbáa, tɛ́ɛ́mɛn, wíim, alɛ agogodɔ́ŋɔn!»

⁵⁰Əgín tɛn ná mɔɔd nyóon ayóób náan, aáság kodɛ́ɛmɛn ŋwaád, amáyáyɛ́dɛ́ɛ́ kóod yəəŋ, əə́sisin a ambaan yə́ə́ŋ, amɛ́ɛn ná Yə́sus alɛɛ́.

⁵¹Yə́sus əyímuŋíən ɔnɔ́ əə: «Olɛ əgiʼkíŋə lɛ́ nyɛ́ɛlɛ tuə́ na wɛ ə́?» Náa mɔɔd ɔnɔ́ na nyɔ́lɛ́: «Kɛlág, ndaanyɔ́ŋɛn lɛ́ wɛ́nyɛɛlɛ nyíiʼkini kodɛ́ʼtɛganan.»

⁵²Náa Yə́sus ɔnɔ́ na nyɔ́lɛ́: «Mɔɔ́n wo mbáa, tod áaá! Omɔ́ɔy lɛ́ omáág oʼto na Táán.» Əgín kɔ áay kum a nsí, əə́bə́ə́ kodɛ́ʼtɛganan. Ayɛ́ɛ əgiim ə́yə́njən Yə́sus kɛnɔ kiim.