Read Yambeta Mə́líʼkus 11 Bible Online

Mə́líʼkus 11 - Yambeta bible

Mə́líʼkus 11

¹Ná Yə́sus na paaʼkan pə́ə́ŋ páyɛ́ɛ pándɛ ndúmiʼ na Yolósalɛm, páyɛ́ɛ pándɛ a oʼkon ó malɛ́m má pa olifiyə́ə, [34] ndúmiʼ na Pɛdfasə́ə na Pɛʼtaníi. Yə́sus yɛɛ́dɛ́lɛm aáság kudə́əmini paaʼkan pə́ə́ŋ pábaan, amáboodóm yuudi,

²ɔnɔ́ na pɔ́lɛ́: «Todáan a ɛyaa ɛ́ nigúu yɛ́ɛy yuudi. Ná puə́giig kɔ, a nɛsɔd nɛ́ɛn poaboan mɔɔ́n ó jáʼkáas uʼtilígə́ə́n. Mɔɔd adɛ́njaŋ kobag a yɛ́lɛ́. Púdíŋin, púinjiimin na yɛ́lɛ́.

³Mɔɔd əməʼkubuŋíən lɛ́ əə: “A igə aa polɛɛ́ əgudíŋin mɔɔ́n o jáʼkáas nyóon əə́?” Púmuyúúlisini poɔʼkɔ́: “Sə́dúk alɛ njaan na yɛ́lɛ́, əəguúlisi tɛn əgín nɛ́gɔŋ.” »

⁴Paaʼkan pááság kɛɛn. Pɛ́ɛ́bóan mɔɔ́n ó jáʼkáas uʼtilígə́ə́n a táán, a kigin kɛ́ noádɛʼ, a ɛbá yɛ́ udíyoog. Pááság kudíŋin.

⁵Ná pɔɔd pá páyɛ́ɛ kɔ páyɛ́boodála pə́ədíŋin jáʼkáas, pə́yíbuŋíən pɔ́nɔ́ na pɔ́lɛ́: «Nkə aa poágɛɛlɛ kɛ́ɛg náan əə́? A igə aa polɛɛ́ əgudíŋin mɔɔ́n ó jáʼkáas nyóon əə́?»

⁶Pááság kubuyúlisini əgín wɔnɔ́ ná Yə́sus ayɛ́bodɛánɛ. Pááság kubuudi lɛ́ pɛ́ɛn na yɛ́lɛ́.

⁷Pááság kudíŋin pámɛ́ɛn na yɛ́lɛ́ ná Yə́sus alɛɛ́. Póyóliógóníí pilə́ə́ pɛɔ́bɔn pɛ́ niŋiʼ, pámáágan a jáʼkáas a mɔɛn, Yə́sus aábágɛd, əə́ləndin[35]

⁸Pə́ə́bə́ə́ kɛɛn, nyɔ́lɛ́ a jáʼkáas a mɔɛn. Ɛ́fɔlɛ́ ɛ́ pɔɔd ɛ́yɛ́ɛ ogoóliogoni pilə́ə́ pɛɔ́bɔn pɛ́ niŋiʼ, páadɛ́ga a ngə́, pɔsɔ́g pə́mmú páagɛɛn asóma pɛlaa a kidun, pə́əgiim agaágan a ngə́ agomonyáadɛ[36]

⁹Pɔɔd páyɛ́ɛ kiʼtúú kilúd lɛ́ póonɛ yuudi, pə́mmú ngim, páagɛɛn, pə́əgiim páágan pɛʼkɛ́ʼkɛ́, pɔ́nɔ́: «Nugəm na wɛ ó! Táán ágoyɛ́ɛlɛ kɔŋɛʼ, wɛ nyɔ́ olɛɛ́ əgiim a niiŋ nɛ́ Sə́dúk!

¹⁰Táán ásɛ́a Nɛlaamɛʼ nɛ́ nɛ́lɛɛ́ əgiim, Nɛlaamɛʼ nɛ́ sɛʼkóón wəəs Tə́fid! Nugəm nóɛn na Táán nyɔ́ alɛɛ́ a mɔɛmɔɛ́n[37]!»

¹¹Yə́sus aáság kɛɛn əgiig a Yolósalɛm. Yɛɛ́sɔ́d a Tɛ́mpɛl, aádɛ́ʼtɛg pɛnɔ piim, əmíim álon, amɛ́ɛn a Pɛʼtaníi na paaʼkan pə́ə́ŋ pá pówád na pábaan, mbin ɛyɛ́ɛ yəə́ndədə́əŋ.

¹²Wɔnɔ́ ná páyɛ́ɛ pə́ʼkiim pádɛ́ɛmɛn a Pɛʼtaníi əguúlini a Yolósalɛm a koany kaáyɛnɛ kóog, njaan ɛyɛ́ɛ abany Yə́sus.

¹³Yɛɛ́dála kiɛd kímmú kɛ́ pɔ́ɔdɔ́ŋɔn lɛ́ figiyə́ə. Kɛ́yɛ́ɛ laálá, toáŋánán ləbiʼ, ləbiʼ, ləbiʼ. Ayáyɛ́ʼtɛ́nɛ́ɛ́ kɔ ndúmiʼ agodála nga alɛ ogoboan modámádám mó konɛ kɔ. Ná ayɛ́ɛ́n əgiig kɔ a nidíŋ, yɛɛ́bóan əgín toáŋánán na toáŋánán lɛ́ kɛ́dɛʼkɛ́ɛ kɛnɛŋ kɛ́ pəfíigə kuum.

¹⁴Náa ɔnɔ́ na yɛ́lɛ́: «Odɛndɛ́ɛ́ kuum kə́mmú mɔɔd áanɛ modámádám moáŋ!» Paaʼkan pə́ə́ŋ páyóób nkə kɛ́ɛg kɛ́ yiísə́ə́.

¹⁵Pááság kɛɛn, pámɛ́ɛn əgiig a Yolósalɛm. Yə́sus ayɛ́ɛ́n ɔsɔd a Tɛ́mpɛl, aáŋɛ́ŋ ungim nyɔ́ yɛɛ́bóan kɔ a undunə́ lɛ́ na palɛgaʼ kɛ́ na pɔɔŋɛnɛʼ kɛ́, əə́díʼkə́ni paʼtɛ́bɛlɛʼ pá pɔsɔ́g pá páyɛ́ɛ agóʼpanɛ mɔɔnɛ́, na toʼkóm tó pɔsɔ́g pá páyɛ́ɛ alɛga piɛm[38]

¹⁶Náa ɔnɔ́ nyɔ́lɛ́ adɛʼtála kə́mmú mɔɔd aásom a Tɛ́mpɛl na kɛnó a oʼto.

¹⁷Əə́bə́ə́ anɛ́ɛ́n kaaʼkananɛ pɔɔd, ɔnɔ́: «Kɛ́lɛ kidiídílə́ a Kálaʼtaʼ ɛ Táán lɛ́, Táán ɔnɔ́: “Pálɛ́ɛ́ kodɔ́ŋɔn noádɛʼ nóam lɛ́ noádɛʼ nó mɔnɔŋ miim málɛ́ɛ́ kɛnyɔɔ́sɔ́gɔlɔnɛɛ́ a nólɛ́.” Náa pəŋi, poáʼkaánɛ agá nólɛ́ nɛɔsɛm nɛ́ piíbən əə́[39]!»

¹⁸Puʼkúm pó payaaganɛʼ pɛfɔny na palɛŋ pɛcɛm páyóób nkə kɛ́ɛg kɛ́ Yə́sus ayɛ́ɛ́lɛ. Pə́ə́bə́ə́ anɛ́ɛ́n kuunə pungə́ wɔnɔ́ ná páagɛɛlɛ agomoyóon. Kɛbán kímuʼ, páyɛ́ɛ agomoódammana lɛ́ ungim ayɛ́ɛ agɔnyɔ́ga na nɛaʼkananɛ niə́ŋ.

¹⁹Ná niób níyíím əgiig, Yə́sus yɛɛ́dɛ́ɛ́mɛn áay a Yolósalɛm na paaʼkan pə́ə́ŋ, páálón agɛɛn kɛnɔ kɛ́ndɛ́ŋ.

²⁰A koany kaáyɛnɛ kúmmú, wɔnɔ́ ná páyɛ́ɛ agosan a ngə́, pɛ́ɛ́dála figiyə́ə yɛ́ɛy yɛ́ Yə́sus yiílúmísə́ni. Ɛyɛ́ɛ yaáʼkoman kogálɛgɛd, yaáʼkoman kogos súʼtə́ə́ na a ngaŋ kɛ́.

²¹Píɛ aáság kaáyɔ́ɔ́ŋɛ nkə kɛ́ kɛ́yásánɛ́ɛ́, náa ɔnɔ́ na Yə́sus: «Kɛlág, waádála figiyə́ə yɛ́ɛy yɛ́ wiílúmísə́ni puə́y ə́! Yaáʼkoság kogálɛgɛd.»

²²Yə́sus yiísə́ə́ ɔnɔ́ na pɔ́lɛ́: «A fɔ́lɔ́b ndabodɛ́anɛ lɛ́ póag oʼto na Táán.

²³Mɔɔd nyɔ́ amáág oʼto na Táán amaʼkodɛ́anɛ na oʼkon wóow lɛ́ wə́ə́lúgin, wɛ́ɛn agaádagɛdɛ a noom nó ɛbá fiɛ́d, adɛág isuŋ lɛ́ nkə kɛ́ɛg kɛ́ əə́səə kɛ́agaáyɛ́ɛlɛ, Táán aagɛɛlɛ lɛ́ kɛáyɛ́ɛlɛ.

²⁴Kólɛ́ aa ndábodɛ́anɛ na pəŋi nyɔʼkɔ́: Nkə kiim kɛ́ puə́ŋíən na Táán a pɛɔ́sɔ́gɔ́lɔ́n, yaŋáan əgəə́liʼtini lɛ́ poándɛ na kɛ́lɛ́, aaboyɛ́ʼkɛn tɛn.

²⁵Kɛnɛŋ kɛ́ pəŋi poáʼkodɛ́lɛmɛɛ́ a pɛɔ́sɔ́gɔ́lɔ́n náa polɛɛ́ na məliŋ na sɔ́g nyummú, ímulísínəən kɔbɛ́ kó ayɛ́boyɛ́ɛ́lɛ. Áay, Sɛ waaŋan nyɔ́ alɛɛ́ a mɔɛn əəbuúlisin tɛn pəŋi mabɛ́ má poámoyɛ́ɛlanɛ.» [

²⁷Yə́sus əyíʼkíni kuúlini a Yolósalɛm na paaʼkan pə́ə́ŋ. Pááság kɛɛn ɔsɔd a Tɛ́mpɛl. Yə́sus alɛ anɛ́ɛ́n agodáŋana kɔ ɔ, puʼkúm pó payaaganɛʼ pɛfɔny na palɛŋ pɛcɛm na ponnom pó nigúu pááság kaáyɛʼtɛnɛ a ɛbá yə́ə́ŋ,

²⁸náa pɔ́nɔ́ na nyɔ́lɛ́: «A toɛn tó ánɛ aa olɛɛ́ agɛɛlɛ nkə kɛ́ɛg kiim kɛ́ olɛɛ́ agɛɛlɛ ə́? Ánɛ aa agoyɛ́ʼkɛ́nɛ́nɛ́ɛ́ toɛn lɛ́ wɛ́ɛlɛ ə́?»

²⁹Yə́sus əyíbuyúlísíni ɔnɔ́: «Mɛ tɛn ndəbuŋíən kɛ́sɔn kímuʼ súg. Puməʼkinyuúlisini nkə kɛ́ mɛ ndə́buŋíən, mɛ ndabodɛ́anɛ tɛn a toɛn tó ánɛ ndɛɛ́ agɛɛlɛ nkə kɛ́ɛnɛ kɛ́ ndɛɛ́ agɛɛlɛ.

³⁰Ánɛ aa əyíím ádom Sɛ́aŋ lɛ́ yíim agɛɛlɛ ɔsɔgɛn? Táán óm, pɔɔd əə́? Ɛ́ʼtɛánɛ́an!»

³¹Pə́ə́bə́ə́ kɔɔ́cɔcɔb kɔ pɔ́lɛ́ na pɔ́lɛ́ pɔ́nɔ́: «Timəʼkumuyúlisini lɛ́ “Táán áa ayɛ́moodóm,” əəbiŋíən ɔnɔ́ əə: “A igə anɛ́ɛ́n aa tidiʼkə́yəmuyə́liʼtinií ə́?”

³²Náa, timəʼkusəə tɛn tɛɔʼkɔ́: “Pɔɔd aa páyɛ́moodóm, kiə́s kɛ́agɛɛn kɛbɛ́”!» Páyɛ́ɛ agodammana kiʼtúú kɛ́ pɔɔd kɛ́ kɛ́yɛ́ɛ kɔ áay lɛ́ ungim yɛɛ́lɛŋɛn lɛ́ Sɛ́aŋ ayɛ́ɛ fɔ́lɔ́b ɔndɔɛgɛʼ pɛbán o Táán.

³³Pə́yímuyúlísíni pɔ́nɔ́ na nyɔ́lɛ́: «Pəsi tɛdɛálɛŋ ánɛ aa ayɛ́moodóm!» Náa nyɔ́lɛ́ tɛn ɔnɔ́ na pɔ́lɛ́: «Oʼó! Mɛ tɛn ntɛábodɛ́anɛ a toɛn tó ánɛ aa ndɛɛ́ agɛɛlɛ pɛbán pɛ́ɛb.»