Read Yambeta Mə́líʼkus 13 Bible Online

Mə́líʼkus 13 - Yambeta bible

Mə́líʼkus 13

¹Yə́sus aáság kodɛ́ɛmɛn agosan na paaʼkan pə́ə́ŋ. Ná páyɛ́ɛ pə́ndəgiim pálón a Tɛ́mpɛl, ongaaʼkan wəəŋ nyummú aáság kuyəlim agomaʼkanɛ wɔnɔ́ pɛ́ɛ́wáag yoog yɛ́ɛy, náa ɔnɔ́ na Yə́sus: «Sə́dúk, waádála noádɛʼ kolɛŋ kowáag əə́! Pɛ́ɛ́wáág na pisig pɛ́ aʼtáán!»

²Yə́sus əyímuyúlísíni ɔnɔ́ na nyɔ́lɛ́: «Odɛmmáʼkɛ a kóog lɛ́ nólɛ́ɛ́ koman kubumbug. Aʼtáán yɛ́ɛy əngim, ɔmbɔ́ nímuʼ nɛ́dɛndɛ́ɛ́ kolɔb náan a nkó ɛ sɔ́g.»

³Yə́sus yɛɛ́bág a oʼkon ó pa Olifiyə́ə, əə́ləndin kɔ, Tɛ́mpɛl náanɛ a udi wə́ə́ŋ. Páyɛ́ɛ́n kɔ́gɔ́ɔg əgín lɛ́ na Píɛ, na Sɛ́ag, na Sɛ́aŋ, na Əndələ́ə.

⁴Náa pə́əmuŋíən pɔ́nɔ́ əə: «Sə́dúk, ɛ́bɛdɛánɛ áŋ! Naanɛ́g áa pɛbán pɛ́ɛb pɛ́lɛ́ɛ́ kaáyɛ́lɛɛ́ ə́? Kɛálɛ́ʼkán igə tɛn aa kɛ́lɛ́ɛ́ kibiílodií lɛ́ kɛnɛŋ kɛ́ pɛbán pɛ́ɛb kaáyɛ́ɛlɛ kiə́ʼkiig əə́?»

⁵Yə́sus əyíbuyúlísíni ɔnɔ́: «Lóʼkɔ́dɔɔn óo! Lóʼkɔ́dɔɔn agɛɛlɛ lɛ́ mɔɔd ədiyíbulígə o!

⁶Kɛ́lɛ lɛ́ ɛ́fɔlɛ́ ɛ́lɛ́ɛ́ kiim na niiŋ nɛ́am a unuʼ. Na nyóon ɔnɔ́ nyɔ́lɛ́ aa alɛɛ́ Məsíi. Pálɛ́ɛ́ kuními ɛ́fɔlɛ́ ɛ́ pɔɔd ngə́.

⁷Ná polɛ́ɛ́ koob pɔ́ɔsɔyɔ lɛ́ pɛdá pɛ́lɛ agaánɔɛyɛ áanɛ ndúmiʼ, ɔmbɔ́ lɛ́ kága laálá, podɛʼtámmána. Nkə kɛ́ɛg kiim kígóódi lɛ́ kɛáyɛ́ɛlɛ. Náa, kɛ́dɛndɛ́ɛ́ kɛɛn lɛ́ nɛman nɛ́ nsí aa nɛ́ɛn.

⁸Kɛ́lɛ́ɛ́ kɛɛn lɛ́ nigúu nɛ́ɛnɛ nɛ́lɛ agonɔɛyɛ nɛ́ʼkága pɛdá, kɛsom kɛ́ nɛlaamɛʼ kɛ́ɛnɛ kɛ́anɔɛyɛ kɛ́ʼkága. Nsí ɛlɛ́ɛ́ kəə́nyigən a pɛnɔ piíŋ. Məyíi málɛ́ɛ́ kudə́əŋ a ombod ó koon mɔɔd. Pɛbán pɛ́ɛb pɛ́lɛ́ɛ́ kɛɛn wɔnɔ́ ntɔ́b yɛ́ ɔʼkɛ́ɛd alɛanɛɛ́ na yɛ́lɛ́ a kɛnɛŋ kɛ́ ɔsánɛʼ.»

⁹Yə́sus ayɛ́ɛ́n na tɔgɛ́ɛ́ yuudi, ɔnɔ́: «Pəŋi, lóʼkɔ́dɔɔn na pəŋibáamɔɛ́d óo, lɛ́ pálɛ́ɛ́ kɛɛn na pəŋi a puog pó pɛyɔm. Pálɛ́ɛ́ kobobáam a puog pó pɛɔ́sɔ́gɔ́lɔ́n. Pálɛ́ɛ́ kubudə́nigi a pɛyɔm a udi ó pongɔ́mɛnaʼ na a oó puʼkúm a kidíídí kɛ́am. Polɛ́ɛ́ kɛʼtɛ́lɛmɛn mbaasɔ́ a udi wɔ́ɔ́bɔn.

¹⁰Náa, yoom ɛ́ na oʼto na oʼto yɛ́ ɛ́lɛɛ́ lɛ́ yáyɛ́ɛlɛ ɔmbɔ́ nsí yədíin ɛ́man ɛ́lɛ lɛ́: Tɔsɔm Tólaŋ tólɛ́ɛ́ koyaŋ agaálɔɛgɛ a mɔnɔŋ miim.

¹¹Ná pálɛ́ɛ́ kubuúgumən agɛɛn na pəŋi a puog pó pɛyɔm, podɛyáságɛ́máá nkə kɛ́ puə́səə kɔ. Náa, tɔgɛ́ɛ́ tuim tó tólɛ́ɛ́ kubuyíminií lɛ́ púsəə a kɛnɛŋ kɛ́go kɛ́ɛg, Uŋun wó Ufúlúʼtú aa ólɛ́ɛ́ koboyɛ́ʼkɛnɛɛ́ tólɛ́ lɛ́ púsəə. Tódɛndɛ́ɛ́ kɛɛn tɔgɛ́ɛ́ tó pomáyɛ́ɛ́ŋɛ́nɛ́ɛ́ pəŋibáamɔɛ́d lɛ́ pósɔyɔ.

¹²Kɛ́lɛ́ɛ́ kɛɛn a kɛnɛŋ kɛ́ɛg lɛ́: Móŋŋí wo nsun mmuʼ aalɛg móŋŋí wəəŋ wo nsun mmuʼ lɛ́ pámoyóon. Sɛ a mɔɔ́n áyɛɛlɛ tɛn náan yoom ímuʼ na pɔɔ́n, pɔɔ́n páyaágasɛnɛ tɛn pasɛ pɔ́ɔ́bɔn lɛ́ ná páboyóóna[52]

¹³Ungim alɛ́ɛ́ koboóbɛnɛn a kidíídí kɛ́am. Náa, nyɔ́ adɛndɛ́ɛ́ koʼtiɛngɛlɛdɛɛ́ súʼtə́ə́ a nɛman, nyóon aa Táán alɛ́ɛ́ komoyɔ́yɛɛ́.»

¹⁴Yə́sus ayɛ́ɛ́n əgín na tɔgɛ́ɛ́ yuudi ɔnɔ́: «Ná polɛ́ɛ́ kodála “Kólógósog nyóon”, “Ɛyósag yɛ́ ɛgóón” undəndínə́ə́n kɛnɔ kɛ́ adɛʼkɛ́lɛɛ́ lɛ́ ə́ləndin[53], (Wɛ nyɔ́ olɛɛ́ agobana nkə kɛ́ɛnɛ, óób náan ó!) Áay anɛ́ɛ́n, pá pálɛ́ɛ́ kɛɛnɛɛ́ a Siudə́ə pógóódi lɛ́ pádɛ́da agɛɛn ɔgɔɔsɛm a nkon.

¹⁵Nyɔ́ alɛ́ɛ́ kɛɛnɛɛ́ a palándaʼ pə́ə́ŋ, ədinjúúnə kiiʼkini kosɔd a yoog agɛɛn əsiəd yoom.

¹⁶Yoom ímuʼ na nyɔ́ alɛ́ɛ́ kɛɛnɛɛ́ a pɔlɛ́m. Ədinjúlíni a noádɛʼ agɛɛn əsiəd kilə́ə́ kiə́ŋ kɛ́ niŋiʼ.

¹⁷Maan kɛ́fɔlɛ́ a mɔɔ́s móom na pagɛ́ɛd pá əngum, na pɔsɔ́g pá pálɛ́ɛ́ kɛɛnɛɛ́ na pɔɔ́n pá páaŋɛ́ʼkɛ!

¹⁸Poɔ́sɔ́gɔlɔn Táán agɛɛlɛ lɛ́ pɛbán pɛ́ɛb pɛ́dɛnjáyɛ́lɛ́ɛ́ a kɛnɛŋ kɛ́ tɔɔ́

¹⁹lɛ́ a mədúg móom ntɔ́b ɛlɛ́ɛ́ kɛɛn kɔ kɛ́fɔlɛ́ a ombod wó pɛ́go pɛ́ nsí ɛyásáŋɛ́ɛ́, mɔɔd adɛ́ʼtálaá əgiim əgiig na nɛ́gɔŋ kɛ́. Yimmú tɛn ɛdɛndɛ́ɛ́ kɛɛn kɔ igiig wɔnɔ́ yɛ́ɛy[54]

²⁰Sə́dúk ədíʼkúusəəlin lɛ́ mədúg móom mɛ́ɛn masɔ́sɔ́m, ngə́ yɛ́ɛnɛ lɛ́ mɔɔd yɔ́ɔy adɛʼkɛ́ɛ agɛɛn kɔ. Náa, alɛ́ɛ́ kosom mɔ́lɛ́ a kidíídí kɛ́ pá əyííyid lɛ́ pálɛ́ɛ́ koob na nyɔ́lɛ́.

²¹Mɔɔd əməʼkiim abodɛ́anɛ anɛ́ɛ́n lɛ́: “Táá Məsíi aa yɛ́ɛnɛ taa!” Ɔmbɔ́ lɛ́: “Taa ogo aa nyóon kága!” Pudiyə́líʼtíníí.

²²Kɛ́lɛ lɛ́, ɛ́fɔlɛ́ ɛ́ pa Məsíi pá pɛfaa, na palɔɛgɛʼ pɛbán pá pɛfaa pálɛ́ɛ́ kiimən. Pálɛ́ɛ́ kɛɛlanɛ ɛ́fɔlɛ́ ɛ́ mangán na pɛálɛ́ʼkán əgulígə pɔɔd. Ngə́ ɛmaʼkɛɛn kɔ, pálɛ́ɛ́ kulígə tɛn ɔmbɔ́ pɔsɔ́g pá Táán əyííyid.

²³Pəŋi lóʼkɔ́dɔɔn anɛ́ɛ́n! Ɛkwaŋ aa yɛ́ɛy mbáyaŋ abooníɛn ó!»

²⁴Yə́sus ayɛ́ɛ́n yuudi na tɔgɛ́ɛ́, ɔnɔ́: «Náa, a ngim ɛ mədúg móom ná ntɔ́b yɛ́ nkóʼkóón yɛ́ɛy yaáʼkosan, niis nɛ́ wɔɔ́s nɛ́lɛ́ɛ́ kunim, údiiʼkíni kolɛŋ konom kə́mmú. Ɔmbɔ́ tɛn wəə́ ódɛndɛ́ɛ́ konom na udúg.

²⁵Muə́dədəʼ mólɛ́ɛ́ kiim mógásɛg a mbálámɔɛn əgudə́əŋ a nsí. Toɛn tó túgumíníníí moom móom muim a mɔɛn tólɛ́ɛ́ kəə́nyigid[55]

²⁶Áay aa pálɛ́ɛ́ kɛʼtálaá mɛ Mɔɔ́n o mɔɔd ndə́əgiim nsuu a kɛbɛd a mɔɛn. Ndɛ́ɛ́ kiim na toɛn tuim na nugəm nuim[56]

²⁷Ndɛ́ɛ́ kodom məŋun má maʼtom a əʼkid yá nsí əngim ə́niʼ, kodɛ́ɛmɛn a ongam wóonɛ agɛɛn agaádɛ a wóow kága lɛ́ mágonyɛd pá Sə́dúk əyííyid[57]»

²⁸Yə́sus əyíbusiə́din nkaʼtɛ́n yɛ́ɛnɛ ɔnɔ́: «Óbáan yisí yɛ́ ɛlɛɛ́ a nkaʼtɛ́n yɛ́ɛnɛ na figiyə́ə. Əgín ná poádála lɛ́ ntab yəəŋ yoóndosomi, toáŋánán tóɔdɔs, pólɛŋ lɛ́ kɛloo kɛándɛ ndúmiʼ.

²⁹Yoom tɛn náan ímuʼ ná polɛ́ɛ́ kodálaá lɛ́ pɛbán pɛ́ɛb piim pɛándagaáyɛ́ɛlɛ, póság kolɛŋ tɛn áay lɛ́ kɛnɛŋ kɛ́am kɛ́ mɛ Mɔɔ́n o mɔɔd kimbuúlini kɛándɛ ndúmiʼ, kíəgəə́bisig kiim əgiig.

³⁰A fɔ́lɔ́b ndabodɛ́anɛ lɛ́ ɔsɛg wóonɛ ó nɛ́gɔŋ ódɛndɛ́ɛ́ kuwu ungim ná nkə kɛ́ɛnɛ kiim kɛ́dɛ́njáásan.

³¹Mbálámɔɛn ɛlɛ́ɛ́ kosan, nsí tɛn yɛ́ɛnɛ yɛ́ɛsan, náa tɔgɛ́ɛ́ tóam tólɛ a pəliə́g.»

³²Yə́sus ayɛ́ɛ́n əgín na tɔgɛ́ɛ́ yuudi, ɔnɔ́: «Náa, mɔɔd na mɔɔd andɛŋɛn wɔɔ́s ogo na kɛnɛŋ kɛ́go kɛ́ pɛbán pɛ́ɛb pɛ́lɛ́ɛ́ kaásánɛ́ɛ́. Ɔmbɔ́ məŋun má maʼtom má málɛɛ́ a mɔɛn mándɛŋɛn, ɔmbɔ́ mɛ nyɔ́ ndɛɛ́ Mɔɔ́n, ntɛlɛŋɛn. Mbáa nyɔ́lɛ́nyɔ́əsíŋ áa aálɛŋ.

³³Pólóʼkɔdɔɔn anɛ́ɛ́n óo! Pudinním ɛnɔ lɛ́ podɛálɛŋ naanɛ́g áa kɛnɛŋ kɛ́go kɛ́lɛ́ɛ́ kiigií.

³⁴Kɛ́lɛ́ɛ́ kɛɛn náanɛ wɔnɔ́ ná mɔɔd nyummú ayɛ́ɛ́lɛ ná ayɛ́ɛ aándagɛɛn ongɛn. A kóonɛ lɛ́ ə́díin yɛɛn, yiídí ə́mə́cum noádɛʼ nuə́ŋ na pəgudin pə́ə́ŋ, amáboyáában pigólí lɛ́ na mɔɔd na piə́ŋ. Yɛɛ́dɛánɛ na sɔ́g nyɔ́ ayɛ́ɛ ənuŋ udíyoog lɛ́ ədinním ɛnɔ.

³⁵Kólɛ́ aa ndábodɛ́anɛ lɛ́ pudinním ɛnɔ lɛ́ podɛálɛŋ naanɛ́g áa mɔɔd o noádɛʼ alɛ́ɛ́ kiim alónɛ́ɛ́. Wɔnɔ́ ná alɛɛ́ ugiim alon na niób, ɔmbɔ́ lɛ́ na ɔʼtɛ́m wó udúg, oó lɛ́ na pɛbáŋɛn pɛ́ koany, ɔmbɔ́ lɛ́ ná koany koáʼkaáyɛnɛ.

³⁶Ɔmbɔ́ aboolónɛn kiʼpus, adɛyɛ́bobóan lɛ́ polɛ a ɛnɔ.

³⁷Nkə kɛ́ɛnɛ kɛ́ ndɛɛ́ əgusəə, ndɛ əgusəə kɛ́lɛ a mɔɔd ungim. Pudinním ɛnɔ o!»