Read Yambeta Mə́líʼkus 14 Bible Online

Mə́líʼkus 14 - Yambeta bible

Mə́líʼkus 14

¹Wɔɔ́n ó Páska, wɔɔ́n tɛn wó Yúdɛn ɛyɛ́ɛ ɛnɛ́alɛla pɛlɛ́ɛd pɛ́ páánám pádɛág toan tó kunudi umbúb óyɛ́ɛ wáʼkolɔb mədúg mábaan[58] Puʼkúm pó payaaganɛʼ pɛfɔny na palɛŋ pɛcɛm páyɛ́ɛ əguunə tuə́ áa páagɛɛlɛ əgugumin Yə́sus pɔɔd pándɛŋ ná pámoyóon.

²Páyɛ́ɛ ɔgɔɔ́cɔcɔb kɔ pɔ́lɛ́ na pɔ́lɛ́ pɔ́nɔ́: «Tɛdɛɔ́gɔ pə́gumuúgumin wɔɔ́s ó wɔɔ́n, inyuunyugiʼ yə́ədə́əŋ.»

³Yə́sus ayɛ́ɛ a Pɛʼtaníi, a nó Simɔ́ɔŋ, mɔɔd nyummú nyɔ́ ayɛ́ɛ abany nkún. Náa ɔʼkɛ́ɛd nyummú əə́giim. Yɛɛ́bóan Yə́sus alɛ agonɛ́ɛnɛ. Yiígóodi igəd ɛ́ lamɛ́ndaʼ a ombɔg. Páyɛ́ɛ́lɛ igəd ɛgo yɛ́ɛy na nɛdáán nɛ́ pɔ́ɔdɔ́ŋɔn lɛ́ alɛbáaʼtɛlɛ. Lamɛ́ndaʼ tɛn ɛgo ɛyɛ́ɛ lamɛ́ndaʼ ɛ mɔɔnɛ́. Páyɛ́ɛ́lɛ yɛ́lɛ́ na kisənduŋ kímmú pɔ́ɔdɔ́ŋɔn lɛ́ náal. Ná yɛɛ́sɔ́d kɛnɔ kɛ́ Yə́sus ayɛ́ɛ, yiíbúən igəd, əə́bə́ə́ kusumənən Yə́sus lamɛ́ndaʼ yɛ́ɛy a oʼto.

⁴Ná pɔɔd pá páyɛ́ɛ kɔ pɛ́ɛ́dála nkə kɛ́ɛg kɛ́ ayɛ́ɛ́lɛ, pɔsɔ́g pə́mmú pə́ə́bə́ə́ komoyɔ́gɔ́dɔ, pə́əgəə́lúluu pɔ́nɔ́: «A igə aa nyóon aáyósag lamɛ́ndaʼ yɛ́ɛy náan əə́?

⁵Pádɛʼkɛ́ɛ págolɛg yɛ́lɛ́ agaáyɛn ɔmbɔ́ əʼtin á pisúg pɛ́ mɔɔnɛ́ puuniʼ[59] ə́!» Páyɛ́ɛ ɔgɔɔ́nyɔmɔnɔn ɔʼkɛ́ɛd nyóon kɛ́fɔlɛ́.

⁶Náa, Yə́sus yiísə́ə́ ɔnɔ́: «Tíən ɔʼkɛ́ɛd nyóon yəə́b. A igə aa poámoyɛ́ɛlɛ lɛ́ yóób ɔʼtɛ́m kogany ə́? Nkə kɛ́ɛnɛ kɛ́ amɛ́ɛ́lɛ na mɛ kɛ́lɛ kisig kɛ́ yoom.

⁷Pugóódi pasɔ́gasɔ́gá pɛnɛŋ piim a kɛgaágadɛ kɛáŋan[60] Kɛnɛŋ kiim kɛ́ poányɔ́ŋɛn koboyɛ́ɛlɛnɛ kɔŋɛʼ, polɛ págoboyɛ́ɛlɛnɛ. Náa, mɛ ntɛndɛ́ɛ́ kɛɛn na pəŋi pɛnɛŋ piim.

⁸Nkə kɛ́ kɛ́yɛ́ɛ əguunə lɛ́ nyɔ́lɛ́ yɛ́ɛlɛ, kɛ́lɛ́ kɛ́go aa kɛ́ɛnɛ amɛ́ɛ́lɛ. Aáyaŋ əgisumənən lamɛ́ndaʼ agoboŋɛn kɛlóŋ kɛ́am wɔnɔ́ ná pálɛ́ɛ́ kinnií[61]

⁹Ndabodɛ́anɛ a fɔ́lɔ́b lɛ́ kɛnɔ kiim kɛ́ pálɛ́ɛ́ kɔlɔɛgɛɛ́ Tɔsɔm Tólaŋ a nsí yɛ́ɛnɛ ngim, pálɛ́ɛ́ kaáyɔ́ɔ́ŋɛ ɔʼkɛ́ɛd nyóonɛ, pɔ́ɔsɔyɔ nkə kɛ́ɛnɛ kɛ́ amɛ́ɛ́lɛ.»

¹⁰Ongaaʼkan nyummú niiŋ lɛ́ Siudáa Ɛsɛʼkalɛyóod ayɛ́ɛ́n aboan puʼkúm pó payaaganɛʼ pɛfɔny agobodɛ́anɛ lɛ́ nyɔ́lɛ́ alɛ ugubuyúunən ngə́ igugumin Yə́sus.

¹¹Puʼkúm pó payaaganɛʼ pɛfɔny pɛ́ɛ́nyɔ́ga kɛ́fɔlɛ́ ná páyóób náan. Páyáyóóbánánɛ́ɛ́ na nyɔ́lɛ́ lɛ́ páamoyɛ́ʼkɛn mɔɔnɛ́. Siudáa əə́bə́ə́ kuunə tuə́ áa aágɛɛlɛ agoboólɛgɛn Yə́sus.

¹²Wɔɔ́s ó na oʼto na oʼto ó wɔɔ́n wó Yúdɛn ɛyɛ́ɛ ɛnɛ́alɛla pɛlɛ́ɛd pɛ́ páánám pádɛág toan tó kunudi umbúb, wɔɔ́s tɛn ogo wóow aa páyɛ́ɛ pasɛga pɔɔ́n pá todóm nto a kɛfɔny kɛ́ páanɛ a wɔɔ́n ó Páska, paaʼkan pə́ə́ŋ pə́yímuŋíən pɔ́nɔ́ əə: «Sə́dúk, ə́lə́ə́ áa tíɛn agoonámɛnɛɛ́ wɔɔ́n ó Páska ə́?»

¹³Ná pə́yímuŋíən náan, aáság kudə́əmini paaʼkan pə́ə́ŋ pábaan, amáboodóm yuudi, ɔnɔ́ na pɔ́lɛ́: «Todáan áay a pálɛ́ɛg. Ná puə́giig kɔ, puəgəə́bun na mɔɔd onnyáŋɛ́náán ungwə́ŋ ó məní a oʼto, púmuyə́ən.

¹⁴Yoog yɛ́ ɔɔ́sɔd a yɛ́lɛ́, pəŋi tɛn pósɔd kɔ. Pódɛ́anɛ na mɔɔd o noádɛʼ poɔʼkɔ́ Sə́dúk ɔnɔ́ əə: Ə́lə́ə́ áa nɛsom nɛ́ yoog nɛ́ ayɛ́njɛɛ́ngɛ́gɛn kɛnɔ kɛ́ ndáanɛ wɔɔ́n ó Páska wóonɛ na paaʼkan páam nɛ́lɛɛ́ ə́?»

¹⁵Əguyibənən, Yə́sus yiísə́ə́ ɔnɔ́ na pɔ́lɛ́: «Mɔɔd ogo ogóódi noádɛʼ nó mɔɛn. Ná puə́muŋíən náan, əəbuúloodi kɛnɔ, kɛdám kɛ́ kɛsom kɛ́ yoog kɔ a noádɛʼ nuə́ŋ a mɔɛn. Kɛmɔɛ́d kɛándɛ kisóbíniə́n. Yiim yɛ́ yə́əgəə́yúunə yándɛ kɔ. Kɔ aa poábɛnámɛn wɔɔ́n.»

¹⁶Páyɛ́ɛ́n əgiig a pálɛ́ɛg, pááboan pɛbán piim əgín wɔnɔ́ ná ayɛ́bodɛánɛ, páánám wɔɔ́n ó Páska.

¹⁷Niób nɛáság kiim əgiig. Yə́sus əmíim alon na paaʼkan pə́ə́ŋ pá pówád na pábaan.

¹⁸Pálɛ anɛ́ɛ́n kɔ agonɛ́ɛnɛ a, Yə́sus aáság kusiəd tɔgɛ́ɛ́ ɔnɔ́: «A fɔ́lɔ́b ndabodɛ́anɛ lɛ́ úmmuʼ áanɛ a ondáŋ wááŋaŋ ó pəŋi póonɛ pá polɛɛ́ agonɛ́ɛnɛ na mɛ, aagɛndɛg[62]»

¹⁹Ɔʼtɛ́m ó paaʼkan wɛ́ɛ́yɛ́b, pə́ə́bə́ə́ kumuŋíənə a pɛlɔ́g a pɛlɔ́g, na nyóon ɔnɔ́ əə: «Sə́dúk, adɛ́njaŋ mɛ áa ndáagoólɛg, ngɔ́ɔ́?»

²⁰Yiísə́ə́ ɔnɔ́ na pɔ́lɛ́: «A pəŋi póonɛ pá pówád na pábaan, úmmuʼ a ondáŋ wááŋan aa aágɛndɛg. Sɔ́g nyɔ́ tiə́gəə́nə́əyəni kɔ áanɛ táasaʼ mmuʼ na nyɔ́lɛ́[63]

²¹Kɛ́lɛ fɔ́lɔ́b lɛ́ mɛ Mɔɔ́n o mɔɔd ndəəgu əgín wɔnɔ́ ná kíyə́dílə́ə́ a Kálaʼtaʼ ɛ Táán lɛ́ ndəəgu[64] Náa, maan kɛ́fɔlɛ́ na nyɔ́ kugu kóam kóamoógom. Kɛ́mɛ́ɛ agɛɛn kɔŋɛʼ na nyɔ́lɛ́ lɛ́ ədiyə́biə́níí!»

²²Pálɛ kɔ agonɛ́ɛnɛ, Yə́sus aáság kudə́əmini pɛlɛ́ɛd, amɛ́ʼkɛn pisoyidiʼ na Táán, aábɛ́ŋa, amɛ́ʼkɛn na paaʼkan pə́ə́ŋ, ɔnɔ́ na pɔ́lɛ́: «Siə́dəən pɛlɛ́ɛd pɛ́ɛnɛ, nkó yaam aa yɛ́ɛy.»

²³A ngim yɛ́ɛy, yiídə́ə́míni tɛn kilən kɛ́ maloʼ, əmíʼkíni kɛɛ́ʼkɛn pisoyidiʼ na Táán, amábonáámɛ́nɛ, pááŋó pɔ́lɛ́ piim.

²⁴Yiísə́ə́ ɔnɔ́ na pɔ́lɛ́: «Móonɛ málɛ maŋɔ́ máam. Mɔ́lɛ́ aa málɛɛ́ kisuŋ kɛ́ kíoloodi nɛálad nɛ́ Táán amáládɛ́ɛ́ na pɔɔd[65] Ndɛ́ɛ́ kusub mɔ́lɛ́ a kidíídí kɛ́ ɛ́fɔlɛ́ ɛ́ pɔɔd.

²⁵A fɔ́lɔ́b ndabodɛ́anɛ lɛ́ Əgəə́bə́ə nɛ́gɔŋ Ntiə́giiʼkini koŋo maloʼ kə́mmú agɛɛn əgiig a wɔɔ́s wó ndə́əgiiʼkini koŋo má mawa a Nɛlaamɛʼ nɛ́ Táán.»

²⁶Ná pɛ́ɛ́mán konɛ́ɛnɛ, pááság kusisinin pɛʼkwáá pɛ́ wɔɔ́n kudúmə. Ná páyɛ́ɛ páʼkoman kudúmə, pááság kolon agɛɛn a oʼkon ó pa Olifiyə́ə.

²⁷Náa Yə́sus ɔnɔ́ na paaʼkan pə́ə́ŋ: «Pəŋi piim poagɛʼtɛ́da lɛ́ náan aa kɛ́lɛɛ́ kidiídílə́ a Kálaʼtaʼ lɛ́ Táán ɔnɔ́: “Ná ndáagoon unnuŋ mudúg, mudúg muim moágólɛ́gɛd[66]”

²⁸Náa, ná ndɛ́ɛ́ kiim ndónɛ́ɛ́ a kəəniʼ, ndɛ́ɛ́ koboóyaŋɛnɛ a Kalilə́ə.»

²⁹Náa Píɛ ɔnɔ́ na nyɔ́lɛ́: «Ɔmbɔ́ ungim nyóonɛ agoodɛ́da, mɛ ntiə́guudi!»

³⁰Yə́sus əyímuyúlísíni ɔnɔ́ na nyɔ́lɛ́: «A fɔ́lɔ́b ndagodɛ́anɛ lɛ́ əgín a udúg ó naánɛ́ yɛ́ɛnɛ, kɛbaŋ kɛ́ nsɛɛ kíədíin kɛdaŋ a annam ábaan ná wəə́ʼkiʼtəm pɛnɛŋ pɛ́dáád wɔʼkɔ́ odɛndɛŋɛn.»

³¹Ɔmbɔ́ náan, Píɛ yiíbís əgín na toɛn, ɔnɔ́: «Kɛ́yɛɛn kɛ́ɛnɛ lɛ́ pəsi na wɛ tígu ondáŋ, tiəgu. Kóonɛ lɛ́ mɛ nkuúʼtəm, ndóo!» Paaʼkan piim píísə́ə́ náan yoom ímuʼ.

³²Páyɛ́ɛ́n, pááság kɛɛn alon a kɛnɔ kímmú pɔ́ɔdɔ́ŋɔn lɛ́ Kɛdsɛmaníi. Kɔ́gɔ́ɔg, Yə́sus yɛɛ́dɛánɛ na paaʼkan pə́ə́ŋ ɔnɔ́: «Pəŋi, lɔbɔ́ɔn áanɛ, mɛ mbɛ́ɛn ɔgɔɔ́sɔ́gɔlɔn.»

³³Yiísiə́d Píɛ na Sɛ́ag pɔ́lɛ́ na Sɛ́aŋ. Ɔʼtɛ́m wə́ə́ŋ óyɛ́ɛ wándɛ ɔmbɛ́. Wɛɛ́y óyɛ́ɛ wə́ʼkumuúgumin.

³⁴Ná páyɛ́ɛ pə́ʼkəə́súid yuudi sɔɔŋ, ayɛ́bodɛánɛ ɔnɔ́ na pɔ́lɛ́: «Ɔʼtɛ́m wáam wándɛ ɔmbɛ́ a las. Pəŋi tɛn púləndin áanɛ, Púgúlə, pudinním ɛnɔ.»

³⁵Nyɔ́lɛ́ ayáyɛ́ʼtɛ́nɛ́ɛ́ kə́mmú yuudi, əmə́súʼkíníí pigúbíʼkub. Ayɛ́ɛ ɔgɔɔ́sɔ́gɔlɔn Táán lɛ́ ngə́ ɛmaʼkɛɛn kɔ, ntɔ́b yɛ́ɛnɛ ɛ́moyágɛɛŋɛ.

³⁶Ayɛ́ɛ əgusəə ɔnɔ́: «Əə́əy Mbáa yaam, Sɛ waam! Olɛ na toɛn tó kɛɛlɛ yiim. Sɛ́gɔɔ mbágoyɔ́sɔ́gɔ́lɔ́nɛ́ɛ́, ɛɛlɛ lɛ́ ntɔ́b yɛ́ɛnɛ yɛ́nyaágɛɛŋɛ. Náa, kɛ́dɛnjɛ́ɛ́n a nɛnyɔ́ŋɛn nɛ́am, kíɛn a nɛáŋ!»

³⁷Ná ayɛ́ɛ ɔɔ́ʼkɔɔ́sɔ́gɔlɔn náan, aáság kiim ádɛ́ɛmɛn əguúlini kɛnɔ kɛ́ yiídí ə́mə́dí pa Píɛ na paaʼkan pə́mmú póob pábaan. Ayɛ́bobóan pə́ʼkugu ɛnɔ tɔ́g. Aáság kubuyóndigi, ɔnɔ́ na Píɛ: «Tuə́ ə́ən Simɔ́ɔŋ, olɛ agá a ɛnɔ ɔ? Odɛáʼkɛnɛ kugúlə ɔmbɔ́ əgín áwaʼ mmuʼ ə?

³⁸Kúlə́ən, poɔ́sɔ́gɔlɔn Táán agɛɛlɛ lɛ́ pudiʼtə́əŋ a pɛásɔ́sɛ́n. Mɔɔd alɛ na ɔʼtɛ́m wóonɛ lɛ́ yɛ́ɛlɛ kɔŋɛʼ, náa nkó yəəŋ áa ɛlɛɛ́ ntom.»

³⁹Yə́sus aáság kiiʼkini kəə́súid agɛɛn ɔgɔɔ́sɔ́gɔlɔn. Ayɛ́ɛ agɛɛlɛ əgín pɛɔ́sɔ́gɔ́lɔ́n pɛ́go pímuʼ.

⁴⁰Əyíʼkíni kiim ádɛ́ɛmɛn əguúlini kɛnɔ kɛ́ paaʼkan páyɛ́ɛ. Ayɛ́bobóan anɛ́ɛ́n kóog pálɛ tɔ́g a ɛnɔ ɛ́ kúfuʼ. Pádɛʼkɛ́ɛ agaáʼkɛ kolɔb əngis angóm. Pádɛʼkɛ́ɛ agolɛŋ tɛn nkə aa pámodɛ́anɛɛ́.

⁴¹Ná əyímbuúlíni a annam ádáád. Páyɛ́ɛ əgín a ɛnɔ tɔ́g. Əyíbuyóndígi, ɔnɔ́ na pɔ́lɛ́: «Pəŋi polɛ əgín a ɛnɔ yi! Polɛ ogooyig! Oo, kɛáʼkoman anɛ́ɛ́n! Táá kɛnɛŋ aa kɛ́ɛnɛ kiə́ʼkiigií. Páagɛndɛg mɛ Mɔɔ́n o mɔɔd nɛ́gɔŋ a ɔmbɔg á pɛɛlɛʼ mabɛ́.

⁴²Tɛ́mɛ́naan, tiɛ́naan! Táá mɔɔd ogo nyɔ́ aágɛndɛg na pɔ́lɛ́ aa nyóonɛ aándɛɛ́ kɔ.»

⁴³Yə́sus alɛ kɔ na tɔgɛ́ɛ́ a unuʼ ə, Siudáa, ongaaʼkan wəəŋ nyummú nyɔ́ a pá pówád na pábaan foáy. Ayɛ́ɛ na pɔɔd a ngim súuu lɛ́ póonɛ na mobag mó pɛdá, pə́mmú na mufun a ɔmbɔg. Pɔɔd póob náan piim, puʼkúm pó payaaganɛʼ pɛfɔny na palɛŋ pɛcɛm na ponnom pó a nigúu aa púyíím póboodom.

⁴⁴Siudáa nyɔ́ ayɛ́bolɛ́gɛn Yə́sus, əyíím yááganan na pɔ́lɛ́ ɔnɔ́: «Nyɔ́ ndáadam nyə́súʼkənən, póság kolɛŋ lɛ́ nyɔ́lɛ́ ogo aa nyóon, púmuúgumin, póɛn na nyɔ́lɛ́. Polɛŋ kumuúnuŋ ó!»

⁴⁵Əgín tɛn ná Siudáa əyíím əgiig, ayɛ́ɛ́n ná Yə́sus alɛɛ́, ɔnɔ́ na nyɔ́lɛ́: «Kɛlág!» Aáság kumuə́súʼkənən.

⁴⁶Əgín tɛn ná pɔɔd pá əyíím na pɔ́lɛ́ pɛ́ɛ́dála náan, pááság kaag ombɔg na Yə́sus, pə́mə́mugúmin.

⁴⁷Náa sɔ́g nyummú nyɔ́ ayɛ́ɛ kɔ áay aáság kusooyin ɛbag yə́ə́ŋ ɛ́ pɛdá a kɛbágáá soád, ɔnɔ́ na uʼkudin wo ɔnjaaganɛʼ pɛfɔny nyɔ́ oʼkóʼkóón ə́siəd a oʼtóɛŋ foáb, oʼtóɛŋ kwə́s.

⁴⁸Yə́sus yiísə́ə́ ɔnɔ́ na pɔ́lɛ́: «Puígóodi lɛ́ púim poáboŋɛn lɛ́ na mobag mó pɛdá na mufun əgiim əgiʼkumin, wɔnɔ́ ndɛ agá ungiíbən ə!

⁴⁹Adɛ́ mɔɔ́s miim njɛ́ɛ na pəŋi, ndáagaaʼkananɛ pɔɔd a Tɛ́mpɛl a! A igə aa pudiʼkə́əgiʼkuminií a kɛnɛŋ kɛ́ɛg? Náa, nkə kɛ́ɛnɛ kiim kɛ́lɛ agodáŋana náan lɛ́ ná nkə kɛ́ kíyə́dílə́ə́ a Kálaʼtaʼ kɛ́as.»

⁵⁰Paaʼkan piim pááság kaásɔɛ́da na ɔʼtɛ́d, pə́ə́dí Yə́sus.

⁵¹Ɔnyɔmmɔ́n o moóngaa nyummú ayɛ́ɛ kɔ áay. Ayɛ́ɛ moóngaa nyɔ́ ayɛ́ɛ yiim ə́yə́njən Yə́sus. Ná páyaʼkanyɔ́ŋɛn kumuúgumin, yiídí ámáyáyɛ́dɛ́ɛ́ kɛsom kɛ́ ombɔ́m kɛ́ əyə́súŋin a nɛdáá, aásaa kɛnɔ nsun iyó agodɛ́da lɛ́ əgín kɛsom kɛ́ ombɔ́m kɛ́ɛg kɛ́lɛ́ na kɛ́lɛ́ aa əyə́súŋin a nɛdáá.

⁵²

⁵³Píígúmin Yə́sus, pámɛ́ɛn na nyɔ́lɛ́ a nó Ɔnjaaganɛʼ pɛfɔny nyɔ́ oʼkóʼkóón. Kɔ́gɔ́ɔg aa páyɛ́ɛ́n agaágɔnyɛd lɛ́ na puʼkúm pó payaaganɛʼ pɛfɔny na ponnom pó a nigúu na palɛŋ pɛcɛm.

⁵⁴Píɛ ayɛ́ɛ əgiim ə́yə́njən Yə́sus laálá a ngim súʼtə́ə́ a oʼtómódáán wó ɔnjaaganɛʼ pɛfɔny nyɔ́ oʼkóʼkóón, ɔɔ́sɔ́d kɔ, əə́ləndin na pəgudin agoósa yug.

⁵⁵Puʼkúm pó payaaganɛʼ pɛfɔny na ungim nyɔ́ ayɛ́ɛ a ɛgɔny yɔ́ɔ́bɔn ɛ pɛyɔm yɛ́ ɛgóón yɛ́ɛy pə́ə́bə́ə́ kuunə ɛgom yɛ́ pándagɛɛ́ʼkɛnɛɛ́ Yə́sus nsɔ́ɔ́ a yɛ́lɛ́, pámoyóon. Náa, pádɛʼkɔ́ɔgɔɔŋ.

⁵⁶Kɛ́lɛ lɛ́ ɛ́fɔlɛ́ ɛ́yɛ́ɛ amoosóman pɛbán a nkó[67], náa, páyɛ́ɛ pádiɛn tɛn unuʼ úmmuʼ. Páyɛ́ɛ lɛ́ nyóonɛ əə́səə ndɛ́ŋ, nyummú ə́yiim, ə́əsəə tɛn kiə́ŋ ndɛ́ŋ.

⁵⁷Náa pɔsɔ́g pə́mmú pə́əgiim adɛ́lɛm, páásómɛn Yə́sus kɛbán a nkó, pɔ́nɔ́:

⁵⁸«Pəsi tɛyóób əə́səə ɔnɔ́: “Ndɛ́ɛ́ kubugə Tɛ́mpɛl yɛ́ɛnɛ yɛ́ pɔɔd aa pɛ́ɛ́wáag, njiʼkini kowáag yɛndɛ́ŋ a mədúg mádáád. Yɛ́ɛy ɛdɛndɛ́ɛ́ kɛɛn yɛ́ ɛmáwáágɛ́ɛ na ɔmbɔg á pɔɔd.” »

⁵⁹Ɔmbɔ́ tɛn a kɛ́ɛg pádɛʼkɛ́ɛ unuʼ úmmuʼ.

⁶⁰Ɔnjaaganɛʼ pɛfɔny nyɔ́ oʼkóʼkóón aáság kodɛ́ɛmɛn kidə́níʼtən a kɛgaágadɛ kɛ́ ɛgɔny, náa ɔnɔ́ na Yə́sus: «Odɛɔ́sɔyɛd a, mbáa? Nkə kɛ́ɛnɛ kɛ́ pálɛɛ́ əgusəə a nkó yaaŋ óoʼ, udiə́buyúlisini ə́?»

⁶¹Yə́sus ayɛ́ɛ sáb, adɛmoogá ɔmbɔ́ pɛbɛɛ. Ɔnjaaganɛʼ pɛfɔny nyɔ́ oʼkóʼkóón aáság kumuŋíən kə́mmú ɔnɔ́ əə: «Ngɔ́ɔ́, olɛ Məsíi ə? Olɛ Mɔɔ́n o Táán nyɔ́ tɛlɛɛ́ agɔnyáadanɛ a?»

⁶²Əyímuyúlísíni ɔnɔ́: «Ɛɛ́ɛ, kɛ́lɛ náan. Polɛ́ɛ́ kɛʼtála mɛ Mɔɔ́n o mɔɔd undəndínə́ə́n a ombɔg ó nɛnom ó Táán o toɛn tuim. Polɛ́ɛ́ kɛʼtála tɛn ndə́əgiim nsuu kɔ́gɔ́ɔg a kɛbɛd a mɔɛn[68]»

⁶³Ná Ɔnjaaganɛʼ pɛfɔny nyɔ́ oʼkóʼkóón ayóób náan, yiígúmin kilə́ə́ kiə́ŋ aáwag waás, ɔnɔ́: «Pɔɔd pá mbaasɔ́ pá igə pə́mmú aa tiə́guunə!

⁶⁴Pəŋibáamɔɛ́d pomóób wɔnɔ́ ná alɛɛ́ agofánan Táán. Tíɛlɛ tuə́ ə́?» Ungim aáság kusəə lɛ́ alɛ na nsɔ́ɔ́, pámoyóon[69]

⁶⁵Pɔsɔ́g pə́mmú pə́ə́bə́ə́ kumudúəŋənən pɛda a udi, pə́mmú páayaŋ kumuugub udi na kilə́ə́, páamodóan pɛʼkam, pɔ́nɔ́ na nyɔ́lɛ́: «Aanɛn ánɛ aa amágoogó!» Pəʼpulúus pə́yímuyə́suídíníí, páamosában ambany a ombáŋ[70]

⁶⁶Píɛ ayɛ́ɛ undəndínə́ə́n káanɛ a oʼtómódáán. Náa moóngaa ɔʼkɛ́ɛd nyummú, uʼkudin wo Ɔnjaaganɛʼ pɛfɔny nyɔ́ oʼkóʼkóón əə́giim kɛnɔ kɛ́ Píɛ ayɛ́ɛ.

⁶⁷Ná yɛɛ́dála Píɛ aágoósa yug, yɛɛ́lɛ́ŋ kumuúsəsəŋəni, náa ɔnɔ́ na nyɔ́lɛ́: «Wɛ, oyɛ́ɛ tɛn a ondáŋ ó Yə́sus, mɔɔd o Násalɛd nyóon!»

⁶⁸Náa, Píɛ ayácɛ́mɛ́ɛ́, ɔnɔ́: «Ndóo, ntɛálɛŋ kɔmɔɛ́d nkə kɛ́ɛg kɛ́ olɛɛ́ əgusəə. Alɛ ntɛób ɔmbɔ́ koob.» Aáság kodɛ́ɛmɛn kɔ áay, amɛ́ɛn ələndin a nɛag nɛ́ ngə́, a nɛsɔd nɛ́ a oʼkág wó Nkúm yɛ́ nkóʼkóón ɛ payaaganɛʼ pɛfɔny. [[71]]

⁶⁹Náa, uʼkudin nyóon əyíʼkíni kodála Píɛ, əmíʼkíni kəə́bə́ə́ kosɔyɔ na pɔɔd pá páyɛ́ɛ kɔ áay ɔnɔ́: «Mɔɔd nyóonɛ alɛ mɔɔd nyɔ́ a ondáŋ ó pɔɔd pá Yə́sus!»

⁷⁰Píɛ əyíʼkíni kaácɛma, ɔnɔ́: Iyó kɛ́dɛɔ́gɔ náan. Ɛyaa ɛ́ kɛnɛŋ a ngim yɛ́ɛy, pɔɔd pá páyɛ́ɛ kɔ áay pə́ə́bə́ə́ kosɔyɔ pɔ́nɔ́ na Píɛ: «A fɔ́lɔ́b, olɛ a ondáŋ wɔ́ɔ́bɔn. Wɛ ɔmmɔɛ́d olɛ mɔɔd o Kalilə́ə!»

⁷¹Náa Píɛ ɔnɔ́: «Táá módáád a mɔɛn, ntɛlɛŋɛn mɔɔd nyóon nyɔ́ polɛɛ́ əgusəə! Mbaʼkosom pɛnyaʼ, Táán yɛ́mbɔ́nɛsɛ!»

⁷²Əgín ná yiísə́ə́ náan, kɛbaŋ kɛ́ nsɛɛ kɛ́ annam ábaan kɔʼkɔ́lɛ́ɔʼkɔɔ. Aáság kaáyɔ́ɔ́ŋɛ tɔgɛ́ɛ́ tó Yə́sus ayɛ́modɛánɛ. Yə́sus yiísə́ə́ ɔnɔ́ na nyɔ́lɛ́: «Kɛbaŋ kɛ́ nsɛɛ kɛ́ annam ábaan kíədíin kɛdaŋ ná wəə́ʼkiʼtəm pɛnɛŋ pɛ́dáád wɔʼkɔ́ odɛndɛŋɛn.» Ná ayáyóŋɛ́ɛ́ náan, əə́bə́ə́ kolɛɛ.