Read Yambeta Mə́líʼkus 15 Bible Online

Mə́líʼkus 15 - Yambeta bible

Mə́líʼkus 15

¹Na pɛbáŋɛn pɛ́ a koany kaáyɛnɛ, puʼkúm pó payaaganɛʼ pɛfɔny, na ponnom pó nigúu, na palɛŋ pɛcɛm, na ungim nyɔ́ ayɛ́ɛ a ɛgɔny yɔ́ɔ́bɔn yɛ́ ɛgóón yɛ́ɛy, páyágɔ́nyɛ́dɛ́ɛ́ agoyɔɔ kɛbán kiə́ŋ. Pə́yímuusúŋ tuwoo a ombɔg, pámɛ́ɛn na nyɔ́lɛ́ a nó Pɛláad.

²Pɛláad əə́bə́ə́ komolóoya, ɔnɔ́: «Olɛ nkúm ɛ Yúdɛn a, ngɔ́ɔ́?» Yə́sus əyímuyúlísíni ɔnɔ́: «Náan ó! Kɛ́lɛ náan wɔnɔ́ ná olɛɛ́ əgusəə.»

³Puʼkúm pó payaaganɛʼ pɛfɔny póyɛ́ɛ əgín agosóman Yə́sus ɛ́fɔlɛ́ ɛ́ pɛbán a nkó.

⁴Náa Pɛláad əyíʼkíni kuŋíən na Yə́sus ɔnɔ́ əə: «Tuə́, odɛágaánɔna a? Odɛɔ́gɔ agoob pɛsɔ́mɛn pɛ́ɛnɛ piim pɛ́ pálɛɛ́ əgusuginə a nkó yaaŋ á!»

⁵Náa, Yə́sus adɛʼkɛ́ɛ agogáaŋanan. Ɔmbɔ́ pɛbɛɛ a kɛbán əgín kímuʼ adɛʼkáabaalɛ. Pɛláad ayáfɛ́máá kɛ́fɔlɛ́ na kaásab kóog kó ayásábɛ́ɛ́ náan.

⁶Maag miim a wɔɔ́n ó Páska, kɛ́yɛ́ɛlanɛ lɛ́ Pɛláad əəlis mɔɔd o yoog yɛ njaan úmmuʼ nyɔ́ nigúu níəŋíən lɛ́ ə́lis.

⁷Náan aa a kɛnɛŋ kɛ́go kɛ́ɛg, mɔɔd nyummú ayɛ́ɛ a yoog yɛ njaan niiŋ lɛ́ Palábas. Páyɛ́ɛ a yɛ́lɛ́ na pɔsɔ́g pə́mmú pá pídə́ə́míni oʼto wɔɔ́s wúmmú na nɛlaamɛʼ, pámáyoon mɔɔd.

⁸Náa kiʼtúú kɛ́ pɔɔd kɛ́agɛɛn a nó Pɛláad əgumuŋíən lɛ́ yɛ́ɛlɛ ondoŋá.

⁹Pɛláad əyíbuŋíən ɔnɔ́ na pɔ́lɛ́ əə: «Oo, poanyɔ́ŋɛn anɛ́ɛ́n lɛ́ mpuúlisin ánɛ ə́? Nkúm ɛ Yúdɛn əə́?»

¹⁰Kɛ́lɛ lɛ́, Pɛláad yɛɛ́lɛŋɛn lɛ́ a yaág yɛ́ əngis aa puʼkúm pó payaaganɛʼ pɛfɔny puígúmin Yə́sus əgiim amosɔ́mɛn na nyɔ́lɛ́.

¹¹Náa, puʼkúm pó payaaganɛʼ pɛfɔny poɛ́báya kiʼtúú kɛ́ pɔɔd kɛ́ɛg lɛ́ pádɛ́anɛ na Pɛláad, ə́buúlisin Palábas. Pááság komodɛ́anɛ náan.

¹²Náa Pɛláad əə́giiʼkini kusiəd tɔgɛ́ɛ́, ɔnɔ́ na pɔ́lɛ́: «Nyɛ́ɛlɛ anɛ́ɛ́n tuə́ na sɔ́g nyóonɛ nyɔ́ polɛɛ́ agodɔ́ŋɔn lɛ́ nkúm ɛ Yúdɛn əə́?»

¹³Pə́yímuyúlísíni nɛŋo a mɔɛn pɔ́nɔ́: «Ɛ́ʼkɛn toɛn pámoóbaŋan a ɔmbásá o!»

¹⁴Náa Pɛláad ɔnɔ́ na pɔ́lɛ́: «Kɔbɛ́ igə anɛ́ɛ́n áa amɛ́ɛ́lɛ ə́?» Náa, pɛ́ɛ́sásɛd agá kə́mmú na toɛn pɔ́nɔ́: «Ɛ́ʼkɛn toɛn pámoóbaŋan a ɔmbásá o!»

¹⁵Wɔnɔ́ ná Pɛláad adɛʼkɛ́lɛɛ́ anyɔ́ŋɛn lɛ́ kiʼtúú kɛ́ pɔɔd kɛ́ɛg kɛób ilúún na nyɔ́lɛ́, aáság kubuúlisin Palábas, amáboyɛ́ʼkɛn Yə́sus lɛ́ pámobáam ná pámoóbaŋan a ɔmbásá.

¹⁶Pasɔ́njaa páyɛ́ɛ́n na Yə́sus a yoog yəəŋ ɛ nɛlaamɛʼ yɛ ngɔ́mɛnaʼ yɛ́ nkóʼkóón, . Páyɛ́ɛ agodɔ́ŋɔn kɛnɔ kɛ́go kɛ́ɛg lɛ́ pɛlɛʼtówa. Páyányámánánɛ́ɛ́ kɔ pɔ́lɛ́ piim.

¹⁷Píníígi Yə́sus ntaa yɛ́ mbógógó.[72] Píísiə́d nuwoo nó pɔsɛ́n páánog, pámámosɔ́nɛg a oʼto.

¹⁸Pə́ə́bə́ə́ anɛ́ɛ́n komoónyɛɛŋanɛ, pə́əmuúsoyidəni pɔ́nɔ́: «Nkúm ɛ Yúdɛn, calɛʼ calɛʼ calɛʼ!»

¹⁹Páyɛ́ɛ agomogóaŋan na niob a oʼto, pə́əmudúəŋənən pɛda, pə́əgiim ədúmə əndu a udi wə́ə́ŋ, nti yəə́gəə́siŋ a nsí wɔnɔ́ ná ándɛ páagɛɛlanɛ a udi wó nkúm.

²⁰Ná páyɛ́ɛ páʼkoman ɛnyɛɛŋɛʼ yɛ́ɛy náan a nkó yəəŋ, pááság kumudíŋin ntaa yɛ́ mbógógó yɛ́ pə́yímuníígi, pə́mə́muyúlísíni pilə́ə́ piə́ŋ. A ngim yɛ́ɛy aa pɛ́ɛ́lón na nyɔ́lɛ́, pámɛ́ɛn amoóbaŋan a ɔmbásá.

²¹Pə́yə́búníí na mɔɔd nyummú niiŋ lɛ́ Simɔ́ɔŋ, mɔɔd nyɔ́ a pálɛ́ɛg ɛ Silɛ́ɛn, sɛ ɛ pa Alɛsándɛlɛ pɔ́lɛ́ na Ulufúus, əə́gəə́yímbuúlini a pɔlɛ́m. Pasɔ́njaa pááság komoogóda ambaan lɛ́ ógóomin Yə́sus konyáŋɛn ɔmbásá.

²²Páyɛ́ɛ́n na Yə́sus a kɛnɔ kímmú pɔ́ɔdɔ́ŋɔn a tɔgɛ́ɛ́ tó Əbələ́ə lɛ́ «Kologóʼta.» Áay lɛ́ «kɛnɔ kɛ́ kɛ́yɛ́ɛ wɔnɔ́ kɛlɛ́ʼtɛ́g kɛ́ oʼto.»

²³Páyaʼkayɛ́moyɛ́ʼkɛn maloʼ məbuúbúlə́ na yoom yímmú, pɔ́ɔdɔ́ŋɔn lɛ́ míil. Náa, yɛɛ́sáŋɛ́nɛ koŋo.

²⁴Páyɛ́mobáŋan a ɔmbásá, a ngim yɛ́ɛy, agɛɛlɛ lɛ́ páabanan pilə́ə́ piə́ŋ, pɛ́ɛ́lá ntɔŋ agolɛŋ ánɛ aa ə́siədií kɛ́yaán[73]

²⁵Áanɛ na kɛás, a njə́ŋí ɛ́ʼtáan na íniʼ aa pɛ́ɛ́báŋan Yə́sus a ɔmbásá.

²⁶Kɔ a ɔmbásá, píídílid a igúg igə aa páyɛ́moyóón a yɛ́lɛ́. Náan aa píídílid pɔ́nɔ́: «Táá, nkúm ɛ Yúdɛn.»

²⁷Wɔɔ́s ogo wóow, pɛ́ɛ́báŋan tɛn pɔɔd pə́mmú kɔ áay pábaan a ɛbá ɛ́ Yə́sus. Páyɛ́boyáágan lɛ́ ɛ́nɛ́ sɔ́g a ɔmbásá wə́ə́ŋ lɛ́ nyóonɛ a ombɔg ó Yə́sus ó nɛnom, nyummú a oó kɛmɛs. Pɔ́lɛ́ páyɛ́ɛ piíbən pá pagóón, páagoóna pɔɔd. [

²⁸[74]]

²⁹Pɔɔd pá páyɛ́ɛ agosánan kɔ áay páyɛ́ɛ agodam pámoodóga tɛn, pə́əgəə́liʼtəni na nto pɔ́nɔ́: «Ɛɛ́ɛ, wɛ nyɔ́ oyɛ́ɛ əgusəə wɔʼkɔ́ wəəbugə Tɛ́mpɛl wíiʼkini kowáag yɛndɛ́ŋ a mɔɔ́s mádáád súg[75],

³⁰ɔ́yɔ́yɛ́ɛ́ wɛɛ́nyɔ́amɔɛ́d anɛ́ɛ́n, wə́díŋin a ɔmbásá wóow, úsuu!»

³¹Yoom tɛn náan ímuʼ na puʼkúm pó payaaganɛʼ pɛfɔny na palɛŋ pɛcɛm. Pɔ́lɛ́ tɛn páyɛ́ɛ agomoónyɛɛŋanɛ, pɔ́ɔsɔyɔ kɔ pɔ́lɛ́ na pɔ́lɛ́ pɔ́nɔ́: «Iíi, ayɛ́ɛ ɔgɔɔyɔnɛ pɔsɔ́g. Nɛ́gɔŋ anɛ́ɛ́n óoʼ, ɔdɛɔ́gɔ ogɔɔ́yɔ́ɔyɛ nyɔ́lɛ́nyɔ́amɔɛ́d!

³²Ayɛ́ɛ əgəə́səsəə ɔnɔ́ nyɔ́lɛ́ alɛ Məsíi, alɛ nkúm ɛ nigúu nɛ́ Ɛ́sɛlayɛl. Yə́díŋin anɛ́ɛ́n a ɔmbásá wóow nɛ́gɔŋ yi, ə́suu. Tɛmaʼkodála lɛ́ əə́suu, tɛagaag oʼto na nyɔ́lɛ́!» Ɔmbɔ́ tɛn pɛbɛ́ pɛ́ pɔɔd pɛ́ pɛ́ɛ́báŋan kɔ áay a ɛbá ɛ́ Yə́sus, páyɛ́moyágásɛ́nɛ́ɛ́ tɛn agomoodóga.

³³Ná tóɛf iyííg, mbin yiídə́əŋ a nsí ngim pilíb, súʼtə́ə́ a mangɛn mádáád.

³⁴A mangɛn mádáád, Yə́sus yiídóʼtin kiʼkíŋ na toɛn ɔnɔ́: «Ɛ́lɔ́ɔy, Ɛ́lɔ́ɔy, lámá sabágtáni?» Áay lɛ́: «Táán waam, Táán waam, tuə́ áa umíʼtúmín ngim náan[76]?»

³⁵Ná ngab ɛ pɔɔd yɛ́ ɛyɛ́ɛ kɔ áay ɛyóób náan, pə́ə́bə́ə́ kosɔyɔ pɔ́nɔ́: «Pomóób ə́, ɔɔ́ndɔdɔ́ŋɔn Ɛlɛ́as!»

³⁶Sɔ́g nyummú kɔ áay a ondáŋ wɔ́ɔ́bɔn aáság kɛɛn na ɔʼtɛ́d, əə́nyum ɛʼpɔ́ɔnsɛ a pɛŋwáŋwáŋá pɛ́ maloʼ, əmíim áfanyɛg a oʼto ó niob, amɛ́ʼkɛn na Yə́sus lɛ́ ɔ́sɔ́sɔ[77] Yiísə́ə́ ɔnɔ́ na pɔsɔ́g: «Póŋáan, tɛ́dála nga Ɛlɛ́as əəgiim əmuúsuuli a ɔmbásá!»

³⁷Yə́sus aáság kiiʼkini kudóʼtin kiʼkíŋ na toɛn, əmíísímid, aádó oʼto.

³⁸Sanjaʼ yɛ́ pɛ́ɛ́sandɛgɛnɛ a Tɛ́mpɛl[78] yaáság kosaalɛg pɛsaa pɛ́baan paáám, kəə́bə́ə́ a oʼto agɛɛn əgiig a nsun.

³⁹Ná sɔ́njaa yɛ́ yɛɛ́dɛ́lɛmɛn a udi wó ɔmbásá yɛɛ́dála wɔnɔ́ ná Yə́sus ayáág nɛŋo, əə́gú, yiísə́ə́ yɔ́nɔ́: «A fɔ́lɔ́b, mɔɔd nyóonɛ ayɛ́ɛ Mɔɔ́n o Táán!»

⁴⁰Ngab ɛ pagɛ́ɛd ɛyɛ́ɛ kɔ. Pɛ́ɛ́dɛ́lɛ́man laálá, pə́ədíin pánadɛna agá pɛnág agodɛ́ʼtɛg kiim kɛ́ kɛ́yɛ́ɛ agaásan. Kɔ a ondáŋ ó pagɛ́ɛd wóow, Malɛ́a nyɔ́ a Magdala ayɛ́ɛ kɔ, na Malɛ́a tɛn nyummú, ŋŋí ɛ pa Sɛ́ag, ɔnyɔmmɔ́n o mɔɔd, pɔ́lɛ́ ná Yosə́ə. Ɔʼkɛ́ɛd tɛn nyummú niiŋ lɛ́ Salomə́ə ayɛ́ɛ kɔ.

⁴¹Páyɛ́ɛ pagɛ́ɛd pá páyɛ́ɛ əgiim pə́yə́njən Yə́sus əgín kɔ́gɔ́ɔg a Kalilə́ə, páamoyɛ́ɛlanɛ maʼtóʼtóm. Ɛ́fɔlɛ́ ɛ́ pagɛ́ɛd tɛn yɛ́ íyíím ɛ́bágananɛ na nyɔ́lɛ́ a Yolósalɛm ɛ́yɛ́ɛ kɔ.

⁴²Niób nɛáság kiim əgiig. Na niób nɛ́go nɛ́ɛn pɔ́nɔ́ kisúgiʼ na koany aa Yúdɛn ɛ́yɛ́ɛ yaáboŋɛn kɛ́lɛ́.

⁴³Mɔɔd nyummú niiŋ lɛ́ Yósɛb, kibíəniʼ kɛ́ pálɛ́ɛg yɛ Əliməʼtə́ə aáság kiim alon. Ayɛ́ɛ mɔɔd tɛn nyɔ́ ayɛ́ɛ lɛ́ amaʼkosɔyɛd a ɛgɔny yɔ́ɔ́bɔn yɛ́ ɛgóón yɛ́ɛy, páyɛmoyóob. Nyɔ́lɛ́ tɛn ayɛ́ɛ aándaamɛna pɛda lɛ́ Táán alɛ́ɛ́ kolaamɛ. Yɛɛ́nóm ɔʼtɛ́m amɛ́ɛn əŋíən na Pɛláad lɛ́ ámoyɛ́ʼkɛn kɛlóŋ kɛ́ Yə́sus nyɔ́lɛ́ yɛ́ɛn əni.

⁴⁴Ná Pɛláad ayóób lɛ́ Yə́sus əə́ʼkugu, əyə́wúnə́níí, aáság kusəə lɛ́ pɛ́ɛn amodɔ́ŋɔnɔn sɔ́njaa yɛ́ nkóʼkóón yɛ́ píídə́nígi a kinuŋ. Əyímuŋíən ɔnɔ́ na nyɔ́lɛ́: «Yə́sus əə́gú kalaʼ a?»

⁴⁵Ná sɔ́njaa ɛyɛ́modɛánɛ lɛ́ aádó oʼto kalaʼ, Pɛláad aáság kɛɛ́ʼkɛn Yósɛb toɛn lɛ́ yɛ́ɛn əsiəd kɛlóŋ.

⁴⁶Yósɛb yɛɛ́wɛ́ɛ́n ombɔ́m ó lɛ́ɛŋ, wə́əfúŋə púyúŋ púyúŋ. Yɛɛ́gábɛ́na óndoʼ yɛ́ pɛ́ɛ́báŋan Yə́sus na yɛ́lɛ́, əə́suuli kɛlóŋ a ɔmbásá, aágóda na ombɔ́m, amɛ́ɛn əni. Əyímuúní a kəəniʼ ká káyɛ́ɛ kɔ áay. Káyɛ́ɛ kədímə́ə́n wɔnɔ́ kɛbaŋ a kɛgon. Ná ayɛ́ɛ əə́ʼkumuúni, aáság kusiəd kɛa kɛ́ kɛdám kɛ́ nɛdáán, əə́míngílídə́ni agolɔ́g unuʼ ó kəəniʼ na nɛ́lɛ́.

⁴⁷Pa Malɛ́a nyɔ́ a Magdala pɔ́lɛ́ na Malɛ́a nyummú páyɛ́ɛ əgín kɔ áay, páadɛ́ʼtɛg wɔnɔ́ ná pálɛɛ́ əguni Yə́sus.