Read Yambeta Mə́líʼkus 3 Bible Online

Mə́líʼkus 3 - Yambeta bible

Mə́líʼkus 3

¹Yə́sus əyíʼkíni kosɔd a yoog ɛ pɛɔ́sɔ́gɔ́lɔ́n. Mɔɔd nyummú ayɛ́ɛ kɔ a yoog ɛ pɛɔ́sɔ́gɔ́lɔ́n yɛ́ɛy, na ombɔg úmmuʼ uʼkuə́n.

²Pafalɛsɛyɛ́ɛŋ páyɛ́modámɛn əngis agodála nga aagoómɛ mɔɔd nyóon naánɛ́ yɛ́ɛy, wɔɔ́s ó kisúgiʼ ná pɔ́ɔŋ ɛgom ɛ́gomosɔ́mɛn lɛ́ alɛ agɛɛlanɛ kɔbɛ́.

³Náa ɔnɔ́ na mɔɔd nyóon nyɔ́ ayɛ́ɛ abany ɛyɔgɛʼ: «Tɛ́ɛ́mɛn, wíim adɛ́lɛm áanɛ a udi ó mɔɔd ungim.»

⁴Mɔɔd aáság kiim adɛ́lɛm. Náa Yə́sus ɔnɔ́ na pɔɔd pá pə́yímubísin əngis: «Kɛ́lɛ a pɛcɛm piə́s lɛ́ nkə ə́? Kɛ́lɛ lɛ́ mɔɔd yɛ́ɛlɛ kɔŋɛʼ wɔɔ́s ó kisúgiʼ oóm, yɛ́ɛlɛ kɔbɛ́ ə́? Kɛ́lɛ lɛ́ yɔ́ɔyɛ mɔɔd wɔɔ́s wóow oóm, ámoyóon ə́?» Ɔmbɔ́ úmmuʼ ədiʼkə́əgúbin unuʼ əgumuyúlisini kɛbán.

⁵Na ilúún yɛ́ɛy, Yə́sus aáság kobodɛ́ʼtɛg log log log. Ɔʼtɛ́m wə́ə́ŋ óyɛ́ɛ ɔmbɛ́ na pɔ́lɛ́ lɛ́ yɛɛ́dála lɛ́ pálɛ na ntɛ́m yɛ́ nnasáŋ. Náa ɔnɔ́ na mɔɔd nyóon: «Tə́ə́míni ombɔg.» Əə́də́ə́míni, wándɛ kə́lə́ŋ.

⁶Pafalɛsɛyɛ́ɛŋ pá páyɛ́ɛ kɔ áay a yoog ɛ pɛɔ́sɔ́gɔ́lɔ́n pááság kolónan, pámɛ́ɛn aboan pɔɔd pá a ngim yɛ Ɛlóod ɔgɔɔ́dɔɔgɛ na pɔ́lɛ́. Pɛ́ɛ́gód unuʼ úmmuʼ a wɔnɔ́ ná páagɛɛlɛ ná póon Yə́sus.

⁷Yə́sus ayɛ́ɛ́n na paaʼkan pə́ə́ŋ a ɛbá ɛ́ noom nó Kalilə́ə. Ɛ́fɔlɛ́ ɛ́ pɔɔd íyímuyə́ən kɔ. Pə́yíím pádɛ́ɛman lɛ́ póonɛ a Kalilə́ə, pə́mmú a Siudə́ə,

⁸pə́mmú a pálɛ́ɛg ɛ Yolósalɛm. Pɔsɔ́g pə́mmú pə́yíím pádɛ́ɛmɛn a kɛsaa kɛ́ nsí kɛ́ Idumə́ə, pə́mmú nsɛ́ɛ́ ɛ noom nó Siuludɛ́ɛŋ, na pɔsɔ́g tɛn pá pə́yíím pádɛ́ɛman a əʼkúu yɛ́ a kɛsaa kɛ́ nsí kɛ́ Tíil na a kɛ́ Sɛdɔ́ɔŋ. Páyɛ́ɛ kiʼtúú kilúd pá pə́yíímən kɔ áay lɛ́ páyóób nugəm nó nkə kiim kɛ́ Yə́sus ayɛ́ɛ agɛɛlɛ.

⁹Yə́sus yɛɛ́dɛánɛ na paaʼkan pə́ə́ŋ lɛ́ pámoóboŋɛnɛn kɛʼkɔ́m, nyɔ́lɛ́ ábág kɔ agɛɛlɛ lɛ́ kiʼtúú kɛ́ pɔɔd kɛ́ɛg kɛ́ kɛ́lɛɛ́ agaányɛŋ a nkó yəəŋ kɛ́dɛyɛ́modása.

¹⁰Kɛ́lɛ lɛ́, wɔnɔ́ ná ayɛ́ɛ agoómanɛ pabámbany piíŋ, ungim nyɔ́ ayɛ́ɛ abany, ayɛ́ɛ agaányɛŋ a nkó yəəŋ lɛ́ ná ámodɔ́bɛd əgín komodɔ́bɛ́dáán, yóom.

¹¹Pɔsɔ́g pá məŋun má mabɛ́ máyɛ́ɛ na pɔ́lɛ́, páyɛ́ɛ pɛɛlanɛ lɛ́, ná páamoodála, pə́yiim əmudə́əŋənən a ambaan, páasása nɛŋo a mɔɛn pɔ́nɔ́: «Wɛ, olɛ Mɔɔ́n o Táán óo!»

¹²Náa, nyɔ́lɛ́ ayɛ́boyáágánan mbaŋ, ɔnɔ́: «Ná poándagɛɛnɛɛ́, podɛyɛ́ʼkwaaŋɛ.»

¹³Yə́sus yɛɛ́bág a oʼkon a mɔɛn, aáság kodɔ́ŋɔn ngab yɛ́ yɛɛ́nyɔ́ŋɛn. Pááság kiimən kɛnɔ kɛ́ ayɛ́ɛ.

¹⁴Páyɛ́ɛ nto yówád na ɛ́baan yɛ́ əyííyid. Ayɛ́boólóg ɔnɔ́ «pɔɔ́n pə́ə́ŋ pá maʼtom.»[10] Yiídə́nígi pɔsɔ́g póob lɛ́ pɛ́ɛn a ɛbá yə́ə́ŋ, áaboodom lɛ́ pɛ́ɛn alɔɛgɛ Tɔsɔm Tólaŋ.

¹⁵Ayɛ́boyɛ́ʼkɛn toɛn tó koŋɛŋ məŋun má mabɛ́.

¹⁶Táá əngiŋ á pɔɔ́n pá maʼtom págo pá pówád na pábaan aa yɛ́ɛnɛ lɛ́: Simɔ́ɔŋ nyɔ́ Yə́sus ayɛ́moólóg tɛn lɛ́ Píɛ,

¹⁷na pa Sɛ́ag pɔ́lɛ́ na móŋŋí Sɛ́aŋ, pɔɔ́n pá Səbədə́ə. (Yə́sus ayɛ́boólóg tɛn lɛ́: Poánɛ́ɛ́gɛs. Áay lɛ́, pɔɔd na toɛn tó mbambany),

¹⁸na Əndələ́ə, na Filíib, na Pəʼtələmíi, na Maʼtɛ́as, na Tómas, na Sɛ́ag tɛn nyummú, mɔɔ́n wo Əlifə́ə, na Tadə́ə, na Simɔ́ɔŋ tɛn nyummú, (ayɛ́ɛ ɔnnɔnaʼ pɛbán pɛ́ nigúu)

¹⁹na Siudáa Ɛsɛʼkalɛyóod, nyɔ́ yɛɛ́lɛ́g Yə́sus.

²⁰A ngim yɛ́ɛy, Yə́sus aáság kɛɛn a noádɛʼ. Kɛnɔ kɛáság kiiʼkini kiim əyə́əg kɔ síɛ́ɛ́d. Kɛnɛŋ kɛ́ɛnɛ lɛ́ ánɛ́ɛnɛ na paaʼkan pə́ə́ŋ fiɛ́d.

²¹Ná yoog yəəŋ ɛ pɔɔd ɛyóób náan, pə́yíím pádɛ́ɛmɛn əgiim əmuúsiəd lɛ́ púúli na nyɔ́lɛ́. Páyɛ́ɛ agosɔyɔ pɔ́nɔ́: «Oʼto wə́ə́ŋ wáʼkolɛ́aŋ.»

²²Palɛŋ pɛcɛm pá pə́yíím pádɛ́ɛmɛn a Yolósalɛm páyɛ́ɛ kɔ áay. Pɔ́lɛ́ páyɛ́ɛ agosɔyɔ pɔ́nɔ́: «Pə́lə́səbul, nkúm ɛ məŋun má mabɛ́ aa ɛlɛɛ́ na nyɔ́lɛ́.» Na lɛ́: «Nkúm ɛ məŋun má mabɛ́ aa ɛmoyɛ́ʼkɛ́nɛ́nɛ́ɛ́ toɛn tóod tó alɛɛ́ agoŋɛ́ŋŋaŋ məŋun má mabɛ́ na tólɛ́.»

²³Ná Yə́sus ayóób náan, yiísə́ə́ lɛ́ píim. Əə́bə́ə́ kosɔyɔ na pɔ́lɛ́ a poʼkaʼtɛ́n a mɔɛn, ɔnɔ́: «Tuə́ aa Sáʼtan alɛɛ́ ugiiʼkini kaáŋɛŋ nyɔ́lɛ́nyɔ́amɔɛ́d ə́?

²⁴Kɛnɛŋ kɛ́ pɔɔd pá nigúu nímuʼ páagaánɔɛyɛ pɛdá pɔ́lɛ́ na pɔ́lɛ́, nigúu nɛ́ɛn nɛ́dɛɔ́gɔ nɛ́gɛɛn yuudi?

²⁵Yoom tɛn náan ímuʼ na yoog ɛ pɔɔd yɛ́ ɛlɛɛ́ na məʼtíiyiʼ na məʼtíiyiʼ. Yoog ɛ pɔɔd yɛ́ɛy tɛn ɛdɛɔ́gɔ ɛgɛɛn yuudi.

²⁶Sáʼtan amaʼkɛɛn lɛ́ aagaánɔɛyɛ pɛdá nyɔ́lɛ́nyɔ́amɔɛ́d, oó lɛ́ ɔdɛɔ́gɔ unuʼ úmmuʼ na ngim yəəŋ, Nɛlaamɛʼ niə́ŋ nɛ́dɛɔ́gɔ nɛ́gɛɛn yuudi, níəwu.

²⁷Mɔɔd na mɔɔd ɔdɛɔ́gɔ ogosɔd a yoog ɛ sɔ́g nyummú nyɔ́ alɛɛ́ na toɛn, áanyáŋɛna moom muə́ŋ agosan na mólɛ́ fiɛ́d koyaŋ amoósanya. Əgín aáʼkomoogóda, áay aa aányáŋɛna muim mó mólɛɛ́ a noádɛʼ nó mɔɔd o toɛn nyóon agosan na mólɛ́.

²⁸A fɔ́lɔ́b ndabodɛ́anɛ lɛ́, Táán alɛ́ɛ́ kulisin pɔɔd mabɛ́ mɔ́ɔ́bɔn miim, na tofán tuim tó páamofánan.

²⁹Náa, nyɔ́ alɛ́ɛ́ kosɔyɔɔ́ niiŋ nɛ́ Uŋun wó Ufúlúʼtú kɔbɛ́, nyóon, Táán adɛndɛ́ɛ́ kumuúlisin lɛ́ nsɔ́ɔ́ yɛ́ ɛlɛɛ́ a kɔbɛ́ kóog ɛlɛ́ɛ́ kɛɛn na nyɔ́lɛ́ a pɛnɛŋ piim.»

³⁰Yə́sus ayɛ́ɛ əgusəə náan lɛ́ páyɛ́ɛ agosɔyɔ pɔ́nɔ́ nyóon alɛ na uŋun wó ɔmbɛ́.

³¹Na ŋŋí, na pomóŋŋí pá Yə́sus foáy kɛnɔ kɛ́ ayɛ́ɛ. Pádɛʼkɔ́ɔsɔd a yoog a kaadɛ. Pɛ́ɛ́lɔ́b a táán, páádóm mɔɔd lɛ́ ábodɔ́ŋɔnɔn Yə́sus.

³²Pɔɔd páyɛ́ɛ kɔ a yoog piíŋ. Náa pɔ́nɔ́ na Yə́sus: «Táá ŋŋí yaaŋ na pomóŋŋí pááŋ áa póonɛ pálɛɛ́ a táán, pálɛ əguguyúunə.»

³³Əyíbuyúlísíni ɔnɔ́ na pɔ́lɛ́: «Ánɛ aa alɛɛ́ ŋŋí waam əə́? Pa ánɛ aa pálɛɛ́ pomóŋŋí páam əə́?»

³⁴Əə́bə́ə́ kodɛ́ʼtɛg ungim nyɔ́ ayɛ́moyágoʼkɛnɛn, náa ɔnɔ́ na pɔ́lɛ́: «Taa, ŋŋí waam aa nyóonɛ. Pomóŋŋí tɛn páam aa póonɛ.»

³⁵Kɛ́lɛ lɛ́, nyɔ́ alɛɛ́ agɛɛlɛ nɛnyɔ́ŋɛn nɛ́ Táán, nyóon aa alɛɛ́ móŋŋí waam nyɔ́ ɔnɔ́mɛɛd, na móŋŋí waam nyɔ́ ɔʼkɛ́ɛd na ŋŋí waam.