Read Yambeta Mə́líʼkus 4 Bible Online

Mə́líʼkus 4 - Yambeta bible

Mə́líʼkus 4

¹Yə́sus ayɛ́ɛ agaaʼkananɛ pɔɔd kə́mmú a ɛbá ɛ́ noom nó a Kalilə́ə. Ɛ́fɔlɛ́ ɛ́ pɔɔd yááság kiim əgəə́yii kɔ a ɛbá yə́ə́ŋ, kiʼtúú kilúd. Wɔnɔ́ ná kɛnɔ kɛ́yɛ́ɛ miíi, yɛɛ́bág a kɛʼkɔ́m kɛ́ kɛ́yɛ́ɛ kɔ áay, əə́ləndin kɔ lɛ́ nyɔ́lɛ́ a məní, pɔɔd a kɛdɛ́ɛ́.

²Ayɛ́boyáʼkánánɛ pɛbán piíŋ a poʼkaʼtɛ́n a mɔɛn. Náan aa əyíbusiə́din nkaʼtɛ́n yɛ́ɛnɛ, ɔnɔ́:

³«Mɔɔd nyummú aa nyóon ayɛ́ɛ́n əmisə masám a pɔlɛ́m puə́ŋ.

⁴Alɛ anɛ́ɛ́n kɔ əgumisə əə, masám mə́mmú mááság kɛɛn ədə́əŋ a ɛbá yɛ́ ngə́, pɛsag pímíim, pɛánɛ́.

⁵Mə́mmú míídə́əŋ a kɛgon, mə́míim múús na toɛn lɛ́ nsí ɛlaŋ ɛdɛʼkɛ́ɛ ngíŋ kɔ a kɛnɔ kɛ́ɛg.

⁶Náa, ná yoóy yɛ́ɛ́nás, yɛ́báám əʼtíŋ yɛ́ɛy yá ə́yíím yúus, yááyómbɛ́lɛd, yə́ə́gú lɛ́ nsí ɛdɛʼkɛ́ɛ ngíŋ agɛɛlɛ lɛ́ ngaŋ ɛ́lɛŋ kosɔd.

⁷Mə́mmú tɛn míídə́əŋ a kɛnɔ kɛ́ kɛ́yɛ́ɛ na nɛ́ngany. Náa, ná mə́yúús, nɛ́ngany nɛ́ɛ́báʼkánan, niə́wííyi, nidíŋ ɔmbɔ́ nímuʼ nídiúm.

⁸Mə́mmú anɛ́ɛ́n míídə́əŋ a nsí ɛlaŋ. Mə́yúús, máálɛŋ koyam, əʼtíŋ ə́múúm yəlíg yəlíg yəlíg. Áyɛ́ɛ lɛ́, nɛ́ɛnɛ pɛcógód niʼtin na pɛówád, nímmú əʼtin ádáád, nímmú tɛn əʼtin áʼtáan.»

⁹Yə́sus yiíyíbə́ni ɔnɔ́: «Taa, wɛ nyɔ́ olɛɛ́ na ntóɛŋ ɛgoob, óyoob!»

¹⁰Pɔɔd pááság kosánan. Ná páyɛ́ɛ páʼkolɔb əgín lɛ́ na pɔɔ́n pə́ə́ŋ pá maʼtom pówád na pábaan, na ngab ɛ pɔɔd yimmú yɛ́ yiíligi, pɔɔ́n pə́ə́ŋ pá maʼtom pááság kumuŋíən lɛ́ áboyásɛnɛn poʼkaʼtɛ́n póob.

¹¹Náa Yə́sus ɔnɔ́ na pɔ́lɛ́: «Pəŋi, Táán əmə́bulóódi pɛbán pɛ́ a Nɛlaamɛʼ niə́ŋ pɛ́ pɛ́lɛɛ́ a nuníb. Náa, a pɔsɔ́g pɛ́ndɛ́ŋ, pɔ́lɛ́ pálɛ agoob pɛ́lɛ́ agá a poʼkaʼtɛ́n a mɔɛn.

¹²Táán amáboyɛ́ɛ́lɛ pɔ́lɛ́ náan lɛ́, ɔmbɔ́ páásɛn əngis agodɛ́ʼtɛg, pádɛ́adála yoom. Ɔmbɔ́ pádám ntóɛŋ agoob, pádɛ́agoob yoom lɛ́ ná pádɛʼkásɛ ɔlaa wɔ́ɔ́bɔn, Táán ədiíbulísin tɛn kɔbɛ́ koɔ́bɔn[11]»

¹³Náa Yə́sus əə́səə ɔnɔ́ na pɔ́lɛ́: «Pəŋi, podɛóbɛn nkaʼtɛ́n yɛ́ɛnɛ a! Tuə́ anɛ́ɛ́n áa puə́giim agoob poʼkaʼtɛ́n póʼkáanɛ póndɛ́ŋ puim əə́?

¹⁴«Masám má ummisəʼ alɛɛ́ əgumisə málɛ Tɔsɔm tó Táán.

¹⁵Má mídə́əŋ a ɛbá yɛ́ ngə́ málɛ wɔnɔ́ pɔɔd pá pálɛɛ́ lɛ́ ná páagoob Tɔsɔm tó Táán, Sáʼtan əməʼkiim əgiig, áság kuliogi Tɔsɔm tóod tó tóyɛ́ɛ toáʼkobosɔd a ntɛ́m yɔɔbɔn.

¹⁶Má mídə́əŋ tɛn a kɛgon, málɛ wɔnɔ́ pɔɔd pá páagoob Tɔsɔm tó Táán, pə́əsiəd tólɛ́ na tɔnyɔ́g.

¹⁷Náa, páagaáyɛ́ngɛg tólɛ́ əgín ɛyaa ɛ́ kɛnɛŋ, pádɛáʼkɛ́nɛ lɛ́ tólɛŋ kaágon a ntɛ́m yɔɔbɔn. Əgín ná pɔ́ɔgɔɔŋ njəʼkə́nə́ní, ɔmbɔ́ lɛ́ pálɛ agoboónɔɛyɛ a oʼto ó Tɔsɔm tó Táán, pááság kodambɛlɛd, póóliogi ongoo.

¹⁸Masám má mídə́əŋ a nɛ́ngany, málɛ pɔɔd pá pálɛɛ́ lɛ́ páagoob Tɔsɔm.

¹⁹Náa, wɔnɔ́ ná ɔʼtɛ́m wɔ́ɔ́bɔn ólɛɛ́ a tugúm, páagaáságɛma pɛbán pɛ́ a nsí, pálɛ wɔnɔ́ əʼtíŋ yá ə́diə́guúmíí. Ɔʼtɛ́m wɔ́ɔ́bɔn wó páágɛ́nɛ́ɛ́ a moom, na ɛságág yɛ́ pálɛɛ́ na yɛ́lɛ́, pɛbán pɛ́ɛb pɛ́abáʼkanan Tɔsɔm wɔnɔ́ ná ándɛ nɛ́ngany nɛ́abáʼkanan moom móság kuwu.

²⁰Má mídə́əŋ anɛ́ɛ́n a nsí ɛlaŋ málɛ pɔɔd pá pálɛɛ́ lɛ́ páagoob Tɔsɔm tó Táán, páyaáyɛ́ngɛg tólɛ́ a ɔʼtɛ́m, pə́ə́bə́ə́ kolaa wɔnɔ́ ná tólɛɛ́ əgusəə, páagɛɛlɛ ɛ́fɔlɛ́ ɛ́ pɛbán pɛ́laŋ. Pɛbán pɛ́laŋ pɛ́ɛb aa pɛ́lɛɛ́ wɔnɔ́ əʼtíŋ yá ə́yúúm yəlíg yəlíg yəlíg lɛ́ nɛ́ɛnɛ pɛcógód niʼtin na pɛówád, nɛ́ɛn əʼtin ádáád, nímmú tɛn əʼtin áʼtáan».

²¹Yə́sus əyíʼkíni kusəə ɔnɔ́ na pɔ́lɛ́: «Pə́díəguug ɛláam lɛ́ ná páág a ilúlúú, ɔmbɔ́ lɛ́ a mɔdɛ́gɛ́n yisí, ndóo. Pə́əguug yɛ́lɛ́ agɛɛdɛg a mɔɛn.

²²Kɛ́lɛ lɛ́, yiim yɛ́ ɛ́yɛ́ɛ a nuníb ɛ́lɛ́ɛ́ kolon táán. Yɛ́ ɛ́yɛ́ɛ a pɛɔsɛ́g, ɛ́lɛ́ɛ́ kolon a kɛmoámoáŋ tə́ləə.

²³Taa, wɛ nyɔ́ olɛɛ́ na ntóɛŋ ɛgoob, óyoob!»

²⁴Yə́sus ayɛ́ɛ́n əgín na tɔgɛ́ɛ́ yuudi ɔnɔ́: «Pólóʼkɔd na nkə kɛ́ poágoob oo! Kɛ́lɛ lɛ́, nɔfɛg nó pəŋi polɛ́ɛ́ kofɛgɛnɛɛ́ pɔsɔ́g na nólɛ́, əgín na nólɛ́ aa Táán alɛ́ɛ́ koboófɛgɛnɛɛ́ tɛn pəŋi.

²⁵Kɛ́lɛ́ɛ́ kɛɛn lɛ́, nyɔ́ ogódíí, pə́yiʼkini komosáayɛnɛ agɛɛlɛ lɛ́ yɛ́ɛn na mólɛ́ ilubənən. Nyɔ́ oʼkódií, pə́yiʼkini komogábɛn ɔmbɔ́ əgín yɛ́ ɔnɔ́ nyɔ́lɛ́ ogóódi.»

²⁶Yə́sus aáság kiiʼkiniʼ kubuúsiədin nkaʼtɛ́n yɛ́ɛnɛ ɔnɔ́: «Nɛlaamɛʼ nɛ́ Táán nɛ́lɛ náanɛ wɔnɔ́ mɔɔd nyummú nyɔ́ ayɛ́ɛ́n a pɔlɛ́m puə́ŋ, aágóna ngafón yəəŋ.

²⁷Ɔmbɔ́ əním ɛnɔ oo, ɔmbɔ́ yɛɛn əngis ongóm óo, ngafón yɛ́lɛ́ yəgiim ɛ́lónɛ mmɛʼ, yɛ́ɛlog, andɛŋ wɔnɔ́ ná kímə́mə́ngílə́ə́ kɔ a nsí.

²⁸Moom múəgiim mólog kɔ mólɛ́móamɔɛ́d a nsí. Nidíŋ áa nɛ́ayaŋ əgiim nɛ́bag wɔnɔ́ ombɛ́n, ná tobab túbə́ə́ kiim tómáda, ná ngafón ɛ́wɔɔ, ɛ́wɛ́ɛ.

²⁹Ná yaáman kowɛ́ɛ, mɔɔd o pɔlɛ́m áság kiim abáŋa lɛ́ kɛnɛŋ kɛ́ kobáŋa kiə́ʼkiig[12]»

³⁰Yə́sus əyíʼkíni kusəə ɔnɔ́: «Na igə aa mbándafɛgɛɛ́ kə́mmú Nɛlaamɛʼ nɛ́ Táán áŋ? Nkaʼtɛ́n ɛyaán áa mbə́ndənsiədií áŋ?

³¹Wálaa! Nɛlaamɛʼ nɛ́ Táán nɛ́lɛ tɛn náanɛ wɔnɔ́ nsám ɛ moʼtáadɛ. Poálɛŋ lɛ́ a nsí ngim, yoom yímmú yɛ́ yə́ə́ʼtə́b posám agaáyɛn moʼtáadɛ ɛ́dɛɔ́gɔ.

³²Náa, pámaʼkogon nsám yəəŋ, ná yaálog, yaayáma ɛ́ság kaáyɛn yoom yiim yɛ́ pálɛɛ́ págogon a pɔlɛ́m. Yaagɛɛn na piʼtóʼtólog pɛ́ ntab pɛ́ɛnɛ lɛ́ pɛsag píyiim awáaga aŋŋany kɔ».

³³Taa, náan aa Yə́sus ayɛ́ɛ yaʼkananɛ pɔɔd a poʼkaʼtɛ́n puíŋ wɔnɔ́ póonɛ. Ayɛ́ɛ əbuúsiədin əgín nkaʼtɛ́n yɛ́ pɔɔd pálɛɛ́ págoob nkə kɛ́ aágaaʼkananɛ.

³⁴Ayɛ́ɛ adɛbodɛánɛ tɛn kɛbán fiɛ́d a nkaʼtɛ́n a mɔɛn. Náa, kɛnɛŋ kɛ́ aándɛɛ́ na paaʼkan pə́ə́ŋ pɔ́lɛ́bə́əsíŋ, áság koboyásɛnɛn pɔ́lɛ́ pɛbán piim.

³⁵Na niób nɛ́ a wɔɔ́s ogo wóow, Yə́sus yɛɛ́dɛánɛ na paaʼkan pə́ə́ŋ ɔnɔ́: «Tɛ́yaagaan nsɛ́ɛ́ ɛ noom yɛ́ɛy káag.»

³⁶Pááság kodɛ́ɛmɛn agɛɛn, pə́ə́dí pə́mə́dí kiʼtúú kɛ́ pɔɔd kɛ́ɛg kɛ́ kíyíím kɔ áay, páábág a kɛʼkɔ́m kɛ́ Yə́sus yɛɛ́bág a kɛ́lɛ́, pámɛ́ɛn. Pɛʼkɔ́m tɛn pímmú pɛ́yɛ́ɛ agoyaaganan ondáŋ na pɔ́lɛ́.

³⁷Pálɛ anɛ́ɛ́n kɔ agoyaag a, kigud kɛáság kiim kɛ́dɛ́ɛmɛn na nɛŋo a unuʼ. Kɛ́maʼkosom kɛmɔ́s kɛ́ məní, kɛ́ɛdagɛdɛ a kɛʼkɔ́m a kaadɛ poay. Kɛ́ɛsom, kɛ́ɛdagɛdɛ poay. Məní mə́ndəyə́əg a kɛʼkɔ́m.

³⁸Yə́sus ayɛ́ɛ ənim ɛnɔ a nsun ɛ kɛʼkɔ́m, oʼto wə́ə́ŋ a píloʼ a mɔɛn. Pááság kumuyóndigi, pɔ́nɔ́ na nyɔ́lɛ́: «Kɛlág óoó! Kɛlág wɛ! Tiə́gú o! Tuə́ áa olɛɛ́ yəə́b ə́?»

³⁹Yə́sus aáság kondig, aásásɛ́dɛn kigud, na puní pó noom tɛn, ɔnɔ́: «Kigud, tɛ́lɛm! Wɛ tɛn noom, tɔɔ!» Əgín tɛn ná yɛɛ́sásɛd, kigud kɛáság kodɛ́lɛm, noom noɔ́dɔɔ, kɛnɔ wiiy.

⁴⁰Náa ɔnɔ́ na paaʼkan pə́ə́ŋ: «Tuə́ áa polɛɛ́ náan kwag kwag kwag na wɛɛ́y? Podɛ́ndɛŋ kaag oʼto na mɛ anyóon yi?»

⁴¹Náa, ngililiʼ iyíbugúmin, pə́ə́bə́ə́ kəə́ŋíənə kɔ pɔ́lɛ́ na pɔ́lɛ́ pɔ́nɔ́ əə: «Nyóonɛ mɔɔd əə, ánɛ aa alɛɛ́ náan əə́? Alɛ lɛ́ amaʼkosásɛdɛn ɔmbɔ́ kigud, ɔmbɔ́ puní pó noom, muim móamoyóbɛn əə́[13]!»