Read Yambeta Mə́líʼkus 5 Bible Online

Mə́líʼkus 5 - Yambeta bible

Mə́líʼkus 5

¹Ná kigud kɛ́yɛ́ɛ kɛáʼkodɔɔ, páyɛ́ɛ́n, pámɛ́ɛn əgiig nsɛ́ɛ́ ɛ noom yɛ́ʼkáag yɛ́ a nigúu nɛ́ Kɛlása.

²Əgín ná Yə́sus ayɛ́ɛ aándagaag ongoo a nsí lɛ́ ə́suu a kɛʼkɔ́m, mɔɔd nyummú aáság kiim amoóboan. Mɔɔd ogo nyóon, uŋun wó ɔmbɛ́ óyɛ́ɛ əgumuyə́bi. Ayɛ́ɛ əgiim álon a pɛnɛngɛlɔ́ɔŋ lɛ́ oʼkɔɔ wə́ə́ŋ ungim káag aa óyɛ́ɛ wándɛ.

³Ngə́ ɛgomoogóda ɛdɛʼkɛ́ɛ kɔ, ɔmbɔ́ na pasɛŋ

⁴lɛ́ ayɛ́ɛ pə́məʼkumuúgumin, páyɛmoyáag pasɛŋ a ɔmbɔg, áyaágása. Páyɛmoyáág ongoo a kɛáŋ, áyaáda. Mɔɔd ayɛ́ɛ adɛáʼkɛ komoófanya agɛɛlɛ lɛ́ ədiyə́dúgə́ə́.

⁵Na udúg wɔnɔ́ na wɔɔ́s, oʼkɔɔ wə́ə́ŋ ungim óyɛ́ɛlanɛ əgín a kɛgaágadɛ kɛ́ pəgəəniʼ, na a nkon a mɔɛn, əə́giim yáányam, aágaábáam a aʼtáán, poŋó póamoyóo.

⁶Ná mɔɔd nyóon yɛɛ́dála Yə́sus kága laálá əə́suu a kɛʼkɔ́m, ayɛ́ɛ́n na ɔʼtɛ́d, əmə́mudə́ə́ŋə́nən a ambaan.

⁷Ayɛ́ɛ agosɔyɔ nɛŋo a mɔɛn ɔnɔ́: «Əə́əy Yə́sus! Mɔɔ́n o Táán nyɔ́ alɛɛ́ a mɔɛmɔɛ́n! Nkə aa mbágoyɛ́ɛ́lɛ́nɛ ə́? Sɛ́gɔɔ mbágoyɔ́sɔ́gɔ́lɔ́nɛ́ɛ́, a niiŋ nɛ́ Táán, odɛyɛ́nyɛɛ́ʼkɛn njəʼkə́nə́ní».

⁸Ayɛ́ɛ agosɔyɔ náan lɛ́ Yə́sus ayɛ́ɛ agosásan uŋun wó ɔmbɛ́ wó óyɛ́ɛ na nyɔ́lɛ́ lɛ́ ólon a nkó yəəŋ.

⁹Náa Yə́sus əə́muŋíən ɔnɔ́ na nyɔ́lɛ́ əə: «Niiŋ nɛáŋ áa nɛ́ɛn ánɛ ə́?» Náa mɔɔd ɔnɔ́ na nyɔ́lɛ́: «Niiŋ nɛ́am aa nɛ́ɛn “Kiʼtúú” lɛ́ ndɛ kiʼtúú kilúd kɛ́ məŋun má mabɛ́.»

¹⁰Mɔɔd əə́bə́ə́ kɔɔ́sɔ́gɔlɔn Yə́sus na toɛn ɔnɔ́: «Sɛ́gɔɔ, odɛŋŋɛ́ŋ məŋun má mabɛ́ móom laálá na nigúu».

¹¹Ubid ó pɔŋɔnɛá[14] óyɛ́ɛ aníɛn kɔ áay ndúmiʼ na oʼkon wó páyɛ́ɛ kɔ.

¹²Náa məŋun má mabɛ́ móom mɔ́nɔ́ na Yə́sus: «Tɛmágoyɔ́sɔ́gɔ́lɔ́nɛ́ɛ́. Sɛ́gɔɔ ɛ́bɛyɛ́ɛ́lɛ agá lɛ́ tíɛn ɔsɔd a pɔŋɔnɛá póʼkága».

¹³Yə́sus əyíbuyúlísíni ɔnɔ́ na pɔ́lɛ́: «Ooʼó, mbə́líʼtíníí, todáan ɔsɔd kɔ.» Náan aa məŋun má mabɛ́ móom mɛ́ɛ́lón a nkó ɛ mɔɔd nyóon, mə́ə́dí mə́mə́muudí mááság kɛɛn ɔsɔd a pɔŋɔnɛá. Əgín tɛn ná mɛ́ɛ́sɔ́d a pólɛ́, ubid ó pɔŋɔnɛá wóow ungim wááság kiim wə́ə́lis, ómádágɛ́dɛ́ɛ́ a noom cuuum, puim puə́wú. Póyɛ́ɛ yoom wɔnɔ́ tɔ́ɔ́sɛn ɛ pɔŋɔnɛá ɛ́baan.

¹⁴Ná pɔɔd pá páyɛ́ɛ a kinuŋ kɛ́ pɔŋɔnɛá póob pɛ́ɛ́dála náan, pɛ́ɛ́gádɛ́d na ɔʼtɛ́d agɛɛn a pálɛ́ɛg na a malɛ́m lɛ́ pɛ́ɛn adɛ́anɛ nkə kiim kɛ́ kɛ́yásánɛ́ɛ́.

¹⁵Ná páyɛ́ɛ́n agoob náan a pálɛ́ɛg, kɛnɔ kɛáság kiim kíbugig agɛɛn kɔ́gɔ́ɔg. Ná páyɛ́ɛ́n əgiig kɔ kɛnɔ kɛ́ Yə́sus ayɛ́ɛ, pɛ́ɛ́bóan mɔɔd ogo nyóon nyɔ́ məŋun má mabɛ́ mə́yímugóodi, alɛ kɔŋɛʼ, undəndínə́ə́n a ɛbá ɛ́ Yə́sus, na pilə́ə́ a nkó. Mədig mə́yíbusúú pɔ́lɛ́ piim a ambaan.

¹⁶Pá pɛ́ɛ́dála nkə kiim kɛ́ kɛ́yásánɛ́ɛ́ na mɔɔd nyóon nyɔ́ məŋun má mabɛ́ máyɛ́ɛ na nyɔ́lɛ́, pə́ə́bə́ə́ kudəənən pɔsɔ́g, pámábodɛánɛ tɛn nkə kɛ́ kɛ́yásánɛ́ɛ́ na pɔŋɔnɛá.

¹⁷Ná pɔɔd páyóób nkə kɛ́ɛg náan, pááság kodɛ́anɛ na Yə́sus lɛ́ ásan, adɛndɔ́b kə́mmú áay a nigúu nɛɔ́bɔn.

¹⁸Yə́sus aáság kɛɛn abag a kɛʼkɔ́m agosan. Ná mɔɔd nyóon nyɔ́ məŋun má mabɛ́ máyɛ́ɛ na nyɔ́lɛ́ yɛɛ́dála lɛ́ aándagɛɛn, yiísə́ə́ ɔnɔ́ na nyɔ́lɛ́ ə́muudi nyɔ́lɛ́ yíim ə́muyə́ən.

¹⁹Yə́sus yɛɛ́sáŋɛ́nɛ, ɔnɔ́ na nyɔ́lɛ́: «Ndóo, úúli a noádɛʼ noáŋ, wɛ́ɛn aboan yoog yaaŋ ɛ pɔɔd, óboyáloaŋanan nkə kiim kɛ́, a ɔʼtɛ́m wə́ə́ŋ ólaŋ, Sə́dúk amɛ́ɛ́lɛ na wɛ.»

²⁰Mɔɔd aáság kusiəd ngə́ əguúli. Ayɛ́ɛ agɛɛn əə́giim álɔɛgɛ ngə́ ngim, a nigúu nɛ́ pálɛɛ́ agodɔ́ŋɔn lɛ́ nigúu nɛ́ pálɛ́ɛg yówád. Nkə kɛ́ Yə́sus ayɛ́ɛ́lɛ na nyɔ́lɛ́ aa ayɛ́ɛ agɛɛn, əə́giim álɔɛgɛ. Ayɛ́ɛ ungim nyɔ́ amóób nkə kɛ́ɛg kɛ́ Yə́sus ayɛ́ɛ́lɛ, áyaáyáág ɔmbɔg a oʼto əgəə́wúnəni.

²¹Yə́sus yɛɛ́bág a kɛʼkɔ́m əguúlini nsɛ́ɛ́ ɛ noom yɛ́ɛy káag. Ná ayɛ́ɛ́n əgiig kɔ, kɛnɔ kɛáság kiim əyə́əg na pɔɔd síɛ́ɛ́d, kiʼtúú kilúd, nyɔ́lɛ́ aádɛ́lɛm a ɛbá ɛ́ məní.

²²Pálɛ anɛ́ɛ́n kɔ náan a, mɔɔd nyummú, niiŋ lɛ́ Siəyilúus aáság kiim alon. Ayɛ́ɛ nkúm ɛ yoog ɛ pɛɔ́sɔ́gɔ́lɔ́n yɛ́ a kɛnɔ kɛ́ɛg. Ná yɛɛ́dála Yə́sus, əyímudə́ə́ŋə́nən a ambaan,

²³əə́bə́ə́ komoyɔ́sɔ́gɔlɔn na toɛn ɔnɔ́: «Sɛ́gɔɔ paabá, mɔɔ́n waam nyɔ́ ɔʼkɛ́ɛd ɔɔ́ndɔɔʼkɔŋ kugu. Sɛ́gɔɔ mbágoyɔ́sɔ́gɔ́lɔ́nɛ́ɛ́, mɛ́ɛn, ómoyábɛgɛn əgín ombɔg wááŋ a nkó yɔ́ɔy, yíiʼkini kɛɛn a ɔlaa.»

²⁴Yə́sus yɛɛ́dɛ́ɛ́mɛn agɛɛn na nyɔ́lɛ́, kiʼtúú kɛ́ pɔɔd kíəgiim kíbuyə́ən a ngim, páagaányɛŋ kaányɛ́ŋáán a nkó yəəŋ.

²⁵Kɔ a kiʼtúú kɛ́ pɔɔd kɛ́ɛg kɛ́ kɛ́yɛ́ɛ agaányɛŋ a nkó ɛ Yə́sus, ɔʼkɛ́ɛd nyummú ayɛ́ɛ kɔ. Ayɛ́ɛ aáʼkɛɛlɛ pɛag pɛówád na pɛ́baan na kɛbon maŋɔ́ máamoolon másɔ́mɛg. Ayɛ́ɛ abany ɛdɛŋɛnɛʼ.

²⁶Ayɛ́ɛ aáʼkaánɛ kɛ́fɔlɛ́ a mɔndɔʼ na pogóʼtonon piíŋ, aáyósag mɔɔnɛ́ miim má yiígóodi agɛɛlɛ lɛ́ yógóʼton, ɔdɛɔ́ŋ kɔŋɛʼ ɔmbɔ́ sɔɔŋ. Kobany kóyɛ́ɛ agɛɛn agá kə́mmú yuudi na toɛn.

²⁷Ɔʼkɛ́ɛd ogo nyóon ayóób nugəm nó Yə́sus. Náan aa əyíím, əmə́búlídíí na kiʼtúú kɛ́ pɔɔd kɛ́ɛg, aágaʼkas, amɛ́ɛn əgiig a ɛbá ɛ́ Yə́sus a ngim yəəŋ, amágógɛ́lɛ́dɛ́ɛ́ a kilə́ə́ kiə́ŋ.

²⁸Ayɛ́ɛ́lɛ náan lɛ́ ayɛ́ɛ əgusəə kɔ a ɔʼtɛ́m wə́ə́ŋ a kaadɛ ɔnɔ́: «Mbaʼkoyag kodɔ́bɛd ɔmbɔ́ əgín kilə́ə́ kiə́ŋ, mbɔ́ɔy.»

²⁹Əgín tɛn ná ayágógɛ́lɛ́dɛ́ɛ́ a kɛ́lɛ́, maŋɔ́ mááság kɔsɔ́mɛg, mə́njúlə kə́mmú. Aáság kaáyóób lɛ́ oóʼkoom.

³⁰Əgín tɛn a kɛnɛŋ kɛ́go kɛ́ɛg, Yə́sus ayáyóbɛ́ɛ́ lɛ́ toɛn tuə́ŋ toálón. Ayágásɛ́ɛ́ ná pɔɔd pálɛɛ́, ɔnɔ́: «Ánɛ aa amɛ́ʼtɔ́bɛd a kilə́ə́?»

³¹Náa paaʼkan pə́ə́ŋ pɔ́nɔ́ na nyɔ́lɛ́: «Niŋíən nɛ́ maʼkalaʼ aa nɛ́ɛn oóm? Odɛɔ́gɔ agodála pɔɔd póonɛ pá pálɛɛ́ agaányɛŋ a nkó yaaŋ á? Tuə́ áa olɛɛ́ ugiiʼkini kuŋíən lɛ́: “Ánɛ aa amɛ́ʼtɔ́bɛd ə́?” »

³²Yə́sus ayɛ́ɛ agolɛŋ kodɛ́ʼtɛg ungim a udi lɛ́ ná álɛŋ ánɛ aa amámodɔ́bɛd.

³³Ɔʼkɛ́ɛd nyóon ayɛ́ɛ əguliminə na wɛɛ́y kwag, kwag, kwag lɛ́ nyɔ́lɛ́ yɛɛ́lɛŋɛn nkə kɛ́ kɛ́yásánɛ́ɛ́. Əyíím ədə́əŋənən Yə́sus a ambaan, amámoyáloáŋánánɛ́ɛ́ kiim.

³⁴Náa Yə́sus ɔnɔ́ na nyɔ́lɛ́: «Íyowó, tod kɔŋɛʼ aá! Wɛ́ɛn ɔʼtɛ́m ungwiyə́ə́n, kobany koáŋ koáman áaá! Omɔ́ɔy lɛ́ omáág oʼto na mɛ!»

³⁵Yə́sus alɛ agosɔyɔ kɔ náan a, pɔɔd pə́mmú pá a nó nkúm ɛ yoog ɛ pɛɔ́sɔ́gɔ́lɔ́n pááság kiim alon. Pɛ́ɛ́dɛánɛ na Siəyilúus pɔ́nɔ́: «Nkúm, udiyíʼkíni kuyə́bi Kɛlág kə́mmú, mɔɔ́n əə́ʼkugu.»

³⁶Náa, Yə́sus ədiʼkə́əsiəd kɛnɛŋ kɔ na tɔgɛ́ɛ́ tóod[15] Yɛɛ́dɛánɛ agá na Siəyilúus ɔnɔ́: «Odɛʼtámmána aá, áág agá oʼto na Táán áaá!»

³⁷Ná ayɛ́ɛ aándagɛɛn kɔ a nó Siəyilúus, ədiʼkə́əgəə́liʼtini lɛ́ mɔɔd na mɔɔd ə́buyə́ən kɔ. Yiísiə́d əgín lɛ́ na Píɛ na Sɛ́ag pɔ́lɛ́ na móŋŋí Sɛ́aŋ.

³⁸Ná páyɛ́ɛ́n əgiig kɔ, pɛ́ɛ́bóan kɛnɔ kiim kíəgəə́nyug. Ungim ayɛ́ɛ agolɛɛ, páagaányam.

³⁹Yə́sus yɛɛ́sɔ́d a yoog, náa ɔnɔ́ na pɔɔd póob pá páyɛ́ɛ agolɛɛ: «Nkə aa kɛnɔ kɛ́lɛɛ́ náan puə́gəə́nyug əə́? Nkə aa polɛɛ́ agaáyóon náan na ɔndɛɛ ə́? Moóngaa nyóonɛ ɔdɛɔ́gɔ uʼkuə́n, alɛ agá a ɛnɔ.»

⁴⁰Ná pɔɔd páyóób náan, pə́ə́bə́ə́ agá komoóŋɔnɔ. Aáság kusəə lɛ́ ungim álon a táán. Pɛ́ɛ́lɔ́b a yoog əgín lɛ́ na sɛ ɛ moóngaa, na ŋŋí, na pɔɔ́n pə́ə́ŋ pá maʼtom pádáád pá əyíím na pɔ́lɛ́. Pááság kosɔd a nɛsom nɛ́ yoog nɛ́ moóngaa əyíngi.

⁴¹Yɛɛ́dám ə́gumin moóngaa a ombɔg, ɔnɔ́ na nyɔ́lɛ́: «Talíʼta kum[16]!» Áay lɛ́: «Íyowó, tɛ́ɛ́mɛn aá. Mɛ aa mbə́səə!»

⁴²Əgín tɛn ná yiísə́ə́ náan, moóngaa aádɛ́ɛ́mɛn ŋwaád, əə́bə́ə́ kodáŋana. Ayɛ́ɛ moóngaa o pɛag pɛówád na pɛ́baan. Ná sɛ a moóngaa, na ŋŋí, na pɔɔ́n pá maʼtom pá Yə́sus pɛ́ɛ́dála náan, páyáyáágɛ́ɛ́ agá ɔmbɔg a oʼto əgəə́wúunəni.

⁴³Yə́sus ayɛ́boyáágánan mbaŋ ɔnɔ́ pádɛʼtɛánɛ na mɔɔd nkə kɛ́ɛnɛ kɛ́ kɛ́másánɛ́ɛ́. Yɛɛ́dɛánɛ na pa sɛ na ŋŋí lɛ́ púunən mɔɔ́n wɔɔbɔn yoom ɛ́ konɛ, pámoyɛ́ʼkɛn, ánɛ.