Read Yambeta Mə́líʼkus 6 Bible Online

Mə́líʼkus 6 - Yambeta bible

Mə́líʼkus 6

¹Yə́sus yɛɛ́dɛ́ɛ́mɛn áay, amɛ́ɛn a Násalɛd, pálɛ́ɛg yɛ́ yɛɛ́yám a yɛ́lɛ́. Páyɛ́ɛ na paaʼkan pə́ə́ŋ.

²Wɔɔ́s ó kisúgiʼ wúmmú, ayɛ́ɛ́n ɔsɔd a yoog ɛ pɛɔ́sɔ́gɔ́lɔ́n kɔ, əə́bə́ə́ kaaʼkananɛ pɔɔd Tɔsɔm tó Táán. Ɛ́fɔlɛ́ ɛ́ pɔɔd yɛ́ ɛ́yɛ́ɛ agoob, íyə́wúnə́níí kɛ́fɔlɛ́ na nɛaʼkananɛʼ niə́ŋ. Páyɛ́ɛ agosɔyɔ pɔ́nɔ́ əə: «Nyóonɛ mɔɔd əə, ə́lə́ə́ aa ayáʼkan pɛbán pɛ́ɛnɛ piim əə́? Nsiŋ yɛ́ɛy náan əə, ánɛ aa amoyɛ́ʼkɛ́nɛ́nɛ́ɛ́ ə́? Mangán móonɛ má alɛɛ́ agɛɛlɛ əə, ánɛ aa amoyɛ́ʼkɛ́nɛ́nɛ́ɛ́ toɛn tó kɛɛlɛ ə́?

³Adɛ́ kámɛ́ndaʼ yɛ́ɛnɛ aa ɛ́lɛɛ́ náan əə́? Adɛ́ mɔɔ́n o Malɛ́a aa alɛɛ́ náan əə́? Adɛ́ pomóŋŋí aa póonɛ pálɛɛ́ lɛ́: Na Sɛ́ag, na Yósɛs, na Síud, na Simɔ́ɔŋ əə́? Adɛ́ pomóŋŋí pə́ə́ŋ pá pagɛ́ɛd tɛn aa póonɛ tɛlɛɛ́ alaa ondáŋ na pɔ́lɛ́ ə́?» Taa, náan aa kíyə́ʼtúmíí wɔnɔ́ ná pádɛʼkɛ́ɛ ɔgɔɔ́sɔ́dɛɛ́ Yə́sus, pádɛág oʼto na nyɔ́lɛ́.

⁴Yə́sus ayɛ́bodɛánɛ ɔnɔ́ na pɔ́lɛ́: «Pɔ́dɛɔ́gɔɔ́sɔ́dɛ ɔndɔɛgɛʼ pɛbán o Táán a nigúu niə́ŋ nɛ́ nyɔ́lɛ́nyɔ́amɔɛ́d, a ŋŋɛ́n yəəŋ na a yoog yəəŋ ɛ pɔɔd. A mɔnɔŋ mɛ́ndɛ́ŋ agá aa əə́gə́mən.»

⁵Yə́sus adɛʼkáagɛɛlɛ ongán ɔmbɔ́ úmmuʼ a Násalɛd. Náa, ayábɛ́gan əgín ngab ɛ pabámbany yimmú ombɔg, pámáyoom.

⁶Ayɛ́ɛ əgəə́wúunəni kɛ́fɔlɛ́ wɔnɔ́ ná pɔɔd pá a pálɛ́ɛg yəəŋ pádɛʼkágaágɛ́ɛ́ oʼto na nyɔ́lɛ́. Ayɛ́ɛ əgiim ádáŋana a moyaa mó əʼkúu muim mó a Násalɛd a kaaʼkananɛ pɔɔd.

⁷Yɛɛ́dɔ́ŋɔn paaʼkan pə́ə́ŋ pá pówád na pábaan, amáboyɛ́ʼkɛn toɛn tó koŋɛŋ məŋun má mabɛ́. Ayɛ́boodóm pábaan pábaan.

⁸Ná páyɛ́ɛ pándagɛɛn, yiísə́ə́ ɔnɔ́ na pɔ́lɛ́: «Ná poándagɛɛnɛɛ́, podɛnjábóŋɛ́náá moom. Pudisiə́d yoom na yoom agɛɛn na yɛ́lɛ́. Ɔmbɔ́ əgín kɛlɛ́ɛd kɛ́ konɛ, ɔmbɔ́ mɔɔnɛ́ podɛnjáyáágɛ́ɛ́ a pɛbalɛ́. Podɛnjábóŋɛ́náá na kɛbalɛ́ kɛ́ ongɛn, ndóo. Púsiəd əgín oʼtɔ́ŋ wááŋan.

⁹Púníig pasɛ́lɛ́ʼpas a ambaan, podɛnjɛ́ɛ́n na pilə́ə́ pɛ́baan, ndóo kímuʼ súg.»

¹⁰Yiísə́ə́ tɛn kə́mmú ɔnɔ́ na pɔ́lɛ́: «Kɛnɔ kiim kɛ́ pumíig, noádɛʼ nó pə́mə́busiə́d kɔ kɔŋɛʼ, púləndin kɔ agɛɛn əgiig a wɔɔ́s wó poádɛ́ɛmɛn agosan.

¹¹Puməʼkiig kɛnɔ kímmú náa pə́dibuúsiədinií kɔ kɔŋɛʼ, pánnyɔ́ŋɛn tɛn ɔmbɔ́ lɛ́ póob nkə kɛ́ poálɔɛgɛ, lónáan pósan. Poándaasan, puə́gidə ummúndúŋ wó a ambaan yááŋan[17] Mbaŋ áa pomáboyáágánan náan.»

¹²Pɔɔ́n pá maʼtom pááság kodɛ́ɛmɛn, pámɛ́ɛn. Páyɛ́ɛ agɛɛn pə́əgiim pálɔɛgɛ lɛ́ pɔɔd págasɛ ɔlaa wɔ́ɔ́bɔn.

¹³Páyɛ́ɛ agoŋɛ́ŋŋaŋ məŋun má mabɛ́ miíŋ, páagɛɛlanɛ tɛn lɛ́ wɛ nyɔ́ olɛɛ́ abany, pə́yiguusiŋ məgúd, óyɔɔy.

¹⁴Kɛnɔ kiim kɛ́yɛ́ɛ lumuʼ lumuʼ na niiŋ nɛ́ Yə́sus. Ɛlóod aa ayɛ́ɛ alaamɛ a Kalilə́ə. Ayóób nugəm nó Yə́sus, pɔ́ɔsɔyɔ pɔ́nɔ́: «Sɛ́aŋ Ɔsɔgɛn pɔɔd aa əə́ʼkiiʼkini kiim yóndɛgɛɛ́, kólɛ́ aa alɛɛ́ na toɛn tóod tó kɛɛlɛ mangán.»

¹⁵Náa, pə́mmú páyɛ́ɛ əgusəə pɔ́nɔ́: «Ɛlɛ́as aa alɛɛ́nɔ.» Pə́mmú tɛn pɔ́nɔ́: «Ɔndɔɛgɛʼ pɛbán o Táán nyummú aa alɛɛ́nɔ, wɔnɔ́ palɔɛgɛʼ pɛbán pá Táán tɛn pə́mmú pá páyɛ́ɛ kalaʼ.»

¹⁶Ná Ɛlóod ayóób nkə kɛ́ɛg kɛ́ pɔɔd páyɛ́ɛ agosɔyɔ, yiísə́ə́ ɔnɔ́: «Sɛ́aŋ Ɔsɔgɛn pɔɔd aa əə́ʼkiiʼkini kiim yóndɛgɛɛ́, nyɔ́lɛ́ nyɔ́ njɛ́ɛ́lɛ lɛ́ pámoosom oʼto.»

¹⁷Kɛ́lɛ lɛ́, Ɛlóod yiísiə́d Ɛlodɛ́ad, oʼkán ó móŋŋí wəəŋ Filíib, aágóan. Wɔnɔ́ ná Sɛ́aŋ ayɛ́modɛánɛ ɔnɔ́: «Ɛlóod, omɛ́ɛ́lɛ kɔbɛ́ əgusiəd oʼkán ó móŋŋí waaŋ[18]!» Náan aa Ɛlóod yiísə́ə́ lɛ́ pə́gumin Sɛ́aŋ, pámoyáág a kɛáŋ kɛ́ pasɛŋ, pámoódagɛdɛ a yoog yɛ́ njaan.

¹⁸

¹⁹Náan aa Ɛlodɛ́ad ayɛ́ɛ agobɛnɛn Sɛ́aŋ na toɛn. Ayɛ́ɛ əguunə komoyóon, ɔdɛɔ́ŋ ngə́.

²⁰Kɛ́lɛ lɛ́, Ɛlóod ayɛ́ɛ agɔnyáadanɛ Sɛ́aŋ lɛ́ yɛɛ́lɛŋɛn lɛ́ alɛ mɔɔd o sáád, mɔɔd nyɔ́ alɛɛ́ a ngə́ ɛ Táán. Náan aa ayɛ́ɛ agomoónɔna, annyɔ́ŋɛn lɛ́ ná pámámoyɛ́ɛ́lɛ kɔbɛ́. Ɛlóod ayɛ́ɛ lɛ́ kɛnɛŋ kɛ́ alɛ agoob nkə kɛ́ Sɛ́aŋ alɛɛ́ əgusəə, oʼto wə́ə́ŋ wóoyɛb, andɛŋ tuə́ áa yɛ́ɛlɛɛ́. Náa, aányɔ́ŋɛn əgín koob nkə kɛ́ alɛɛ́ əgusəə.

²¹Wɔɔ́s wúmmú anɛ́ɛ́n, nkə kɛ́go kɛ́ Ɛlodɛ́ad ayɛ́ɛ əguunə kɛáság kudə́əŋ. Kɛ́yɛ́ɛ lɛ́, Ɛlóod ayɛ́ɛ́lɛ wɔɔ́n wó a kɛalɛn kɛ́ əyə́biə́níí. Yɛɛ́dɔ́ŋɔ́nɔ ɛ́fɔlɛ́ ɛ́ pɔɔd a wɔɔ́n wóow lɛ́, na pɛgóʼkóón pɛ́ a kɛsom kiə́ŋ kɛ́ nɛlaamɛʼ, na puʼkúm puə́ŋ pó pasɔ́njaa, na ɛ́fɔlɛ́ ɛ́ pɔɔd pá a Kalilə́ə.

²²Mɔɔ́n wo Ɛlodɛ́ad nyɔ́ ɔʼkɛ́ɛd aáság kiim ɔsɔd kɔ a yoog yɛ́ páyɛ́ɛ agɛɛlɛ wɔɔ́n, əə́bə́ə́ kubin. Kubin kuə́ŋ kuísóbin Ɛlóod na ungim nyɔ́ ayɛ́ɛ kɔ a kúfuʼ. Náa Ɛlóod ɔnɔ́ na moóngaa ɔmbɔ́dɔ́m: «Íyowó, wəə́bín ə́y! Íŋŋiə́n nkə kiim kɛ́ waányɔ́ŋɛn, a pibúnə́n pɛáŋ, ndagoyɛ́ʼkɛn.»

²³Ayácɛ́mɛ́ɛ́ kɔ áay a udi ó mɔɔd ngim, ɔnɔ́: «Taa, tɔnɔɔ́nɔ́ tódáád a mɔɛn ə́! Nkə kiim kɛ́ wəə́giŋíən, ndagoyɛ́ʼkɛn. Ɔmbɔ́ Nɛlaamɛʼ nɛ́am aa wɔʼkɔ́ tɛ́abanan na wɛ a kɛgaágadɛ, ndəgəə́liʼtini.»

²⁴Moóngaa ɔʼkɛ́ɛd aáság kolon agɛɛn əŋíən ndə́b na ŋŋí, ɔnɔ́: «Mmə́, mmuŋíən nkə ə́?» Náa ŋŋí ɔnɔ́ na nyɔ́lɛ́: «Ímuŋíən oʼto ó Sɛ́aŋ Ɔsɔgɛn pɔɔd.»

²⁵Moóngaa ɔʼkɛ́ɛd aáság kuúlini na ɔʼtɛ́d kɛnɔ kɛ́ nkúm alɛɛ́, ɔnɔ́ na nyɔ́lɛ́: «A pibúnə́n pɛ́am, ndaanyɔ́ŋɛn lɛ́ ódɛ́anɛ, pɛ́ɛn asom oʼto ó Sɛ́aŋ Ɔsɔgɛn pɔɔd əgín nɛ́gɔŋ nɛ́gɔŋ, píim páág a maʼtɛ́ngɛ́lɛ́, wɛ́nyɛɛ́ʼkɛn.»

²⁶Ná nkúm Ɛlóod ayóób náan, ɔʼtɛ́m wə́ə́ŋ wɛ́ɛ́yɛ́b. Náa, wɔnɔ́ ná ayɛ́ɛ aáʼkolɛg unuʼ, amáyaácɛma a udi ó pɔɔd pá yɛɛ́dɔ́ŋɔ́nɔ a wɔɔ́n, adɛʼkɛ́ɛ ogosáŋɛnɛ kə́mmú.

²⁷Aáság kodom sɔ́njaa yəəŋ yimmú lɛ́ yɛ́ɛn asom Sɛ́aŋ oʼto a yoog yɛ njaan, yíim na wólɛ́. Sɔ́njaa yaáság kɛɛn tɛn a yoog yɛ njaan, ɛmámoosóm oʼto,

²⁸imíim yáag a maʼtɛ́ngɛ́lɛ́, ɛmɛ́ʼkɛn na moóngaa ɔʼkɛ́ɛd. Moóngaa ɔʼkɛ́ɛd tɛn əə́siəd, amɛ́ɛn agɛɛ́ʼkɛn na ŋŋí.

²⁹Ná paaʼkan pá Sɛ́aŋ páyóób náan lɛ́ páásóm sə́dúg wɔɔbɔn oʼto, píísiə́d kɛlóŋ, pámɛ́ɛn əni.

³⁰Pɔɔ́n pá maʼtom pá Yə́sus yɛɛ́dóm, pə́ə́bə́ə́ komoyáloaŋanan wɔnɔ́ ná páádáŋána na nkə kiim kɛ́ páyɛ́ɛ́lɛ, nkə kiim kɛ́ páyáʼkánánɛ pɔɔd.

³¹Wɔnɔ́ ná kɛnɔ kɛ́yɛ́ɛ miíi na pɔɔd lɛ́ póonɛ páagɛɛn, pə́mmú pə́əgiim, pɔɔ́n pá maʼtom pádiɛn na kɛnɛŋ kɛ́ konɛ́ɛnɛ, Yə́sus yiísə́ə́ ɔnɔ́ na pɔ́lɛ́: «Pəŋi mɛ́naan. Tiə́suídəən sɔɔŋ a ɛbá, tiɛ́naan a kɛnɔ kɛ́ kifələ́ə́n, púoyig sɔɔŋ.»

³²Pɛ́ɛ́bág a kɛʼkɔ́m, pə́mə́suídíí a kɛnɔ kɛ́ kifələ́ə́n. Páyɛ́ɛ́n əgín kɔ pɔ́lɛ́ na pɔ́lɛ́.

³³Náa, ɛ́fɔlɛ́ ɛ́ pɔɔd ɛ́yɛ́boodálá páagɛɛn, pááság kolɛŋ lɛ́ nyɔ́lɛ́ aa nyóon alɛɛ́ agosan na pɔɔ́n pə́ə́ŋ pá maʼtom. Pə́yíím pə́bugig agɛɛn kɔ. Páyɛ́ɛ na ambaan, pálɛ́ɛg ngim, pə́əgiim pádɛ́da əgumuyə́ən kɔ́gɔ́ɔg kɛnɔ kɛ́ pɛ́ɛ́lɛ́ŋ lɛ́ alɛ agɛɛn. A Yə́sus kudíin yɛɛn əgiig kɔ na paaʼkan pə́ə́ŋ, kɛnɔ kɛ́yɛ́ɛ kɛándɛ síɛ́ɛ́d.

³⁴A nisuu niə́ŋ a kɛʼkɔ́m, Yə́sus yɛɛ́dála kiʼtúú kɛ́ pɔɔd kɛ́ɛg wɔnɔ́ ná kɛ́lɛɛ́ miíi. Maan mə́yímusíəd na pɔ́lɛ́ lɛ́ páyɛ́ɛ wɔnɔ́ todóm tó túʼkódií sə́dúg[19], əə́bə́ə́ koboyáʼkananɛ pɛbán piíŋ.

³⁵Wɔnɔ́ ná kɛnɛŋ kɛ́yɛ́ɛ kɛáʼkosan, mbin yəə́ndədə́əŋ, paaʼkan pə́ə́ŋ páyáyɛ́ʼtɛ́nɛ́ɛ́ a ɛbá yə́ə́ŋ, pɔ́nɔ́ na nyɔ́lɛ́: «Kɛnɔ kɛ́ɛnɛ kɛ́ tɛlɛɛ́ a kɛ́lɛ, kɛ́lɛ a kifiidi, náan aa wɔɔ́s tɛn wáʼkɛɛnɛɛ́.

³⁶Tɛánɛ́ na pɔɔd póonɛ, pɛ́ɛn a moyaa mó əʼkúu, na a toádɛʼ tó tólɛɛ́ áanɛ ndúmiʼ, pɛ́ɛn əgəə́dumin, páwɛɛn nkə kɛ́ pálɛɛ́ págonɛ.»

³⁷Yə́sus əyíbuyúlísíni ɔnɔ́: «Íʼi, ɛ́boyɛ́ʼkɛ́naan moom mó konɛ pəŋibáamɔɛ́d.» Náa pɔ́nɔ́ na nyɔ́lɛ́: «Tɛ́lónɛ mɔɔnɛ́, ɔ́ndɛd ɛ pisúg pɛ́ mɔɔnɛ́ ɛ́baan agɛɛlɛ lɛ́ tɛ́oŋɛnɛ pɛlɛ́ɛd, tiɛ́ʼkɛn na ɛdám ɛ́ pɔɔd yɛ́ɛnɛ yiim, ɛ́nɛ a?»

³⁸Náa Yə́sus ɔnɔ́ na pɔ́lɛ́: «Póasa pɛbalɛ́ pɛáŋan, pódála pɛlɛ́ɛd pɛ́sɛ́g aa pugódíí.» Pááság kaáyáas, náa pɔ́nɔ́ na nyɔ́lɛ́: «Tigóódi pɛlɛ́ɛd pɛ́ʼtáan súg áanɛ, na pusú póbaan.»

³⁹Náa Yə́sus ɔnɔ́ na pɔ́lɛ́: «Ɛ́bodɛánɛ́an, pányɛŋ mbɛ́n, pə́ləndən a pilí a pilí.»

⁴⁰Pááság kubuúligigəni a pilí a pilí. Pilí pímmú pɛ́yɛ́ɛ na əʼtin á pɔɔd áʼtáan, pímmú əʼtin á pɔɔd ábaan na pówád.

⁴¹Yə́sus yiísiə́d pɛlɛ́ɛd pɛ́ɛb pɛ́ʼtáan na pusú póbaan, aábágɛ əngis a mɔɛn, amɛ́ʼkɛn pisoyidiʼ na Táán, aábɛ́ŋa, amɛ́ʼkɛn na paaʼkan pə́ə́ŋ lɛ́ páaban ungim, ánɛ. Pááság kaaba. Ɔnɔ́ páboyáaban tɛn pusú, pámáába.

⁴²Ungim nyɔ́ ayɛ́ɛ kɔ yɛɛ́nɛ́, əə́yíid, moom moɔ́lɔb.

⁴³Pɛbɛŋ pɛ́ pɛ́ɛ́lɔ́b, paaʼkan pɛ́ɛ́gómmánɛ, piə́yə́ə́g mɔsaŋɛʼ mówád na móbaan[20]

⁴⁴Pá pɛ́ɛ́nɛ́ pɛlɛ́ɛd pɛ́ɛb páyɛ́ɛ yoom wɔnɔ́ tɔ́ɔ́sɛn ɛ pɔɔd ɛ́ʼtáan.

⁴⁵Əgín kɔ áay a ngim yɛ́ɛy, Yə́sus aáság kusəə na paaʼkan pə́ə́ŋ lɛ́ pə́siəd kɛʼkɔ́m, páyaag nsɛ́ɛ́ ɛ noom yɛ́ɛy káag, a noá nó a pálɛ́ɛg ɛ Pɛdsáyída, nyɔ́lɛ́ əədíin yiim ə́buyə́ən a ngim, aayag kɛɛlɛ lɛ́ pɔɔd púúləni.

⁴⁶Ná ayɛ́ɛ əə́ʼkudíin yɛɛlɛ lɛ́ pɔɔd púúləni, yɛɛ́bág agɛɛn ɔgɔɔ́sɔ́gɔlɔn Táán a oʼkon a mɔɛn.

⁴⁷Niób nɛ́ɛ́mán kusuu nyɔ́lɛ́ əgín kɔ́gɔ́ɔg nsɛ́ɛ́ ɛ noom, kɛʼkɔ́m kɛ́ pɔɔ́n pá maʼtom páyɛ́ɛ a kɛ́lɛ́ kɛ́yɛ́ɛ kiə́ʼkəə́súid, kɛándɛ a kɛgaágadɛ kɛ́ noom.

⁴⁸Aáság kodála lɛ́ pálɛ na njəʼkə́nə́ní kɛ́fɔlɛ́, pálɛ agaábáam əgunud kɛʼkɔ́m na pibuəd pádɛáʼkɛ lɛ́ kigud kɛ́yɛ́ɛ əgufiŋ na toɛn a udi wɔ́ɔ́bɔn, kíəbuyúlisəni agá ngim. Áanɛ əgiim əgiig a pɛbáŋɛn pɛ́ koany, Yə́sus əə́bə́ə́ kiim ná pálɛɛ́. Ayɛ́ɛ agodáŋana a məní na ambaan wɔnɔ́ alɛ agá a nsí mmɔɛ́d, ənnímin. Yɛɛ́dám yɛ́ɛlɛ wɔnɔ́ aaboosan mbámbáŋ.

⁴⁹Ná páyɛ́moodála aádáŋana a məní əgiim ná pálɛɛ́, pɛ́ɛ́fɛ́g lɛ́ kiíd áa kɛ́lɛɛ́nɔ!

⁵⁰Wɛɛ́y úyíbugúmin, páagaányam pɔ́lɛ́ piim. Náa, nyɔ́lɛ́ aáság koság kobodɛ́anɛ ɔnɔ́: «Wiiyíən ɔʼtɛ́m, podɛʼtámmána, mɛ áa ndɛɛ́nɔ!»

⁵¹Aáság kobag a kɛʼkɔ́m. Kigud kɛ́ kɛ́yɛ́ɛ əgufiŋ na toɛn kɛáság kodɔɔ. Paaʼkan pə́yə́wúnə́níí kɛ́fɔlɛ́ na nkə kɛ́ɛg kɛ́ pɛ́ɛ́dála.

⁵²Kɛ́lɛ lɛ́, pádɛʼkáagoob ongán ó pɛlɛ́ɛd wóow. Nsiŋ yɔɔbɔn ɛdɛʼkɛ́ɛ ɛgoob yisí yɛ́ ɛyɛ́ɛ kɔ a wólɛ́.

⁵³Pííyíbə́nən koyaag nsɛ́ɛ́, pámɛ́ɛn alon a nigúu nɛ́ Kɛnɛsalɛ́ɛd, pə́ə́súŋ kɛʼkɔ́m a kɛdɛ́ɛ́.

⁵⁴Ayɛ́ɛ páaman kaag ongoo a kɛdɛ́ɛ́, pɔɔd pááság kolɛŋ lɛ́ Yə́sus anyóon aándɛɛ́ kɔ.

⁵⁵Pɛ́ɛ́laamɛ kɛnɔ kiim lɛ́ aándɛ áay. Pɔɔd pə́yíím pányáŋɛna pabámbany pɔ́ɔ́bɔn a pɛʼkwág agɛɛnan na pɔ́lɛ́ kɛnɔ kiim kɛ́ pámóób lɛ́ Yə́sus alɛ kɔ.

⁵⁶Kɛnɔ kiim kɛ́ Yə́sus ayɛ́ɛ agosan, a pálɛ́ɛg yɛ́ nkóʼkóón óo, a yɛ́ ndiʼti oo, ɔmbɔ́ a əʼkúu yɛ́ a kidun oo, pɔɔd páyɛ́ɛ agɛɛnan kɔ na pabámbany pɔ́ɔ́bɔn a pɛdom pɛ́ ongon na a pɛdom pɛ́ pɛgóón lɛ́ ná Yə́sus əə́giim asan, pámoyálɛɛlɛn lɛ́ ə́buudi pɔ́lɛ́ pɔ́dɔ́bɛd ɔmbɔ́ əgín ɔmbɛb ó kilə́ə́ kiə́ŋ. Ungim tɛn nyɔ́ yɛɛ́dɔ́bɛd ɔmbɛb wə́ə́ŋ ó kilə́ə́, ɔyɔ́ɔ́y.