Read Yambeta Mə́líʼkus 7 Bible Online

Mə́líʼkus 7 - Yambeta bible

Mə́líʼkus 7

¹Pafalɛsɛyɛ́ɛŋ na ngab ɛ palɛŋ pɛcɛm yimmú, pə́yíím pádɛ́ɛmɛn a Yolósalɛm, pámɛ́ɛn agaágɔnyɛd a ɛbá ɛ́ Yə́sus.

²Pálɛ anɛ́ɛ́n kɔ ɔ, pááság kodála lɛ́ paaʼkan pə́ə́ŋ pálɛ agonɛ́ɛnɛ pádɛásɔ́gɛ́ɛ́ ɔmbɔg wɔnɔ́ ná pisiə́g pɛɔ́bɔn pɛ́lɛɛ́ əgusəə. Áay lɛ́ pádɛásɔ́gɛ́nɛ́ɛ́.

³Kɛ́lɛ lɛ́, Pafalɛsɛyɛ́ɛŋ na Yúdɛn ngim kɛ́, páyɛ́ɛ panyáadanɛ pɛcɛm pɛ́ pɛmbáa pɔ́ɔ́bɔn páyɛ́bosánɛ́nɛ wɔnɔ́ kɛ́ɛnɛ lɛ́ mɔɔd ogóódi lɛ́ yáásog ɔmbɔg kɔŋɛʼ kɔŋɛʼ agosɔgɛn yɛ́lɛ́ ná ə́díin anɛ́ɛnɛ.

⁴Na kɛ́ɛnɛ tɛn kɛ́ kɛ́lɛɛ́ lɛ́ uməʼkimbuúli nion, odɛʼtám údə́əŋ konɛ moom odɛásɔ́gáá agaásɔgɛn kɔbɛ́ kuim kó omɔ́dɔ́bɛ́ɛ́ na kólɛ́ kɔ a nion. Páyɛ́ɛ agɔnyáadanɛ pisiə́g pɛ́ nigúu pímmú tɛn náan piíŋ wɔnɔ́ kɛ́ɛnɛ kɛ́ kɔsɔgɛn moom wɔnɔ́ pilən, pidín, paʼtáasaʼ.

⁵Náa Pafalɛsɛyɛ́ɛŋ póob na palɛŋ pɛcɛm pə́əŋíən na Yə́sus pɔ́nɔ́ əə: «A igə aa paaʼkan pááŋ pɔ́lɛ́ pɔ́dɛɔ́gɔ agonyádɛɛ́ pisiə́g pɛ́ pɛmbáa əə́. Pálɛ agonɛ́ɛnɛ pádɛásɔ́gɛ́ɛ́ ɔmbɔg agaásɔgɛn lɛ́ nkə ə́?»

⁶Yə́sus əyíbuyúlísíni ɔnɔ́: «Polɛ fɔ́lɔ́b moɔ́ŋɛ́ná pusú wɔnɔ́ ná Ɛsayíi, ɔndɔɛgɛʼ pɛbán o Táán yiísə́ə́ a kidíídí kɛáŋan ɔnɔ́, Táán ɔnɔ́: “Ndɛg yɛ́ɛnɛ ɛlɛ agɛnyáadɛ əgín na unuʼ na unuʼ, kɔmɔɛ́d lɛ́ a ntɛ́m yɔɔbɔn a kaadɛ pálɛ afɛga ndɛ́ŋ.

⁷Pɛɔ́sɔ́gɔ́lɔ́n pɛɔ́bɔn, na nkə kiim kɛ́ pálɛɛ́ agɛɛlɛ agɛnyɛɛ́ʼkɛn nnyáádɛ́ kɛ́lɛ iyó. Ndə́b ngim yɛ́ pálɛɛ́ agaaʼkananɛ pɔɔd ɛlɛ yɛ́ ɛlɛɛ́ a pisiə́g pɛ́ pɔɔd[21]” »

⁸Náa Yə́sus ɔnɔ́ kə́mmú na pɔ́lɛ́: «Taa, náan aa polɛɛ́. Pɛcɛm pɛ́ Táán pɛmɔɛ́d podɛɔ́gɔ əguyə́ən, polɛ agɔnyáadanɛ agá pɛ́ pɔɔd pámɛ́ɛ́ga.»

⁹Ayɛ́ɛ́n əgín na tɔgɛ́ɛ́ yuudi ɔnɔ́: «Ɛɛ́ɛ, pəŋi poálɛŋ kɛɛlɛ náan əgudi pɛcɛm pɛ́ Táán, poányáadɛ agá pisiə́g pɛáŋan pɛ́ pəŋibáamɔɛ́d.

¹⁰Moyíis yiísə́ə́ a pɛcɛm piə́ŋ ɔnɔ́: “Nyáádɛ sɛ waaŋ na ŋŋí waaŋ.” Yiísə́ə́ tɛn kə́mmú lɛ́: “Wɛ nyɔ́ wəə́səə na sɛ waaŋ, oó lɛ́ ná ŋŋí waaŋ wɔʼkɔ́: Tuúdudúú, wɛ nyóon olɛ lɛ́ págoyóon[22]!”

¹¹Náa, pəŋi anɛ́ɛ́n óoʼ, adɛ́ polɛ agaaʼkananɛ poɔʼkɔ́: “Mɔɔd alɛ ogodɛ́anɛ na sɛ ɔmbɔ́ lɛ́ na ŋŋí lɛ́: Ngab yɛ́ nyiígóodi lɛ́ nkoyɛ́ʼkɛn agogoɛ́bɛ yaándɛ kolobáaŋ?[23] Áay lɛ́ yaáʼkodɛ́lɛm a oʼto ó Táán á?”

¹²Náan oóoʼ, adɛ́ poɔʼkɔ́ póob pádɛyɛ́ʼkɛn kə́mmú yoom na sɛ wɔɔbɔn na ŋŋí wɔɔbɔn ə́?

¹³Ombod ó pɛbán wɔnɔ́ wóow náan, na pímmú tɛn piíŋ pɛ́ polɛɛ́ agaaʼkananɛ pɔɔd, adɛ́ pɛ́lɛ lɛ́ ná púwíiyi kuwíyiə́n nkə kɛ́ Tɔsɔm tó Táán tólɛɛ́ əgusəə ə? Adɛ́ poɔʼkɔ́ pə́yə́ən agá nkə kɛ́ pisiə́g pɛáŋan pɛ́ pəŋibáamɔɛ́d pɛ́lɛɛ́ əgusəə ə?»

¹⁴Yə́sus aáság kodɔ́ŋɔn kiʼtúú kɛ́ pɔɔd kɛ́ɛg kə́mmú, ɔnɔ́ na pɔ́lɛ́: «Pəŋi piim pódam ntóɛŋ kɔŋɛʼ, puób nkə kɛ́ɛnɛ kɛ́ ndɛɛ́ əgusəə:

¹⁵Adɛ́njaŋ nkə kɛ́ mɔɔd aágaáyáág a unuʼ ná kísuu a kaadɛ aa kíəmuúfiləni, ndóo. Nkə kɛ́ kɛ́lɛɛ́ agolon a ɔʼtɛ́m wə́ə́ŋ áa kíəmuúfiləni. [

¹⁶Wɛ nyɔ́ olɛɛ́ na ntóɛŋ ɛgoob, óyoob!» ]

¹⁷Ná Yə́sus ayɛ́ɛ əə́ʼkudi kiʼtúú kɛ́ pɔɔd aáság kɛɛn ɔsɔd a yoog, paaʼkan pə́ə́ŋ pə́yímuyə́ən kɔ, pááság kumuŋíən lɛ́ áboyásɛnɛn nɔgɛ́ɛ́ nóon nó əə́səə.

¹⁸Náa ɔnɔ́ na pɔ́lɛ́: «Pəŋi tɛn podɛ́njɔ́ɔ́ŋ nsiŋ ə́? Podɛ́njóób lɛ́ nkə kiim kɛ́ mɔɔd aágaáyáág a unuʼ, adɛ́njaŋ kɛ́lɛ́ aa kíəmuúfiləni ə?

¹⁹Kɛ́lɛ lɛ́ nkə kiim kɛ́ mɔɔd aágaáyáág a unuʼ agonɛ, kɛ́dɛ́ɔsɔd a ɔʼtɛ́m wə́ə́ŋ, kíəmuúsuu a kaadɛ ná ánɛaŋɛn a oʼkɔ́g.» A nisəə nɛ́ɛn, Yə́sus yiílóódi lɛ́ yiim ɛ́lɛ lɛ́ pánɛ, yímmú ɛ́dɛɔ́gɔ kɔ yɛ́ ɛ́lɛɛ́ kifuə́.

²⁰Yə́sus ayɛ́ɛ́n na tɔgɛ́ɛ́ yuudi ɔnɔ́: «Taa, nkə kɛ́ kíəgiim kɛ́lon a ɔʼtɛ́m o mɔɔd, kɛ́lɛ́ aa kíəmuúfiləni

²¹lɛ́ a ɔʼtɛ́m ó mɔɔd a kaadɛ aa mafɛgaʼ má mabɛ́ málɛɛ́ əgiim. A wólɛ́ a kaadɛ aa mɔɔd aáfɛga lɛ́ nyɔ́lɛ́ yɛ́ɛlɛ pɛɔg, yííbə, yóon sɔ́g.

²²A wólɛ́ aa mafɛgaʼ móonɛ lɛ́ yɛ́ɛlɛ kɛdaŋ mə́əmuyíimin. Wólɛ́ aa wáamoyɛ́ɛlɛ lɛ́ ányɔ́ŋɛn kɛɛn na yiim, wɛndɛ́ŋ ɔdɛɔ́ŋ. Wólɛ́ aa wáagɛɛlɛ lɛ́ yɛ́ɛn na nɛgány, na pɛnyaʼ, yɛ́ɛlɛ nɛbambɛɛ, ádóga pɔsɔ́g, yábágɛdɛ, yɛ́ɛlanɛ wɔnɔ́ mɔɔd nyɔ́ oʼto wáʼkolɛáŋɛ́ɛ́.

²³Pɛbán pɛ́ pɛbɛ́ pɛ́ɛb piim, a ɔʼtɛ́m ó mɔɔd aa pɛ́lɛɛ́ əgiim pɛ́dɛ́ɛmɛn. Pɛ́lɛ́ aa píəfiləni mɔɔd.»

²⁴Yə́sus aáság kodɛ́ɛmɛn áay agɛɛn a kɛsom kɛ́ nsí kɛ́ Tíil. Yɛɛ́dám ɔ́sɔd kɔ a yoog yimmú. Adɛʼkɛ́ɛ anyɔ́ŋɛn lɛ́ pɔɔd pálɛŋ lɛ́ nyɔ́lɛ́ aándɛ áay, náa, pááság kolɛŋ əgín lɛ́ aándɛ kɔ.

²⁵Kɛ́lɛ lɛ́, ɔʼkɛ́ɛd nyummú, kɛnɔɔŋɛʼ lɛ́ ayɛ́ɛ ntóón ɛ Fənəsíi, a nigúu nɛ́ Silíi ɛyóób nugəm nó Yə́sus. Wɔnɔ́ ná yiígóodi ɛbódómbódóm yə́ə́ŋ ɛ́ mɔɔ́n yɛ́ uŋun wó ɔmbɛ́ óyɛ́ɛ əguyə́bi, əyíím ədə́əŋənən Yə́sus a ambaan, əə́bə́ə́ komoyɔ́sɔ́gɔlɔn ɔnɔ́ sɛ́gɔɔ nyóon ámoŋɛ́ŋɛŋ uŋun wó ɔmbɛ́ wóow wó ólɛɛ́ əguyə́bi mɔɔ́n.

²⁷Yə́sus ayɛ́modɛánɛ ɔnɔ́ na nyɔ́lɛ́: «Ndóo, mmə́! Yaŋ kudi lɛ́ pɔɔ́n pá pálɛɛ́ pɔɔ́n pá mɔɔd pánɛ, pə́yíid. Kɛ́dɛɔ́gɔ kɛŋɛʼ lɛ́ pə́siəd moom mó konɛ mó pɔɔ́n pá pɔɔd agodo na pobo.»

²⁸Náa ɔʼkɛ́ɛd əə́muyúúlisini ɔnɔ́: «Ɛɛ́ɛ Sə́dúk, kɛ́lɛ náan fɔ́lɔ́b. Náa adɛ́ pubum pó pólɛɛ́ əgudə́əŋən kɛnɛŋ kɛ́ pɔɔ́n pá pɔɔd pálɛɛ́ agonɛ́ɛnɛ, ándɛ pɔɔ́n pá pobo páabáda agonɛ ə́?»

²⁹Yə́sus yiísə́ə́ ɔnɔ́ na nyɔ́lɛ́: «Ɛɛ́ɛ maamá, əgín a nkə kɛ́ɛg kɛ́ umínjuúlísíni, úúli a noádɛʼ noáŋ, uŋun wó ɔmbɛ́ wó óyɛ́ɛ əguyə́bi wɔɔ́mɔ́ɔ́n wə́ʼkumuudi.»

³⁰Náan aa ɔʼkɛ́ɛd nyóon əyúúli a noádɛʼ nuə́ŋ, yɛɛ́bóan mɔɔ́n ongɛɛ́mmɛ́ŋɛ́náán a mɔdɛ́gɛ́n, alɛ yəə́b, uŋun wó ɔmbɛ́ wə́ʼkumuudi.

³¹A ngim yɛ́ɛy, Yə́sus yɛɛ́dɛ́ɛ́mɛn a nigúu nɛ́ɛn, ndúmiʼ na pálɛ́ɛg ɛ Tíil, əmúúlíni a ɛbá ɛ́ noom nó Kalilə́ə. Yɛɛ́sán yɛ́ a pálɛ́ɛg ɛ Sɛdɔ́ɔŋ, agosom yɛ́ a nigúu nɛ́ pálɛ́ɛg yówád.

³²Pə́yímuyíímin kɔ na mɔɔd nyummú nyɔ́ ayɛ́ɛ na pɛlɔ́g, nyɔ́lɛ́ mummug. Náa pɔ́nɔ́ na nyɔ́lɛ́: «Sɛ́gɔɔ, áábɛ́gɛn mɔɔd nyóonɛ ombɔg a oʼto.»

³³Yə́sus aáság kəə́súid na mɔɔd a ɛbá, laálá na kiʼtúú kɛ́ kɛ́yɛ́ɛ kɔ, ɔɔ́dɔ́ɔg mɔnɔɔ́nɔ́ muə́ŋ a ntóɛŋ ɛ mɔɔd nyóon, ɔɔ́fɛɔngɛ́lɛd, əmə́dúú pɛda a ɛnoónó, ɔɔ́dɔ́bɛd nɔmɛm nó mɔɔd na yɛ́lɛ́.

³⁴Ná ayɛ́ɛ aáʼkɛɛlɛ náan, yɛɛ́bágɛ əngis a mɔɛn, əmíísímid. Náa ɔnɔ́ na mɔɔd: «Ɛ́fáʼta[24]!» Áay lɛ́: «Áyásɛ́nɛ́ɛ́!»

³⁵Əgín kɔ áay kum a nsí, ntóɛŋ ɛ mɔɔd nyóon yaáság kaáyásɛn, nɔmɛm nuə́ŋ númóyóndíníí, ɔɔ́ndɔsɔyɔ kɔŋɛʼ.

³⁶Pááság kimbuúlini ná kiʼtúú kɛ́ pɔɔd kɛ́lɛɛ́, Yə́sus aáság kusəə ɔnɔ́ na pɔ́lɛ́: «Nkə kɛ́ɛnɛ kɛ́ kɛ́másánɛ́ɛ́, podɛʼtɛánɛ na mɔɔd!» Náa, kɛnɛŋ kiim kɛ́ nyɔ́lɛ́ ayɛ́ɛ amaʼkobodɛ́anɛ náan, páyɛ́ɛ pádɛmoyóóbɛn, páyɛ́ɛ agá əgiiʼkini kaágɔ́nɛgɛ na toɛn əgiim pálɔɛgɛ nkə kɛ́ amɛ́ɛ́lɛ.

³⁷Pɔɔd piim páyɛ́ɛ əgəə́wúunəni kɛ́fɔlɛ́, pɔ́ɔsɔyɔ pɔ́nɔ́: «Nkə kiim kɛ́ nyóon alɛɛ́ agɛɛlɛ, kɛ́lɛ kɛŋɛʼ. Alɛ agɛɛlɛ lɛ́ pɔlɔ́ndɔ́g póóbanan, pəmummug pɔ́ɔsɔyɔ!»